HKRIT hpa re ai lam langai mi byin wa ai. Hka lup sara Yawhan hpe ya sha sat kau ma ai. Hkawhkam jan Herodia gaw hka lup sara Yawhan hpe n ra ai. Dai majaw Yawhan a baw hpe hkawhkam wa daw kau hkra shi galaw dat ai.

Ndai lam hpe Yesu na ai shaloi, grai yawn kau ai. Machyi shim ai shara de langai hkrai pru mat wa ai. Raitimung masha ni gaw shi a hpang hkan ma ai. Masha wunawng hpung ni hpe Yesu mu jang shanhte hpe matsan dum ai. Dai majaw Karai Kasang mungdan a lam hpe tsun dan ai. Bai nna machyi ai masha ni hpe shamai ya ai.

Dai shana de shi a sape ni gaw shi kaw sa nna: ‘Shana de rai sai; Bai nna ndai shara gaw nam mali rai nga ai. Ndai masha ni kahtawng e lusha sa mari la mu ga. Shanhte hpe shabawn dat u,’ nga nna tsun ma ai.

Yesu gaw, ‘shanhte nsa ra ai. Shanhte sha na matu nanhte jaw mu,’ nga nna tsun ai. Hpilip hpang de kayin yu nna: ndai shawa masha hpe jaw sha na matu lusha kanang na mari na kun?’ nga nna san ai.

‘Masha hkum shagu n-gup mi ren sha na matu mari yang pyi gumhpraw law law hkrat na re,’ nga nna Hpilip htan ai. Andre gaw, ‘Anhte hpe lusha gun ya ai ndai shabrang ma kaw e, muk tawng manga hte nga lahkawng nga ai. Raitimung ndai daram law ai masha ni sha na matu, ndang law ai,’ nga nna tsun ai.

‘Masha ni hpe tsingdu pa ntsa e dung shangun mu,’ nga nna Yesu tsun ai. Dai hpang e lusha a matu Karai Kasang a chyeju hpe shakawn nna, muk tawng hte nga hpe ahkyep alep di dat ai. Bai nna sape ni gaw muk hte nga la nna masha yawng hpe gran jaw ma ai. Dai shara hta ala ni 5,000 nga nga ma ai. Anum ni hte ma kaji ni hking lam hku nna naw nga ma ai. Shanhte yawng sha nna hkru kat lu ma ai. Sape ni gaw ngam ai muk ahkyep alep ni hpe lahkawn la yang, mung 12 hpring tup naw lu la ma ai.

Dai hpang e Yesu gaw shi a sape ni hpe li ntsa e lung jawn shangun nna Galile nawng wora hkran de rap sa shangun ai. Shana ahkying du jang nbung laru kaba ru wa ai. Hka leng hta wa nna ali gaw n hkyeng n hkang rai wa jang sape ni grai hkrit ma ai. Yup tung hpawa hta masha langai mi gaw hka ntsa hku lam hkawm nna shanhte hpang de sa wa nga ai hpe bai mu ma ai. Hkrit kajawng ai hte jahtau dat ma ai. Shanhte mu ai gaw hpa re ai hpe nchye ma ai majaw re.

‘Hkum hkrit mu, ngai she rai nngai,’ nga nna Yesu tsun dat yang pyi shanhte garai n kam ma ai. Dai majaw Petru gaw: ‘Madu e nang rai teng yang gaw hka ntsa hku lam hkawm nna madu kaw sa du lu na matu ngai hpe shaga rit,’ nga nna tsun yang Yesu gaw sa wa rit, nga nna tsun ai. Petru gaw ali kaw na pru nhtawm hka ntsa hku lam hkawm sa ai. Dai hpang Petru gaw hkrit ai myit rawng wa nna hka hta lup mat ai. Raitimung Yesu gaw shi hpe hkye la ai.

Dai hpang kalang Yesu gaw masha hking lam hpe lusha daw jaw ai. Ndai lang gaw muk tawng sanit hte nga kachyi mi hte sha lu sha daw jaw ai. Masha yawng hkru kat hkra bai sha lu ma ai. Masha ni hpe Yesu lusha daw jaw nna makawp maga ai lam gaw mauhpa nrai ni? Yesu gaw Karai Kasang a hkawhkam hku nna up hkang ai shaloi, anhte gaw lam shagu hta ntsang ra na sai.