EDIN sun shinggan e, Adam yan Ewa jam jau amyu shagu hkrum ma ai.Lusha a matu ruyak ai hte amu galaw ra sai. Shanhte a makau grup yin e, tsawm la ai namsi hpun ni a malai, ju hpun ni law law tu nga ai hpe shan mu ma ai. Adam yan Ewa gaw Karai Kasang ga n madat nna, shi hte jinghku nlu hku ai majaw, ndai zawn byin ai re.

Grau n kaja ai gaw, Adam yan Ewa si na matu hpang wa sai.Naw matsing ai kun? Hpun langai mi na namsi hpe sha jang si na re, nga nna Karai Kasang shan hpe sadi jaw tawn ai. Sha ai shani e nan si na matu hpang wa sai. Karai Kasang a ga hpe n madat ai gaw, grai angawk ai lam re.

Adam hte Ewa a kashu kasha ni yawng gaw, shanhte a kanu kawa hpe Edin sun kaw na Karai Kasang shapraw kau ai hpang e, shangai ma ai. Dai re nna kashu kasha ni mung, gumgai dingla wa nna, si ra sai.

Adam yan Ewa gaw Yehowa a ga hpe madat mara yang sha shan a prat hte, kashu kasha ni a prat, ngwi pyaw nga na re. Ginding aga ntsa e, ngwi ngawn ai hte, prat dingsa nga lu na ma ai. Kadai mung, machyi makaw ai, gumgai dingla ai, si hkrung si htan n hkrum na re.

Shinggyim masha ni ngwi pyaw ai hte, prat tup asak hkrung nga na hpe, Karai Kasang ra sharawng ai. Lani mi na nhtoi hta nga lu na hpe shi ga sadi jaw tawn ai. Ginding aga ma hkra hta tsawm htap nga na sha n-ga, masha yawng hkam kaja na re. Ginding aga a ntsa e, langai hte langai hku hkau nna Karai Kasang hte mung jinghku hku ai hkrai rai na re.

Raitimung Ewa gaw Karai Kasang a jinghku langai mi nrai sai. Dai majaw Kasha shangai ai shaloi, shi a matu nloi sai. Shi n ji n mu machyi ai. Yehowa a ga hpe n madat ai majaw, yawn hkyen ai lam amyu shagu shi hta hkrum sai. Teng ai nrai ni?

Adam yan Ewa gaw shayi shadang sha law law shaprat ma ai. Shan a kasha alat shangai wa ai shaloi, shi hpe ka-in nga nna, amying shamying ai. Lahkawng ngu na la kasha hpe, Abela nga nna, shamying ma ai. Shan nau hpa baw byin ai kun? Nang chye a ni?