Yehowa Sakse Ni gaw Chyum Hpaji jawng ni law law hpaw hpang wa sai. Aten tup magam gun ni, hkaw tsun bungli hpe “hkum tsup hkra” galaw lu na matu laksan jawng ni hkyen lajang da ya ai.​—⁠2 Timohti 4:5.

Lam Woi Ningshawng Magam Jawng. Ten galu ningshawng amu gun ai laning mi hpring yang, tinang hte ni ai Nawku Htingnu hta galaw ai 6 ya na ai magam jawng lung na matu, mying jahpan mai jaw ai. Dai jawng a yaw shada lam gaw, lam woi ningshawng ni Yehowa hte grau hku hkau wa hkra, hkaw tsun bungli hte seng ai lam shagu hta grau kaja wa hkra hte, sadi dung let matut nna magam gun lu na matu re.

Kabu Gara Shiga Hkaw Tsun Ai Ni A Matu Magam Jawng. Shata lahkawng na ai ndai magam jawng gaw, tinang a nta kaw na htawt nna, grau ra ai shara hta amu gun na hpe sharawng ai, mahkrum madup nga ai lam woi ningshawng ni hpe, shaman ya na matu hpaw da ai re. Shanhte gaw mungkan ntsa hta kaba htum, Kabu Gara Shiga Hkaw Tsun Ai Wa Yesu a kasi hpe hkan sa nna, “Ngai nga nngai, ngai hpe shangun dat e” ngu nna tsun ai. (Esaia 6:8; Yawhan 7:29) Nta hte tsan ai shara hta htawt nga ai shaloi, prat hpe asan sha chye nga na matu shakut ra ai. Htung hking, du hkra ladaw hte lu sha ni mung bung na nre. Ga amyu nnan hpe mung sharin ra yang ra na re. Ndai magam jawng gaw, asak 23 kaw na 65 ning lapran na mahkawn, shabrang hte, yan la hpunau nauna ni, shanhte a lit hpe gun hpai ai hta, ra rawng ai atsam ningja ni nga wa na matu, Yehowa hte shi a uhpung uhpawng a matu, grau akyu rawng ai ni byin wa na matu karum ya ai.

Gilead Sin Langchyi Chyum Jawng. “Gilead” ngu ai Hebre ga a lachyum gaw “Sakse Sumpum” re. “Lamu ga htum hkra” sakse hkam lu na matu, 1943 ning hta Gilead jawng hpe hpaw hpang nna, jawng ma 8,000 jan hpe sasana byin na matu shalat ya ngut sai. (Kasa 13:47) Jawng yu ma ni, Peru mungdan de nnan du ai shaloi, dai kaw hpung n nga shi ai. Ya gaw hpung 1,000 jan nga sai. Japan mung hta sasana amu nnan galaw ai shaloi, Yehowa Sakse marai 10 pyi n nga ai. Ya gaw 200,000 jan nga sai. Shata 5 na ai Gilead Chyum jawng hta Karai Kasang A Mungga hpe atsawm sharin ya ai. Mungkan grup magam bungli hpe grau awng dang hkra, laksan ningshawng ni, sasana magam gun ni, ginjaw garan rung ni hta amu gun ai ni hte hpung kawan bungli galaw nga ai ni hpe dai jawng hta laksan shaman ya na matu saw shaga ai.

• Lam woi ningshawng Magam Jawng a yaw shada lam gaw hpa rai ta?

• Kabu Gara Shiga Hkaw Tsun Ai Ni A Matu Magam Jawng hpe kadai ni mai lung ai kun?