NDAI sumla kaw na la ni gaw, masha ni hpe adip arip rai nna amu galaw shangun ma ai. Bungli galaw ai masha langai mi hpe lasik hte gayat nga ai wa hpe yu yu mu! Bungli galaw nga ai masha ni gaw, Yaku a dinghku masha ni rai nna Israela masha ni nga ma ai. Adip arip rai nna amu galaw shangun ai masha ni gaw Egutu masha ni rai ma ai. Israela masha ni gaw Egutu masha ni a mayam tai wa ma ai. Gara hku nna byin ma ai kun?

Yaku a kun dinghku masha ni ngwi pyaw ai hte, Egutu mung hta shaning law law nga lai wa ma ai. Hpara-u hta lai nna Egutu mung hta kaba htum ai wa Yosep gaw, shanhte hpe yu lajang wa ai. Raitimung hpang e Yosep si mat sai. Dai hpang e Israela masha ni hpe nra ai Hpara-u hkawhkam nnan langai mi, Egutu mung hta hkaw hkam tai wa ai.

Dai majaw ndai nhkru ai Hpara-u gaw Israela masha ni hpe mayam shatai kau ai. Gumshem ai hte matsan nchye dum ai hpareng ni hpe, Israela masha ni hpe up hkang shangun ai. Hpara-u a matu mare ni gawgap na matu israela masha ni hpe adip arip nna amu galaw shangun ai. Raitimung Israela masha ni gaw, matut nna law htam wa ma ai. Kade nna yang Israela masha ni, law htam wa ai hte, n-gun rawng wa na hpe Egutu masha ni gaw hkrit tsang wa ma ai.

Dai rai nna Hpara-u gaw hpa galaw ai hpe chye ai kun? Kasha shangai ai Israela ma kanu ni ma chyangai shangai ai shaloi, karum ai num ni hpe, shaga nna: ‘Shangai wa ai la kasha shagu hpe, sat kau mu,’ nga ai. Raitimung shanhte gaw kaja ai num ni rai ma ai majaw, ma chyangai ni hpe, n sat kau ma ai.

Dai rai nna Hpara-u gaw shi a masha yawng hpe hkang da ai gaw, Israela ma chyangai la kasha yawng hpe sat kau mu; anum kasha ni hpe sahlawt da mu,’ nga ai. Hkrit hpa re ai ahkang n re a ni? La kasha langai mi gara hku asak lawt wa ai hpe yu yu ga.