YU DAT mu. Myit kahpra na zawn re ai lam byin nga ai. Yesu sat kau ai hkrum nga sai. Yesu hpe hpun shadaw hta jen tawn ma ai. Shi a lagaw hte lata kaw e ahpri hte dawk shakap tawn ma ai. Yesu hpe kadai ni sat kau ma ni? Yesu hpe kadai ni hpa majaw ndai zawn sat kau a ni?

Yesu hpe masha nkau mi nju ndawng ma ai majaw re. Kadai ni re ai hpe chye a ni? Langai mi gaw nhkru ai lamu kasa Satan nat re. Adam hte Ewa Yehowa a ga nmadat hkra galaw ai wa Satan nat re. Yesu a hpyen ni gaw Yesu hpe ndai zawn hkrit hpa hte sat kau hkra galaw ai wa mung Satan nat re.

Yesu shadaw hta rai ndawk ai shawng kaw nna pyi, hpyen ni gaw Yesu hpe nni nkri rai zingri ma ai. Getsemane sun kaw e sa nna Yesu hpe gara hku sa rimla ma ai lam hpe myit dum a ni? Dai hpyen ni gaw kadai ni rai ma ni? Teng ai. Makam masham ningbaw ni rai ma ai. Dai hpang e hpa byin ai hpe yu yu ga.

Yesu hpe makam masham ningbaw ni rim ai shaloi Yesu a sape ni hprawng mat ma ai. Shanhte hkrit ai majaw Yesu hpe langai hkrai hpyen ni a lata hta, kau da nna hprawng mat ma ai. Raitimung Petru hte Yawhan gaw tsan tsan de nhprawng ma ai. Yesu hta hpa byin wa na lam, hpang kaw nna hkan yu ma ai.

Hkinjawng ni gaw Yesu hpe hkinjawng agyi galaw ga ai Anna ngu ai, dingla wa hpang de shaga sa wa ai. Masha wunawng hpung ni gaw dai shara hta na na nhkring ma ai. Dai hpang e Yesu hpe hkinjawng agyi galaw nga ai Kayapa a nta de shaga sa wa ma ai. Dai nta hta makam masham ningbaw ni law law hpawng de nga ma ai.

Kayapa nta kaw du jang amu hpaw nna jep ma ai. Yesu a lam hte seng nna masu ai sakse hkam na masha ni hpe shaga tawn ma ai. Makam masham ningbaw ni mahkra gaw: ‘Yesu hpe sat kau ging ai,’ nga nna jeyang ma ai. Bai nna Yesu a myi man hta mayen mahtaw bun ma ai hte lata hte htwi ma ai.

Shing di nna Yesu hpe zingri nga ma ai shaloi, Petru gaw shinggan wang kata e nga nga ai. Kashung ai shana re ai majaw masha ni gaw wan kra nga ma ai. Ya na zawn wan kra nga ma yang nchyang num langai mi gaw Petru hpe yu nna: ‘ndai wa mung Yesu hte rau nga ai wa re,’ nga nna tsun dat ai.

Petru gaw, ‘n re ai. Ngai nrai nngai,’ nga nna htan dat ai.

Yesu hte nga ai wa re, nga nna masum lang masha ni Petru hpe tsun ma ai. Raitimung shagu lang nteng ai nga nna nyet kau ai. Petru masum lang ngu na nyet kau ai shaloi, Yesu gaw Petru hpang de kayin yu dat ai. Dai zawn nyet kau ai majaw grai yawn kau ai. Shing rai shinggan de pru sa nhtawm hkrap ai.

Bat hpang manga ya jahpawt jan pru wa ai aten hta, hkinjawng ni gaw shanhte a zuphpawng shara kaba Sanhe-drin htingnu de Yesu hpe shaga sa wa ma ai. Dai shara hta Yesu hpe kaning di na lam bawng hkat ma ai. Dai hpang e Yuda ginwang up ai Pilat hkawhkam hpang de shaga sa wa ma ai.

‘Ndai wa gaw nshawp ai masha langai mi re; shi hpe sat kau ra ai,’ nga nna hkinjawng ni gaw Pilat hkawhkam hpe tsun ma ai. Pilat gaw Yesu hpe ga san ni san nna, shi hta hpa mara mung ngai amu nngai,’ nga nna tsun ai. Dai hpang e Pilat gaw Yesu hpe Herod Antipa hpang de sa dat ai. Herod gaw Galile ginwang na hkawhkam langai mi re. Raitimung shi gaw Yerusalem mare kaw e dung nga ai. Herod mung Yesu hta hpa mara mung nmu ai. Dai rai nna Pilat hpang de bai sa dat ai.

Pilat gaw Yesu hpe dat dat mayu ai. Raitimung Yesu a hpyen ni gaw Yesu hpe dat kau na malai bawng masha langai mi hpe dat kau shangun mayu ai. Dai wa gaw Baraba ngu ai damya wa re. Pilat gaw Yesu hpe shinggan de shapraw ya ai ahkying gaw shani chyingtung daram rai sai. Pilat gaw masha ni hpe tsun ai: ‘Nanhte a hkawhkam wa hpe yu yu mu,’ nga ai. Raitimung hkinjawng agyi kaba ni gaw: ‘shi hpe la kau mu, shi hpe sat kau mu, sat kau mu,’ nga nna jahtau tsun ma ai. Dai rai nna Pilat gaw Baraba hpe dat kau nna Yesu hpe mahtang sat kau na matu shaga sa wa shangun ai.

Bat hpang manga ya shani chyingtung lai aten e, Yesu hpe hpun shadaw hta dawk shakap kau ma ai. Anhte sumla kaw e nmu lu timung Yesu a apai ahkra kaw damya langai hpra shadaw hta dawk shakap tawn ai. Yesu si wa na mahka e damya langai mi gaw, ‘Madu e, na a mungdan hta du wa jang ngai hpe mung myit dum la rit law,’ nga nna Yesu hpe tsun ai. ‘Nang gaw ngai hte rau Hparadisu hta nga lu na; ngai ga sadi jaw ai,’ nga nna bai htan ai.

Grai kabu hpa ga sadi nrai a ni? Kaning re ai Hparadisu a lam Yesu tsun nga ai hpe chye a ni? Shawng ningnan Karai Kasang galaw ai Hparadisu gaw kanang e nga a ni? Re teng ai. Ga ntsa e nga ai. Sumsing lamu hta Yesu uphkang ai shaloi dai damya wa hpe asak bai hkrung wa hkra galaw ya na ra ai. Damya wa gaw ginding aga Hparadisu nnan hta ngwi pyaw ai hte nga lu na re. Dai lam a majaw anhte kabu shara nre a ni?