N re. Chyum Laika hta mung, labau ni hta mung, dai zawn galaw ai lam n nga ai.

Chyum Laika law law hta dai Chyum daw hpe ga gale da ai lam a majaw, Pawlu a prat hta, si mat ai ni a malai hkalup hkam ya ai ngu masha nkau sawn la mat ai re. Ga shadawn, “si mat ai ni a matu mara shanhte a malai hku nna hkalup hkam la ai masha ni a lam gaw gara hku rai ta?” ngu nna Kabu Gara Shiga Chyum Laika hta tsun da ai.

Chyum hpaji du marai lahkawng tsun ai lam hpe mung yu yu ga. “Si mat ai masha ni a malai hkalup hkam ya ai lam hte seng nna, Chyum Laika hta mung, labau hta mung madi madun da ai lam n nga ai” ngu Dr. Gregari Lakwud tsun ai. Dai hte maren, Gawdan Di Hpi mung ndai hku ka da ai: “Chyum Laika hta mung, labau hta mung dai zawn hkalup hkam ai lam n nga ga ai. Ga Shaka Ningnan hta mung dai lam hte seng nna tsun da ai lam n nga ai. Tsa ban langai na Hkristan ni mung, kasa ni si mat ai hpang hpawng de wa ai nawku jawng ni mung, dai zawn galaw wa ai ngu sakse madun ai lam n nga ai.”

Chyum Laika hta, Yesu a hpang hkan nang ai ni hpe ‘masha amyu baw shagu hpe sape shatai let, . . . shanhte hpe baptisma jaw nhtawm, shi a hkang da mada yawng hte hpe hkan shadik lu mu ga, shanhte hpe sharin shaga ya mu’ ngu nna tsun da ai. (Mat 28:19, 20) Marai langai gaw, hkalup hkam da ai sape garai n byin shi yang, Yehowa hte Yesu a lam sharin la ra nna, kamsham ra ai, shan a ga hpe madat ra ai. Si mat sai marai langai ngai gaw dai hpe n lu galaw ai zawn, asak hkrung nga ai Hkristan langai mung shi a malai n lu galaw ya ai.​—Hpj 9:5, 10; Yhn 4:1; 1 Ko 1:14-16.

Rai yang, Pawlu hpa hpe tsun mayu ai kun?

Korinhtu mare hta nga ai Hkristan nkau mi gaw si mat ai ni bai hkrung rawt wa na ngu ai lam hpe n kam ai. (1 Ko 15:12) Dai ningmu shut ai ngu Pawlu tsun ai. ‘Shani shagu si’ hkrung si htan hte shi hkrum nga ai ngu tsun ai. Shani shagu asak shoihpa nga ai lam ni hte hkrum tim, si mat ai hpang Yesu zawn atsam kaba ai wenyi hkum hte hkrung rawt na hpe shi kam ai.​—1 Ko 15:30-32, 42-44.

Namman chya hkam ai Hkristan ni gaw manghkang ni hkrum ra na, si ra na, dai hpang she hkrung rawt lu na ngu ai hpe Korinhtu masha ni chye na ra ai. “Hkristu Yesu hta e baptisma hkam ai” lam hta, “shi a si hkam ai hta baptisma hkam” ai lam mung lawm ai. (Rom 6:3) De a lachyum gaw, Yesu zawn sumsing lamu de hkrung rawt na matu, shanhte gaw mayak mahkak ni hkrum nna, si ra na ngu tsun mayu ai re.

Yesu hkalup hkam ngut nna 2 ning jan hta, shi a kasa lahkawng hpe ndai hku tsun ai: “Ngai hkam la na baptisma hpe mung, nan hkam la lu na rai nga myit dai.” (Mrk 10:38, 39) Yesu gaw hka hta hka lup hkam ai hpe tsun ai n re. Shi a sadi dung ai lam a majaw si hkam ra ai hpe tsun nga ai re. Namman chya hkam ai Hkristan ni gaw “hpung shingkang hkam la lu hkra, shi hte rau nni nkri hkrum” na ngu Pawlu tsun da ai. (Rom 8:16, 17; 2 Ko 4:18) Dai majaw, shanhte mung sumsing lamu de hkrung rawt na matu si ra ai.

Pawlu a ga hpe ndai zawn jaw ai hku ga gale mai ai: “Si mat ai ni asak bai n hkrung yang si ai hta hkalup hkam ai ni gaw gara hku rai ta? Si mat ai ni asak bai n hkrung yang dai zawn hkalup hpe hpa majaw hkam wa na kun?”