Jinghku gaw tsaw ra ai myit hta ningpawt dē ai. Yehowa a lam grau nna chyē wa măgang, shi hpe nang grau tsaw ra wa na ra ai. Kărai Kăsang hpe tsaw ra ai myit jat wa ai hte măren, shi hpe daw jau măyu ai myit mung, law jat wa na rè. Shingrai Yēsu Hkristu a săpe lăngai tai wa na mătu, nang hpe jăsu ya na rè ai. (Mahte 28:19) Yehowa saksē ni a ngwi pyaw ai kun dinghku hte nang kănawn măzum yang, Kărai Kăsang a jinghku prat tup tai na ndai. Nang hpa gălaw ra a ta?

Kărai Kăsang a tăra ni hpe mădat ai hku nna, shi hpe tsaw ra ai myit mădun ra ai. “Kărai Kăsang a hkang da ai ga hpe hkan gălaw ai lam gaw, shi hpe tsaw ra ngu ai lam rai nga ai; shi a hkang ai ga chyawm gaw, yak la ai n rai.”​—1 Yawhan 5:3.

Shărin la lu ai hpe akyu jăshawn u. Dai lam hte seng nna htai shăleng dan ai mau­mwi lăngai hpe Yēsu tsun ai. Hpaji rawng ai wa lăngai gaw, shi a nta hpe lunghkrung ntsa ē gap da ai. Angawk ai wa lăngai gaw, zaibru jang ē nta hpe gap da ai. Nbung lăru kăba bung wa ai shăloi, lunghkrung ntsa ē gap da ai nta gaw n kădawng daw mat ai. Zaibru jang ē gap da ai nta chyawm gaw, nyawp rap rai daw mat ai. Yēsu a shărin shăga ai ga hpe na la nna, hkan gălaw ai ni gaw, lunghkrung ntsa ē gap da ai hpaji rawng ai wa hte bung ai, ngu mădu tsun da ai. Rai ti mung, shi a shărin shăga ai ga hpe na la nna n hkan gălaw ai ni chyawm gaw, zaibru jang ē gap da ai măsha angawk hte bung ai. Nang kădai wa hte bung măyu a ta? ​—Mahte 7:​24-​27.

 Ap nawng ai lam. Lăchyum gaw, Yehowa a myit ai hku hpe prat tup hkan gălaw măyu ai ngu, Mădu kaw akyu hpyi nna tsun dan ai rè. Kărai Kăsang a myit ai hku hkan gălaw ai gaw, nang Yēsu Hkristu a săpe lăngai rè ai lam mădun ai.​—Mahte 11:29.

Hka lup hkam ai. “Shi a amying ningsang hpe gang shăga let baptisma hkam la nna, na yubak kăshin kămun kau u.”​—Kasa 22:16.

Kărai Kăsang a amu hpe hpring tsup hkra gun u. “Hpa gălaw yang mung, măsha a mătu gălaw ai zawn n rai, dai Mădu [Yehowa] a mătu zawn gălaw nga nna, myit măsin yawng hte a shăja nga mu.”​—Kolose 3:​23, 24.