1. “Teng man ai lam” de gara hku shang wa ai lam tsun jahta ai kaw nna anhte gara hku akyu lu mai ai kun?

 “TENGMAN ai lam de nang gara hku du wa ai kun?” Dai ga san hpe law law lang htai ga na re. Hpunau nauna shada hkrum ai aten hta dai zawn san chye ai. Hpunau nauna ni Yehowa hpe gara hku chye wa nna, tsawra wa ai lam hpe na mayu ai. Tengman lam hpe anhte hpa majaw tsawra ai lam hpe mung tsun dan mayu ai. (Rom 1:11) Dai hku tsun jahta ai lam gaw, tengman lam kade daram manu dan ai hpe chye wa shangun ai. “Teng man ai lam hta hkan sa asak hkrung” na, Yehowa a shaman chyeju hte myi man lu shangun na prat hkrun lam hte maren matut asak hkrung na ngu ai dawdan lam hpe mung grau ngang kang shangun ai.​—3 Yh 4, JCLB.

2. Ndai sumhpa hta hpa lam bawngban na kun?

² Ndai sumhpa hta, tengman ai lam hpe anhte hpa majaw tsawra wa ai hte seng ai lam nkau hpe bawngban lu na re. Dai manu dan ai kumhpa hpe tsawra ai lam gara hku matut madun lu na lam hpe mung hkaja lu na re. Rai yang, tengman ai lam de anhte hpe Yehowa lau la wa ai majaw chyeju dum ai myit grau law wa na re. (Yhn 6:44) Kaga ni hpe Chyum Laika tengman lam mung grau tsun dan mayu wa na re.

3. Tengman ai lam hpe tsawra ai a ahkyak htum lam gaw hpa rai kun?

³ Tengman ai lam hpe tsawra ai lam law law nga ai. Ahkyak htum gaw, tengman lam a madung re ai Yehowa Karai Kasang  hpe tsawra ai majaw re. Shi gaw sumsing lamu hte ginding aga hpe chyahtum chyalai n-gun atsam hte Hpan Ai Wa sha n-ga, anhte hpe lanu lahku ai sumsing Kawa mung re ai lam Chyum Laika hkaja ai majaw chye wa ai. (1 Pe 5:7) Shi gaw, “sumnung ai myit hte chyeju hpring ai, myit galu ai hte n-gaw nwai re ai, matsan dum ai hte sadi sahka hpring ai” Karai re ai hpe mung chye wa ai. (Pru 34:6) Yehowa gaw tara rap ra ai. (Esa 61:8) Anhte yakhkak hkrum ai hpe mu ai shaloi shi mung hkamsha ai. Masat da ai aten hta, yakhkak ai lam yawng hpe jahtum kau na re. (Yer 29:11) Grai kaja ai aten re. Dai lam ni a majaw Yehowa hpe anhte grai tsawra ai re.

4-5. Kasa Pawlu gaw myit mada lam hpe hpri chyinghkyi hte hpa majaw shingdaw wa ai kun?

⁴ Tengman lam hpe tsawra ai lam kaga langai gaw hpa rai kun? Tengman ai lam gaw anhte hpe grai akyu lu shangun ai. Ga shadawn langai hpe yu yu ga. Chyum Laika tengman lam hta htawm hpang myit mada lam mung lawm ai. Dai myit mada lam a atsam hpe kasa Pawlu ndai hku tsun da ai: “Dai myit mada shara chyawm gaw, anhte a myit masin a matu hpri chyinghkyi tai nga ai rai nna, dai gaw ngang mung ngang, grin mung grin rai nga ai.” (Heb 6:19) Hpri chyinghkyi gaw, sanghpaw n shamu hkra galaw ya ai zawn, Chyum Laika hpe madung tawn ai myit mada lam mung, mayak mahkak ni hkrum ai shaloi, myit simsa lam jaw ai.

⁵ Dai Chyum daw gaw, namman chya hkam ai Hkristan ni a sumsing lamu myit mada lam hte seng nna Pawlu tsun nga ai re. Raitim, mungkan hparadisu hta htani htana asak hkrung na matu myit mada nga ai Hkristan ni hte mung seng ai. (Yhn 3:16) Htani htana asak myit mada lam hte seng nna hkaja ai gaw anhte a prat hpe lachyum nga shangun ai.

6-7. Htawm hpang hte seng ai myit mada lam hpe Ibun hkaja ai majaw gara hku akyu lu ai kun?

⁶ Nauna Ibun a mahkrum madup hpe yu yu ga. Shi gaw tengman ai lam hta n kaba wa ai. Ma prat hta si ai lam hpe hkrit wa ai. “Hpawt ni ngu ai gaw nga sana n re ai nhtoi du wa na” ngu ai ga yan hpe ngai hti hkrup ai shaloi, dai hpe n lu malap ai. Shi ndai hku tsun ai: “Shana aten ni nga yang n lu yup nna, htawm hpang lam hpe sha myit hkrup ai. ‘Prat gaw dai daram sha n mai byin ai. Ngai hpa majaw asak hkrung nga ai kun? Ngai n si mayu ai.”

⁷ Asak shi ning jan re ai shaloi, Yehowa Sakse ni hte Ibun hkrum wa ai. Shi ndai hku tsun ai: “Mungkan Hparadisu hta htani htana asak hkrung lu ai myit mada lam hpe ngai kam wa ai.” Tengman ai lam hpe hkaja ai gaw nauna hpe gara hku akyu lu shangun ai kun? Shi ndai hku tsun ai: “Htawm hpang (sh) si ai lam hte seng nna tsang ai majaw n lu yup ai aten ni n nga sai.” Tengman lam gaw Ibun a matu grai manu dan nna, htawm hpang hte seng ai myit mada lam hpe kabu gara let kaga ni hpe tsun dan nga ai.​—1 Tm 4:16.

8-9. (a) Yesu a ga shadawn hta lawm ai la langai gaw, shi mu wa ai sut gan hpe kade daram manu shadan ai kun? (b) Nang mung kade daram manu shadan ai kun?

⁸ Chyum Laika tengman lam hta, Karai Mungdan hte seng ai kabu gara shiga mung lawm ai. Mungdan tengman lam hpe, makoi da ai sut gan hte Yesu shingdaw da ai. Mahte 13:44 hta shi ndai hku tsun ai: “Sumsing lamu a mungdan gaw, ga dachyawk hta e makoi da nna, masha mu hkrup lu ai hte, bai makoi da ai sut gan hte bung nga ai: kabu gara ai myit hte shi wa nhtawm e, shi lu malu hte hpe dut kau nna, ga dachyawk dai hpe mari la wu ai.” Dai la wa gaw, sut gan hpe tam nga ai n re. Raitim, mu ai shaloi, lu na matu law law hpe asum hkam wa ai. Shi hta nga ai yawng mayawng hpe dut wa ai. Hpa majaw kun? Grai manu dan ai hpe shi chye ai majaw re. Shi asum hkam wa ai yawng mayawng hta grau manu dan ai.

⁹ Tengman lam hte seng nna, nang mung dai zawn hkamsha ai kun? Hkamsha na re. Ya aten hta,  Yehowa hpe nawku ai majaw, lu la ai ngwi pyaw lam, htawm hpang na Karai Mungdan uphkang ai npu hta, htani htana asak hkrung lu na ngu ai myit mada lam hte shingdaw dat yang, mungkan kaw na jaw ai lam ni gaw hpa n rai sai. Yehowa hte hku hkau lu ai gaw, anhte sak jaw ra ai lam yawng hta grau manu dan ai. “Shi ra sharawng ai lam hpring tup” lu la ai gaw, anhte a matu ngwi pyaw lam re.​—Kol 1:10, NWT.

10-11. Prat hpe galai shai lu hkra Maike hpe hpa gaw shadut ya wa ai kun?

¹⁰ Anhte law malawng gaw, Yehowa myiman lu na matu, grai nan sak jaw wa ai. Nkau gaw, mungkan kaw na grai kaja ai bungli ni hpe kau da wa ai. Nkau gaw, lusu na ahkaw ahkang hpe asum hkam kau ai. Nkau gaw, Yehowa a lam chye wa ai shaloi, prat hkrun lam hpe tsep kawp galai shai wa ai. Maike dai zawn galaw wa ai. Shi gaw tengman ai lam hta kaba wa ai n re. Asak kaji ai shaloi, htawng hkat ai ginsup lam (karate) hpe sharin la wa ai. Shi ndai hku tsun ai: “Hkum hkrang n-gun ja ai hpe ngai grai arawng la ai. Ngai hpe dang ai masha n nga ai ngu kalang lang hkamsha ai.” Raitim, Chyum Laika hpe hkaja hpang ai shaloi, dawsa ai lam hte seng nna, Yehowa a ningmu hpe chye wa ai. (Shk 11:5) “Shi hpe Chyum Laika sharin ya ai Sakse Hkam yan la gaw, htawng hkat ai ginsup lam hpe hkring kau na matu galoi n tsun ai. Chyum Laika tengman lam hpe sha matut sharin ya ai” ngu Maike tsun ai.

¹¹ Yehowa a lam Maike grau chye wa ai shaloi, Shi hpe tsawra ai myit grau law wa ai. Yehowa gaw Shi hpe nawku ai ni hpe matsan dum myit madun ai lam hpe Maike grai ra sharawng ai. Dai shaloi, prat hpe galai shai na matu, dawdan lam jahkrat ra ai hpe shi chye wa ai. Shi ndai hku tsun ai: “Htawng hkat ai ginsup lam hpe tawn kau da na matu yak dik htum re. Raitim, dai hku galaw ai gaw, Yehowa ra sharawng ai hpe chye wa ai. Shi hpe nawku dawjau lu na matu, sak jaw ai lam galaw ai gaw ging dan ai.” Maike gaw, shi mu tam wa ai tengman lam hpe manu shadan wa nna, dai gaw, shi a prat hpe galai shai lu hkra shadut ya wa ai.​—Yak 1:25.

12-13. Chyum Laika tengman lam gaw Mayli hpe gara hku karum ya ai kun?

¹² Chyum Laika hta, tengman lam a manu hpe, grai sin mak ai shaloi nhtoi jahtoi ya lu ai pyengdin hte shingdaw da ai. (Shk 119:105; Ehp 5:8) Azerbaijan mungdan kaw na Mayli gaw, Chyum Laika kaw na lu la ai karum shingtau lam hpe grai manu shadan ai. Shi gaw, makam masham n bung ai nta hta nga kaba wa ai. Kawa gaw, Muslim rai nna, kanu gaw, Ju re. Shi ndai hku tsun ai: “Karai Kasang nga ai hpe ntsen ai myit galoi n nga tim, san mayu ai ga san ni gaw grai nga ai. ‘Karai Kasang gaw masha hpe hpa majaw hpan ai kun? Marai langai gaw, prat ting yakhkak hkrum nna, ngarai hta htani htana zingri hkrum na matu sha asak hkrung ai nga yang, hpa lachyum nga na kun?’ ngu ai hpe ngai myit ai. Byin ai lam yawng gaw, Karai a myit ra ai lam re ngu masha ni tsun ai. Rai yang, ‘Karai Kasang gaw, masha ni yakhkak hkrum ai hpe yu nna pyaw nga ai kun?’ ngu nna mung ngai myit ai.”

¹³ Mayli gaw, dai ga san ni a mahtai hpe matut tam ai. Hpang hta, Chyum Laika sharin na matu hkap la dat nna, tengman lam de du wa ai. “Kamhpa mai nna lachyum nga ai Chyum Laika mahtai ni gaw, nye prat hpe grau pyaw wa hkra karum ya ai” ngu shi tsun ai. “Chyum Laika hta lawm ai lam ni gaw, myit simsa lam lu shangun ai.” Mayli zawn sha, anhte yawng mung Yehowa hpe “nsin kata de nna shi a mauhpa nhtoi de [anhte] hpe shaga bang ai wa” ngu nna shakawn ai.​—1 Pe 2:9.

14. Tengman lam hpe grau tsawra wa hkra gara hku galaw lu ai kun? (“ Kaga Shingdaw Lu Ai Lam Ni” ngu ai lawk hpe mung yu u.)

¹⁴ Dai lam ni gaw, tengman lam a manu hpe madun dan ai mahkrum madup nkau mi sha naw re.  Kaga mahkrum madup ni hpe nang chye na re. Tengman lam hpe tsawra ging ai kaga lam ni hpe tinang hkrai hkaja yu u. Tengman lam hpe grau tsawra wa yang, tsawra ai lam madun lu ai lam ni hpe grau tam wa magang rai na re.

15. Tengman lam hpe tsawra ai lam madun mai ai lam langai gaw hpa rai kun?

¹⁵ Chyum Laika hte Chyum Laika hpe madung tawn ai laili laika ni hpe ayan hkaja ai hku nna tengman lam hpe tsawra ai lam madun mai ai. Tengman lam hta grai na sai raitim, hkaja na lam ni naw nga ai. Shawng nnan shapraw ai Sin Langchyi hta ndai hku tsun da ai: “Tengman lam gaw, nam maling kaw na nampan langai zawn, grai htat nna tu taw ai shut shai ai tsing ni a shingkang ka-up ai hpe hkrum nga nna, makoi magap hkrum na daram byin nga ai. Dai nampan hpe mu mayu yang, nam maling hta shakut shaja tam ra ai. . . . Tinang madu mayu ai nga yang, hkum hpe gum nna di la ra ai. Tengman lam nampan langai hte sha hkum myit dik nga. . . . Matut tam u, matut mahkawng u.” Hkaja ai lam gaw shakut shaja ra ai raitim, gingdan ai.

16. Tang du ai gara hkaja ai ladat hpe nang mu tam ai kun? (Ga Shagawp 2:4-6)

¹⁶ Hti ai, hkaja ai lam hpe anhte yawng ra sharawng ai n re.  Raitim, tengman lam hpe grau chye wa hkra, matut “tam nga” na matu, matut “sawk yu” na matu Yehowa saw shaga ai. (Ga Shagawp 2:4-6 hpe hti u.) Dai zawn galaw yang, anhte galoi mung akyu lu la na re. Kalang hti yang, Chyum daw langai hpe sha myit maju jung ai ngu Kori tsun ai. “Lawu matsing yawng, shi hte seng ang ai Chyum daw yawng hpe hti nna, kahtap hkaja ai lam galaw ai. . . . Dai ladat gaw, lam law law hpe chye hkra karum ya ai” ngu shi tsun ai. Dai ladat (sh) kaga ladat hpe lang nna, tengman lam hpe aten hte n-gun shadat nna hkaja yang, tengman lam hpe tsawra ai lam madun ai re.​—Shk 1:1-3.

17. Tengman lam hta asak hkrung ai ngu ai gaw hpa lachyum rai kun? (Yaku 1:25)

¹⁷ Tengman lam hpe hkaja ai hte sha n hkum tsup ai. Akyu hpring tup lu na matu, chye wa ai lam ni hpe prat hta hkan sa ai hku nna tengman lam hta asak hkrung ra ai. Rai yang, tengman lam a majaw jet ai ngwi pyaw lam lu la na re. (Yaku 1:25 hpe hti u.) Tengman lam hta gara hku nna asak hkrung nga lu na kun? Anhte gara shara hta tatut hkan sa taw ai, gara shara hta naw rawt jat ra ai hpe chye hkra tinang hkum tinang san jep ra ai ngu hpunau langai hpaji jaw ai. Kasa Pawlu ndai hku tsun wa ai: “Ya dep madep hte hte maren, dai arawn alai hta anhte hkawm nga ga.”​—Hpl 3:16.

18. “Teng man ai lam hta hkan sa asak hkrung” na matu hpa majaw kaja htum shakut ai kun?

¹⁸ “Teng man ai lam hta hkan sa asak hkrung” ai majaw, lu la ai akyu ni hpe myit yu u. Anhte a prat hta atsam ningja ni rawt jat wa ai sha n-ga, hpunau nauna ni hte Yehowa hpe mung ngwi pyaw lam jaw lu ai. (Gsh 27:11; 3 Yh 4,JCLB) Dai lam ni gaw, tengman lam hpe tsawra na matu, dai hte maren asak hkrung na matu karum ya lu ai kaja htum lam ni re.