1-3. Aten hpring magam gun ai ni gaw hpa lam ni a majaw lit nnan lu wa chye ai kun?

“SASANA magam gun nna 21 ning na ai hpang, an a kanu kawa ni gaw n kung n kang byin wa ai” nga nna Robat yan Meri Jo tsun ai. “Shanhte hpe lanu lahku ai hta an grai kabu ga ai. Raitim, an grai manu shadan ai shara hpe kau da ra ai majaw, grai yawn ai.”

² “An a hkam kaja lam a majaw, lit ang ai shara de bai n lu wa ai lam chye dat ai shaloi grai yawn nna hkrap ai” ngu Wiliyam yan Teri tsun ai. “Maigan mungdan hta Yehowa a magam gun na ngu ai an a myit mada lam htum mat sai.”

³ “Ngai magam gun nga ai gin jaw garan rung hpe ninghkap ai ni gaw pat kau mayu ai lam anhte chye dat ai” nga nna Aliksi tsun ai. “De a majaw, Behtela kaw nna anhte pru ra mat ai shaloi grai yawn ai.”

4. Ndai sumhpa hta gara ga san ni hpe hkaja mat na kun?

⁴ Hkying lam hku law ai Behtela nta masha ni hte aten hpring magam gun ai ni gaw lit nnan lu la ma ai. * Dai sadi dung ai hpunau nauna ni gaw, shanhte manu shadan ai lit hpe kau da ra ai shaloi grai yak chye ai. Galai shai ai lam hte maren galaw lu hkra, shanhte hpe hpa gaw karum ya lu na kun? Shanhte hpe gara hku karum ya lu na kun? Prat hta galai shai ai masa ni hte maren nga chye hkra, anhte yawng hpe dai ga san ni a mahtai gaw karum ya lu ai.

5. Lit nnan galai shai ai shaloi gara hku hkamsha chye ai kun?

⁵ Anhte gaw Behtela hta raitim (sh) kaga aten hpring magam hta raitim, gara kaw mi magam gun tim, anhte magam gun ai shara kaw nna masha ni hte dai shara hpe tsawra na matu sharin la ga ai. Dai majaw, anhte a lit hpe kau da ra ai nga yang anhte grai yawn ga ai. Kau da ra ai hpunau nauna ni hpe anhte grai dum nna shanhte a matu grai myit tsang ya ai. Laksan hku nna zingri zingrat ai shara kaw nna wa ra ai aten hta re. (Mat 10:23; 2 Ko 11:28, 29) Kaga shara hta lit nnan bai ang ai (sh) tinang mungdan de bai wa ai shaloi, mayak mahkak ni hkrum chye ai. “An gaw tinang a htunghking lailen ni hpe nau n chye mat sai. Tinang a amyu ga hte hkaw tsun ai shaloi mung nau n manu mat sai” nga nna Robat yan Meri Jo tsun ai. “An gaw tsasam masha zawn hkam sha ai.” Lit nnan galai shai ai nkau mi gaw n myit mada da ai lam ni a matu gumhpraw jai ra na lam ni mung hkrum wa chye ai. Dai majaw, shanhte gaw shim lum lam n nga ai, myit daw myit hten ai ngu nna hkamsha wa chye ai. Hpa gaw karum ya lu na kun?

6. Yehowa hte gara hku nihtep lu na kun?

⁶ Yehowa hte nihtep hkra nga u. (Yak 4:8) Dai hpe gara hku galaw lu na kun? “Akyu hpyi ai ga madat mara ai wa” hpe kamsham ai hku nna re. (Shk 65:2) “Nanhte a myit shi a man e hpaw dan mu” nga nna Shakawn Kungdawn 62:8 hta tsun da ai. Yehowa gaw “anhte hpyi mahpyi hte myit mang lu ai mahkra hta grau nna shabyin lu ai wa” rai nga ai. (Ehp 3:20) Anhte hpyi ai hpe sha Yehowa jaw lu ai n re. Shi gaw anhte galoi mung n myit ga ai lam hte manghkang ni hpe hparan ya na re.

7. (a) Yehowa hte matut nihtep lu na matu hpa gaw karum ya na kun? (b) Hebre 6:10-12 hku nga yang, Yehowa hpe sadi dung let matut nawku ai gaw hpa akyu lu shangun ai kun?

⁷ Yehowa hte matut nihtep lu na matu, Chyum Laika hpe shani shagu hti nna myit sawn sumru ra ai. Sasana magam gun wa ai hpunau ndai hku tsun ai: “Moi magam gun ai shaloi galaw wa ai zawn, zuphpawng lamang hkyen lajang ai, dinghku nawku galaw ai lam ni hpe matut galaw mat u.” Nawku hpung nnan kaw kabu gara shiga hkaw tsun ai hta dang lu ai daram matut shang lawm u. Moi galaw wa ai daram n lu galaw tim pyi, Yehowa gaw shi hpe sadi dung let matut nawku nga ai  ni hpe dum ya nga ai.​—⁠Hebre 6:10-12 hpe hti u.

8. 1 Yawhan 2:15-17 hta mu lu ai ga ni gaw prat hpe matut nna asan sha tawn na matu gara hku karum ya ai kun?

⁸ Part hpe matut nna asan sha tawn u. Wenyi lam hpe “lim kau” shangun ai Satan mungkan a myitru myit tsang lam ni hpe ahkang hkum jaw. (Mat 13:22) Satan mungkan a hpaga lam galaw na matu, mungkan (sh) manang ni, jinghku ni shadut ai hpe nyet kau u. (1 Yawhan 2:15-17 hpe hti u.) Anhte a wenyi lam, myit tsang lam hte ra rawng ai arung arai ni hpe “ra kadawn ai aten” hta madi shadaw ya na ngu ga sadi jaw da ai Yehowa hpe kamhpa u.​—⁠Heb 4:16; 13:5, 6.

9. Ga Shagawp 22:3, 7 hku nga yang n ra ai sha hka kap ai hpe koi na matu hpa majaw ahkyak ai kun? Hpaji rawng ai hku dawdan lu na matu anhte hpe hpa gaw karum ya lu ai kun?

⁹ N ra ai sha hka kap ai hpe koi u. (Ga Shagawp 22:3, 7 hpe hti u.) Shara htawt ai gaw gumhpraw grai ma ai majaw, hka kap na matu loi ai. Hka n kap na matu, n ra ai rai ni hpe hkoi nna mari ai hpe sadi u. Tsawra ai marai langai machyi nna lanu lahku ra ai majaw, myitru myit tsang ai shaloi gumhpraw kade daram hkoi na hpe dawdan na matu yak chye ai. Dai zawn masa ni hta, hpaji rawng ai hku dawdan lu na matu, akroi anoi “akyu hpyi” ai gaw karum ya lu ai hpe dum u. Na a akyu hpyi ga ni hpe bai htang ai lam hta, “nanhte a myit masin hte nanhte a myit mang ai hpe, . . . bau sin” ai hku nna Yehowa gaw nang hpe simsa ai lam jaw lu ai.​—⁠Hpl 4:6, 7; 1 Pe 5:7.

10. Manang nnan ni hpe gara hku tam lu na kun?

¹⁰ Kaja ai hku hkau lam matut nga u. Laksan hku nna, anhte zawn hkrum wa ai kaja ai manang ni hpe na a hkamsha lam hte mahkrum madup ni hpe tsun dan u. Dai hku galaw yang, hkamsha lam ni yawm mat na re. (Hpj 4:9, 10) Moi magam gun wa ai shara hta hkau wa ai manang ni gaw, ya du hkra na a manang ni naw re. Ya mung, na a lit nnan hta, manang nnan ni hpe tam ra ai. Manang lu mayu yang, nang mung hku hkau chye ra ai hpe dum u. Manang nnan ni hpe gara hku tam na kun? Yehowa a magam gun ai shaloi lu la ai kaja ai mahkrum madup ni hpe tsun dan yang, nang kabu gara nga ai hpe shanhte mu wa na re. Aten hpring magam hpe myit rawt let nang galaw nga ai hpe nkau mi gaw n chye na ya tim, nkau mi chyawm gaw na a kasi ningli hpe hkan sa mayu wa nna, kaja ai manang ni byin wa na re. Na a lam (sh) Yehowa a magam hta nang galaw wa ai lam ni hte na a n kaja ai hkamsha lam ni hpe hkum tsun dan.

11. Dinghku hta matut ngwi pyaw hkra gara hku galaw mai ai kun?

¹¹ Ningrum ningtau a hkamja lam a majaw, na a lit hpe kau da ra ai nga yang, shi hpe mara hkum shagun. Shing nrai, nang nan mung hkam n kaja ai nga yang, tinang hkum tinang mara shagun ai gaw ningrum ningtau hpe myit daw shangun ai. Nanhte gaw “hkum shan langai  sha” rai nna, gara masa hta raitim langai hte langai lanu lahku na matu Yehowa a man hta ga sadi jaw da ai hpe dum u. (Mat 19:5, 6) N myit mada ai sha ma hkum kap mat ai majaw, lit hpe kau da ra ai nga yang, ma gaw na a lit hta na grau ahkyak ai lam ma hpe tsun dan u. Karai Kasang jaw ai kumhpa hku nna mu mada ai lam ma hpe chyahkring hkring tsun dan u. (Shk 127:3-5) Na a lit hta lu la wa ai mahkrum madup ni hpe mung tsun dan u. Dai hku galaw yang, nang galaw wa ai hte maren Yehowa a magam hta, prat hpe akyu jashawn na matu ma hpe shadut ya lu ai.

12. (a) Aten hpring magam gun ni shanhte a lit hpe matut gun hpai lu hkra gara hku karum ya lu ai kun? (b) Lit nnan hpe atsawm sha gun hpai lu hkra gara hku karum ya lu ai kun?

¹² Shakawn hpa gaw, nawku hpung hte hpunau nauna ni gaw aten hpring magam gun ni shanhte a lit hpe matut gun hpai lu hkra dang lu ai daram karum ya nga ai. Shanhte a lit hpe matut gun hpai lu hkra karum ya ai, ja gumhpraw, arung arai ni madi shadaw ya ai, ngam nga ai shanhte a nta masha ni hpe lanu lahku ya nga ma ai. (Gal 6:2) Na a nawku hpung de aten hpring magam gun langai du ai nga yang, shanhte lama ma shut nna sharin shaga hkrum ai majaw, lit nnan lu la ai ngu n mai sawn la ai. * Lit nnan hpe atsawm gun hpai lu hkra shanhte hpe karum ya u. Hkam n kaja ai majaw, shanhte law law n lu galaw tim pyi, shanhte galaw wa ai lam ni hpe shakawn ya nna alum ala hkap tau la u. Shanhte hpe chye hkra shakut u. Shanhte a machye machyang, hpaji ni hte mahkrum madup ni kaw nna sharin la u.

13. Lit nnan lu ai ni hpe madi shadaw ya na matu anhte hpa galaw mai ai kun?

 ¹³ Shawng nnan hku nna, lit nnan lu la ai ni gaw nta shap na matu, hkawm sa hkawm wa galaw na matu, bungli hte kaga ra kadawn ai lam ni lu la na matu karum shingtau lam ra chye ai. Dai sha n-ga, shani shagu hkrum chye ai masa ni hte seng nna mung shanhte chye ra ai. Raitim, ahkyak htum gaw anhte maga hku nna shanhte hpe chye na ya na matu re. Shanhte nan hte jinghku ni a hkam kaja lam hte seng ai lam ni hpe hparan ra chye ai. Tsawra ai marai langai si mat ai majaw, yawn hkyen nga chye ai. * Moi lit ang ai shara kaw nna manang ni hpe dum ai lam n tsun dan tim pyi, shanhte yawn nga chye ai. Dai zawn myit hta hkamsha lam amyu myu byin pru wa chye ai hpe hparan na matu aten ra na re.

14. Hkaw tsun masha ni gaw nauna langai lit nnan hpe atsawm sha galaw lu hkra gara hku karum ya wa ai kun?

¹⁴ Ndai laman, na a karum shingtau lam hte kasi ningli gaw shanhte lit nnan gun hpai ai hta karum ya lu ai. “Moi na lit hta shani shagu Chyum ga sharin ni galaw ai” nga nna maigan mung hta shaning law law magam gun wa ai nauna langai tsun ai. “Nye a lit nnan hta gaw, hkaw tsun magam sa ai shaloi Chyum Laika hpaw dan na matu (sh) video madun na matu pyi yak ai. Raitim, hkaw tsun masha ni gaw shanhte a bai kawan ai lam hte Chyum ga sharin ni sa na matu ngai hpe saw shaga ai. Myit rawt nna, shakut shaja ai hpunau nauna ni a rawt jat ai Chyum ga sharin ni hpe mu lu ai gaw, kaja ai ningmu nga na matu ngai hpe karum ya ai. Hkaw tsun lawk nnan hta ga shaga hpang na matu ngai sharin la ai. Dai lam yawng gaw kabu gara ai myit bai lu la hkra ngai hpe karum ya ai.”

15. Lit nnan hta awng dang lam gara hku lu mai ai kun?

¹⁵ Na a lit nnan hpe awng dang hkra galaw lu ai. Galai shai ai lam gaw hting nut mat ai (sh) hkrat sum mat ai nga nna hkum myit. Na a prat hta Yehowa karum ya wa ai lam hpe myit yu nna matut hkaw tsun nga u. Tsa ban langai  na sadi dung ai Hkristan ni hpe kasi la u. Shanhte gaw gara shara kaw du ai raitim, “mungga hkaw dan let htawt hkawm nga ma ai.” (Kas 8:1, 4) Matut nna hkaw tsun nga yang, kaja ai akyu ni lu la na re. Ga shadawn, mungdan langai kaw nna gawt shapraw hkrum ai ningshawng ni gaw, shanhte tsun ai amyu ga hpe naw ra nga ai htingbu mungdan de htawt wa ma ai. Shata loi mi laman, hpung kaji ni hku nna alawan rawt jat wa ai.

16. Lit nnan hta kabu gara lam gara hku tam mai ai kun?

¹⁶ “Yehowa hta kabu gara nga ai gaw, nanhte a n-gun atsam rai nga ai.” (Neh 8:10) Anhte a lit hpe grai manu shadan tim, dai lit a majaw kabu gara ai n re ai sha, Yehowa hte hku hkau ai lam a majaw sha rai ra ai. Dai majaw, Yehowa hte arau matut hkawm nna, nyan hpaji, lam matsun hte madi shadaw ya na matu shi hpe kamhpa u. Moi na lit hta mung masha ni hpe myit masin mahkra hte nang karum ya wa ai majaw, dai lit hpe tsawra wa ai re. Dai zawn, lit nnan hta mung myit masin mahkra hte galaw u. Rai yang, dai lit nnan hpe mung tsawra wa hkra Yehowa karum ya nga ai hpe nang mu wa na re.​—⁠Hpj 7:10.

17. Ya gun hpai nga ai lit hte seng nna hpa hpe dum ra ai kun?

¹⁷ Yehowa hpe magam gun ai gaw htani htana grin nna, anhte a lit gaw chyahkring chyahkra sha re ai hpe dum ra ai. Mungkan nnan hta, anhte yawng gaw lit nnan lu la na re. Ya lu la ai mahkrum madup ni gaw, htawm hpang a matu hkyen lajang ya nga ai hpe Aliksi kam ai. “Yehowa hte mungkan nnan gaw teng sha nga ai lam re ai hpe ngai chye da tim, kachyi mi naw tsan nga ai ngu nna ngai shadu wa ai. Ya gaw, nye a man hta Yehowa du nga nna, mungkan nnan mung grai ni sai hpe ngai chye wa ai” ngu Aliksi tsun ai. (Kas 2:25) Anhte a lit gaw hpa mi raitim, Yehowa hte matut nna hkawm nga na matu re. Shi anhte hpe galoi mung kau da na n re. Yehowa a magam hta gara shara kaw mi raitim, gara lit hpe gun hpai ra ai raitim, ngwi pyaw lam lu hkra shi karum ya na re.​—⁠Esa 41:13.