TSAWRA ai manang kaw nna n-gun jaw ai laika lu la ai shaloi, gara hku hkamsha ai kun? Sape Timohti gaw kasa Pawlu kaw nna dai zawn laika lu la wa ai. Ya anhte lu hti ai 2 Timohti laika re. Timohti gaw simsa ai shara hpe tam nna, tsawra ai manang a laika hpe hti nga na re. ‘Pawlu hkam kaja nga ai kun? Nye a lit hpe karum ya lu ai hpaji jaw na lama ma nga ai kun? Hkaw tsun magam hta awng dang lu na matu hte kaga ni hpe karum ya na matu ndai laika gaw ngai hpe karum ya lu na kun?’ ngu nna Timohti myit chye ai. Dai ga san ni a mahtai sha n-ga, kaga ahkyak ai lam ni hpe laika hta Timohti lu hti ai. Ndai laika hta lawm ai hpaji jaw ga nkau mi hpe ndai sumhpa hta chye lu na re.

Timohti gaw laika hpe hpaw hti dat ai hte kalang ta, shi hpe Pawlu kade daram lanu lahku ai lam chye mat na re. “Nye tsaw ra ai ngai sha” ngu nna Pawlu shaga da ai. (2 Tm 1:1) Timohti gaw dai laika hpe A.D.65 daram hta lu la ai. Dai shaloi shi gaw asak 30 jan rai nna, myitsu salang hku nna magam gun nga sai. Rau magam gun wa ai 10 ning jan laman, Pawlu kaw nna law law sharin la lu ai.

Yakhkak ai lam ni hpe sadi dung let hkam jan nga ai Pawlu a kasi ningli hpe yu nna Timohti n-gun lu la na re. Pawlu gaw Roma hta bawng dung hkrum nna, kade n na yang sat hkrum sana re. (2 Tm 1:15, 16; 4:6-8) Pawlu gaw “hkrum mahkrum ngai hkam sharang nga nngai” ngu tsun da ai majaw, shi a nden marai hpe Timohti mu lu ai. (2 Tm 2:8-13) Timohti zawn, anhte mung Pawlu a hkam sharang lu ai atsam kaw nna n-gun lu la ai.

Pawlu gaw Timohti hpe Karai a magam hta lu la ai lit hpe manu shadan na matu n-gun jaw ai. Pawlu gaw Timohti lu da ai “Karai a chyeju kumhpa hpe wan zawn grung hkra galaw” shangun mayu ai. (2 Tm 1:6, NW) Pawlu gaw “chyeju kumhpa” hpe Grik ga si hkarisma ngu ai hpe lang wa ai. Dai Grik ga si gaw manu jahpu n jaw ra ai, n ging dan ai sha lu la ai ngu lachyum nga ai. Nawku hpung hta laklai ai lam hku nna magam gun na matu, lata hkrum ai shaloi Timohti  gaw dai chyeju kumhpa hpe lu la wa ai re.​—1 Tm 4:14.

Chyeju kumhpa hpe hpa galaw na matu Timohti hpe Pawlu n-gun jaw ai kun? “Wan zawn grung” ngu ai ga si hpe hti dat ai shaloi, nta kaw lang ai wan chyi nga ai wan n-ga hpe Timohti myit hkrup na re. Wan matut chyi nga na matu, grau kahtet na matu, wan n-ga ni hpe shalau ya ra ai. “Wan wut ai, shalau ai, layit yit ai” ngu lachyum nga ai Grik ga si hpe Pawlu lang da ai majaw, “lama ma galaw na matu myit rawt u” ngu tsun nga ai re ngu nna ga htai chyum langai hta tsun da ai. ‘Na a lit hpe atsawm gun hpai nga u’ ngu nna Timohti hpe hpaji jaw nga ai re. Dai ni, anhte mung magam bungli hta dai zawn myit rawt ai lam madun na matu ahkyak ai.

Magam bungli hta awng dang na matu karum ya lu ai lam langai hpe laika hta Timohti matut lu hti ai. “Nang hpe ap ya da ai aya kaja hpe, anhte hta rawng nga ai Chyoi pra ai Wenyi hte, a mahkyu nga u” ngu Pawlu ka da ai. (2 Tm 1:14) Dai aya kaja gaw hpa rai kun? Timohti gaw gara aya kaja hpe ap da hkrum ai kun? Chyum Laika hta lawm ai tengman ai lam, akyu nga ai mungga a lam hpe shawng na daw kaji hta Pawlu tsun da ai. (2 Tm 1:13) Magam gun langai hku nna Timohti gaw nawku hpung kata kaw sha n-ga, shinggan kaw mung tengman ai lam sharin ya na lit nga ai. (2 Tm 4:1-5) Dai sha n-ga, Karai a sagu hpung hpe rem na matu, myitsu salang hku nna mung lit ap hkrum ai. (1 Pe 5:2) Timohti gaw Yehowa a chyoi pra ai wenyi hte Chyum Laika hpe kamhpa ai hku nna, tengman ai lam hpe makawp maga lu ai.​—2 Tm 3:14-17.

Dai ni anhte mung, hkaw tsun magam hta kaga ni hpe sharin ya na matu, tengman ai tara ap da hkrum ai. (Mat 28:19, 20) Akroi anoi akyu hpyi ai, Chyum Laika hpe atsawm hkaja ai hku nna, ap da hkrum ai aya kaja a matu, chyeju dum ai lam madun mai ai. (Rom 12:11, 12; 1 Tm 4:13, 15, 16) Nawku hpung myitsu salang, aten hpring magam gun hku nna lit ni hpe kahtap lu da ai rai na re. Dai lit ni gaw anhte hpe grau shagrit shanem ai, Karai Kasang hpe grau kamhpa ai wa byin shangun ging ai. Dai majaw, lit hpe manu shadan ai, Yehowa a karum shingtau lam hpe kamhpa ai hku nna, aya kaja hpe makawp maga mai ai.

Timohti a lit hta kaga ni hpe shaman ya na lit mung lawm ai. Dai majaw mung, Pawlu gaw “ngai kaw na nang na la sai lam hte hpe, masha kaga hpe sharin achyin chye ai kangka re ai masha” kaw ap ya u ngu nna Timohti hpe n-gun jaw ai. (2 Tm 2:2) Hpunau ni kaw nna Timohti sharin la ai zawn, kaga ni hpe mung bai sharin ya ra ai. Myitsu salang ni mung dai hte maren shakut ging ai. Kaja ai myitsu salang gaw lit hte seng nna chye da ai lam ni hpe n ngam da ai sha, kaga ni hpe sharin ya ai. Tinang hta grau chye, grau ram mat na hpe n tsang ai. Dai majaw, loi mi sha sharin ya ai baw n galaw ai. Wenyi lam hta rawt jat wa na matu, sawn maram chye na matu kaga ni hpe shaman ya ai. Dai majaw, shi shaman ya dat ai “kangka re ai masha” ni a majaw nawku hpung gaw akyu law law lu la ai.

Pawlu a n-gun jaw ai laika hpe Timohti grai manu shadan na re. Laika hpe chyahkring hkring bai hti let hpaji jaw ga ni hpe gara hku akyu jashawn mai na kun? ngu nna myit nga ai hpe shingran yu mai ai.

Pawlu a hpaji jaw ga hpe anhte mung hkan sa mayu ai. Gara hku nna kun? Chyeju kumhpa hpe wan zawn grung nga ai myit rawt ai lam hte akyu jashawn ai, aya kaja hpe makawp maga ai, kaga ni hpe mahkrum madup hte machye machyang garan ya ai hku nna re. Rai yang, Timohti hpe Pawlu n-gun jaw wa ai zawn, “Karai jaw ai lit hpe kangka hkra galaw lu” na re.​—2 Tm 4:5, NW.