Htawm hpang hpe Yehowa tau chye ai ngu Chyum Laika hta asan sha tsun da ai. (Esa 45:21) Gara aten kaw nna chye ai, gara hku chye ai, kade daram chye hkra galaw ai hpe gaw, Chyum Laika hta ahkri ahkrai n tsun da ai. Dai majaw, Yehowa a tau chye lu ai atsam hte seng nna, anhte tup hkrak n lu tsun ai. Raitim, lam nkau hpe yu yu ga.

Yawng mayawng hpe Yehowa galaw lu tim, n galaw ai lam ni mung nga ai. Chyahtum chyalai re ai nyan hpaji nga ai majaw, chye mayu yang hpa hpe raitim chye hkra galaw lu ai. (Rom 11:33) Raitim, tinang hkum tinang hkang lu ai majaw, hpa byin wa na hpe chye hkra n galaw ai aten ni mung nga ai.—Esaia 42:14 hte shingdaw yu u.

Myit ra ai hte maren Yehowa shabyin ai. Yehowa a tau chye lu ai atsam hte seng nna dai lam gaw hpa hpe chye na shangun ai kun? “Ngai gaw npawt kaw nna jahtum du hkra mung, moi chyaloi nhkoi kaw nna garai n byin ai amu ni hpe mung, shapraw dan nngai: Nye a hpaji daw ai lam grin nga na ra ai; ngai ra mara hpe shatup na nngai” ngu Esaia 46:10 hta tsun da ai.

Htawm hpang hte seng nna, Yehowa tau hkrau lu tsun ai lam langai gaw, hpa hpe raitim byin wa shangun lu ai atsam nga ai re. Sumla hkrung gara hku ngut mat na kun? ngu ai hpe chye mayu ai majaw, anhte shalai nna jahtum hpe yu kau ai. Raitim, Yehowa gaw htawm hpang hta hpa byin na hpe n yu ai. Htawm hpang ngu ai gaw byin ngut chyalu n re ai majaw, shalai nna n mai yu ai. Raitim, gara aten hta hpa shabyin na ngu ai hpe Yehowa aten masat da lu ai. Aten du ai shaloi teng sha shabyin ai.—Pru 9:5, 6; Mat 24:36; Kas 17:31.

Htawm hpang mabyin nkau hte seng nna, Yehowa “myit shatawng da” ai, “shabyin ai” ngu nna Chyum Laika hta tsun da ai. (2 Hk 19:25; Esa 46:11) Dai ga si ni gaw, madung amyu ga hta “di bu sama” ngu lachyum nga ai ga si kaw na ga gale da ai re. (Yer 18:4) Ningtawn ai di bu sama gaw, madi ai ga gakam hpe lang nna, grai tsawm ai nampan di hpe galaw ya lu ai zawn, Yehowa mung shi myit ra ai hte maren, lam shagu hpe shabyin ya lu ai.—Ehp 1:10-12.

Masha ni hpe wanglu wanglang lata na ahkang Yehowa jaw da ai. Masha langai a gam maka hpe tau hkrau n masat da ya ai. Myit ding man ai masha ni, hten za ai lam de du na matu mung n masat da ai. Shanhte hkrai lata na ahkang jaw da ai. Jaw ai lam hpe lata nna galaw na matu n-gun jaw ai.

Ga shadawn lahkawng hpe yu yu ga. Langai, Ninewe masha ni grai nhkru ai majaw, mare hpe jahten kau na ngu, Yehowa tau hkrau tsun ai. Raitim, mare masha ni myit malai lu ai majaw, “shanhte hpe ari jaw na lam, Karai Kasang myit malai nna, hpa n di mu ai.” (Yon 3:1-10) Ninewe mare masha ni gaw, sadi jaw ga hpe na ngut ai hpang, shanhte myit malai lu nna galai shai ai majaw, Yehowa mung shi a dawdan lam hpe galai shai kau ai.

Lahkawng, Kuru ngu ai wa gaw, Yuda masha ni hpe, bawng dung ai prat kaw na shalawt ya na, Nawku Htingnu bai gawgap na ahkang jaw na ngu, Yehowa tau hkrau tsun da ai. (Esa 44:26–45:4) Dai myihtoi ga gaw, Persi Hkawhkam Kuru hta hpring tsup wa ai. (Ezr 1:1-4) Raitim, Kuru gaw tengman ai Karai Kasang hpe nawku ai wa n re. Myihtoi ga hpring tsup wa na matu, Kuru hpe Yehowa akyu jashawn wa tim, tinang hpe nawku wa hkra atik anang n galaw ai.—Gsh 21:1.

Dai lam ni gaw, htawm hpang hpe tau hkrau tsun ai shaloi, Yehowa myit shalawm ai lam nkau sha naw re. Gaja nga yang, Yehowa a myit mang lam ni hpe hpring tup kadai mung n chye na lu ai. (Esa 55:8, 9) Raitim, chye na da ai daram hte sha pyi, Yehowa galaw ai lam yawng, htawm hpang hte seng nna tau hkrau tsun da ai lam ni gaw, galoi mung jaw ai hpe kam mai ai.