1. Yehowa a amyu masha hta grai kaja ai gara zawn myit jasat hpe mu lu nga ai kun?

YEHOWA a amyu masha gaw, Kasha a lam matsun npu hta, Karai magam hpe shawang myit hte sak jaw na ngu, Chyum Laika hta tau hkrau tsun da ai. (Shk 110:3) Dai myihtoi ga gaw, dai ni aten hta hpring tsup nga ai. Shaning shagu, Yehowa a mayam ni gaw, hkaw tsun bungli hta, wan hku law ai hkying hkum ni hpe jailang ai. Tinang a gumhpraw hte sharawng awng let sak jaw nga ai re. Wenyi lam, hkum hkrang hte myit masin hta ra kadawn nga ai hpunau nauna ni hpe mung, aten jaw nna madi shadaw nga ai. Lit nga ai hpunau ni gaw, zuphpawng hta lu ai lit ni hpe hkyen lajang na matu, sagu kawan sa na matu, aten law law jailang ai. Dai lam ni hpe hpa majaw galaw ai kun? Yehowa hte masha shada da hpe tsawra ai majaw re.​—Mat 22:37-39.

2. Roma 15:1-3 hta tsun da ai hte maren Yesu gara hku kasi kaja madun wa ai kun?

² Tinang akyu hta na, kaga ni a akyu hpe shawng tawn ai hta Yesu kasi kaja madun wa ai. Yesu a hkang hpe hkan nang na matu, anhte dang lu ai daram shakut ai. (Roma 15:1-3 hpe hti u.) Dai zawn hkan nang yang, akyu law law lu na re. “Hkam sha ai hta jaw ya ai mahtang grau a nga ai” ngu Yesu tsun ai.​—Kas 20:35.

3. Ndai sumhpa hta hpa lam bawngban na kun?

³ Kaga ni a akyu hpe galaw ya na matu, Yesu hpa ni sak jaw  wa ai, gara hku kasi la lu ai, kaga ni a akyu hpe grau galaw ya mayu ai myit law wa hkra gara hku galaw lu ai lam hpe ndai sumhpa hta bawngban na re.

4. Tinang akyu hta na kaga ni a akyu hpe Yesu gara hku shawng tawn ai kun?

⁴Pu ba nga ai aten hta pyi, kaga ni hpe Yesu karum ya ai. Bum lagaw langai a makau hta, Yesu hpe mu na matu, masha hpawng hkan nang wa ai. Kaperna-um mare makau hta rai na masa nga ai. Yesu shana tup akyu hpyi da ai majaw, grai pu ba nga na re. Raitim, masha hpawng kaw na, matsan ai ni, hkam n kaja ai ni hpe mu ai shaloi matsan dum mat ai. Shanhte hpe shamai shatsai ya ai sha n-ga, n-gun lu hpa mungga ni hte n-gun jaw ai. Dai hpe Bum Ntsa Na Mungga ngu nna masha ni chye ma ai.​—Luk 6:12-20.

5. Dinghku a baw ni gaw pu ba ai aten hta pyi Yesu hpe gara hku kasi la mai ai kun?

⁵Dinghku a baw ni Yesu hpe kasi la nga ai lam. Ndai mabyin hpe shingran yu u: Dinghku baw langai gaw bungli ngut ai hpang, pu ba let nta de bai wa ai. Dai shana hta, dinghku nawku lamang hpe n galaw mayu tim, n-gun lu na matu Yehowa kaw akyu hpyi dat ai. Akyu hpyi ga hpe Yehowa mahtai jaw ai. Shawoi na zawn, dinghku nawku galaw ai. Kanu kawa ni a matu, wenyi lam gaw ahkyak htum re ai hpe dai shana hta, kasha ni sharin la lu mat ai.

6. Kaga ni hpe karum ya na matu tinang a aten hpe Yesu gara hku sak jaw wa ai kun?

⁶Tinang a aten hpe kaga ni a matu Yesu sharawng awng let sak jaw ai lam. Manang re ai Hkalup Sara Yawhan baw daw sat hkrum ai lam Yesu na ai shaloi, gara hku hkamsha na hpe shingran yu u. Grai yawn na re. “Yesu gaw, dai ga na jang [Yawhan si mat ai lam], li jawn let dai yang kaw nna pru mat wa nhtawm, shingran katsi ai shara de lagyim sa mat wa ai” ngu Chyum Laika hta tsun ai. (Mat 14:10-13) Hpa majaw langai sha nga mayu ai hpe chye na ya lu ai. Anhte law malawng gaw, langai sha nga ai aten hta, kadai n chye hkra hkrap chye ai. Dai shingran katsi ai shara de, masha hpawng gaw Yesu hta na shawng du taw ai. Yesu gara hku bai htang ai kun? Masha hpawng a ra kadawn ai lam hpe myit shalawm ya nna, “matsan dum” wa ai. Karai a ga hpe  shanhte na ra nga ai hpe chye ai majaw, “law law wa sharin shaga ya mu ai.”​—Mrk 6:31-34; Luk 9:10, 11.

7-8. Karum shingtau ra nga ai aten hta myitsu salang ni gaw Yesu hpe gara hku kasi la nga ai kun?

⁷Tsawra myit nga ai myitsu salang ni Yesu hpe kasi la nga ai lam. Anhte akyu a matu, myitsu salang ni a sak jaw ai lam hpe grai chyeju dum ai. Shanhte galaw nga ai lam ni hpe hpunau nauna ni yawng n chye lu ai. Ga shadawn, hkamja lam manghkang hkyak hkyak byin wa ai shaloi, Tsi Rung Matut Mahkai Komiti hpung shang ni gaw, karum ya na matu, lawan sa ra ai. Law malawng hku nna, shana yup tung hta, dai zawn hkyak hkyak re ai masa ni byin chye ai. Raitim, dai myitsu salang ni hte nta masha ni gaw, yakhkak hkrum nga ai hpunau nauna ni hpe tsawra ai majaw, tinang akyu hta na kaga ni a akyu hpe shawng tawn ya ai.

⁸ Nawku Htingnu hte kaga htingnu ni hpe gawgap ai, shingra tsin-yam hkrum ai ni hpe hkye mawoi ai hta mung myitsu salang ni karum ya nga ai. Anhte hpe lam matsun, n-gun jaw, madi shadaw ya na matu, myitsu salang ni gaw hkying hkum law law jailang nga ai. Dai hpunau ni hte shanhte a nta masha ni hpe gaja wa shakawn ging ai. Shanhte madun ai myit jasat hpe Yehowa shaman ya u ga. Raitim, kaga masha ni zawn sha, myitsu salang ni mung, rap ra ai lam nga ra ai. Nawku hpung lit ni hte sha aten ma nna, dinghku a ra kadawn ai lam ni hpe n lanu lahku ai baw n byin ging ai.

9. Hpilipi 2:4, 5 hku nga yang, Hkristan yawng gara myit jasat hpe shalat ging ai kun?

⁹ Hpilipi 2:4, 5 hpe hti u. Anhte gaw myitsu salang ni n raitim, Yesu a sak jaw ai myit  hpe kasi la lu ai. Yesu gaw, “mayam a ahpraw nsam dagraw” la ai ngu Chyum Laika hta tsun da ai. (Hpl 2:7) Dai daw kaji kaw nna hpa sharin la lu ai lam myit yu ga. Manu shadan hkrum ai mayam gaw, madu a myiman lu na matu ahkaw ahkang tam ai. Yehowa hte hpunau nauna ni a mayam hku nna, anhte mung shanhte a matu, grau akyu nga ai ni byin mayu na re. Lawu na lam matsun ni hpe bai maram ai hku nna dai zawn galaw mai ai.

10. Tinang hkum tinang gara ga san ni hpe san mai ai kun?

¹⁰Tinang a myit jasat hpe san jep ai. Tinang hkum tinang ndai hku san mai ai: ‘Kaga ni hpe karum na matu, ngai kade daram sharawng ai kun? Ga shadawn, asak kaba ai ni nga ai shara hta nga ai hpunau langai hpang de sa chyai na matu (sh) asak kaba ai nauna langai hpe zuphpawng lung lu hkra, sa tau ya na matu karum hpyi yang, ngai gara hku bai htang na kun? Zuphpawng kaba ni galaw na shara hpe, jasan jaseng galaw na matu (sh) Nawku Htingnu gram lajang ai hta shawang lit gun na matu, ra wa yang kalang ta karum ya na kun?’ Yehowa kaw apnawng ai shaloi, tinang hta nga ai yawng, shi a magam hta jailang na ngu ga sadi jaw wa ai. Karai Kasang gaw anhte a aten, n-gun atsam, arung arai ni hpe kaga ni hpe karum ya ai hta jailang shangun mayu ai. Dai zawn sak jaw yang shi grai kabu na re. Dai lam ni hta rawt jat ra ai hpe sadi hkrup yang hpa galaw mai ai kun?

11. Sak jaw mayu ai myit hpe shalat na matu akyu hpyi ai gaw gara hku karum ya lu ai kun?

¹¹Yehowa kaw akroi anoi akyu hpyi u. Masa lam nkau hta rawt jat ra ai hpe chye tim, galai shai mayu ai myit n nga ai ngu saga. Yehowa kaw akroi anoi akyu hpyi u. Tinang a hkamsha lam hpe dingman ai hku, dan dan leng leng tsun dan u. “Galaw mayu ai myit rai ti mung, galaw lu ai lam rai ti mung” jaw ya na matu hpyi u.​—Hpl 2:13.

12. Hkalup hkam ngut sai ramma hpunau ni gaw uhpung hpe gara hku karum ya lu ai kun?

¹² Nang gaw hkalup hkam ngut sai ramma hpunau rai yang, nawku hpung hta grau sak jaw mayu ai myit nga wa hkra, karum ya na matu Yehowa kaw akyu hpyi u. Mungdan nkau hta, magam tau ni hta na myitsu salang ni grau law nga ai. Dai magam tau ni mung asak ram daw kaba sai ni hte asak kaba sai ni sha re. Uhpung grau kaba wa ai hte maren, Yehowa a amyu masha hpe lanu lahku na matu, ramma hpunau ni grau ra nga ai. Ra nga ai gara shara kaw raitim, sharawng awng let magam gun mayu ai myit nga yang, ngwi pyaw lam hkamsha lu na re. Hpa majaw kun? Yehowa ra sharawng ai lam lu na, mying kaja lu na, kaga ni hpe karum ya ai kaw na myit dik lam hkamsha lu na majaw re.

13-14. Hpunau nauna ni hpe tatut gara hku karum ya mai ai kun? (Makawp sumla hpe yu u.)

¹³Kaga ni a ra kadawn ai lam hpe chye hkra galaw u. “Mai kaja ai amu galaw na hte gam jaw gam ya ai lam, hkum malap kau myit; shing re ai hkungga hpe, Karai Kasang gaw sharawng awng nga ai” ngu Yuda mare hta nga ai Hkristan ni hpe kasa Pawlu n-gun jaw ai. (Heb 13:16) Tatut re ai hpaji jaw ga re. Ndai laika hpe lu la nna kade n na yang, shanhte gaw tinang nta, bungli, n kamsham ai jinghku ni hpe kau da nna, “bum lang de hprawng” ra wa ai. (Mat 24:16) Shada da karum hkat na matu, ra dik htum aten re. Dai aten garai n du shi ai kaw na, Pawlu a hpaji jaw ga hpe hkan sa nna, shada da garan kachyan ya wa yang, masa nnan hta mung, chye nga na matu grau loi na re.

¹⁴ Hpunau nauna ni gaw, shanhte ra kadawn ai lam ni hpe ayan hpaw tsun dan  yang she tsun dan na re. Ga shadawn, madu jan n nga mat ai majaw, hpunau chyu sha yawn hkyen let nga taw ai. Lusha shadu na matu, hkawm sa hkawm wa galaw na matu, nta bungli galaw na matu karum shingtau ra nga ai kun? Kaga ni hpe jam jau n jaw mayu ai majaw, tsun dan yang she tsun dan na re. Tinang maga kaw na karum ya na nga yang, shi grai chyeju dum na re. Dai majaw, shi hkrai shi rai mat na re (sh) karum shingtau ra yang tsun na re ngu galoi n myit ging ai. ‘Shi shara hta ngai nga yang, gara zawn karum shingtau lam lu mayu na kun?’ ngu tinang hkum tinang san u.

15. Kaga ni hpe karum ya mayu yang hpa galaw ra ai kun?

¹⁵Hku hkau loi ai wa byin u. Nawku hpung hta, kaga ni hpe karum ya na matu, jin jin rai nga ai hpunau nauna ni hpe nang chye na re. Jam jau jaw nga ai ngu anhte hkamsha hkra, shanhte galoi n galaw ai. Karum shingtau ra shagu, shanhte hpe kamhpa mai ai lam anhte chye ai. Anhte mung dai zawn karum ya mayu na re. Asak 45 ning re ai myitsu salang Elan gaw, hku hkau loi ai wa re. Yesu a kasi hpe myit yu nna ndai hku tsun ai: “Yesu bungli grai law tim, asak kaji kaba yawng, shi makau hta nga mayu ai. Shi hpe karum hpyi gwi ai. Grai lanu lahku chye ai wa hku nna mu mada ai. Ngai mung Yesu zawn byin mayu ai. Hku hkau loi ai wa, alum ala tsun shaga chye ai wa, lanu lahku chye ai wa ngu ai mying lu mayu ai.”

16. Shakawn 119:59, 60 hpe hkan sa ai gaw Yesu a kasi hpe htep lahti hkan sa na matu gara hku karum ya lu ai kun?

¹⁶ Yesu a kasi hpe hpring tup n hkan sa lu ai nga yang, myit hkum daw. (Yak 3:2) Hkrang pan ka sharin nga ai jawng ma gaw, sara a hkrang pan hte maren byin hkra ka lu na n re.  Raitim, shut ai lam ni kaw na sharin la na, sara a kasi hpe dang lu ai daram shakut nna hkan sa na nga yang, atsam rawt jat wa na re. Dai zawn sha, anhte mung chye wa ai lam ni hpe tatut hkan sa nna, gawng kya ai lam ni hpe galai shai na matu, dang lu ai daram shakut yang, Yesu a kasi hpe htep lahti hkan sa lu na re.​—Shakawn 119:59, 60 hpe hti u.

17-18. Yesu a sak jaw ai myit hpe kasi la yang gara akyu ni lu na kun?

¹⁷ Sak jaw mayu ai myit gaw kap chye ai. Myitsu salang Tim ndai hku tsun ai: “Ramma nkau magam tau ni byin wa ai. Nkau nga yang, grai naw kaji ai. Dai zawn byin wa ai lam langai gaw, kaga ni a karum ya mayu ai myit hpe mu nna, shanhte zawn byin mayu wa ai majaw re. Dai ramma hpunau ni a sak jaw ai lam gaw, nawku hpung a matu mung, myitsu salang ni a matu mung, grai madi shadaw ya ai.”

¹⁸ Tingkyeng akyu tam mayu ai myit hte hpring nga ai mungkan hta anhte asak hkrung nga ai. Raitim, Yehowa a amyu masha gaw shanhte hte n bung ai. Yesu a sak jaw ai myit a majaw shadut hkrum nna, shi a kasi hpe hkan sa na matu, anhte dawdan da ai. “Shi a hkang” hpe raw n hkan sa lu tim, htep lahti hkan nang lu ai. (1 Pe 2:21) Yesu a sak jaw ai myit hpe dang lu ai daram shakut nna kasi la yang, Yehowa a myiman lu na ngu ai hpe chye ai majaw, ngwi pyaw lam hkamsha lu na re.