Adam yan Ewa gaw, Karai Kasang a ga n madat ai majaw, anhte yubak kap mat nna, yakhkak hkrum ai, si ra ai. a Raitim, anhte hta myit mada lam nga ai. Yehowa gaw, Kasha Yesu Hkristu hku nna, anhte si hkrung si htan hte yubak mara kaw na lawt na matu lajang ya wa ai. Yesu gaw, si hkam ai hku nna gawng malai jahpu hpe lajang ya ai ngu Chyum Laika hta tsun da ai. Gawng malai jahpu ngu ai gaw, marai langai ngai lawt na matu jaw ra ai manu jahpu hpe tsun ai re. Yesu gaw, hkum tsup ai shinggyim asak aprat hpe manu jahpu hku nna jaw wa ai. (Mahte 20:28 hpe hti u.) Yesu gaw, mungkan ga hta htani htana asak hkrung na ahkang nga ai. Raitim, dai hpe sharawng awng let jaw kau ai majaw, Adam yan Ewa sum mat ai lam yawng hpe anhte bai lu la na matu lam hpaw wa ai. Yesu gaw, Yehowa anhte hpe kade daram tsawra ai, shi mung anhte hpe kade daram tsawra ai lam hpe madun dan wa ai. Ndai daw gaw, Yesu si hkam wa ai lam hpe grau nna chyeju dum lu hkra karum ya lu na re.

1. Yesu si hkam ai lam kaw na dai ni aten anhte gara hku akyu lu la nga ai kun?

Anhte gaw, yubak masha ni re ai majaw, Yehowa n ra sharawng ai lam law law hpe galaw ai. Raitim, anhte a mara a matu gaja wa myit malai lu nna mara raw ya na matu, Yehowa kaw Yesu Hkristu hku nna hpyi nem na, dai mara ni hpe kahtap nna n galaw hkrup na matu, dang lu ai daram shakut na nga yang, Karai Kasang hte hku hkau nihtep lu na re. (1 Yawhan 2:1) Chyum Laika hta ndai hku tsun da ai: “Hkristu mung yubak a majaw kalang sha mi si hkam nu ai; Karai Kasang hpang de anhte hpe woi wa lu hkra, ding hpring ai wa gaw, n ding n hpring ai ni a matu mara si hkam ai.”​—1 Petru 3:18.

2. Htawm hpang hta, Yesu a si hkam ai lam kaw na anhte gara hku akyu lu la na kun?

Yehowa gaw, Yesu a hkum tsup ai shinggyim asak aprat hpe jaw na matu, mungkan ga de shangun dat ai. Dai majaw, “Kasha [Yesu] hpe kam sham ai ni nlang hte gaw, hten bya n hkrum ai sha, htani htana asak lu la” wa ai. (Yawhan 3:16) Adam n madat mara ai majaw, byin wa ai n kaja ai lam yawng hpe Yesu a chyeju hte Yehowa gaw kade n na yang, yeng seng kau ya na re. Dai majaw, Yesu a gawng malai jahpu hpe kamsham ai lam madun ai nga yang, mungkan ga Hparadisu hta htani htana ngwi pyaw let asak hkrung lu ai ahkang lu la na re.​—Esaia 65:​21-23.

 Kahtap Hkaja

3. Yesu si hkam ai majaw yubak mara hte si hkrung si htan kaw na lawt lu

1. Hkum tsup ai masha Adam gaw, Karai Kasang a ga n madat wa ai majaw, shinggyim masha ni yubak hte si hkrung si htan hkrum

2. Yesu gaw, hkum tsup ai masha rai nna, Karai Kasang a ga madat ai majaw, shinggyim masha ni hpe hkum tsup ai prat hte htani htana asak hkrung lu ai ahkang lu shangun

4. Yesu a si hkam ai lam gaw masha yawng hpe akyu lu shangun

 5. Gawng malai jahpu gaw nang hpe Yehowa jaw ai kumhpa

Yehowa a jinghku ni gaw, gawng malai jahpu hpe tinang hpe jaw ai kumhpa hku nna mu mada ai. Ga shadawn, Galati 2:20 hpe hti nna, ndai ga san hpe bawngban u:

• Kasa Pawlu gaw, gawng malai jahpu hpe tinang hpe jaw ai kumhpa hku nna mu mada ai lam gara hku madun wa ai kun?

Adam mara galaw ai majaw, shi hte shi a aru arat ni yawng gaw, si hkrung si htan hte hkrum ra mat ai. Raitim, Yehowa gaw, kasha hpe si hkam na matu shangun dat ai majaw, htani htana asak hkrung lu ai ahkang anhte lu la mat ai.

Lawu na Chyum daw ni hpe hti ai shaloi, kasha nni nkri hkamsha nga ai laman, Yehowa gara hku hkamsha ai hpe shingran yu u. Yawhan 19:​1-7, 16-18 hpe hti nna, ndai ga san hpe bawngban u:

• Na a matu Yehowa hte Yesu galaw ya wa ai lam ni hte seng nna gara hku hkamsha ai kun?

 Kadun Dawk

Yesu si hkam ai majaw, Yehowa gaw, anhte a mara hpe raw ya lu nna, htani htana asak hkrung lu ai ahkang lu la ai.

Bai Maram

• Yesu hpa majaw si hkam ai kun?

• Yesu a hkum tsup ai shinggyim asak aprat gaw, gara lam hku nna maren mara re ai gawng malai jahpu rai kun?

• Yesu a si hkam ai lam gaw, nang hpe gara hku akyu lu shangun ai kun?