Dai wa gaw, dinghku bai de ai shaloi, shawng na dinghku hte ngut mat nna, hpang na dinghku hpe dinghku nnan hku nna nawku hpung gaw mu mada ai. Dai zawn mu mada ai hpe chye na na matu, jahka ai, dinghku bai de ai hte seng ai Yesu a ga hpe myit yu ga.

Mahte 19:9 hta, dinghku jahka mai ai Chyum Laika tsang madang hpe Yesu tsun nga ai re. Shi ndai hku tsun ai: “Hpye ai lam hta kaga, tinang a madu jan hpe shabawn kau nhtawm, num kaga hpe hkungran la ai wa kadai mung, num shaw ai wa tai nga ai.” Yesu a ga hku nga yang, (1) hpye ai amu a majaw sha, dinghku hpe jahka mai ai ngu Chyum Laika hta tsun da ai lam re. (2) Chyum Laika hta tsun da ai hku n re ai sha, madu jan hpe jahka ai wa gaw num shaw ai wa re. a

Yesu a ga hku nga yang, madu wa gaw hpye ai amu galaw nna, madu jan hpe jahka kau ai hte dinghku bai de na matu, Chyum Laika hku tara shang mat sai kun? N shang ai. Dai hku byin yang, madu wa hpe mara raw ya na kun? N raw ya na kun? ngu ai hpe mara n nga ai ningrum ningtau sha dawdan ra ai. Madu jan gaw mara n raw ya ai sha, tara shang jahka kau sai nga yang, lahkawng yan dinghku bai de na ahkang nga mat sai.

Masa nkau mi hta gaw, mara n nga ai ningrum ningtau gaw, dinghku hpe makawp maga mayu ai majaw, sharawng awng let mara raw ya mayu na re. Raitim, dinghku htak ai madu wa gaw, madu jan a dawdan lam hpe nyet kau nna, shi maga hku nna tara shang jahka na matu galaw ai nga yang gaw gara hku kun? Madu jan gaw mara raw ya nna, n hka mayu ai majaw, madu wa gaw Chyum Laika hku nga yang dinghku bai n mai de ai. Lama na, madu wa gaw dai zawn masa hta dinghku bai de yang, shi gaw dinghku htak ai wa re. Shi a shut ai mara hpe tara jeyang na matu, myitsu salang ni tara komiti hpaw na re.​—1 Ko 5:1, 2; 6:9, 10.

Lama na, marai langai gaw Chyum Laika tsang madang hku dinghku bai de na ahkang n nga ai sha, de na nga yang, shawng na dinghku hte hpang na dinghku hpe nawku hpung gaw gara hku mu mada ging ai kun? Chyum Laika tara hku nga yang, shawng na dinghku gaw, tara shang nga ding yang rai kun? Mara n nga ai madu jan gaw, madu wa hpe mara raw ya na, n raw ya na ngu ai hpe dawdan na ahkang nga ding yang rai kun? Hpang na dinghku hpe dinghku htak ai lam hku nna mu mada na kun?

Mara n nga ai ningrum ningtau asak hkrung nga dingsa, dinghku bai n de dingsa, hpye ai amu n galaw dingsa, hpang na dinghku hpe dinghku htak ai lam ngu, lai wa sai aten hta, nawku hpung gaw mu mada wa ai. Raitim, jahka ai lam hte dinghku bai de ai lam hpe Yesu tsun nga ai shaloi, mara n nga ai ningrum ningtau hte seng nna n tsun ai. De a malai, Chyum Laika hta tsun da ai  lam n nga ai sha, jahka kau nna kaga wa hte hkungran ai wa gaw, num shaw ai wa re ngu Yesu tsun ai. Dai zawn masa hta, jahka kau nna dinghku bai de ai wa gaw, dinghku htak mat ai majaw, shawng na dinghku hte ngut mat sai.

Jahka kau nna dinghku bai de ai majaw, shawng na dinghku hte ngut mat sai majaw, mara n nga ai ningrum ningtau gaw, mara raw ya ai, n raw ya ai ngu ai lam ni gaw tara n shang sai. Dai majaw, madu wa hpe mara raw ya na, n raw ya na ngu ai lit mung shi hta n nga sai. Dai sha n-ga, hpang na dinghku hte seng nna nawku hpung a mu mada lam mung, mara n nga ai ningrum ningtau asak naw hkrung ai, n hkrung ai, dinghku bai de ai, n de ai, hpye ai amu galaw ai, n galaw ai hta n madung ai. b

Lahta de bawngban wa ai ga shadawn hku nga yang, madu wa dinghku htak ai majaw jahka kau ma ai. Raitim, madu wa gaw, num shaw ai amu n galaw ai sha, madu jan hpe jahka kau nna dinghku bai de ai nga yang gaw gara hku kun? Shing nrai, dinghku htak ai lam n nga ai sha, jahka ngut ai hpang, madu jan gaw sharawng awng let mara raw ya mayu tim, madu wa dinghku bai de dat ai nga yang gaw gara hku kun? Ndai ga shadawn ni hta, jahka kau nna dinghku bai de ai gaw, dinghku htak ai lam re ai majaw, shawng na dinghku hte ngut mat sai. Hpang na dinghku gaw, tara shang byin mat sai. 1979, November 15, Sin Langchyi (Inglik) laika man 32 hta ndai hku tsun da ai: “Ya, dinghku bai de dat sai majaw, dai hpe aloi sha shaprai kau nna, shawng na madu jan hpe bai n mai la ai. Jahka ai lam, dinghku htak ai lam, dinghku bai de ai lam ni a majaw, shawng na dinghku gaw ngut mat sai.”

Ndai chye na ai lam nnan gaw, dinghku a chyoi pra ai lam hpe shayawm kau ya ai n re ai zawn, dinghku htak ai mara kaba hpe mung shayawm kau ya ai n re. Chyum Laika tsang madang hte maren n re ai sha, madu jan hpe jahka kau nna, tara shang dinghku bai de na ahkang n nga ai sha, dinghku bai de ai wa gaw, dinghku htak ai mara hte nawku hpung hta tara jeyang hkrum ra na re. (Hpang na madu jan mung, Hkristan rai na nga yang, shi mung dinghku htak ai mara hte nawku hpung hta tara jeyang hkrum na re.) Bai de ai dinghku hpe dinghku htak ai ngu mu mada na n raitim, madu wa gaw, nawku hpung magam lit ni a matu shaning law law atsam hpring na n re. Galaw da ai mara a majaw, n kaja ai mying nga dingsa, n hkungga ging ai wa hku nna masha ni mu nga dingsa atsam hpring na n re. Sadi run hkrum ai shawng na ningrum ningtau a masa, mara galaw ai ningrum ningtau a kau da hkrum ai ma ni a masa hpe mung, myitsu salang ni myit shalawm na re.​—Mal 2:14-16.

Chyum Laika hku n re ai sha, jahka kau nna, dinghku bai de ai nga yang, n kaja ai akyu ni nga ai majaw, Hkristan ni gaw, dinghku lamang a chyoi pra ai lam hte seng nna Yehowa a ningmu nga na matu shakut ai.​—Hpj 5:4, 5; Heb 13:4.