Ndai mabyin hpe shingran yu u: Brian gaw shi jawng manang lahkawng sa wa ai hpe mu jang myit shuk wa ai. Hkayawm lu na matu tsun ai ndai bat laman lahkawng lang rai sai. Ya, masum lang naw shadut na kun? ngu shi myit tsang wa ai.

Nambat langai lasha gaw:

“Manang” ngu tsun ti mung lama ma hpe sumbu kaw nna shaw let Brian hpe jaw dat ai.

Shi lata kaw na hkayawm hpe Brian mu dat ai shaloi myit grau shuk wa ai.

Nang Brian shara hta rai yang gara hku di na?

Brian a manang ni gaw shanhte galaw ai lam hpe atsawm myit yu nna galaw ai kun? Tinang hkrai dawdan nna galaw ai kun? N rai na re. Shanhte hpe mung manang ni dip n-gun jaw na rai na re. Manang ni ra sharawng na matu shanhte galaw ai hku hkan galaw dat ai.

Nang dai zawn mabyin ni hkrum wa yang gara hku ning hkap na kun?

1. TAU HKRAU SHAJIN DA U

   Chyum Laika hta ndai hku tsun ai: “Hpaji rawng ai wa gaw, n kaja ai hpe tau chye nna, koi kau nga ai; Nyan tang ai wa chyawm gaw, dingyang sa wa nna, yubak hkrum nga ai.”​—⁠Ga Shagawp 22:⁠3.

   Manghkang byin na hpe law malawng hku nna gaw tau hkrau chye lu ai. Ga shadawn, na a jawng manang ni hkayawm lu nga ai hpe nang mu ai ngu saga. Nang hpe mung hkayawm lu na matu dip n-gun jaw na hpe tau hkrau chye da sai majaw, hparan na matu shajin da mai ai.

2. TAU HKRAU MYIT DA U

   Chyum Laika hta ndai hku tsun ai: “Karai Kasang a man e mung, masha a man e mung, ra n rawng ai sha tutnawng myit mang san pra nga lu hkra, a shaja nga nngai.”​—⁠Kasa 24:⁠16.

   Tinang hkum tinang ndai hku san yu u: ‘Shanhte galaw ai hku hkan galaw yang hpang de hpa byin wa na kun?’ Shawng nnan hta gaw shanhte a hkap la ai hpe chyahkring chyahkra lu na re. Hpang de gaw nang gara hku hkamsha na kun? Jawng manang ni a ra sharawng ai hpe lu na matu na a makam masham hpe asum hkam gwi ai i?​—⁠Pru Mat 23:⁠2.

3. MYIT DAWDAN DA U

   Chyum Laika hta ndai hku tsun ai: “Masha gaw gat hkai ai hte maren, dan la na ra ai.”​—⁠Galati 6:⁠7.

   Hpa galaw na hpe tinang hkrai dawdan nna asak hkrung ra na aten du wa na re. Jaw ai hku lata wa ai Yosep, Yoba hte Yesu a lam ni Chyum Laika hta mu lu ai. Dawdan lam shut wa ai Ka-in, Esaw, Yuda Iskarut ni a lam hpe mung tsun da ai. Nang gara hku galaw na kun?

“Mai kaja ai hta manoi nga mu” nga nna Chyum Laika hta tsun ai. (Roma 12:⁠9) Hpang de byin na akyu hpe tau hkrau myit da yang, tinang hkam la ai lam ma­nang ni hpe aloi sha tsun dan gwi ai sha n ga akyu nga ai hpe mung nang mu wa na re.

Myit hkum tsang, na a manang ni hpe tara hkaw ra na ngu ai lachyum gaw n re. N galaw ai ngu aja awa tsun ai hte sha ram sai. Shanhte tsun ai hku hkan galaw na n re ai hpe dan dan leng leng chye hkra ndai hku mai tsun ai:

• “Ngai hpe hkum shalawm!”

• “Ngai galoi mung galaw na n re!”

• “Ngai n galaw ai hpe nanhte chye ai me!”

Madung gaw kalang ta ning dang kau na matu re. Nang dai hku galaw na nga yang, na a manang ni dip n-gun n jaw ai sha hting nut mat na re.

Manang shada jahpoi hkrum yang, hpa galaw na ta? Shanhte gaw “nang hpa baw byin taw nga ai, nang la n re i” ngu tsun wa yang gaw taw? Dai gaw ramma ni hkrum chye ai dip n-gun langai re ai hpe chye da ra ai. Gara hku galaw na? Nang hta hparan na matu yawm htum lam lahkawng nga ai.

• Jahpoi ai hpe hkam sharang dat u. (“Nang tsun ai jaw ai. Ngai dai baw ni gaw hkrit ai” ngu tsun nna hpa majaw n galaw ai hpe kadun dawk tsun dan u.)

• Shi hpe dip n-gun bai jaw dat u. Hpa majaw ning dang ai hpe tsun dan nna shi a atsam marai hpe shakawn ya u. (“Nang gaw hkayawm lu na matu n hkrit ai i?” ngu bai tsun dat u.)

Na a manang ni gaw nang hpe matut nna jahpoi na nga yang dai kaw na pru mat wa u. Nang dai shara hta matut nga magang dip n-gun grau jaw magang re. Dai hku pru mat wa ai gaw shanhte dip n-gun jaw shagu, n hkan galaw ai lam madun dan ai re.

Manang ni dip n-gun n jaw hkra gaw nang n lu galaw ai. Raitim, dip n-gun hkrum wa jang gara hku hparan na hpe gaw nang dawdan lu ai. Madung gaw tinang sha re.​—⁠Yawshu 24:15.