1. Ehpesu 6:10-13 hta tsun da ai hte maren, anhte hpe lanu lahku ai lam Yehowa gara hku madun ai kun? Sanglang dan u. 

SHI a mayam ni hpe lanu lahku ai lam, Yehowa madun ai lam langai gaw, hpyen ni hpe ninghkap na matu karum ya ai hku nna re. Anhte a madung hpyen ni gaw Satan hte nat ni re. Yehowa gaw, nat ni a lam anhte hpe sadi jaw da nna, ninghkap lu na matu mung karum ya ai. (Ehpesu 6:10-13 hpe hti u.) Yehowa a karum shingtau lam hpe hkap la nna, shi hpe sha tsep kawp kamhpa na nga yang, nat ni hpe ninghkap ai lam hta awng dang lu na re. Kasa Pawlu hta nga wa ai kamhpa myit anhte hta mung nga lu ai. Shi ndai hku tsun ai: “Karai Kasang gaw anhte a maga e nga nga a yang gaw, anhte hpe hpyen ai maga de kadai wa mi nga lu na a ta?”​—⁠Rom 8:31.

2. Ndai sumhpa hta hpa lam ni hkaja mat na kun?

² Hkristan ni hku nna anhte gaw Satan hte nat ni a lam hpe ladu lai myit maju jung na n re. Yehowa a lam sharin la na matu hte shi a magam gun na matu madung hku nna myit maju jung ga ai. (Shk 25:5) Raitim, Satan a galaw ai lam ni hpe mung chye da ra ai. Hpa majaw kun? Shi a hkalem hkalau ai lam ni hpe koi gam lu na matu re. (2 Ko 2:11) Ndai sumhpa hta, masha ni hpe hkalem na matu Satan hte nat ni akyu jashawn ai madung ladat ni hpe hkaja mat na re. Shanhte hpe gara hku ninghkap lu na lam hpe mung hkaja mat na re.

3-4. (a) Nat hpaji ngu ai gaw hpa rai kun? (b) Nat hpaji hpe kam sham ai lam kade daram chyam bra mat ai kun?

³ Masha ni hpe Satan hte nat ni hkalem ai madung ladat gaw nat hpaji re. Nat hpaji hkan ai ni gaw shinggyim masha ni n  chye lu, n hkang lu ai ni hpe shanhte chye lu, hkang lu ai ngu tsun ma ai. Ga shadawn, shaba wawt ai (sh) gumhpan hpan nna htawm hpang hpe chye lu ai atsam nga ai ngu masha nkau tsun ma ai. Nkau chyawm gaw, si mat ai masha ni hte ga shaga lu ai zawn galaw dan ma ai. Nkau gaw, hpyi hpaji (sh) mandan lakle hpaji hpe akyu jashawn nna, kaga ni hpe hpyi kawa shangun ai. *

⁴ Nat hpaji hpe kam sham ai lam kade daram chyam bra nga ai kun? Letin Amerika hte Karibiyan hta nga ai mungdan 18 hta galaw ai sawk sagawn ai hku nga yang, marai 3 hta 1 gaw mandan lakle hte hpyi hpaji ni hpe kam ma ai. Masha yawng ngu na daram gaw, wenyi ni hte matut mahkai na matu mai byin ai ngu kam ma ai. Ahprika hta nga ai mungdan 18 hta mung dai zawn sawk sagawn ai lam ni galaw ai. Masha kaang hkup jan daram gaw, hpyi hpaji hpe kam sham ai lam tsun ma ai. Anhte gara kaw mi nga nga, nat hpaji shoihpa kaw na makawp maga ra ai. Satan gaw, “mungkan ga ting” hpe hkalem na matu shakut nga ai.​—⁠Shr 12:9.

5. Nat hpaji hte seng nna Yehowa gara hku hkamsha na kun?

⁵ Yehowa gaw “teng man ai Karai Wa” rai nga ai. (Shk 31:5) Rai yang, nat hpaji hte seng nna shi gara hku hkamsha na kun? Shi nju n dawng ai. Yehowa gaw Israela ni hpe ndai hku tsun ai: “Tinang a shayi shadang sha hpe wan hta nat nawng ai wa, shaba wawt ai wa, myihtoi htoi ai wa, lawng dat chye ai wa, mandan bau chye ai wa, ahkyu hkyu chye ai wa, atsu hte shaga chye ai wa, shung sha chye ai wa hte gumhpan hpan ai wa langai mi muk nanhte hta nga lu na n rai. Kaning rai nme law, ndai lam galaw ai wa kadai mung Yehowa man e matsat shabat rai nga ai:” (Trj 18:10-12) Hkristan ni gaw Israela ni hpe Yehowa jaw ai tara npu hta n nga sai. Raitim, nat hpaji hte seng ai Yehowa a hkamsha lam n galai shai ai hpe anhte chye ga ai.​—⁠Mal 3:6.

6. (a) Satan gaw nat hpaji hpe akyu jashawn nna masha ni hpe gara hku hkalem nga ai kun? (b) Hpaji Ningli 9:5 hku nga yang, si mat ai masha ni a masa hte seng nna tengman ai lam gaw hpa rai kun?

⁶ Masha ni hpe shoihpa jaw na matu nat hpaji hpe Satan akyu jashawn ai lam Yehowa chye ai majaw, dai hpe ninghkap na matu anhte hpe sadi jaw da ai. Si mat ai masha gaw, shara ra hta asak naw hkrung nga ai ngu ai masu ga hte hpawn, masu ga ni hpe grau chyam bra wa hkra nat hpaji hpe Satan akyu jashawn nga ai. (Hpaji 9:5 hpe hti u.) Satan gaw masha ni hkrit mat na matu hte Yehowa kaw na tsan mat na matu mung nat hpaji hpe akyu jashawn ai. Shi a yaw shada lam gaw, nat hpaji hkan ai ni Yehowa hpe kamhpa na malai, nhkru ai nat ni hpe kam mat na matu re.

7. Yehowa anhte hpe hpa lam tsun dan ai kun?

⁷ Tsun wa sai hte maren, Yehowa gaw anhte chye da ra ai lam ni hpe tsun da ai. Rai yang she, Satan hte nat ni a hkalem ai lam hpe anhte koi yen lu na re. Satan hte nat ni hpe gasat lu ai tatut re ai lam nkau hpe hkaja yu ga.

8. (a) Nat ni hpe ninghkap na matu karum ya lu ai madung lam gaw hpa rai kun? (b) Si mat ai ni hte seng nna Satan masu nga ai hpe Shakawn 146:4 gaw gara hku mahtai jaw ai kun?

⁸ Karai a Mungga hpe hti nna myit sawn  sumru u. Dai gaw nat ni shabra nga ai masu ga ni hpe ninghkap lu ai madung lam re. Karai a Mungga gaw, Satan a masu magaw lam ni hpe garan ginhka lu ai, dai ai nhtu hte bung ai. (Ehp 6:17) Ga shadawn, si mat ai ni gaw hkrung nga ai ni hte matut mahkai lu ai gaw n teng ai hpe Chyum Laika hta tsun da ai. (Shakawn 146:4 hpe hti u.) Yehowa langai sha, htawm hpang hpe tup hkrak chye lu ai lam hpe mung Chyum Laika hta tsun da ai. (Esa 45:21; 46:10) Karai Mungga hpe ayan hti nna sumru na nga yang, nat ni anhte hpe kam shangun mayu ai masu magaw lam ni hpe anhte ni nju ndawng nna ninghkap na matu jin jin rai na re.

9. Gara nat hpaji ni hpe anhte koi ra na kun?

⁹ Nat hpaji hte seng ai lam yawng hpe nyet kau u. Anhte gaw tengman ai Hkristan ni re ai majaw, nat hpaji hpe tsep kawp hkan sa na n re. Ga shadawn, nat sara ni hpang anhte sa na n re. Si mat ai masha ni hte mung matut mahkai na matu shakut na n re. Shawng na sumhpa hta hkaja wa ai hte maren, si mat ai masha ni shara ra hta asak hkrung nga ai ngu ai makam masham hpe madi shadaw ai makoi mayang htung ni hpe anhte koi ga ai. Htawm hpang hpe chye lu na matu, gumhpan hpaji (sh) gam maka chye lu ai hpaji hpe lang na n re. (Esa 8:19) Dai zawn re ai lam ni gaw, shoihpa nga nna Satan hte nat ni hte ading tawk matut mahkai ai baw byin mat na hpe anhte chye ai.

10-11. (a) Tsa ban langai na masha nkau tengman ai tara chye wa ai shaloi hpa galaw wa ai kun? (b) 1 Korinhtu 10:21 hku nga yang, tsa ban langai na Hkristan ni hpe anhte hpa majaw kasi la ging ai kun? Gara hku hkan sa mai na kun?

¹⁰ Nat hpaji hte seng ai arung arai yawng hpe kabai kau u. Tsa ban langai na Ehpesu masha nkau gaw, nat hpaji hpe hkan sa nga ai. Tengman ai lam hpe shanhte chye wa ai shaloi kalang ta tatut hkan sa ai. “Lakle mandan bau sha ga ai ni law law mung, shanhte a laika ni la sa nna, masha yawng a man e nat kau mu ai.” (Kas 19:19) Shanhte gaw, nat ni hpe ninghkap na matu galaw lu ai lam yawng hpe galaw wa ai. Shanhte a mandan lakle laika  buk ni gaw grai hpu ai. Dai laika buk ni hpe kaga ni hpe dut kau (sh) jaw kau na malai, jahten kau ma ai. Laika buk ni a manu hta na, Yehowa a ra sharawng ai lam galaw na matu grau myit maju jung wa ai.

¹¹ Tsa ban langai na Hkristan ni hpe anhte gara hku kasi la na kun? Nat hpaji hte matut mahkai nga ai arung arai yawng hpe kabai kau ai gaw hpaji rawng ai lam re. Dai hta, nhkru ai wenyi ni kaw na tinang hkum tinang makawp maga na matu, galoi mung gun da ai lakhpoi ni (sh) kaga arai ni lawm ai.​—⁠1 Korinhtu 10:21 hpe hti u.

12. Shangwi shapyaw ai lam hte seng nna tinang hkum tinang gara ga san ni san ging ai kun?

¹² Shangwi shapyaw lam hpe atsawm myit nna lata u. Tinang hkum tinang ndai hku san u: ‘Ngai hti ai laika buk, magazine (sh) Internet kaw na hti ai sumhpa ni gaw nat hpaji hte seng ai lam rai nga ai kun? Ngai madat ai yungwi, yu ai sumla hkrung ni hte TV lamang ni (sh) ginsup ai video game ni gaw gara hku kun? Ngai yu ai shangwi shapyaw lam ni hta nat hpaji lawm nga ai kun? Dai ni hta sai chyup hpuk, hpuk shang ai wa (sh) shingra tara hta jan ai lam ni lawm nga ai kun? Dai hta, mandan hpaji, ahkyu hkyu sha ai, dagam dala ga ni tsun ai lam ni hpe shoihpa n nga ai mani hpa zawn sha madun da ai kun?’ Maumwi mausa ni hpe hkrang madun ai shangwi shapyaw lam shagu gaw, nat hpaji hte matut mahkai nga ai ngu nna gaw tsun mayu ai n re. Raitim, na a shangwi shapyaw lam hpe atsawm myit nna lata na nga yang, Yehowa nju ndawng ai lam yawng hte tsan tsan nga lu na matu nang hpe karum ya na re. Karai Kasang a man hta “myit mang san pra” nga lu hkra, kaja htum anhte shakut mayu ga ai.​—⁠Kas 24:16. *

13. Anhte hpa hpe koi mayu ai kun?

 ¹³ Nat ni hte seng ai lam tsun jahta ai hpe koi u. Ndai lam hta Yesu a kasi hpe hkan sa mayu ga ai. (1 Pe 2:21) Yesu mungkan ga de n sa shi yang, sumsing lamu hta nga wa nna, Satan hte nat ni galaw ai lam ni hpe law law chye wa ai. Raitim, dai nat ni galaw ai hte seng ai lam hpe Yesu n tsun wa ai. Yesu gaw Yehowa a sakse re. Satan a lam tsun shana ya ai Satan a sakse n re. Nat ni a lam hpe n jahta ai hku nna, Yesu hpe kasi la mai ai. Tengman ai tara hta anhte a ‘myit katu nga ai’ lam, n-gup ga hku nna madun ga ai.​—⁠ Shk 45:1.

14-15. (a) Nat ni hpe hpa majaw n hkrit ra ai kun? (b) Yehowa gaw shi a mayam ni hpe makawp maga ya ai lam hpa gaw sakse madun nga ai kun?

¹⁴ Nat ni a majaw hkum hkrit. Dai ni na aten hta, anhte hta n kaja ai lam law law byin chye ai. N myit mada ai sha hkala nba hkrum ai, machyi makaw hte si hkrung si htan ni mung hkrum ai. Dai hku byin ai gaw nat ni a majaw byin ai ngu nna n sawn la ging ai. “Aten ladaw hte, ang wa ai hte maren” anhte yawng hkrum chye ai ngu Chyum Laika hta tsun da ai. (Hpj 9:11) Yehowa gaw, nat ni yawng hta na grau atsam kaba ai lam, nat ni hpe madun wa ai. Ga shadawn, Yoba hpe sat na matu Satan hpe ahkang n jaw wa ai. (Yob 2:6) Mawshe a prat hta mung, Egutu mung kaw na mandan lakle sara ni hta atsam grau kaba ai lam Yehowa madun wa ai. (Pru 8:18; 9:11) Yehowa gaw, Yesu hpe Satan hte nat ni hta grau ai atsam jaw wa ai. Dai majaw, Yesu gaw shanhte hpe sumsing lamu kaw na ginding aga de jahkrat kau ai. Htawm hpang hta mung, shanhte gaw kadai hpe mung shoihpa n lu jaw na shara re ai sung htum ai shara kata de jahkrat kau hkrum na re.​—⁠Shr 12:9; 20:2, 3.

¹⁵ Yehowa gaw shi a mayam ni hpe makawp maga ya ai lam sakse law law anhte mu lu ga ai. Ndai lam hpe myit yu ga: Anhte gaw tengman ai tara hpe mungkan ga ting hta hkaw tsun nga ai, sharin ya nga ai. (Mat 28:19, 20) Satan a nhkru n kaja ai amu ni hpe hpaw madun dan nga ai. Lama na, Satan hta anhte a amu ni hpe hkum pat lu ai atsam nga yang, teng sha hkum pat na re. Raitim, shi dai hku n lu galaw ai. Dai majaw, nat ni hpe anhte n hkrit ra ai. “Yehowa gaw, ding hpring ai ni a matu, ngang ai shingbyi shara tai na nga, shi a myi mungkan ting hproi hkra mada yu nga ai” hpe anhte chye ga ai. (2 Hl 16:9) Yehowa  hpe sadi dung na nga yang, nat ni gaw anhte hpe shoihpa lu jaw na n re.

16-17. Nat ni hpe ninghkap na matu nden marai nga ra ai lam ga shadawn tsun dan u. 

¹⁶ Nat ni hpe ninghkap na matu nden marai nga ra ai. Laksan hku nna anhte a jinghku jingyu ni hte manaw manang ni gaw, anhte hpe myit tsang ya nna tsun ai shaloi hta re. Raitim, nden marai madun ai ni hpe Yehowa shaman chyeju jaw ai. Gana mungdan kaw na nauna Erika a mahkrum madup hpe myit yu ga. Shi asak 21 ning hta, Chyum Laika hkaja hpang wa ai. Shi a kawa gaw nat sara re ai majaw, nat ni hpe hkungga nawng da ai shan ni hpe sha shangun ai. Shi dai hpe nyet kau ai shaloi, shi gaw nat hpara ni hpe n gawn n sawn di ai ngu shi a nta masha ni hkamsha ma ai. Nat hpara ni gaw, myit masin hte hkum hkrang hkra machyi hkra galaw sana re ngu shanhte kam ma ai.

¹⁷ Erika a nta masha ni gaw, dai htung hpe hkan sa na matu atik anang shadut tim, shi gaw asum n jaw ai. Dai majaw, nta kaw na shi pru mat wa ai. Hpunau nauna nkau gaw shanhte hte arau sa nga shangun ai. Dai hku nna, kanau kana majing zawn re ai, makam masham bung ai ni hpe Erika a matu Yehowa shaman chyeju jaw wa ai. (Mrk 10:29, 30) Shi a jinghku majing ni gaw, shi hpe kau da nna, shi a arung arai ni hpe wan nat kau ya ai. Raitim, Erika gaw Yehowa hpe matut sadi dung nna hkalup hkam la ai. Ya nga yang, aten galu ningshawng galaw nga sai. Shi gaw nat ni hpe n hkrit ai. Shi a nta masha ni hte seng nna Erika ndai hku tsun ai: “Nye a nta masha ni mung Yehowa hpe chye chyang yang, lu la na ngwi pyaw lam hte shi hpe nawku yang, lu la na lawt lu lam hpe lu wa na matu ngai shani shagu akyu hpyi nga ai.”

18. Yehowa hpe kamhpa ai kaw na gara shaman chyeju ni lu la na kun?

¹⁸ Anhte yawng gaw, dai zawn chyam dinglik lam hkrum yang she hkrum na. Raitim, nat ni hpe ninghkap nna Yehowa hpe kamhpa ra ai. Rai yang, shaman chyeju law law lu la nna, Satan a hkalem hkalau lam ni kaw nna lawt lu na re. Nat ni hpe hkrit ai majaw Yehowa hpe n nawku mat ai baw mung byin na n re. Yehowa hte anhte a hku hkau lam hpe mung shangang shakang lu na re. “Karai Kasang a npu e a taw nga mu: nat gumlau hpe ban hkum kau mu; shaloi shi nanhte kaw nna hprawng mat na ra ai. Karai Kasang hpang de sit sa wa mu; shaloi shi nanhte hpang de sit wa na ra ai” nga nna sape Yaku ka wa ai.​—⁠Yak 4:7, 8.