N tsun wa ai. Nat Satan gaw Ewa hpe, Karai Kasang hkum pat da ai namsi hpe sha yang, si mat tim, n mu lu ai daw (dai ni aten na masha nkau tsun ai n chye si ai wenyi) gaw matut asak hkrung na re ngu n tsun wa ai. Lapu kaw nna ga shaga ai shaloi, Satan gaw Ewa hpe dai hpun kaw nna namsi sha yang, ‘gaja wa n si na re’ ngu hkrak tsun wa ai. Ewa gaw matut asak hkrung lu na, ginding aga hta grau kaja ai aprat lu la na, Karai Kasang hpe n kamhpa ra ai prat lu la na ngu shi tsun wa ai.​—Nin 2:17; 3:3-5.

Dai ni aten hta sharin ya nga ai n chye si ai wenyi ngu ai shut ai sharin achyin lam gaw Edin sun kaw nna hpang wa ai (sh) gara aten hta hpang wa ai kun? Tup hkrak gaw n lu tsun ai. Shut shai ai nawku htung yawng hpe Noa aten Hka Sha-u Ing ai shaloi, jahten kau sai lam hpe gaw anhte chye ai. Noa hte shi a nta masha ni sha, asak hkrung lawt lu wa ai. Shanhte yawng gaw teng man ai hku nawku daw jau ai ni re. Shut shai ai nawku htung hte seng ai lam langai mi mung ngam sana n re.

Dai majaw, ya aten na sharin achyin ai lam re ai shinggyim masha ni hta n chye si ai wenyi nga ai ngu ai lam gaw Hka Sha-u Ing ngut ai hpang hta hpang wa ai re. Babelon hta amyu ga ni hpe Karai Kasang shanut kau ya nna, masha ni hpe “ga ningtsa ting de shabra dat wu ai” shaloi, shinggyim masha ni hta n chye si ai wenyi nga ai ngu ai lam gaw shanhte hte arau lawm mat wa na re. (Nin 11:8, 9) Shut shai ai ndai lam gaw gara aten kaw nna hpang ai raitim, “masu magaw ai a kawa” Nat Satan gaw, de a hpang hta nga taw ai. Dai lam chyam bra nga ai hpe mu ai shaloi shi grai kabu nga na re.​—Yhn 8:44.