LAI WA sai shaning, mungkan ting hta hkying hku law ai hpunau ni gaw myitsu salang hte magam tau ni hku nna lit shatsam hkrum ma ai. Nang gaw shanhte kaw nna langai rai yang, Yehowa hte hpunau nauna ni a matu ndai lam nnan hku nna sak jaw lu ai majaw nang grai kabu na re.

Nang hta myit tsang lam loi nga na re. Asak kaji ai myitsu salang Jesan ndai hku tsun ai: “Lit shatsam hkrum ai shaloi, ngai na lit nnan hte seng nna grai myit tsang wa ai.” Mawshe yan Yeremia mung, Yehowa jaw ai lit nnan hpe lu la ai shaloi, atsam n nga ai ngu hkamsha wa ai. (Pru Mat 4:10; Yeremia 1:6) Nang mung dai hku hkamsha yang, tinang hkum tinang kam ai myit nga na matu hte matut rawt jat nga na matu gara hku galaw mai na kun? Timohti a kasi ningli kaw nna sharin la lu na re.​—⁠Kasa 16:1-3.

Kasa Pawlu hte arau hpung kawan magam hta shang lawm hpang ai shaloi, Timohti a asak gaw 20 ning daram sha naw rai na re. Magam lit gun na matu saw shaga hkrum ai shaloi, shi asak grai naw kaji ai. Dai majaw shi gaw kaga ni hpe sharin achyin ya na matu hte hpaji jaw na matu atsam n hpring ai ngu hkamsha na re. (1 Timohti 4:11, 12; 2 Timohti 1:1, 2, 7) Raitim, matut rawt jat hkra shakut wa ai. Shi ning na ai hpang, Hpilipi hta nga ai hpunau nauna ni hpe Pawlu ndai hku tsun wa ai: “Nanhte hpang de Timohti hpe alawan shangun dat na, dai Madu Yesu hta e ngai myit mada nga nngai.” Pawlu hpa majaw dai hku tsun ai kun? Shi ndai hku sang lang dan ai: “Shi zawn nanhte a lam hpe htep lahti tsang ai masha kaga, langai mi mung ngai n lu nngai.”​—⁠Hpilipi 2:19, 20.

Myitsu salang ni a matu Timohti a kasi gaw hpa majaw grai kaja ai kun? Lam yan kru hpe yu yu ga.

1. Masha ni hpe lanu lahku ai. Hpilipi kaw nga ai hpunau nauna ni hpang de Pawlu laika ka ai shaloi, Timohti gaw shanhte hpe gaja wa myit “tsang ai” ngu tsun wa ai. (Hpilipi 2:20) Timohti gaw hpunau nauna ni hpe Yehowa hte matut nna hku hkau shangun mayu ai. Dai majaw, shanhte hpe karum ya na matu shi a ahkying aten hte n-gun atsam hpe sharawng awng let sak jaw wa ai.

Bu hkawm na masha ni hpe mawdaw ntsa htaw lu na hta, mawdaw daru de aten dep du lu hkra sha shakut ai mawdaw la zawn n byin hkra sadi u. Myitsu salang hku nna magam gun nga ai 20 ning jan rai sai hpunau Wiliyam gaw myitsu salang hku nna lit nnan shatsam hkrum ai hpunau ni hpe ayan na ndai hku tsun ai: “Hpunau nauna ni hpe tsawra u. Magam bungli ni ngut kre lu na hta hpunau nauna ni a ra kadawn ai lam hpe karum na matu myit maju jung u.”

2. Yehowa a magam hpe shawng tawn ai. “Hkristu Yesu hte seng ai hpe n re ai sha, tinang hte seng ai hpe sha tam nga” ai ni hte Timohti n bung ai lam Pawlu tsun wa ai. (Hpilipi 2:21) Shi makau hta nga ai hpunau ni gaw, shanhte a lam hpe sha grai myit maju jung nga ai hpe Pawlu sadi hkrup ai. Kalang lang, shanhte gaw Yehowa hpe magam gun na hta grau nna tinang a myit lawm ai hpe sha shawng tawn ma ai. Timohti gaw dai zawn n re. “Ngai nga nga nngai, ngai hpe shangun dat e” ngu nna Esaia tsun wa ai zawn, Yehowa a magam hpe grau nna gun hpai lu na ahkaw ahkang hpe tam ai.​—⁠Esaia 6:8.

Nawku hpung a ra kadawn ai lam hte tinang a ra kadawn ai lam hpe lajang ai hta rap ra hkra gara hku galaw mai na kun? Shawng nnan, Pawlu a ndai hpaji jaw ga hpe hkan sa u: “Grau ahkyak ai lam hpe ginhka chye hkra galaw u.” (Hpilipi 1:10, NW) Yehowa a magam hpe shawng tawn u. Bai nna, ahkying aten hte n-gun atsam ni hpe ladu lai hkra akyu jashawn ra ai bungli ni hpe koi u. Pawlu gaw Timohti hpe ndai hku tsun wa ai: “Brang ram a myit kayut ai lam koi gam u: . . . ding hpring ai, kam sham ai, tsaw ra ai hte ngwi pyaw ai hpe, hkan shachyut nga u.”​—⁠2 Timohti 2:22.

3. Yehowa a magam hta shakut shaja ai.  Timohti hte seng nna Pawlu ndai hku tsun wa ai: “Kasha gaw kawa hpe shadaw ai zawn, dai kabu gara shiga a lam hta ngai hte rau shakut sharang nga ai.” (Hpilipi 2:22) Timohti gaw n lagawn ai. Pawlu hte arau shakut shaja let magam gun ai majaw, shan a hku hkau lam ngang kang ai.

Dai ni na aten, Yehowa a uhpung hta galaw ra ai magam bungli grai law hkra nga ai. Dai magam bungli ni gaw myit dik lam lu shangun nna, hpunau nauna ni hte hku hkau shangun ai. Dai majaw, “Madu a bungli hta tut nawng e tsam mari shakut sharang nga nga mu.”​—⁠1 Korinhtu 15:58.

4. Sharin la wa ai hpe tatut hkan sa ai. Timohti hpang de Pawlu ndai hku ka wa ai: ‘Nang mahtang gaw, nye a sharin shaga ai lam, nye a lai len, maw mawn ai hku, kam sham ai lam, myit galu kaba ai, tsaw ra ai, shakut sharang ai . . . hta htep lahti hkan nang nit dai.’ (2 Timohti 3:10, 11) Timohti gaw sharin la wa ai lam ni hpe tatut hkan sa ai majaw, lit ni grau nna lu la wa ai.​—⁠1 Korinhtu 4:17.

Nang kasi la lu ai mahkrum madup nga ai myitsu salang langai ngai nga na re. Myitsu salang galaw ai shaning grai na sai hpunau Tom gaw, shi hpe myit lawm ai lam madun nna shaman shakyang ya wa ai myitsu salang langai hpe naw dum ai. Shi ndai hku tsun ai: “Ngai gaw shi hpe ayan hpaji hpyi nna shi a hpaji jaw ga hpe hkan sa ai. Dai gaw tinang hkum tinang kam ai myit nga wa hkra karum ya ai.”

5. Tinang hkum tinang matut nna shaman shakyang ai. Timohti hpe Pawlu ndai hku hpaji jaw wa ai: “Tara hkungga chye hkra bandung da nna, tinang hkum tinang shaman shakyang u.” (1 Timohti 4:7, NW) Ginsup ninghkrin langai hta sara nga tim, tinang hkrai mung matut nna shaman shakyang ra ai. Timohti hpe Pawlu ndai hku n-gun jaw wa ai: “Ngai sa du ai du hkra laika hti yu nna shadum shahprang ai hte sharin shaga ai hta, a shaja nga u. . . . Na a kung hpan wa ai nyan masha mahkra a man e dan leng wa u ga, ndai lam hte hpe hkan shachyut nna, dai hta sha a manoi nga u.”​—⁠1 Timohti 4:13-15.

Na a atsam ningja hpe matut nna rawt jat hkra galaw ra ai. Chyum Laika hpe shakut shaja let hkaja ra ai. Uhpung kaw nna matsun ai hpang jahtum lam matsun ni hte maren galaw ra ai. Tinang hkum tinang ladu lai hkum kam hpa u. Gara masa hpe raitim sawk sagawn ai lam atsawm n galaw ai sha, hparan lu ai mahkrum madup grai law hkra nga ai ngu myit ai gaw shut ai. Timohti zawn, “na a hkum hpe mung, na a sharin shaga ai lam hpe mung, a sadi nga u.”​—⁠1 Timohti 4:16.

6. Yehowa a chyoi pra ai wenyi hpe kam hpa ai. Timohti a magam lit hte seng nna tsun ai shaloi, shi hpe Pawlu ndai hku shadum wa ai: “Nang hpe ap ya da ai aya kaja hpe, anhte hta rawng nga ai Chyoi pra ai Wenyi hte, a mahkyu nga u.” (2 Timohti 1:14) Timohti gaw Karai Kasang a chyoi pra ai wenyi hpe kam hpa ra ai.

Myitsu salang galaw nga ai shaning grai law sai hpunau Daw Ne ndai hku tsun ai: “Lit shatsam hkrum ai hpunau ni gaw Karai Kasang hte hku hkau lam hpe manu shadan ra ai. Dai zawn manu shadan ai ni gaw ‘n-gun bai jat’ wa na re. Karai Kasang a chyoi pra ai wenyi lu na matu akyu hpyi nna wenyi asi si na nga yang, hpunau nauna ni a matu shanhte gaw shaman chyeju rai na re.”​—⁠Shakawn 84:7; 1 Petru 4:11.

Nang zawn sha, Yehowa a magam grau nna gun lu hkra shakut nga ai myitsu salang nnan ni hte magam tau nnan ni hpe mu lu ai majaw grai n-gun lu ga ai. Hpunau Jesan ndai hku tsun ai: “Myitsu salang langai hku nna magam gun lu nga ai gaw, grai law hkra sharin la lu nna, tinang hkum tinang kam ai myit mung grau rawt jat wa ai. Ya, ngai na magam lit hta ngai pyaw nga nna, laksan ahkaw ahkang hku nna mu mada ai.”

Nang matut nna rawt jat hkra shakut nga ai kun? Timohti a kasi ningli hpe nang hkan sa na nga yang, hpunau nauna ni a matu nang mung shaman chyeju langai rai na re.