Anhte yawng hta lata hpa langai nga ai. Yehowa hpe magam gun na kun? Shing n rai Satan hte nat ni hpe kun? Lahkawng yan hpe gaw n mai lata ai. Yehowa a magam gun na matu lata ai gaw, hpaji rawng dik htum re.

Anhte chye wa sai hte maren, nat ni gaw masha ni hpe hkra machyi hkra galaw nna hkalem nga ma ai. Yehowa gaw dai hku n re. Kawa gaw tinang a kashu kasha ni hpe tsawra ai zawn, masha ni hpe shi tsawra ai. Karai Kasang gaw “kaja ai kumhpaw nlang hte hte, hkum hkum re ai kumhpa yawng hte” hpe jaw ai madu re. (Yaku 1:17) Grau htum ai sak jaw lam hpe jaw ngut ai hpang pyi, hpa hpe mung n ngam da ai sha masha ni hpe kaja ai akyu ni chyu jaw ai.—Ehpesu 2:4-7.

Karai Kasang a kasha Yesu Hkristu gaw, mungkan ga hta shi asak hkrung ai shaloi galaw wa ai lam ni hpe myit yu u. Ga n lu shaga ai ni hpe lu shaga hkra galaw ya ai, myi n mu ai ni hpe mu hkra galaw ya ai. Manggang kap ai ni hte n kung n kyang ai ni hpe shamai shatsai ya ai. Nat ni hpe shapraw ya ai, yawga ana yawng hpe shamai shatsai ya ai. Karai a daru atsam hpe akyu jashawn nna, si mat ai masha ni hpe pyi jahkrung sharawt ya ai.—Mahte 9:32-35; 15:30, 31; Luka 7:11-15.

Karai Kasang gaw masu ga galoi n tsun ai. Teng man ai ga sha tsun ai. Kadai hpe mung n hkalem ai.—Bu Hkawm 23:19.

Ndi gram tsip gaw jinu hpe n lu shamu hkra rim da lu ai zawn, wan hku law ai shinggyim masha ni mung shajan shalai kamsham ai lam hte n teng n man ai ga ni a hkang ai lam hkrum nga ai. Si mat ai ni hpe hkrit ai. Nat ni hpe hkrit ai. Dagam ga tsun ai, namik kumla htai ai, lak hpoi, mandan hpaji ni hpe hkrit tsang nga ma ai. Satan Nat a masu magaw lam ni hpe npawt tawn ai makam masham ni, htung hkring ni a hkang ai lam hkrum nga ma ai. Karai a mayam ni chyawm gaw, dai zawn gyit hkang ai lam langai mung n hkrum ma ai.

Yehowa gaw Satan hta na atsam grai kaba ai. Yehowa a magam gun na nga yang, nat ni a shoihpa ni kaw na makawp maga hkrum na re. (Yaku 4:7) Nang hpe n mai ahkyu ai. Ga shadawn, mare kaw na pru mat na matu ningdang ai Naijiriya kaw na Yehowa Sakse langai hpe sat na matu, grai ningtawn ai nat sara masum gaw ahkyu hkyu ai. Shanhte ahkyu hkyu ai gaw n awng dang ai shaloi, nat sara langai gaw hkrit kajawng nna, Sakse Hkam hpang de sa nna mara raw ya na matu sa tawng ban ai.

Nang hpe nat ni shoihpa jaw ai shaloi, Yehowa a mying hpe shaga na nga yang, makawp maga hkrum na re. (Ga Shagawp 18:10) Raitim, Karai Kasang a makawp maga ai lam hkrum mayu yang, nat hpaji hte nat nawku ai lam hte seng ai lam yawng hte asan sha rai ging ai. Moi na aten hta, Ehpesu mare kaw Karai Kasang hpe nawku ai ni gaw dai hte maren galaw wa ai. Mandan hpaji hte seng ai laili laika yawng hpe shapraw nna wan nat kau ma ai. (Kasa 19:19, 20) Dai ni aten hta mung, Karai a mayam ni mung dai hte maren galaw ra ai. Lak hpoi, “makawp maga” sumri, mandan hpaji hte seng ai laili laika ni, nat hpaji hte matut manoi ai lam yawng hpe koi yen ra ai.

Karai a myiman lu mayu yang, shut shai ai nawku dawjau lam hte nhkru n kaja lam ni hpe koi yen ai daram hte sha n mai ai. Tengman ai nawku dawjau lam hta myit rawt let shang lawm ra ai. Hpa ni galaw ra na hte seng nna Chyum Laika hta tsun da ai.

Shut shai ai lam ni galaw nna kaga masha ni hpe sharin achyin ya nga ai, Satan hte nat ni a masha ni mungkan ga hta nga ai. Yehowa hta mung shi a amyu masha ni nga ai. Shanhte gaw Yehowa Sakse Ni re. (Esaia 43:10) Mungkan hta Yehowa Sakse wan masat jan nga ai. Shanhte yawng gaw kaja ai hpe dang lu ai daram galaw nna, kaga masha ni hpe mung tengman ai tara hpe sharin achyin ya nga ai. Mungdan law law hta, shanhte a nawku htingnu hta shanhte hte mu hkrum mai ai. Nang hpe atsawm hkap hkalum la na re.

Shanhte a bungli gaw, kaga masha ni Karai Kasang hpe nawku wa hkra karum ya ai re. Na a nta hta, nang hte arau Chyum Laika hkaja nna, Yehowa Karai Kasang hpe tengman ai hku gara hku nawku dawjau mai ai lam hpe chye hkra karum ya na re. De a matu manu jahpu n jaw ra ai. Sakse Hkam ni gaw tengman ai tara hpe sharawng awng let sharin ya mayu ma ai. Yehowa hte masha ni hpe tsawra ai majaw re.