Hebre 12:16 hta tsun da ai lam a majaw, meshia yu hkrat wa na gaw kasha alat aya hte seng ai ngu anhte shadu wa ai. Esaw gaw “tara n hkungga” ai majaw, Yaku hpe “shat ma mi a matu sha hte kasha alat” aya hpe jaw kau ai nga nna dai kaw tsun da ai. Dai majaw, Yaku gaw “kasha alat a akyu” lu la ai majaw, Meshia yu hkrat wa na ru sai hte seng nna laksan ahkaw ahkang lu wa ai ngu anhte sawn la wa ai.​—⁠Mahte 1:2, 16; Luka 3:23, 34.

Raitim, Chyum Laika hta lawm ai kaga labau ni hpe atsawm hkaja ai shaloi, Meshia yu hkrat wa na ru sai gaw, kasha alat n rai ra ai hpe chye lu ai. Dai hte seng ai labau nkau mi hpe yu yu ga.

Yaku yan Lea a kasha alat gaw Rubin re. Yaku hte Rahkela lu wa ai kasha alat gaw Yosep re. Rubin gaw hpye ai amu hpe galaw ai majaw, kasha alat a akyu n lu mat ai. Dai akyu hpe Yosep lu mat ai. (Ningpawt 29:31-35; 30:22-25; 35:22-26; 49:22-26; 1 Hkawhkam Labau 5:1, 2) Raitim, Meshia a ru sai gaw Rubin (sh) Yosep kaw nna n yu hkrat wa ai. Yaku yan Lea a kasha, Ma Tu mahtang re ai Yuda kaw nna yu hkrat wa ai.​—⁠Ningpawt 49:10.

Luka 3:32 hta Meshia yu hkrat wa ai ru sai, ban prat manga hpe madun da ai. Yawng gaw kasha alat ni rai ang ai. Ga shadawn, Bua a kasha Obed, Obed a kasha Yese re.​—⁠Ruhta 4:17, 20-22; 1 Hkawhkam Labau 2:10-12.

Yese a kasha Dawi gaw kasha alat n re. Shi gaw la kasha matsat kaw nna kaji htum ai wa re. Raitim, Dawi kaw nna Meshia yu hkrat wa ai re. (1 Samuela 16:10, 11; 17:12; Mahte 1:5, 6) Ngut nna, Meshia a jiwoi jiwa langai re ai Shawlumon  mung Dawi a kasha alat n re.​—⁠2 Samuela 3:2-5.

Raitim, kasha alat a akyu gaw, n ahkyak ai ngu tsun mayu ai n re. Kasha alat gaw kaga la kasha ni n lu la ai laksan ahkaw ahkang ni hpe lu la ai. Shi gaw dinghku hpe woi awn ai wa byin wa nna, sali wunli mung htam lahkawng lu la ai.​—⁠Ningpawt 43:33; Tara Jahprang 21:17; Yawshu 17:1.

Raitim, kasha alat aya hpe kaga la kasha ni hpe mai jaw ai. Abraham gaw Ishmaela hpe gawt shapraw kau ai shaloi, Ishmaela a kasha alat aya gaw Isak kaw du mat ai. (Ningpawt 21:14-21; 22:2) Anhte tsun wa sai hte maren, Rubin a kasha alat aya gaw Yosep kaw du mat ai.

Rai yang, kasa Pawlu gaw Hebre 12:16 hta gara lam hpe tsun nga ai kun? Dai hta ndai hku tsun da ai: “Shat ma mi a matu sha hte kasha alat a akyu dut kau ai Esaw zawn, shut hpyit ai hte tara n hkungga ai wa n rawng nga ma lit ga mung, hkap yu sadi nga mu.”

Ndai lam hta, Pawlu gaw Meshia a ru sai hte seng nna tsun nga ai n re. De a malai, Hkristan ni hpe sadi jaw nga ai re. Shi shanhte hpe ndai hku tsun ai: ‘Nanhte sa wa na matu, ding ai lam lajang mu.’ Rai yang, “Karai Kasang a chyeju hkam la” lu na re. Hpye ai amu galaw yang gaw Karai Kasang a chyeju hkam la lu na n re. (Hebre 12:12-16) Hpye ai amu galaw yang, Esaw hte bung mat na re. Esaw gaw “kasha alat a akyu” hpe manu n shadan ai sha, shi a ra marin ai lam hpe shawng tawn wa ai.

Dai aten na htung hku nga yang, laksan ahkaw ahkang hku nna, Esaw gaw kalang lang Yehowa hpang hkungga nawng na ahkang pyi lu na re. (Ningpawt 8:20, 21; 12:7, 8; Yoba 1:4, 5) Raitim, shi a ra marin ai lam hpe sha myit maju jung ai majaw, shapre wan mi hte, shi a laksan ahkaw ahkang re ai kasha alat aya hpe asum hkam kau ai. Abraham a aru arat ni hkrum ra na tsin-yam hte seng nna, Yehowa tsun da ai lam hpe koi mayu ai majaw mung rai na re. (Ningpawt 15:13) Shut shai ai nawku htung hpe nawku ai num lahkawng hpe hkungran la nna mung, kasha alat aya hpe manu n shadan ai lam shi madun wa ai. Dai zawn shi galaw ai lam gaw, shi kanu yan kawa hpe grai myit n pyaw shangun ai. (Ningpawt 26:34, 35) Teng man ai Karai Kasang hpe nawku ai num hpe hkungran la ai Yaku hte grai shai ai.​—⁠Ningpawt 28:6, 7; 29:10-12, 18.

Ndai Chyum Laika labau ni gaw Meshia a ru sai hte seng nna anhte hpe hpa sharin ya ai kun? Ru sai hta na nkau mi gaw kasha alat rai nna, nkau mi gaw n re. Ndai lam hpe Yuda masha ni chye na nna hkap la ai. Anhte gara hku chye lu ai kun? Hkristu gaw Yese a kasha kaji htum Dawi kaw nna yu hkrat wa na re nga nna shanhte hkap la wa ai.​—⁠Mahte 22:42, 43.