Satan hte nhkru ai nat ni gaw, zingri zingrat nna dawsa ai ni rai ma ai. Moi shawng de asak hkrung wa ai sadi dung ai Yoba a dusat yamnga ni hte mayam ni hpe Satan sat kau ya ai. Yoba a kasha marai 10 nga nga ai nta hpe mung, “nbung kaba” hte sharun kau ya nna si hkra galaw ai. Dai hpang, Yoba hpe “lagaw lahpan kaw nna baw pungding du hkra krwi jap tu ahpra shangun wu ai.”—Yoba 1:7-19; 2:7.

Yesu lakhtak hta nat ni gaw, masha nkau hpe ma-a shangun ai, myi kyaw shangun ai. (Mahte 9: 32, 33; 12:22) Masha langai hpe zingri nna shi hkum hpe nlung hte arin shangun ai. (Marku 5:5) Lasha langai hpe mung, aja awa marawn hkra galaw, ga de kadawng tawn nna “htan kashan shangun” ai.—Luka 9:42.

Dai ni aten hta mung, Satan hte nat ni gaw moi na zawn sha masha sat na matu lit n li ma ai. Satan hte nat ni sumsing lamu kaw na jahkrat kau hkrum ai hpang kaw na, nhkru nhkra lam ni grau law htam wa ai re. Shanhte a dawsa zingri ai lam ni law wa ai lam, mungkan shiga ni hpe yu yang chye lu ai. Masha nkau hpe machyi makaw byin shangun ai, nkau hpe shana de n lu yup hkra galaw ai, hkrit hpa yup mang ni mu wa hkra dingbai dingna jaw ai. Nkau hpe ngang hte seng nna roi rip ma ai. Nkau hpe gaw mana mat ai du hkra, si ai du hkra, tinang hkum sat si ai du hkra galaw ai.

Nat (sh) nhkru ai wenyi gaw nta masha 16 hpe sat kau nna, shi hpe mung 18 ning ting ting hkum hkrang hte myit hpe zingri wa ai ngu Surinem mungdan na Lintina tsun dan ai. Nhkru ai nat ni gaw “masha ni hpe si ai du hkra zingri ai hpe pyaw ma ai” ngu dai mahkrum madup kaw na tsun dan ai.

Raitim, Yehowa Karai Kasang gaw shi a amyu masha ni hpe Satan gasat ai lam kaw na, makawp maga ya lu ai.—Ga Shagawp 18:10.