Nang Gaw Bungli Manang Kaja Rai Kun?
“NGAI gaw hpa-awn wa zawn shi hte rau nga nga nna, . . . Ngai mung shi a man e tut nawng awng sharawng nga nngai.” (Gsh 8:30) Karai Kasang a kasha gaw, mungkan ga de garai n sa shi yang, Kawa hte rau sumsing lamu kaw shaning law law bungli galaw wa ai lam ndai Chyum daw gaw madun dan ai. Karai hte rau bungli galaw lu ai hpe Yesu “awng sharawng nga” ai hpe mung sadi yu u.
Hpang hta, mungkan ga kaw, shi hte rau bungli galaw na ni a matu, bungli manang kaja byin na atsam ningja ni hpe Yesu sharin la wa ai. Yesu a kasi ningli kaw na anhte gara hku akyu lu mai na kun? Yesu a kasi hpe hkaja ai hku nna, bungli manang kaja byin lu na npawt tara 3 hpe chye wa na re. Dai npawt tara ni gaw, zinlum lam rawt jat na matu, rau chye galaw na matu karum ya na re.
Yehowa hte Yesu a kasi ningli hpe dum nna, bungli manang ni hpe na a mahkrum madup, machye machyang ni hpe garan ya u
Npawt Tara 1: “Hkungga Lara Ai Hta Shada Da Shagrau Hkat Mu”
Bungli manang kaja gaw, bungli rau galaw ai ni hpe manu shadan ai. Tinang yu kaba hkrum na matu sha n shakut ai. Dai zawn shagrit shanem ai myit jasat hpe, Kawa kaw na Yesu sharin la wa ai. Yehowa chyu sha Hpan Madu ngu shaga hkrum na ging dan ai. Raitim, bungli manang re ai Kasha a galaw ngut kre ai lam ni hpe mung, kaga ni hpe chye shangun ai. “Anhte gaw, anhte a hkrang sumla hte . . . bung ai, shinggyim masha hpan ga” ngu ai ga hta dai lam dan dawng ai. (Nin 1:26) Yehowa a shagrit shanem ai lam hpe Yesu manu shadan na gaw teng sha re.—Shk 18:35.
Yesu mungkan ga hta nga ai shaloi, shagrit shanem ai lam madun wa ai. Tinang ngut kre awng dang wa ai lam ni a matu shakawn hkrum ai shaloi, Karai hpe sha shakawn shangun ai. (Mrk 10:17, 18; Yhn 7:15, 16) Kasa ni hte simsa na matu shakut ai. Sape ni hpe mayam hku n re ai sha, jinghku zawn kanawn mazum ai. (Yhn 15:15) Shagrit shanem ai lam hpe sharin ya na matu, shanhte a lagaw hpe pyi kashin ya ai. (Yhn 13:5, 12-14) Anhte mung, bungli manang ni hpe manu shadan ging ai. Shanhte a akyu hta na, tinang a akyu hpe shawng n tawn ging ai. “Shada da shagrau hkat” na, kadai myi man lu na hpe myit n tsang ai nga yang, bungli law law ngut kre lu na re.—Rom 12:10.
Shagrit shanem ai wa gaw, “hpaji daw chye ai ni law nga yang, myit ai lam grin wa ai” ngu ai hpe hkap la ai. (Gsh 15:22) Mahkrum madup, atsam ningja kade daram nga tim, yawng hpe chye ai kadai n nga ai. Yesu pyi, shi n chye ai lam ni nga ai hpe yin la ai. (Mat 24:36) N hkum tsup ai sape ni, hpa chye da ai lam, gara hku mu mada ai lam hpe mung shi myit lawm ai. (Mat 16:13-16) Dai majaw, Yesu makau hta, manang ni nga manu ai gaw mauhpa n re. Anhte mung, tinang n chye ai lam ni nga ai hpe shagrit shanem let hkap la nna, kaga ni a hpaji jaw ga hpe madat na nga yang, simsa lam lu nna, bungli mung grau awng dang na re.
Laksan hku nna, myitsu salang ni, shada da rau bungli galaw ai shaloi, Yesu a shagrit shanem ai lam hpe kasi la na matu ahkyak ai. Gara myitsu salang hpe mung, chyoi pra ai wenyi shadut ya lu ai hpe hkap la ra ai. Myitsu salang zuphpawng hta, marai shagu gaw, tinang a ningmu hpe wanglu wanglang tsun gwi ai masa byin hkra karum ya na nga yang, nawku hpung ting akyu lu na dawdan lam ni jahkrat lu na re.
Npawt Tara 2: ‘Nanhte A Rap Ra Ai Lam Hpe Chye Wa Mu Ga’
Bungli manang kaja gaw, manang ni hte kanawn mazum ai shaloi, rap ra ai lam nga ai. Tinang sha jaw dum na n re. Myit hkrum chye ai. Kawa a rap ra ai myit jasat hpe Yesu law law lang mu wa ai. Ga shadawn, si dam hkrum ging ai shinggyim masha ni hpe hkye la na matu, Yesu hpe Yehowa shangun dat ai.—Yhn 3:16.
Yesu mung, htap htuk ai aten shagu myit hkrum ya ai. Israela masha ni hpe karum na matu shangun dat hkrum tim, Hkanan (Hponisha) amyu numsha hpe karum ya wa ai hpe dum u. (Mat 15:22-28) Sape ni kaw na mung, ladu lai n myit mada ai. Shi hpe masha man hta nyet kau ai manang Petru hpe mara raw ya ai. Hpang hta, lit kaba ni pyi jaw wa ai. (Luk 22:32; Yhn 21:17; Kas 2:14; 8:14-17; 10:44, 45) Yesu a kasi gaw, “rap ra ai lam hpe masha yawng mayawng chye wa” na matu shakut ra ai hpe sharin ya ai.—Hpl 4:5, NWT.
Rap ra ai lam nga ai gaw, masha yawng hte htap htuk ai hku bungli rau galaw lu hkra, hku hku hkau hkau nga chye hkra karum ya na re. Yesu gaw, kaga ni hte grai htuk ai majaw, “kang hta ai ni, yubak kap ai ni a jinghku” ngu nna pyi, manawn ai hpyen ni mara shagun ma ai. (Mat 11:19) Yesu zawn sha, anhte mung kaga ni hte htap htuk hkra bungli rau galaw lu na kun? Hpung kawan bungli hta, Behtela hta, shingdu labau amyu myu nga ai ni hte rau magam gun wa ai hpunau Luwit a lam hpe yu yu ga. “Ngai hte rau galaw ai ni yawng hpe hkrang n bung ai nlung ni hte gap da ai shakum langai hte shingdaw yu ai. Hkrang n bung ai nlung ni hte gap ai majaw, shakum ding na matu, shara nkau na nlung ni hpe galai bang ra ai. Ngai mung bungli ngut kre lu hkra, kaga ni hte htap htuk na matu, ra ang ai lam ni hpe galai shai ai” ngu shi tsun ai. Grai kaja ai myit jasat re.
Bungli manang kaja gaw, kaga ni tinang a hkang ai npu hta n nga na tsang nna, hpaji ip da ai baw n galaw ai
Gara aten ni hta rau galaw ra chye ai kun? Hkaw tsun bungli hta shang lawm ai shaloi hta re. Tinang hta na, dinghku lit grau law ai ni, asak n bung ai ni hte rau magam gun ra chye ai. Tang du hkra shanhte shang lawm lu na matu, tinang a myit rawt ai lam, hkaw tsun ai ladat hpe galai shai mai na kun?
Npawt Tara 3: “Karan Kachyan Jaw” Nga U
Bungli manang kaja gaw, “karan kachyan jaw” mayu ai myit nga ai. (1 Tm 6:18) Yehowa gaw hpaji ip da ai wa n re ai lam, bungli rau galaw ai shaloi Yesu chye wa na re. “Sumsing lamu hpe hpajang” ai shaloi, Yesu “lawm” ai majaw, sharin la lu wa ai. (Gsh 8:27) Hpang hta, ‘Wa kaw na na la ai hte yawng’ sape ni hpe karan kachyan ya ai. (Yhn 15:15) Anhte mung, bungli manang ni hpe hpaji, mahkrum madup ni hpe karan kachyan ging ai. Bungli manang kaja gaw, kaga ni tinang a hkang ai npu hta n nga na tsang nna, hpaji ip da ai baw n galaw ai. Chye da ai lam ni hpe sharawng awng let karan kachyan ya ai.
Bungli manang ni hpe n-gun jaw ga ni tsun mai ai. Tinang shakut shaja ai hpe marai langai ngai sadi hkrup nna, myit majing hte shakawn ya ai shaloi, n-gun lu ai n re i? Bungli manang ni hta nga ai kaja ai lam ni hpe, sadi hkrup ai shaloi Yesu shakawn ya ai. (Mahte 25:19-23 hte shingdaw yu u; Luk 10:17-20.) Tinang galaw ai hta na, “grau kaba ai amu mung, lu galaw na” re ngu nna pyi tsun wa ai. (Yhn 14:12) Shi garai n si shi ai shana hta, “nanhte chyawm gaw, ngai gung lau hkrum shatsang ai hta, ngai hte rau nga nan nga ai ni, rai nga myit dai” ngu, sadi dung ai kasa ni hpe shakawn ya ai. (Luk 22:28) Dai ga ni gaw, sape ni hpe kade daram n-gun lu shangun na hpe myit yu u. Grau shakut mayu ai myit nga wa shangun na re. Anhte mung, manang ni hpe aten la nna shakawn ya na nga yang, shanhte grau pyaw wa na, bungli grau ngut kre wa na gaw teng sha re.
Nang Bungli Manang Kaja Byin Mai
Hpunau Kayodi ndai hku tsun ai: “Bungli manang kaja gaw, hkum tsup na matu n ra ai. Shi gaw rau galaw ai ni hpe ngwi pyaw shangun ai. Lit ni hpe tsang hkra galaw ya ai.” Nang gaw, dai zawn bungli manang rai kun? Tinang gaw gara zawn bungli manang re ai hpe chye na matu hpunau nauna nkau hpe san yu u. Yesu hte rau galaw lu ai hpe sape ni pyaw ai zawn, nang hte rau galaw ai hpe mung pyaw ai nga yang, anhte gaw nanhte hpe “kabu gara” shangun ai ‘shingdep shingtau ai [bungli manang kaja, NWT] ni rai nga ga ai’ ngu, kasa Pawlu tsun ai zawn, nang mung lu tsun na re.—2 Ko 1:24.
