Kărai Kăsang a jinghku tai măyu yang, shi a lam hpe shărin la ra ai. Na a jinghku ni na a mying hpe chyē nna dai hpe jai lang a ni? Shanhtē jai lang ma ai. Kărai Kăsang mung nang shi a amying hpe chyē nna jai lang shăngun măyu ai. Kărai Kăsang a amying gaw Yehowa rè. (Shăkawn Kungdawn 83:18; Mahte 6:9) Shi ra ai hte n ra ai hpe mung nang shărin la ra ai. Shi a jinghku ni kădai rè ai, shi a hpyen ni kădai rè ai hpe nang chyē ra ai. Mărai lăngai ngai hpe chyē chyang na mătu aten ra ai. Yehowa a lam hpe shărin la na mătu, aten măzing tawn ai wa gaw hpaji rawng ai wa rè nga, Chyum laika tsun ai.—Ehpesu 5:15, 16.

Kărai Kăsang a jinghku ni gaw, Mădu ra shărawng ai hpe gălaw ai. Na a mănang ni hpe myit yu u. Shanhtē hpe atsawm sha n kănawn ai sha, n ju n dawng ai lam ni hpe gălaw yang, nang hte mătut nna jinghku grin nga na kun? Grin na n rè ai! Dai hte măren, Kărai Kăsang a jinghku tai măyu yang, Mădu ra shărawng ai hku hkan gălaw ra ai.—Yawhan 4:24.

Naw ku htung yawng gaw Kărai Kăsang hte jinghku n hku lu shăngun ai. Kărai Kăsang a hku hkau htum ai jinghku rai nga ai Yēsu gaw, lam lăhkawng a lam tsun ai. Lam lăngai gaw, dam lăda nga ai hte, măsha ni hpring nga ma ai. Dai lam gaw, hten bya ai de hkrang ai. Kăga lam lăngai gaw, gyip gyeng nna, dai hta hkawm sa ai măsha ni n law ma ai. Dai lam gaw, htani htana asak de hkrang ai. Tsun măyu ai gaw, nang Kărai Kăsang a jinghku tai măyu yang, teng ai naw ku lam hpe shărin la ra ai.—Mahte 7:13, 14.