NDAI ram ma masum a lam na yu ga ai hpe naw matsing a ni? Teng ai. Shanhte a matu nkaja ai lu sha hpe n sha hkra nga ai Daniela a manang masum rai ma ai . Shanhte hpe Babelon masha ni gaw, Shadrak, Meshak, Abed-nego nga nna shamying ma ai. Ya shanhte hpe yu dat mu. Kaga masha ni hte maren sumla kaba hpe hpa majaw n nawku ma ni? Yu yu ga.

Yehowa a lata hte ka tawn ai jep ai tara kanu shi hpe naw matsing a ni? Shawng nnan na tara hta: ‘Ngai hta kaga karai kasang shaje hpe hkum naw mu,’ nga nna tsun ai. Ya ndai ram ma masum gaw dai tara hpe hkan shatup nga ma ai. Dai hpe hkan shatup ai gaw nloi nga ai.

Babelon hkawhkam Nebuhkadneza gaw shi shadun tawn ai ndai sumla hpe nawku na matu munggyi salang yawng hpe shaga dat ai. ‘Pahtau, Tingse hte kaga dum ai baw amyu myu, ngoi ai nsen na jang, nanhte ndai ja sumla kaba hpe gum dagup nawku lu na. N nawku ai masha kadai hpe mung kalang lata grung nga ai wan htung hta jahkrat bang kau ai hkrum na ma ai,’nga nna ya sha hkawhkam wa hkang da ai.

Shadrak, Meshak, Abed-nego ni gaw n nawku ma ai, lam hpe Nebuhkadneza na ai shaloi, grai sindawng kahtet pawt bu nga ai. Shanhte hpe shaga la nna gum dagup nawku na matu kalang bai ahkaw ahkang jaw dat ai. Raitimung ndai ram ma ni gaw Yehowa hpe kam hpa ma ai. ‘Anhte nawku ai Karai gaw, anhte hpe hkye la lu ai. Anhte hpe nhkye la timung na a ja sumla kaba hpe n nawku lu ai,’ nga nna Nebuhkadneza hpe tsun ma ai.

Dai lam hpe Nebuhkadneza na jang grau nna matsin pawt wa ai. Wan htung gaw makau kaw sha nga nga ai: ‘Dai majaw wan htung hpe shawng na hta htam sanit kahtet hkra galaw mu,’ nga nna hkang dat ai. Bai nna hpyen hpung hta n-gun ja dik ai masha ni hpe shaga la nna, Shadrak, Meshak, Abed-nego ni hpe gyit nhtawm, wan htung hta kabai bang shangun ai. Wan htung gaw na chying kahtet ai majaw, shanhte hpe jahkrat bang ai masha ni pyi, wan shinglet a majaw hkru si mat ma ai. Shanhte jahkrat bang dat ai ram ma masum chyawm gaw, kaning rai nga nga ma ai kun?

Hkawhkam wa gaw wan htung kaw e sa mada yu yang grai hkrit kajawng mat ai. ‘Masha masum hpe gyit hkang nna grung ai wan htung hta kabai bang dat ai nrai ni?’nga nna san ai.

‘Re law hkawhkam wa e,’nga nna shi a mayam ni bai htan ma ai.

‘Raitimung wan kata e masha mali hkawm nga ma ai hpe ngai mu nngai. Shanhte hpe sumri mung n-gyit da ai. Shanhte hpe wan mung nhkru ai. Mali ngu na wa gaw karai langai mi zawn san ai,’ nga nna hkawhkam wa tsun ai. Hkawhkam wa gaw wan htung mahka de sa nhtawm, ‘tsaw htum ai Karai Kasang a shangun ma Shadrak, Meshak, Abed-nego ni e, pru wa marit,’ nga nna jahtau tsun ai.

Shanhte pru wa ma ai shaloi wan nhkru ai lam yawng hka mu ma ai. Dai rai nna hkawhkam wa gaw: ‘Shadrak, Meshak, Abed-nego ni a Karai Kasang hpe shakawn mu. Shanhte a Karai Kasang hta lai nna karai shaje hpe n nawku ma ai majaw, shanhte a Karai Kasang gaw shi a lamu kasa hpe shangun dat nna shanhte hpe hkye la nu ai,’ nga nna tsun ai.

Yehowa a ntsa hta sadi dung na hta ndai gaw, anhte a matu kaja ai kasi ningli nre a ni?