1-2. Yehowa a mayam ni hta hpa myit mada lam nga ai kun?

MYIT mada lam gaw grai ahkyak ai. Masha nkau mi gaw awng dang ai dinghku byin na matu, hkam kaja ai ma ni hpe bau maka lu na matu, grai machyi sawng ai kaw nna mai tsai wa lu na matu myit mada ma ai. Hkristan ni mung dai lam hpe myit mada ai. Raitim, dai hta grau ai myit mada lam nga ai. Htani htana asak lu na matu hte tsawra ai ni bai hkrung rawt wa na ngu ai lam ni re.

² Kasa Pawlu ndai hku tsun da ai: “Ngai mung, ding man ai ni hte n ding n man ai ni a matu, bai hkrung rawt wa na lam nga ai, ngu nna Karai Kasang hta myit mada nga nngai.” (Kas 24:15) Hkrung rawt ai myit mada lam hpe Pawlu shawng nnan tsun wa ai n re. Yoba mung tsun wa ai. Shi hpe Karai Kasang myit dum nna asak bai jahkrung ya na hpe kam ai.​—Yob 14:7-10, 12-15.

3. 1 Korinhtu daw kaba 15 kaw nna hpa akyu lu la mai ai kun?

³ “Si ai kaw na bai hkrung rawt ai lam” gaw Hkristan sharin achyin ai lam ni a “shawng npawt na ga kanu” langai re. (Heb 6:1, 2) Hkrung rawt ai lam hte seng nna Pawlu sanglang dan ai hpe Langai Korinhtu daw kaba 15 hta mu lu ai. Dai gaw tsa ban langai na Hkristan ni hpe n-gun lu shangun na re. Anhte hpe mung n-gun jaw ya lu nna, myit mada lam hpe grau shangang shakang ya lu ai.

4. Si mat ai ni hkrung rawt wa na ngu hpa majaw kam mai ai kun?

⁴ Tsawra ai ni si mat tim, hkrung rawt wa na ngu ai hpe Yesu Hkristu a hkrung rawt ai lam gaw kam shangun ai. Dai lam gaw Korinhtu masha ni hpe Pawlu ndau shana wa ai “kabu gara shi  ga” kaw lawm ai. (1 Ko 15:1, 2) Hkristan langai gaw hkrung rawt ai lam hpe n kam ai nga yang, shi a makam masham gaw kaman lila re ai lam Pawlu tsun ai. (1 Ko 15:17) Yesu a hkrung rawt ai lam hpe kam ai gaw Hkristan ni a madung myit mada lam re.

5-6. 1 Korinhtu 15:3, 4 hta lawm ai ga ni gaw anhte a matu hpa lachyum nga ai kun?

⁵ Hkrung rawt ai lam hte seng nna Pawlu gaw tengman ai lam 3 hpe shawng tsun ai. Dai ni gaw, (1) “Hkristu gaw anhte a yubak a matu si hkam sai.” (2) ‘Makoi mayang hkrum ai.’ (3) ‘Chyum laika hta tsun ai hte maren, masum ya nhtoi hta bai hkrung rawt wa sai’ ngu ai lam ni re.​—1 Korinhtu 15:3, 4 hpe hti u.

⁶ Yesu a si ai lam, makoi mayang ai lam hte hkrung rawt ai lam gaw anhte a matu hpa lachyum nga ai kun? Meshia gaw “hkrung nga ai ni a ga hta na htawm kau ai hkrum” nna, “tara tawt lai ai ni hte rau shi a matu lup galaw da” na lam myihtoi Esaia tau hkrau tsun da ai. “Masha law law a yubak hpe gun hpai” na ngu nna mung matut tsun ai. Gawng malai hkungga jaw ai hku nna dai lam hpe Yesu jahpring shatsup ya wa ai. (Esa 53:8, 9, 12; Mat 20:28; Rom 5:8) Dai majaw, Yesu a si ai lam, makoi mayang ai lam hte hkrung rawt ai lam gaw yubak hte si ai kaw na lawt lu na, si mat ai ni hte bai hkrum zup na ngu ai myit mada lam nga shangun ai.

7-8. Yesu hkrung rawt wa ai hpe Hkristan ni hpe hpa gaw kam shangun ai kun?

⁷ Hkrung rawt ai lam hte seng nna anhte a myit mada lam gaw Yesu a hkrung rawt ai lam hte matut mahkai nga ai. Dai majaw, Yesu hkrung rawt ai hpe anhte kam ra ai. Yehowa gaw Yesu hpe asak bai jahkrung ya ai lam anhte hpa majaw kam mai ai kun?

⁸ Yesu hkrung rawt wa ai hpe mu wa ai sakse law law nga ai. (1 Ko 15:5-7) Shawng nnan na sakse gaw kasa Petru (Kehpa) re. Hkrung rawt wa ai Yesu hpe Petru mu ai lam sape ni mung shagrin ya ai. (Luk 24:33, 34) Kasa “shi lahkawng” mung mu ai. Dai hpang Hkristu gaw “lang lata sha hpu nau manga tsa jan” a man hta dan pru ai. Mahte 28:16-20 hta lawm ai Galile kaw hkrum zup ai aten hta rai na re. Yesu hpe Meshia hku nna n hkap la ai kanu bung ai kanau Yaku kaw mung dan pru wa ai. (Yhn 7:5) Yesu hkrung rawt ai hpe mu wa ai hpang, Yaku kamsham wa ai. A.D. 55 hta dai laika hpe Pawlu ka ai shaloi, hkrung rawt ai hpe mu wa ai sakse law law gaw asak naw hkrung ai. Dai majaw, dai lam hpe n kam ai kadai raitim, dai sakse ni hpe sa san mai ai.

9. Kasa 9:3-5 hku nga yang Yesu hkrung rawt sai hpe Pawlu hpa majaw lu tsun ai kun?

⁹ Dai hpang, Pawlu hpe mung Yesu shadan dan ai. (1 Ko 15:8) Pawlu (Shawlu) gaw Damasku de sa ai lam hta, hkrung rawt ngut sai Yesu a nsen hpe na ai. Shingran hta Yesu hpe mu ai. (Kasa 9:3-5 hpe hti u.) Pawlu a mabyin gaw, Yesu gaja nan hkrung rawt wa ai hpe kahtap nna sakse madun ai.​—Kas 26:12-15.

10. Yesu hkrung rawt wa ai hpe kam ai majaw Pawlu hpa galaw wa ai kun?

¹⁰ Pawlu gaw lai wa sai aten hta Hkristan ni hpe zingri zingrat wa ai majaw, shi tsun ai lam hpe masha nkau mi myit lawm na re. Yesu hkrung rawt wa ai hpe shi kam mat ai shaloi, kaga ni mung kam wa hkra shakut shaja let tsun dan ai. Kayat hkrum ai, htawng jahkrat hkrum ai, sanghpaw hten ai lam ni hkrum tim pyi, dai tengman ai lam hpe hkaw tsun ai. (1 Ko 15:9-11; 2 Ko 11:23-27) Asak jaw na matu pyi jin jin re. Yesu hkrung rawt wa ai ngu ai tsa ban langai na madi madun lam gaw anhte hpe n-gun jaw ya lu nna, hkrung rawt ai myit mada lam hpe grau shangang shakang ya ai n re i?

11. Korinhtu masha ni hta hkrung rawt ai hte seng ai shut ai ningmu hpa majaw nga ai kun?

¹¹ Grik mung na Korinhtu masha nkau mi gaw hkrung rawt wa ai hte seng nna shut ai ningmu nga ai. Dai majaw, ‘si mat ai ni bai hkrung rawt wa ai lam n nga ai’ ngu nna pyi tsun ma ai. Hpa majaw kun? (1 Ko 15:12) Grik mung, Ahten mare na myit mang hpaji du ni gaw Yesu a hkrung rawt ai hte seng ai makam masham hpe jahpoi asawng ma ai. Korinhtu masha nkau mi mung dai zawn myit na masa nga ai. (Kas 17:18, 31, 32) Nkau mi gaw, hkrung rawt ai lam hpe ga shadawn hku nna sha sawn la ma ai. Masha ni gaw yubak masha re ai majaw, masha chyasi hte bung nna, Hkristan byin wa yang asak hkrung wa ai ngu sawn la ma ai. Gara hku mi tsun tim, hkrung rawt ai lam hpe n kam yang, shanhte a makam masham gaw kaman lila sha re. Karai Kasang gaw Yesu hpe n jahkrung ya yang, gawng malai hkungga hpe n jaw lu ai sha n-ga, anhte yawng mung yubak masha ni sha naw rai nga na re. Dai majaw, hkrung rawt ai lam hpe n kam ai ni hta jet ai myit mada lam n nga ai.​—1 Ko 15:13-19; Heb 9:12, 14.

12. 1 Petru 3:18, 22 hku nga yang Yesu a hkrung rawt ai lam gaw kaga hkrung rawt ai ni hte gara hku shai ai kun?

¹² ‘Hkristu gaw si mat ai ni kaw na bai hkrung rawt wa sai’ lam Pawlu shi nan hkrum wa ai. Dai hkrung rawt ai lam gaw kaga hkrung rawt ai lam ni hta grau ai. Hkristu garai n hkrung rawt shi yang, ginding aga hta hkrung rawt wa ai ni gaw bai si mat wa ai. Pawlu gaw Yesu hpe “yup pyaw mat ai ni hta shawng si ai asi tai wa sai” ngu tsun ai. Gara lam hku nna shawng nnan rai kun? Shi gaw wenyi hkum hte hkrung rawt wa nna, sumsing lamu de lung ai shinggyim masha ni kaw nna shawng nnan re ai majaw re.​—1 Ko 15:20; Kas 26:23; 1 Petru 3:18, 22 hpe hti u.

13. Pawlu gaw Adam hte Yesu a lapran shai ai lam hpe gara hku shingdaw dan ai kun?

¹³ Masha langai si hkam ai majaw wan hku law ai masha ni gaw gara hku asak bai hkrung wa na kun? Pawlu asan sha mahtai jaw da ai. Adam a majaw, shinggyim masha ni hkra machyi nga ai lam hte Hkristu a gawng malai hkungga a majaw, akyu lu la na lam hpe shingdaw dan ai. “Masha a jaw e si hkrung si htan byin wa ai” ngu Pawlu tsun ai. Adam mara galaw ai majaw, shi hte kashu kasha ni si hkrung si htan hkrum wa ai. Shi a majaw, anhte mung ya du hkra, hkra machyi nga ai. Karai Kasang gaw Kasha hpe bai jahkrung ya ai majaw, myit mada lam nga wa ai. “Masha a jaw e mung si mat ai ni matu bai hkrung rawt wa na lam tai wa sai. Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung wa na ma ra ai” ngu Pawlu tsun ai.​—1 Ko 15:21, 22.

14. Adam hkrung rawt na kun? Sanglang dan u.

¹⁴ “Yawng mayawng gaw Adam hta e si mat wa ai” ngu Pawlu tsun ai gaw hpa lachyum rai kun? Adam kaw nna lu la ai yubak hte n hkum tsup ai lam ni a majaw, si ra ai shinggyim masha yawng hte seng nna Pawlu tsun nga ai re. (Rom 5:12) Bai hkrung rawt wa na ni hta Adam n lawm ai. Shi gaw hkum tsup ai masha rai nna, Karai a ga hpe dingsang n madat ai majaw, Hkristu a gawng malai hkungga kaw nna akyu lu la na n re. Shi byin wa ai masa gaw, “bainam” hku nna “n htum n wai ari” jaw hkrum na ni a masa hte maren sha re.​—Mat 25:31-33, 46; Heb 5:9.

15. “Bai hkrung wa” na “yawng mayawng” hta kadai ni lawm ai kun?

¹⁵ “Yawng mayawng gaw Hkristu hta e bai hkrung wa na ma ra ai” ngu Pawlu tsun ai hpe sadi yu u. (1 Ko 15:22) Pawlu gaw sumsing lamu de hkrung rawt na Korinhtu mare na  namman chya hkam ai Hkristan ni hpang de ka nga ai re. Dai Hkristan ni gaw “Hkristu Yesu hta e shachyoi shapra ai hkrum nna, chyoi pra ai ni ngu na shaga la ai” hkrum ai ni re. “Hristu hta e yup pyaw mat ai ni” a lam hpe mung Pawlu tsun da ai. (1 Ko 1:1-2; 15:18; 2 Ko 5:17) Hkristu zawn si hkam ai nga yang, Hkristu zawn bai hkrung rawt wa na ni a lam kaga laika hta Pawlu ka da ai. (Rom 6:3-5) Yesu gaw wenyi hkum hte hkrung rawt mat nna sumsing lamu de lung mat ai. Dai majaw, Hkristu a sape re ai namman chya hkam ai Hkristan yawng mung Yesu zawn sumsing aprat hte hkrung rawt na re.

16. Pawlu gaw Yesu hpe shawng “si ai asi” ngu shaga ai gaw hpa lachyum rai kun?

¹⁶ Hkristu gaw “yup pyaw mat ai ni hta shawng si ai asi tai wa sai” ngu Pawlu ka da ai. Lazaru zawn, kaga ni mung ginding aga hta asak bai hkrung wa tim, wenyi hkum hte hkrung rawt nna, htani htana asak lu ai ni hta Yesu gaw shawng nnan re. Karai Kasang hpe Israela ni hkungga nawng ai shawng si ai nsi naisi hte Yesu hpe shingdaw lu ai. Yesu hpe “shawng si ai asi” ngu nna tsun da ai majaw, kaga ni mung sumsing asak aprat hte naw hkrung rawt wa na gaw dan leng nga ai. Hkristu a sape re ai kasa ni hte kaga ni gaw Yesu zawn sumsing asak aprat hte hkrung rawt na re.

17. Hkristu a sape ni gaw sumsing shaman chyeju hpe gara aten hta lu la na kun?

¹⁷ Korinhtu ni hpe Pawlu laika ka ai aten hta, Hkristu a sape ni gaw sumsing lamu de garai n hkrung rawt shi ai. Htawm hpang hta byin wa na lam hpe Pawlu ndai hku tsun da ai: “Langai hte langai tinang ang ai hku hte maren rai wa na ra ai: Hkristu gaw shawng si ai asi rai nga ai; dai hpang, Hkristu bai du ai ladaw e shi hte seng ai ni hkrung wa na ma ra ai.” (1 Ko 15:23; 1 Ht 4:15, 16) Dai ni anhte gaw tau hkrau tsun da ai Hkristu “bai du” ai ladaw hta asak hkrung nga ai. Si mat sai kasa ni hte kaga namman chya hkam ai Hkristan ni gaw, sumsing shaman chyeju lu na matu, Hkristu zawn hkrung rawt na matu, bai du ai aten du hkra la nga ra ai.

18. (a) Sumsing lamu de hkrung rawt ai lam ngut yang kaga hkrung rawt ai lam nga na hpe hpa majaw lu tsun ai kun? (b) Sumsing lamu hta byin wa na lam hte seng nna 1 Korinhtu 15:24-26 kaw nna hpa chye lu ai kun?

¹⁸ Sumsing lamu hta Hkristu hte arau asak hkrung na matu myit mada lam n nga ai sadi dung ai Hkristan ni gaw gara hku kun? Shanhte mung hkrung rawt na myit mada lam nga ai. Sumsing lamu de hkrung rawt na Pawlu hte kaga ni gaw ‘shawng na bai hkrung rawt wa ai lam’ hta lawm ai ngu Chyum Laika hta  tsun da ai. (Shr 20:6) Dai majaw, kaga hkrung rawt wa na lam naw nga ai hpe chye lu ai. Tinang a htawm hpang hte seng nna Yoba tsun wa ai lam hte mung hkrak sha re. (Yob 14:15) “Hkristu bai du ai ladaw e shi hte seng ai ni” gaw, asuya ni, ahkang aya nga ai ni hte n-gun atsam nga ai ni yawng hpe Yesu Hkristu jahten ai shaloi, Yesu hte arau nga nga na re. “Hpang chyahtum na hpyen wa ngu ai, si hkrung si htan” hpe pyi shamyit kau na re. Sumsing lamu de hkrung rawt mat na ni gaw galoi mung si sana n re. Kaga ni gaw gara hku kun?​—1 Korinhtu 15:24-26 hpe hti u.

19. Ginding aga myit mada lam nga ai ni gaw gara hku kun?

¹⁹ Ginding aga myit mada lam nga ai ni gaw gara hku kun? “Ngai mung, ding man ai ni hte n ding n man ai ni a matu, bai hkrung rawt wa na lam nga ai, ngu nna . . . myit mada nga nngai” ngu Pawlu tsun wa ai ga ni kaw nna myit mada lam lu la mai ai. (Kas 24:15) N ding n man ai ni gaw sumsing lamu de n shang lu ai lam asan sha chye lu ai. Dai majaw, dai ga ni gaw ginding aga hkrung rawt ai lam hpe tsun mayu ai re.

20. Myit mada ai lam gaw gara hku n-gun lu shangun ai kun?

²⁰ “Bai hkrung rawt wa na lam nga ai” gaw teng sha re. Ginding aga hta bai hkrung rawt wa na ni gaw, htani htana asak hkrung na myit mada lam nga ai. Dai ga sadi hpe kam mai ai. Dai majaw, si mat ai anhte tsawra ai ni hte seng nna shalan shabran lam lu ai. Shanhte gaw, Hkristu hte kaga ni, hkawhkam ni hku nna “shaning hkying mi tup up” ai aten laman hkrung rawt wa na re. (Shr 20:6) Shaning 1,000 garai n uphkang shi ai shaloi, nang si mat yang bai hkrung rawt wa na hpe kam mai ai. ‘Dai myit mada lam gaw anhte hpe myit daw shangun na n re.’ (Rom 5:5, JCLB) Dai gaw ya mung n-gun lu shangun nna, Karai a magam gun ai hta mung grau ngwi pyaw shangun ai. Hpang na sumhpa hta 1 Korinhtu daw kaba 15 kaw nna grau chye lu na re.