Timohti gaw Lustra mare kaw nga ai nawku hpung na ramma hpunau langai re. Shi a kawa gaw Greek masha rai nna, shi kanu gaw Yuda masha re. Kanu Uni hte kawoi dwi Lui gaw Timohti hpe grai kaji ai aten kaw nna Yehowa a lam sharin ya wa ai.

Pawlu gaw Lustra mare de lahkawng lang ngu na sasana sa kawan ai shaloi, Timohti hpe sadi hkrup ai. Timohti gaw hpunau nauna ni hpe grai tsawra nna, shanhte hpe sharawng awng let karum ya mayu ai. Pawlu gaw Timohti hpe shi hte arau bu hkawm na matu saw shaga ai. Timohti gaw Pawlu kaw na shaman shakyang ai lam hkam la ngut ai hpang, grai kaja ai hkaw tsun masha hte kabu gara shiga sharin chye ai wa byin wa ai.

Chyoi pra ai wenyi gaw Pawlu yan Timohti hpe gara shara de sa ra na hpe lam matsun ya ai. Lana mi hta, Pawlu a shingran kaw masha langai gaw Makedoni mung de sa nna, shanhte hpe karum ya na matu hpyi shawn ai. Dai majaw, Pawlu, Timohti, Sila hte Luka gaw dai shara de sa nna hkaw tsun ai. Nawku hpung ni mung hpawng de ya wa ai.

Makedoni mung, Htesaloni mare kaw na masha law law gaw Hkristan ni byin wa ai. Raitim, Yuda masha nkau mi gaw Pawlu hte shi manang ni hpe manawn wa ma ai. Dai majaw, shanhte gaw masha ni hpe jahpawng la nna, hpunau ni hpe mare agyi hpang de shaga sa mat ai. Shanhte ndai hku marawn tsun ma ai: ‘Ndai masha ni gaw Roma asuya a hpyen ni re!’ Pawlu yan Timohti gaw asak shoihpa nga ai majaw, dai shana jang Beria mare de hprawng mat ai.

Beria mare masha ni gaw kabu gara shiga hpe grai myit lawm nna chye mayu ma ai. Dai kaw nga ai Greek hte Yuda masha ni gaw Hkristan byin wa ai. Raitim, Htesaloni kaw na Yuda masha nkau mi du wa nna, manghkang sa tam ai majaw, Pawlu gaw Ahten mare de sa mat ai. Timohti yan Sila gaw Beria kaw sha matut naw nga nna, hpunau ni hpe shangang shakang ya ai. Hpang hta, Htesaloni kaw zingri hkrum nga ai hpunau ni hpe karum ya na matu, Pawlu gaw Timohti hpe shangun dat ai. Dai hpang, Pawlu gaw Timohti hpe kaga  nawku hpung law law de sa nna, n-gun jaw na matu mung matsun dat ai.

Pawlu gaw Timohti hpe ndai hku tsun ai: ‘Yehowa a magam gun mayu ai wa gaw, zingri zingrat hkrum na re.’ Timohti gaw shi a makam masham a majaw, zingri zingrat hkrum nna htawng jahkrat hkrum ai. Yehowa hpe sadi dung ai lam sakse lu madun ai majaw shi grai kabu ai.

Pawlu gaw Hpilipi mare masha ni hpe ndai hku tsun ai: ‘Timohti hpe nanhte hpang de ngai shangun dat na. Shi gaw tengman ai lam hta hkawm sa ai ngu ai gaw hpa lachyum re ai hpe sharin achyin ya na re. Hkaw tsun bungli a matu mung shaman shakyang ya na re.’ Pawlu gaw Timohti hpe kam mai ai lam chye ai. Shan gaw shaning law law magam gun manang zawn arau bungli galaw wa ai.