DAW 38
Asak Kumhpa Hpe Manu Shadan U
Prat gaw grai kaja ai mahkrum madup ni hte hpring nga ai. Anhte hta manghkang ni nga tim, prat hta naw ngwi pyaw lu ai. Asak kumhpa hpe chyeju dum ai lam gara hku madun lu na kun? Dai hku galaw na matu ahkyak htum lam gaw hpa rai kun?
1. Asak a matu hpa majaw chyeju dum ging ai kun?
Asak kumhpa gaw tsawra myit nga ai Kawa Yehowa kaw na re ai majaw, chyeju dum ging ai. Shi gaw, “asak yawng a hka hpawk” rai nna, asak yawng hpe hpan da ai. (Shakawn 36:9, JCLB) “Shi nan, yawng mayawng hpe hkrung ai asak, nsoi nsa hte arai hkum sumhpa jaw ya ai wa rai nga ai.” (Kasa 17:25, 28) Anhte asak hkrung na matu ra ai lam yawng hpe, Yehowa lajang da ya ai. Grau nna gaw, prat hta ngwi pyaw lam hpe hkamsha lu na matu ra ai lam hpe lajang da ya ai.—Kasa 14:17 hpe hti u.
2. Asak kumhpa a matu chyeju dum ai lam Yehowa hpe gara hku madun mai na kun?
Kanu a hkritung kaw nna, Yehowa nang hpe lanu lahku nga ai. Karai Kasang shatsam ya ai majaw, Dawi gaw Karai hpe ndai hku tsun wa ai: “Nye a hkum hkrang garai n kumla yang, Na a myi ngai hpe mu nga ai.” (Shakawn 139:16) Na a asak hpe Yehowa grai manu shadan ai. (Mahte 10:29-31 hpe hti u.) Marai langai gaw tinang a asak hpe dawm kau na ngu myit ai shaloi hta pyi, shi grai yawn ai. a (Pru Mat 20:13) Asak shoihpa nga ai masa ni hpe dingsang galaw ai, kaga ni a asak shoihpa nga na masa ni hpe n makawp maga ya ai nga yang mung, Yehowa yawn ai. Tinang a asak hte, kaga ni a asak hpe manu shadan yang, asak kumhpa a matu chyeju dum ai lam madun nga ai re.
Kahtap Hkaja
Asak kumhpa a matu chyeju dum mai ai lam nkau mi hpe hkaja yu ga.
3. Hkamja lam sadi u
Apnawng da ai Hkristan ni gaw Yehowa hpe nawku na matu, prat ting hpe akyu jashawn ai. Shanhte gaw, shanhte a hkum hkrang hpe shagu hkungga hku nna Karai Kasang hpe sak jaw ai. Roma 12:1, 2 hpe hti nna, ndai ga san ni hpe bawngban u:
-
Hkamja lam hpe lanu lahku na matu nang hpe hpa gaw shadut ya ging ai kun?
-
Dai hku galaw lu ai lam nkau mi gaw hpa rai kun?
4. Hkala nba (sh) asak n sum na matu tau hkrau makawp maga u
Shoihpa nga ai akyang lailen ni hpe koi na matu Chyum Laika hta tsun da ai. Shim lum hkra galaw mai ai lam nkau mi hpe chye na matu VIDEO hpe hpaw.
Ga Shagawp 22:3 hpe hti u. Dai hpang, lawu na masa ni hta nang hte kaga ni a shimlum lam nga na matu, gara hku galaw mai ai hpe bawngban u:
-
Nta hta
-
Bungli hta
-
Ginsup ai lam hta
-
Sengke, mawdaw gau ai shaloi (sh) marai langai ngai hpe htaw ai shaloi hta
5. Garai n shangai shi ai ma a asak hpe manu shadan u
N shangai shi ai ma a asak hte dai asak galu kaba wa ai lam hpe Yehowa myit lawm ai lam Dawi gaw ga shagawp hte tsun dan wa ai. Shakawn 139:13-17 hpe hti nna, ndai ga san hpe bawngban u:
-
Yehowa a ningmu hta marai langai a asak gaw, shangai ai aten kaw na hpang ai kun? Shing nrai, hkritung kaw na hpang ai kun?
Moi Israela ni hpe jaw ai Yehowa a tara hta, kanu ni hte n shangai shi ai ma ni hpe makawp maga ya ai lam ni lawm ai. Pru Mat 21:22, 23 hpe hti nna, ndai ga san ni hpe bawngban u:
-
N shangai shi ai ma a asak hpe n myit mada ai sha sum kau shangun ai marai langai hpe Yehowa gara hku mu mada ai kun?
-
Dai hpe dingsang galaw ai marai langai hpe shi gara hku mu mada ai kun? b
-
Karai Kasang a mu mada ai lam hte seng nna nang gara hku hkamsha ai kun?
Asak hpe manu shadan ai num langai pyi, ma shabrai ai hta lai nna kaga lata na lam n nga sai ngu hkamsha chye ai. Esaia 41:10 hpe hti nna, ndai ga san ni hpe bawngban u:
-
Ma shabrai na matu shadut hkrum nga ai num langai gaw kadai kaw karum hpyi ging ai kun? Hpa majaw kun?
Nkau Mi Tsun Ai: “Num langai gaw, ma shabrai na kun? n shabrai na kun? ngu ai hpe dawdan mai ai.”
-
Yehowa gaw kanu hte n shangai shi ai ma a asak hpe manu shadan ai ngu ai hpe, hpa gaw nang hpe kam shangun ai kun?
Kadun Dawk
Yehowa jaw ai asak kumhpa hpe tsawra na matu, manu shadan na matu, makawp maga na matu, Chyum Laika hta tsun da ai. Dai hta tinang a asak hte kaga ni a asak lawm ai.
Bai Maram
-
Shinggyim masha ni a asak gaw Yehowa a matu hpa majaw manu dan ai kun?
-
Marai langai gaw shi a asak hpe sum kau hkra dingsang galaw ai nga yang, Yehowa gara hku hkamsha ai kun?
-
Asak kumhpa a matu nang hpa majaw chyeju dum ai kun?
Sawk Sagawn
Asak kumhpa a matu Yehowa hpe gara hku chyeju dum mai ai kun?
Ma shabrai ga ai num langai hpe Yehowa mara raw ya na kun? ngu ai ga san a mahtai hpe hti yu u.
“Ma Shabrai Ai Hte Seng Nna Chyum Laika Hta Gara Hku Tsun Da Ai Kun?” (Web sumhpa)
Asak hte seng nna Karai a ningmu gaw, anhte ban sa ai lam lata ai hta gara hku akyu shabyin ya ging ai hpe hti yu u.
Tinang hkum tinang sat si mayu ai myit nga wa yang, gara hku kun? Chyum Laika gara hku karum ya lu ai hpe hti yu u.
“Si Mayu Ai—Sat Si Mayu Ai Myit Nga Wa Ai Shaloi Chyum Laika Karum Ya Lu Ai Kun?” (Web sumhpa)
a Myit daw myit hten nga ai ni hpe, Yehowa grai lanu lahku ya ai. (Shakawn 34:18) Dai zawn hkamsha lam a majaw tinang hkum tinang sat si mayu ai ni hpe mung Yehowa chye na ya nna, karum ya mayu ai. Dai zawn myit nga ai wa hpe, shi gara hku karum ya ai hpe chye na matu, ndai daw a Sawk Sagawn ngu ai hta lawm ai “Si Mayu Ai—Sat Si Mayu Ai Myit Nga Wa Ai Shaloi Chyum Laika Karum Ya Lu Ai Kun?” ngu ai sumhpa hpe hti yu u.
b Ma shabrai ga ai ni gaw, mara nga ai ngu ladu lai n hkamsha ra ai. Yehowa shanhte hpe mara raw ya lu ai. Grau nna chye lu na matu, ndai daw a Sawk Sagawn ngu ai hta lawm ai “Ma Shabrai Ai Hte Seng Nna Chyum Laika Hta Gara Hku Tsun Da Ai Kun?” ngu ai sumhpa hpe hti yu u.
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
