1. Yehowa gaw shi a masha ni kaw na hpa hpe mu ya ai kun?

YEHOWA KARAI KASANG gaw, “shi a amyu masha ni hpe ra sharawng ai.” (Shk 149:4, NW) Dai gaw anhte hpe grai kabu shangun ai n re i! Yehowa gaw anhte a kaja ai atsam ningja ni hpe mu ai, kaja ai masha byin wa lu ai hpe shi chye nna, shi hpang de lau la ai. Shi hpe matut sadi dung na nga yang, htani htana hku hkau lu na re.​—Yhn 6:44.

2. Masha nkau gaw Yehowa shanhte hpe tsawra ai lam kam na matu hpa majaw yak chye ai kun?

² ‘Yehowa gaw shi a amyu masha ni hpe uhpung hku nna tsawra ai hpe ngai chye ai. Raitim, ngai hpe Yehowa tsawra ai hpe gara hku kam lu na kun?’ ngu nna masha nkau tsun chye ai. Hpa majaw dai hku tsun chye ai kun? Ma prat hta yawn hpa lam ni hkrum wa ai nauna Oksana * ndai hku tsun ai: “Ngai hkalup hkam ngut nna, ningshawng galaw hpang ai shaloi grai pyaw ai. 15 ning na ai hpang, ma prat hta hkrum wa ai yawn hpa lam ni hpe bai dum wa ai. Yehowa a myiman sum mat sai, shi a tsawra myit hte n gingdan sai ngu myit wa ai.” Ma prat hta manghkang law law hkrum wa ai ningshawng nauna Yua mung ndai hku tsun ai: “Yehowa hpe myit pyaw shangun mayu ai majaw, nye a prat hpe ap nawng kau ai. Raitim, Yehowa ngai hpe galoi mung tsawra na n re ngu nna ngai shadu ai.”

3. Ndai sumhpa hta hpa lam hpe bawngban mat na kun?

³ Dai sadi dung ai Hkristan nauna yan zawn, tinang gaw Yehowa hpe tsawra tim, Yehowa gaw tinang hpe tsawra ai kun? ngu nna ntsen ai myit nga chye ai. Yehowa gaja wa lanu lahku ai ngu ai hpe hpa majaw kam ra ai kun? Yehowa n tsawra ai ngu hkamsha nga yang, nang hpe hpa gaw karum ya lu na kun? Dai ga san ni a mahtai hpe yu yu ga.

4. Yehowa a tsawra myit hpe ntsen ai myit nga ai gaw hpa majaw shoihpa nga ai kun?

⁴ Tsawra myit gaw grai atsam nga ai. Yehowa a tsawra myit hte madi shadaw ya ai hpe kam na nga yang, prat hta mayak mahkak ni hkrum tim, myit masin mahkra hte Yehowa hpe nawku dawjau lu na re. Raitim, Karai Kasang lanu lahku ai hpe ntsen ai myit nga yang, anhte n-gun yawm mat na re. (Gsh 24:10) Dai zawn n-gun yawm wa na, Karai a tsawra myit hpe ntsen ai myit nga wa na nga yang, Satan gasat ai shaloi aloi sha hkrat sum mat na re.​—Ehp 6:16.

5. Karai a tsawra myit hpe n tsen ai myit nga ai nkau mi hta hpa byin chye ai kun?

⁵ Dai ni aten na sadi dung ai Hkristan nkau mi gaw, ntsen ai myit a majaw, wenyi lam hta gawngkya wa ai. Myitsu salang Jim ndai hku tsun ai: “Behtela hta magam gun nga tim, maigan amyu ga shaga ai nawku hpung hta kabu gara let shang lawm nga tim, nye a sak jaw ai lam hpe Yehowa gaja wa hkap la na kun? ngu nna myit wa ai. Nye a akyu hpyi ga ni hpe Yehowa madat ya na kun? ngu nna pyi kalang lang myit wa ai.” Aten hpring magam gun nga ai nauna Iba ndai hku tsun ai: “Yehowa a tsawra myit hpe ntsen ai myit nga ai gaw Yehowa hpe nawku dawjau ai lam yawng hta n kaja ai akyu ni byin shangun ai hpe ngai chye wa ai. Karai a magam gun mayu ai myit mat mat chye nna, Yehowa hpe kabu gara let nawku daw jau ai myit hpe mung sum mat shangun chye ai.” Myitsu salang langai rai nna, aten galu ningshawng galaw nga ai Maike ndai hku tsun ai: “Nang hpe Karai Kasang lanu lahku ya nga ai ngu ai hpe n kam ai nga yang, shi hte gau ngwi ngwi tsan mat na re.”

6. Karai a tsawra myit hpe ntsen ai myit nga wa yang, hpa galaw ra ai kun?

⁶ Yehowa a tsawra myit hpe ntsen ai myit nga ai gaw, wenyi lam hpe hkra machye shangun chye ai hpe dai mahkrum madup ni gaw madun dan nga ai. Dai zawn ntsen ai myit ni nga wa yang, anhte hpa galaw ging ai kun? Kalang ta shaw kau ra ai. Dai zawn myit wa yang, Karai Kasang a simsa ai lam gaw, anhte a myit masin hte myit mang ai lam hpe bau sin ya na matu Yehowa kaw karum hpyi u. (Shk 139:23; Hpl 4:6, 7) Dai zawn myit ai gaw nang hkrai sha n re. Sadi dung ai kaga hpunau nauna ni mung, dai zawn hkamsha lam hpe ninghkap nga ra ai. Lai wa sai aten na Yehowa a mayam ni pyi, dai zawn hkamsha lam ni hpe ninghkap wa ai. Kasa Pawlu a mabyin kaw na sharin la lu ai lam ni hpe yu yu ga.

7. Pawlu gaw gara manghkang ni hpe hkrum nga ai kun?

⁷ Lit ni grai law nna, dai ni yawng hpe n lu hparan ai majaw, lit li ai ngu kalang lang hkamsha ga ai kun? Rai yang, Pawlu hpe nang chye na ya na re. Shi gaw nawku hpung langai a matu sha n-ga, nawku hpung yawng a matu myit tsang nga ai. (2 Ko 11:23-28) Hkamja lam manghkang a majaw, na a ngwi pyaw lam mat mat nga ai kun? Pawlu gaw, “hkum shan hta ju ai aju” a majaw, grai myitru myit tsang nga ai. Dai gaw hkam ja lam manghkang mung rai chye ai. Dai hpe mai mat hkra shi galaw mayu ai. (2 Ko 12:7-10) N hkum tsup ai lam ni a majaw, nang myit daw nga ai kun? Pawlu mung kalang lang dai hku hkamsha ai. Tinang a n hkum tsup ai lam hpe galoi mung gasat ra nga ai majaw, “chyum sha hkrum ai ngai wa e” ngu nna tinang hkum tinang tsun wa ai.​—Rom 7:21-24.

8. Manghkang ni hpe hparan na matu Pawlu hpe hpa gaw karum ya wa ai kun?

⁸ Myit daw shangun ai masa lam ni, chyam dinglik ai lam ni hkrum tim, Pawlu gaw Yehowa hpe matut nawku daw jau ai. Shi hpe hpa gaw n-gun jaw ya ai kun? Tinang hta n hkum tsup ai lam ni nga ai hpe atsawm hkap la ai. Raitim, gawng malai jahpu hpe kamsham ai myit gaw grai ngang kang ai. Yesu hpe “kam sham ai ni nlang hte gaw, . . . htani htana asak lu la” na ngu ai ga sadi hpe mung kam ai. (Yhn 3:16; Rom 6:23) Pawlu gaw gawng malai jahpu hpe teng sha kam wa ai. Mara kaba ni galaw hkrup nna myit malai lu ai nga yang, shanhte hpe Yehowa mara raw ya na matu jin jin re ai hpe shi kam ai.​—Shk 86:5.

9. Galati 2:20 hta lawm ai Pawlu a ga ni kaw na hpa sharin la lu ai kun?

⁹ Hkristu hku nna madun wa ai Karai a tsawra myit a atsam hpe mung Pawlu kam ai. (Galati 2:20 hpe hti u.) Dai Chyum daw a jahtum na n-gun lu hpa ga si ni hpe sadi yu u. “Ngai hpe tsaw ra nna, nye a matu mara shi hkum dai shi ap kau ai Karai Kasang a Kasha” re ngu nna Pawlu tsun wa ai. ‘Hpunau nauna ni hpe Yehowa tsawra ai hpe ngai chye ai. Raitim, ngai hpe gaw tsawra lu na n re’ ngu tsun ai hku nna Karai a tsawra myit hpe shadawn sharam sha nga hkra n galaw kau ai. Pawlu gaw, Roma masha ni hpe “anhte yubak kap ai ni naw rai nga ga yang, Hkristu gaw anhte a matu mara si hkam ai” ngu nna bai shadum ya ai. (Rom 5:8) Karai a tsawra myit gaw, shadawn sharam n nga ai.

10. Roma 8:38, 39 kaw na hpa sharin la lu ai kun?

¹⁰ Roma 8:38, 39 hpe hti u. Pawlu gaw, Karai a tsawra myit a atsam hpe tsep kawp kam ai. Gara lam mung “Karai Kasang a tsaw ra ai hta na, anhte hpe n jahka kau lu” ai ngu nna shi ka wa ai. Israela ni hpe myit galu let  Yehowa kanawn mazum wa ai hpe Pawlu chye ai. Shi hpe Yehowa matsan dum myit madun wa ai hpe mung chye ai. Dai Chyum daw hta lawm ai Pawlu a ga ni hpe ndai hku mung maram yu mai ai: ‘Nye a matu Yehowa gaw Kasha hpe pyi si hkam shangun sai wa, shi a tsawra myit hpe ntsen ai myit naw nga ging ai kun?’​—Rom 8:32.

11. 1 Timohti 1:12-16 hta lawm ai mara ni hpe kasa Pawlu galaw wa tim, Karai Kasang shi hpe tsawra ai ngu ai hpe hpa majaw kam ai kun?

¹¹ 1 Timohti 1:12-16 hpe hti u. Pawlu gaw lai wa sai aten hta, galaw wa ai lam ni a majaw, grai hkamsha ai aten ni mung nga ai. Shi hkum shi “yubak kaba htum ai wa” ngu nna tsun wa ai. Tengman ai tara hpe garai n chye shi yang Pawlu gaw mare langai hpang langai sa nna, Hkristan ni hpe zingri zingrat wa ai. Nkau mi hpe htawng jahkrat ai. Nkau mi hpe gaw sat na matu myit hkrum wa ai. (Kas 26:10, 11) Shi a majaw sat hkrum wa ai kanu kawa ni a kasha hte hkrum yang, shi gara hku hkamsha na hpe shingran yu u. Shi a mara ni hte seng nna grai myit malai lu ai. Raitim, lai wa sai aten ni hpe n galai shai lu ai hpe gaw chye ai. Hkristu gaw shi a matu si hkam wa sai hpe hkap la ai majaw, ndai hku lu tsun ai: “Karai Kasang a chyeju majaw ngai rai nga nngai.” (1 Ko 15:3, 10) Hpa sharin la lu ai kun? Hkristu gaw na a matu si hkam wa ai hpe hkap la nna, Yehowa hte hku hkau lu hkra lam hpaw wa ai hpe mung kam ra ai. (Kas 3:19, 20) Yehowa Sakse byin ngut sai aten hta raitim, garai n byin shi ai aten hta raitim, anhte galaw lai wa ai mara ni gaw Karai Kasang a matu n ahkyak ai. Karai Kasang a matu ahkyak htum gaw, ya aten hte htawm hpang hta anhte galaw na lam ni re.​—Esa 1:18.

12. 1 Yawhan 3:19, 20 hta lawm ai ga ni gaw, manu n dan ai, tsawra hkrum na matu n ging dan ai ngu hkamsha ai shaloi, gara hku karum ya lu ai kun?

¹² Mara raw dat hkrum na matu, Yesu si hkam wa ai hte seng nna nang myit ai shaloi, ‘dai kumhpa hte ngai n ging dan ai’ ngu tsun  chye na re. Hpa majaw dai hku hkamsha ai kun? N hkum tsup ai anhte a myit masin gaw, hkalem chye nna manu n dan ai (sh) tsawra hkrum na matu n ging dan ai ngu nna hkamsha shangun ai. (1 Yawhan 3:19, 20 hpe hti u.) Dai hku myit wa yang, “Karai Kasang gaw anhte a myit hta grau kaba nga ai” ngu ai hpe dum ra ai. Sumsing Kawa a tsawra myit hte mara raw ya ai lam gaw, anhte myit masin hta rawng nga ai n kaja ai hkamsha lam hta na grau n-gun ja ai. Anhte hpe Yehowa tsawra ai hpe kam ra ai. Dai hku kam na matu, Chyum Laika hpe galoi mung hkaja ra ai. Chyahkring hkring akyu hpyi ra ai. Sadi dung ai shi a masha ni hte galoi mung kanawn mazum ra ai. Dai hku galaw na matu hpa majaw ahkyak ai kun?

13. Chyum Laika hkaja ai gaw anhte hpe gara hku karum ya lu ai kun? (“ Chyum Laika Gaw Shanhte Hpe Karum Ya” ngu ai lawk hpe mung yu u.)

¹³ Chyum Laika hpe shani shagu hkaja u. Rai yang, Yehowa a atsam ningja ni hpe grau chye wa na re. Nang hpe kade daram tsawra ai hpe mung chye wa na re. Chyum Laika lam langai hpe shani shagu myit sawn sumru na nga yang, na a myit masin hpe ‘mye shading ya lu’ ai hpe asan sha chye wa na re. (2 Tm 3:17) Manu n dan ai ngu tinang hkum tinang hkamsha nga ai myitsu salang Kebin ndai hku tsun ai: “Shakawn 103 hpe hti nna, myit sawn sumru ai gaw, ngai hte seng nna Yehowa gara hku myit ai hpe chye na wa ai. Nye a myit mang ai lam hpe shading sharai ya na matu karum ya wa ai.” Shawng hta tsun wa ai Iba ndai hku bai tsun ai: “Shana maga hta, Yehowa a myit mang ai lam hpe myit sawn sumru na matu aten la ai. Dai gaw ngai hpe myit simsa lam jaw nna, makam masham hpe shangang shakang ya ai.”

14. Akyu hpyi ai gaw gara hku karum ya lu ai kun?

¹⁴ Chyahkring hkring akyu hpyi u. (1 Ht 5:17) Marai langai ngai hte hku hkau mayu yang, shi hte chyahkring hkring ga shaga ra nna, tinang a hkamsha lam hpe mung tsun dan ra ai. Yehowa hte hku hkau mayu yang mung dai hte maren galaw ra ai. Anhte a hkamsha lam ni, myit mang lam ni, myit tsang lam ni hpe akyu hpyi nna tsun dan ai gaw, shi anhte hpe tsawra ai lam chye nna, shi hpe kam ai lam madun nga ai re. (Shk 94:17-19; 1 Yh 5:14, 15) Yua mung ndai hku bai tsun ai: “Ngai akyu hpyi ai shaloi, lani mi laman galaw hkawm sa wa ai lam ni hpe tsun dan ai daram sha n re. Ngai myit ai lam ni, hkamsha ai lam ni hpe tsun dan ai. Yehowa hpe kungmani lawban langai zawn n re ai sha, kasha ni hpe gaja wa tsawra ai Kawa langai hku nna mu wa ai.”​—“ Nang Hti Ngut Sai Kun?” ngu ai lawk hpe yu u.

15. Yehowa gaw anhte hpe myit lawm ai lam gara hku madun ai kun?

¹⁵ Sadi dung ai manang ni hte kanawn mazum u. Shanhte gaw Yehowa kaw na kumhpa re. (Yak 1:17) Tsawra myit hpe galoi mung madun nga ai hpunau nauna ni hpe lajang da ya ai hku  nna sumsing Kawa gaw, anhte hpe myit lawm ai lam madun ai. (Gsh 17:17) Kolose nawku hpung de ka ai laika hta, Pawlu gaw shi hpe karum ya wa ai Hkristan ni hpe “grai karum madi shadaw ya ai ni” ngu nna tsun da ai. (Kol 4:10, 11, NW) Yesu Hkristu pyi, karum madi shadaw lam hpe ra wa ai. Lamu kasa ni hte shinggyim masha ni kaw na lu la ai madi shadaw lam a matu mung chyeju dum wa ai.​—Luk 22:28, 43.

16. Yehowa hte hku hkau lu hkra sadi dung ai manang ni gaw gara hku karum ya lu ai kun?

¹⁶ Yehowa a kumhpa re ai sadi dung ai manang ni kaw na akyu hpring tup lu la nga ai kun? Kunghpan ai manang hpe anhte a myit tsang ai lam ni hpe tsun dan ai gaw, gawngkya ai lam n re. Dai gaw anhte hpe makawp maga ya lu ai. Hpunau Jim ndai hku mung bai tsun ai: “Kunghpan ai Hkristan ni hte kaja ai hku hkau lam nga ai gaw, karum shingtau lam lu ai. N kaja ai hkamsha lam ni nga wa ai shaloi, shanhte gaw myit galu let madat ya ai. Ngai hpe tsawra ai lam tsun dan ai. Shanhte a majaw, Yehowa a tsawra myit hte ngai hpe lanu lahku ai lam chye wa ai.” Hpunau nauna ni hte matut nna hku hkau nga na matu grai ahkyak ai.

17-18. Kade a ga hpe madat ra ai kun? Hpa majaw kun?

¹⁷ Satan gaw anhte kaja ai hpe shakut nna galaw nga ai hpe asum jaw kau shangun mayu ai. Yehowa gaw anhte hpe n tsawra ai, hkye la na matu n ging dan ai ngu kam shangun mayu ai. Anhte chye wa sai hte maren, dai lam ni gaw n teng ai.

¹⁸ Yehowa nang hpe tsawra ai. Shi a man hta nang gaw grai manu dan ai. Shi a ga madat mara yang, Yesu zawn, shi a tsawra myit hpe galoi mung hkamsha lu na re. (Yhn 15:10) Satan tsun ai (sh) tinang hkum tinang mara shagun chye ai myit masin tsun ai hpe mung hkum madat. Anhte langai hpra hpe kaja ai hku mu mada ai Yehowa a ga hpe sha madat u. Yehowa gaw, nang hte hpawn “shi a amyu masha ni hpe ra sharawng ai” hpe kam u.