1. Kalang lang Yehowa a mayam ni gaw garen ai ngu hpa majaw hkamsha ma ai kun?

ANHTE yawng gaw kalang lang garen chye ai. Nkau gaw chyahkring mi sha re. Nkau gaw grai na hkra garen nga chye ai. Masha ni hte arau nga taw ai aten hta pyi, garen ai ngu anhte hkamsha chye ai. Nkau gaw nawku hpung nnan hta, nga manu na matu yak nga ai. Nkau gaw nta masha shada da grai hku hkau ai majaw, nta masha ni hte tsan ai shara de htawt mat ai shaloi, grai garen ma ai. Nkau gaw tinang grai tsawra nna, n nga mat sai ningrum ningtau hpe grai dum nga ma ai. Ndai laman hta sha teng man lam hpe sharin la ai Hkristan nkau gaw, makam masham n bung ai nta masha ni, manang ni a kabai kau hkrum ai (sh) zingri hkrum nga ai majaw garen nga ai.

2. Gara ga san ni a mahtai hpe bawng ban mat na kun?

² Anhte hte seng ai lam yawng hpe Yehowa chye nna, chye na ya ai. Anhte garen ai ngu hkamsha yang, dai hpe shi chye ai. Tawt lai lu hkra shi karum ya mayu ai. Yehowa anhte hpe gara hku karum ya ai? Tinang nan mung hpa galaw lu ai? Nawku hpung hta garen ai ngu hkamsha nga ai ni hpe anhte gara hku karum ya lu na? Dai ga san ni a mahtai hpe bawng ban mat wa ga.

3. Elia hpe lanu lahku ai lam Yehowa gara hku madun wa ai kun?

³ Yehowa gaw shi hpe nawku daw jau ai ni a akyu hpe grai myit lawm ai. Shi gaw anhte langai hpra a makau hta nga nna, grai myit daw ai ngu hkamsha ai shaloi mung sadi hkrup ai. (Shk 145:18, 19) Yehowa gaw shi a myihtoi Elia hte seng nna, kade daram myit tsang ai hpe myit yu ga. Sadi dung ai Elia gaw  Israela labau a grai yak ai aten hta asak hkrung wa ai. Yehowa hpe nawku ai ni law law gaw sat hkrum nga ai. Karai a hpyen ni gaw Elia hpe sat na matu lak san hku na shakut nga ai. (1 Hk 19:1, 2) Yehowa hpe nawku ai myihtoi gaw, shi langai sha nga sai ngu na Elia hkamsha nga ai. (1 Hk 19:10) Karai Kasang gaw Elia hpe lanu lahku wa ai. Yehowa gaw lamu kasa langai hpe dat nna Elia hpe shi hkrai n re ai lam, Karai hpe hkrit hkungga ai Israela amyu masha grai law hkra naw nga ai lam tsun dan wa ai.​—1 Hk 19:5, 18.

4. Kaga ni a karum shingtau lam n lu nga ai mayam ni hpe Yehowa lanu lahku ai lam Marku 10:29, 30 gaw gara hku madun nga ai kun?

⁴ Yehowa hpe nawku daw jau na matu lata ai shaloi, nkau gaw grai sak jaw ra wa ai hpe Yehowa chye ai. Dai hta makam masham n bung ai jinghku ni hte manang ni lawm na re. Kalang mi hta Petru gaw grai myit tsang ai majaw, Yesu hpe ndai hku san wa ai: “Anhte gaw arai yawng mayawng hpe kau da nna, nang kaw hkan nang sa ga ai; dai rai nna anhte hpa lu la na rai nga ga ta?” (Mat 19:27) Wenyi kun dinghku kaba hpe bai lu la na lam sape ni hpe Yesu tsun dan wa ai. (Marku 10:29, 30 hpe hti u.) Wenyi kun dinghku a baw re ai Yehowa mung, shi hpe nawku daw jau mayu ai ni hpe karum ya na ngu ga sadi jaw da ai. (Shk 9:10) Garen ai ngu hkamsha ai shaloi, Yehowa a karum shingtau lam hpe lu la na matu, tatut galaw mai ai lam nkau hpe hkaja mat ga.

5. Yehowa nang hpe karum ya ai lam hpe myit ai gaw hpa majaw kaja ai kun?

⁵ Yehowa karum ya ai lam hpe myit maju jung u. (Shk 55:22) Dai gaw na a masa lam hpe rap ra ai hku mu mada lu hkra karum ya na re. Teng man lam hta shi hkrai sha re ai nauna Hkaro * ndai hku tsun ai: “Mayak mahkak ni hkrum ai aten hta, Yehowa ngai hpe gara hku karum ya wa ai lam hpe bai myit ai gaw, ngai hkrai sha n re ngu na hkamsha shangun ai. Yehowa ngai hpe matut karum ya na hpe kam shangun ai.”

6. Garen ai ngu hkamsha ai ni hpe 1 Petru 5:9, 10 gaw gara hku n-gun jaw ya lu ai kun?

⁶ Garen ai ngu hkamsha nga ai hpunau nauna ni hpe Yehowa gara hku karum ya ai lam myit u. (1 Petru 5:9, 10 hpe hti u.) Nta masha ni hta Yehowa Sakse langai hku  na shaning law law shi hkrai sha galaw wa ai hpunau Hiroshi ndai hku tsun ai: “Nawku hpung hta, yawng gaw mayak mahkak ni hkrum nga ai hpe aloi hte sha mu lu ai. Raitim, yawng gaw Yehowa hpe nawku lu hkra kaja htum galaw nga ai hpe mu lu ai gaw, teng man ai tara hta tinang hkrai sha rai nga ai ni hpe n-gun lu shangun ai.”

7. Akyu hpyi ai gaw nang hpe gara hku karum ya ai kun?

⁷ Wenyi lam hta matut shamu shamawt nga u. Dai hta nang hkamsha nga ai lam hpe Yehowa hpe tsun dan ai mung lawm ai. (1 Pe 5:7) Ramma nauna Masine gaw Yehowa hpe nawku na matu daw dan kau ai. Nta masha ni gaw n nawku ai majaw, shi hkrai sha re ngu hkamsha ai. Shi ndai hku tsun ai: “Garen ai hpe tawt lai lu hkra karum ya ai ahkyak htum lam langai gaw Yehowa kaw akroi anoi akyu hpyi ai re. Shi gaw nye a kawa langai re. Shani shagu ngai shi kaw akyu hpyi ai. Ngai gara hku hkamsha nga ai hpe chyahkring hkring tsun dan ai.”

8. Karai a Mungga hpe hti nna myit sawn sumru ai gaw nang hpe gara hku karum ya ai kun?

⁸ Chyum Laika hpe ayan hti nna, Yehowa nang hpe tsawra ai lam madun dan ai lam ni hpe myit sawn sumru u. Nta masha ni tsun ai ga a majaw myit daw nga ai nauna Bi-anka ndai hku sanglang dan ai: “Ngai zawn masa lam hpe hkrum wa ai Chyum Laika hta lawm ai labau hte Yehowa a mayam ni a prat labau hpe hti nna, myit sawn sumru ai gaw ngai hpe gaja wa karum ya ai.” Nkau gaw shalan shabran lam jaw ai Chyum daw ni hpe matsing hkra galaw da ai. Shakawn Kungdawn 27:10 hte Esaia 41:10 zawn re ai Chyum daw ni re. Nkau gaw zuphpawng a matu hkyen lajang ai (sh) Chyum Laika hkaja ai shaloi, nsen bang da ai ni hpe madat ai. Dai gaw garen ai lam hpe yawm shangun ai ngu shanhte tsun ai.

9. Zuphpawng ni hpe lung ai gaw nang hpe gara hku akyu jaw ai kun?

⁹ Zuphpawng ayan lung na matu shakut u. Rai yang, zuphpawng lamang ni gaw nang hpe n-gun jaw ya nna, hpunau nauna ni hte mung grau hku hkau wa na re. (Heb 10:24, 25) Masine ndai hku tsun ai: “Ngai gaw grai kaya chye ai raitim, zuphpawng yawng hpe lung nna mahtai jaw na matu shakut ai. Dai gaw nawku hpung na hpunau nauna ni hte grau ni htep ai ngu hkamsha shangun ai.”

10. Sadi dung ai Hkristan ni hte hku hkau lam ngang kang hkra hpa majaw galaw ging ai kun?

¹⁰ Sadi dung ai Hkristan ni hte hku hkau hkra galaw u. Nawku hpung hta nang hte asak, shingdu labau n bung ai ni raitim pyi, nang sharin la lu ai ni hte manang galaw u. “Aprat kaba ai ni” hta hpaji byeng-ya nga ai ngu Chyum Laika hta shadum da ai. (Yob 12:12) Asak kaba ai ni mung, sadi dung ai asak kaji ai  ni kaw na sharin la lu ai. Dawi hte Yonahtan gaw asak grai gang ai raitim, hku hkau wa ai. (1 Sa 18:1) Shan hta yak la ai chyam dinglik lam ni nga ai raitim, Yehowa hpe nawku lu hkra shada da karum ya ai. (1 Sa 23:16-18) Ndai laman nta masha ni hta Sakse Hkam shi langai sha naw rai shi ai nauna Irena ndai hku tsun ai: “Hpunau nauna ni gaw nye a wenyi kanu kawa ni hte kahpu kanau ni byin wa ai. Anhte a ra kadawn ai lam hpe madi shadaw na matu, shanhte hpe Yehowa akyu jashawn lu ai.”

11. Hku hkau lam ngang kang wa na matu hpa galaw ra ai kun?

¹¹ Nang gaw kaya chye ai wa rai yang, manang nnan tam na matu yak na re. Ninghkap ai lam ni nga tim, teng man lam hpe sharin la wa ai, kaya chye ai nauna Retna ndai hku tsun ai: “Wenyi kun dinghku nta masha ni a madi shadaw lam ra ai hpe ngai chye ai.” Marai langai ngai hpe na a hkamsha lam ni tsun dan na matu yak chye ai. Raitim, dai zawn tsun shaga ai gaw hku hkau lam a npawt rai nga ai. Manang ni gaw nang hpe n-gun jaw na, karum madi shadaw ya na re. Rai ti mung, shanhte gara hku madi shadaw ya mai na hpe chye hkra gaw, nang galaw ra ai.

12. Kaja ai manang tam lu hkra hkaw tsun bungli gaw gara hku karum ya ai kun?

¹² Hkristan hpunau nauna ni hte hkaw tsun bungli hta arau shang lawm ai gaw, manang galaw na matu kaja htum lam langai re. Hkaro ndai hku tsun ai: “Nauna ni hte arau hkaw tsun bungli hte kaga magam bungli ni hta shang lawm ai shaloi, kaja ai manang grai law hkra hpe ngai lu wa ai. Dai manang ni hpe akyu jashawn nna Yehowa gaw ngai hpe karum ya wa ai.” Sadi dung ai Hkristan ni hte hku hkau lam ngang kang hkra galaw ai gaw kaja htum re. Garen ai ngu ai hkamsha lam ni hpe tawt lai lu hkra Yehowa gaw dai zawn manang ni hpe akyu jashawn nna nang hpe karum ya na re.​—Gsh 17:17.

13. Nawku hpung hta nga ai ni yawng hta gara lit nga ai kun?

¹³ Kadai mung ngai hkra re ngu n hkamsha hkra, nawku hpung hta nga ai ni yawng gaw tsawra myit madun nna, simsa ai shara byin hkra galaw na lit nga ai. (Yhn 13:35) Anhte tsun ai, galaw ai lam ni hte kaga ni hpe n-gun jaw lu ai. Nauna langai ndai hku tsun ai: “Teng man lam hpe ngai hkaja ai shaloi, nawku hpung gaw nye a dinghku byin wa ai. Shanhte n madi shadaw ya yang, ngai Yehowa Sakse langai byin wa na n re.” Teng man lam hta langai hkrai sha rai nga ai ni hpe, nawku hpung hta lawm ai ngu hkamsha hkra nang gara hku karum ya mai na kun?

14. Masha nnan ni hte manang byin hkra gara hku galaw mai na?

¹⁴ Manang galaw lu hkra nang maga na shawng shakut u. Nawku hpung hta na masha nnan ni hpe, kabu gara hte hkap tau la ai hku nna hpang mai ai. (Rom 15:7) Raitim, shachyen shaga ai daram sha n-ga galaw ra na re. Aten na wa ai hte maren hku hkau lam ngang kang hkra galaw ra ai. Dai majaw, masha nnan ni hpe myit madung hte myit lawm ai lam madun u. Shanhte a lam grai san ai hku n re ai sha, shanhte gara masa hte hkrum nga ai hpe chye hkra shakut u. Nkau gaw shanhte a hkamsha lam hpe tsun dan na matu yak ai. Dai majaw, hkamsha lam hpe tsun wa hkra atik anang hkum galaw. De a malai, ga san hpe hpaji rawng ai hku san nna, shanhte tsun dan wa ai shaloi myit galu let madat ya u. Ga shadawn, teng man lam hta gara hku du wa ai hpe san mai ai.

15. Nawku hpung hta nga ai kaga ni hpe kung hpan ai Hkristan ni gaw gara hku karum ya lu ai kun?

 ¹⁵ Kung hpan ai Hkristan ni hte laksan hku na myitsu salang ni gaw, nawku hpung hta nga ai ni yawng hpe myit lawm ai lam madun ai shaloi, wenyi lam hta rawt jat wa ai. Teng man lam hta nga ai kanu a bau maka ai hpe hkrum wa ai nauna Malisa ndai hku tsun ai: “Wenyi lam hta kawa ni hku na lanu lahku ya wa ai hpunau ni hpe grai chyeju dum ai. Ngai ga shaga mayu ai shaloi, marai langai ngai gaw aten jaw ya ai.” Chyum Laika sharin ya ai wa gaw teng man lam kaw na pru mat ai shaloi, kau da hkrum ai ngu hkamsha wa ai ramma hpunau Mawrisio ndai hku tsun ai: “Myitsu salang ni ngai hpe lanu lahku ai majaw, karum shingtau lam grai lu wa ai. Shanhte ayan na ngai hte ga shaga ai. Hkaw tsun bungli hta ngai hte arau shang lawm ai. Shanhte Chyum Laika hkaja nna chye wa ai wenyi sutgan ni hpe tsun dan ai. Ngai hte pyi ginsup ya ai.” Malisa hte Mawrisio lahkawng yan gaw aten hpring magam hta shang lawm nga sai.

16-17. Gara lam ni hku nna kaga ni hpe tatut karum ya lu ai kun?

¹⁶ Tatut karum ya u. (Gal 6:10) Nta masha ni hte tsan ai shara hta sasana magam gun nga ai Leo ndai hku tsun ai: “Gaja wa ra nga ai aten hta karum ya ai kaji kajaw lam ni gaw grai akyu jaw ya ai. Ngai mawdaw adawt ai shani hpe naw dum ai. Nta de ngai bai du ai shaloi grai myit ru taw ai. Yan la langai gaw shat arau sha na matu ngai hpe saw shaga ai. Anhte hpa sha wa ai hpe gaw ngai n dum sai. Raitim, shanhte madun ai tsawra myit hpe gaw ngai dum nga ai. Dai hpang hta ngai grai nga pyaw mat ai.”

¹⁷ Ginwang zuphpawng, ninghtawn zuphpawng ni hta hpunau nauna ni hte kanawn mazum ai, lamang hte seng nna bawng ban ai hpe anhte grai ra sharawng ga ai. Raitim, Hkaro ndai hku tsun ai: “Ginwang zuphpawng hte ninghtawn zuphpawng ni hta grai garen ai ngu na ngai hkamsha ai.” Hpa majaw kun? “Nye makau hta hpunau nauna ni tsa hku, hkying hku nga ai raitim, shanhte gaw shanhte a nta masha ni hte sha dung nga ai. Dai hpe mu ai shaloi ngai hkrai sha re ngu hkamsha ai” ngu shi tsun ai. Nkau gaw shanhte tsawra ai ni n nga mat ai hpang, shawng nnan lang ginwang zuphpawng hte ninghtawn zuphpawng ni hpe lung na matu yak nga ai. Dai zawn masa lam ni hte hkrum nga ai ni hpe nang chye ai kun?  Chye ai nga yang, du wa na zuphpawng kaba ni hta, na a nta masha ni hte rau shang lawm na matu saw shaga u.

18. Manam daw ai shaloi, 2 Korinhtu 6:11-13 hpe gara hku hkan sa mai ai kun?

¹⁸ Aten jaw u. Kanawn mazum lam galaw ai shaloi, n bung ai hpunau nauna ni hpe shalawm u. Laksan hku na gaw langai hkrai rai nga ai ngu hkamsha nga ai ni hpe re. Dai zawn re ai ni a matu anhte a myit masin hpe dam lada ai hku hpaw da mayu ga ai. (2 Korinhtu 6:11-13 hpe hti u.) Malisa ndai hku tsun ai: “Manang ni gaw shanhte hpang sa chyai na matu saw shaga ai, shanhte a nta masha ni hte rau bu hkawm na matu saw shaga ai shaloi, ngai grai pyaw ai.” Na a nawku hpung hta nang manam daw mai na marai langai ngai nga ai kun?

19. Gara aten ni hta hpunau nauna ni hte arau nga ya ai gaw shanhte a matu akyu nga ai kun?

¹⁹ Hkristan hpunau nauna ni gaw arau kanawn mazum ai hpe grai manu shadan ai. Nkau gaw shut shai ai poi lamang nhtoi ni hta, nta masha ni hte arau nga ra taw ai. Nkau bai rai yang, tsawra ai marai langai n nga mat ai ladu hkrum nhtoi ni hta grai yawn nga ma ai. Dai zawn mayak mahkak ni hpe tawt lai ra nga ai hpunau nauna ni hpe anhte aten jaw ai gaw, shanhte hpe myit tsang ai lam madun nga ai re.​—Hpl 2:20.

20. Yesu tsun wa ai ga ni re ai Mahte 12:48-50 gaw anhte hpe gara hku karum ya lu ai kun?

²⁰ Tinang hkrai sha re ngu Hkristan ni hpe hkamsha shangun ai lam amyu myu nga ai. Raitim, Yehowa gaw dai hkamsha lam hpe chye ai lam anhte galoi n malap ging ai. Anhte ra ai lam ni hpe madi shadaw na matu, Hkristan hpunau nauna ni hpe chyahkring hkring Yehowa akyu jashawn ai. (Mahte 12:48-50 hpe hti u.) Wenyi kun dinghku hpe kaja htum madi shadaw ai hku na Yehowa lajang da ya ai lam hpe chyeju dum ai lam anhte madun mai ai. Kalang lang anhte hta hkamsha ai lam ni nga chye ai. Raitim, Yehowa gaw anhte hte arau re ai majaw anhte hkrai sha n re.