1-2. (a) Yesu a kasa marai 3 gaw, hpa galaw na matu matsun hkrum ai kun? Shanhte gara hku bai htang ai kun? (b) Ndai sumhpa hta hpa lam bawngban na kun?

 A.D. 32 Shalai Wa Ai Poi ngut ai hpang, kasa Petru, Yaku hte Yawhan ni lak lai ai shingran langai mu wa ai. Hermon Bum mayan na tsaw ai bum langai hta rai na re. Shanhte a man hta, Yesu nsam galai shai mat ai. “Shi a myi man gaw, jan zawn htoi kabrim nna, shi a hpun palawng nhtoi zawn hpraw tu wa lu ai.” (Mat 17:1-4) Shingran mu ngut na mahka hta, “ndai wa gaw ngai sharawng awng ai, ngai tsaw ra ai ngai sha rai nga ai: shi a ga madat mara mu” ngu ai Karai Kasang a ga hpe kasa ni na dat ai. (Mat 17:5) Dai kasa 3 gaw, Yesu a ga madat ai lam, shanhte a asak hkrung hkawm sa lam hte madun wa ai. Shanhte a kasi hpe anhte hkan sa mayu ai.

² N mai galaw ai lam nkau hpe shawng na sumhpa hta bawngban wa sai. Ndai sumhpa hta gaw, galaw ra ai ngu Yesu matsun wa ai lam 2 hpe bawngban na re.

3. Mahte 7:13, 14 hku nga yang, anhte hpa galaw ging ai kun?

³ Mahte 7:13, 14 hpe hti u. “Maden nga ai” lam hte “gyeng nga ai” lam hte seng nna, Yesu tsun nga ai hpe sadi yu u. 3 ngu na lam n nga ai. Gara lam ntsa hkawm na hpe tinang nan lata ra ai. Anhte a htani htana asak hte seng ai majaw, ahkyak dik htum dawdan lam re.

4. “Maden nga ai” lam hte seng nna sanglang dan u.

 ⁴ Lam 2 a shai ai lam ni hpe chye da ra ai. “Maden nga ai” lam gaw, hkawm sa hkawm wa loi ai majaw, masha law law ra sharawng ai. Shanhte hpang hkan nna, dai lam ntsa hkawm na matu, masha law malawng lata ai gaw yawn hpa re. Dai lam ntsa hkawm na matu, shadut ai wa gaw Satan rai nna, si ai hta htum mat na hpe shanhte n chye ma ai.​—1 Ko 6:9, 10; 1 Yh 5:19.

5. “Gyeng nga ai” lam hpe masha nkau gara hku tam mu nna hkawm wa ma ai kun?

⁵ “Maden nga ai” lam hte n htan shai ai lam gaw, “gyeng nga ai” lam re. Dai lam ntsa hkawm ai ni n law na ngu Yesu tsun ai. Hpa majaw kun? Hpang na daw kaji hta, myihtoi masu ni hpe sadi na matu, shi hpang hkan ai ni hpe Yesu sadi jaw ai. (Mat 7:15) Hkying hku law ai nawku htung ni nga nna, law malawng mung tengman lam hpe sharin ya ai ngu masha nkau tsun ma ai. Masha wan law law gaw, nawku htung ni grai law ai majaw, myit daw nna asak lam hpe n tam sai. Raitim, tam na nga yang mu na re. “Nanhte nye a ga hta agrin nga myit yang gaw, nye a sape teng teng nanhte rai nga myit dai: teng man ai lam mung nanhte chye lu na ma rin dai rai nna, dai teng man ai gaw, nanhte hpe shalawt dat na ra ai” ngu Yesu tsun ai. (Yhn 8:31, 32) Nang gaw, masha law malawng hpang n hkan ai sha, tengman lam hpe tam wa ai majaw, shakawn hpa re. Karai hpyi shawn ai lam ni hpe chye na matu, Chyum Laika hpe myit rawt let hkaja ai. Yesu a sharin achyin ai lam ni hpe madat ai. Shut shai ai nawku htung a sharin achyin ai lam ni hpe nyet kau na matu, shut shai ai npawt kaw na yu hkrat wa ai poi ni n galaw na matu, Yehowa hpyi shawn da ai hpe chye wa ai. Yehowa hpyi shawn da ai lam ni hte maren asak hkrung na matu, Karai myi man sum mat chye ai htunghking ni hpe, tawn kau da na matu n loi ai hpe chye wa ai. (Mat 10:34-36) Ra ang ai hku galai shai na matu n loi ai. Raitim, sumsing Kawa hpe tsawra ai majaw, Karai myi man lu mayu ai majaw, shakut nna galai shai ai. Karai Kasang grai kabu na re.​—Gsh 27:11.

6. Shakawn 119:9, 10, 45, 133 hku nga yang, gyeng ai lam ntsa matut hkawm lu na matu hpa gaw karum ya lu na kun?

⁶ Gyeng ai lam ntsa matut hkawm lu na matu, hpa gaw karum ya na kun? Ndai ga shadawn hpe yu yu u. Gyip ai bum lam hta, mawdaw gau ai wa hte mawdaw ni shoihpa n byin hkra, lam makau kaw kum da ya ai. Lam nchyun de n du hkra, hkaraw de n hkrat mat hkra makawp maga ya na matu re. Dai hku kum da ai hpe shuk ai, wanglu wanglang n mai gawt ai ngu gara mawdaw sara mung tsun na n re. Chyum Laika hta lawm ai Yehowa a tsang madang ni mung dai kum da ai shadaw ni hte bung ai. Gyeng ai lam ntsa matut hkawm lu na matu, karum ya ai.​—Shakawn 119:9, 10, 45, 133 hpe hti u.

7. Gyeng ai lam hpe ramma ni gara hku mu mada ging ai kun?

⁷ Ramma ni e, Yehowa a tsang madang ni gaw grai ja hpyau ai ngu kalang lang myit hkrup ai kun? Satan dai zawn shadu shangun mayu ai. Maden ai lam ntsa hkawm nga ai ni hpe myit maju jung shangun mayu ai. Shanhte gaja wa pyaw nga ai zawn re. Jawng manang ni, intanet kaw na masha ni hpe lang nna, anhte a prat hta pyaw hpa lam ni sum nga ai ngu hkamsha hkra, Satan galaw nga ai. Yehowa a tsang madang ni a majaw, prat  hta wanglu wanglang n lu pyaw ai ngu nna mung shadu shangun mayu ai. * Raitim, ndai lam hpe sadi yu u: Satan gaw shi a lam ntsa hkawm nga ai ni hpe jahtum hta hpa byin na hpe n chye shangun mayu ai. Yehowa gaw asak lam ntsa matut hkawm nga ai ni hpe gara shaman chyeju ni lu na hpe asan sha tsun dan ai.​—Shk 37:29; Esa 35:5, 6; 65:21-23.

8. Awlip a mabyin kaw na ramma ni hpa sharin la lu ai kun?

⁸ Ramma hpunau Awlip a lam hpe myit yu u. * Jawng manang ni gaw hpye ai amu galaw na matu n-gun jaw ma ai. Tinang gaw Yehowa Sakse re ai lam, Chyum Laika tsang madang ni hte maren asak hkrung ai lam sanglang dan ai shaloi, jawng manang numsha nkau gaw, grau nna pyi gunglau wa ai. Raitim, Awlip gaw jaw ai maga de ngang ngang tsap ai. Shadut hkrum ai lam langai  naw nga ai hpe shi ndai hku bai tsun dan ai: “Dakkasu matut lung na matu, sara ni n-gun jaw ai. Dakkasu lung yang she, arawng nga nna, prat hta awng dang na ngu tsun ma ai.” Dai zawn shadut ai lam ni hpe, ningdang kau lu na matu, Awlip hpe hpa gaw karum ya ai kun? Shi ndai hku tsun ai: “Hpunau nauna ni hte hku hku hkau hkau kanawn mazum ai. Shanhte gaw nye a nta masha ni zawn byin wa ai. Chyum Laika hpe mung shawoi na hta grau hkaja ai. Sung sung hkaja magang, ndai gaw tengman lam re ai hpe grau kam wa magang re. Akyu hku nna Yehowa a magam hta shang lawm na matu, dawdan lu ai.”

9. Gyeng ai lam ntsa matut hkawm na matu hpa ra ai kun?

⁹ Anhte ni asak lam ntsa matut n hkawm mat na hpe Satan ra sharawng ai. Masha law malawng hte rau “hten bya ai de hkrang ai” maden ai lam ntsa kaw sha hkawm shangun mayu ai. (Mat 7:13) Raitim, Yesu a ga hpe madat nna, gyeng ai lam hpe kum da ya ai shadaw hku mu na nga yang, dai lam ntsa matut hkawm lu na re. Anhte galaw na matu, Yesu htet da ai kaga lam langai hpe mung bawngban yu ga.

10. Mahte 5: 23, 24 hku nga yang, anhte hpa galaw ra ai ngu Yesu tsun ai kun?

¹⁰ Mahte 5:23, 24 hpe hti u. Yuda masha ni a matu, grai ahkyak ai masa lam langai hpe Yesu tsun ai. Marai langai nawku htingnu hta hkungga nawng na matu sa ai. Dusat hkungga nawng na matu hkinjawng hpe jaw maw ai shaloi, tinang hpe hpunau langai gaw mara shagun shara lama ma nga ai hpe dum mat yang, hkungga hpe tawn da nna “shawng sa” ra ai. Hpa majaw kun? Yehowa hpe hkungga nawng ai hta grau ahkyak ai lam naw nga ai kun? “Na nhpu nnau hte myit jahkrum la na shawng sa” u ngu Yesu asan sha tsun da ai.

11. Esaw hte simsa hkra Yaku gara hku shakut wa ai hpe tsun dan u?

¹¹ Simsa hkra galaw wa ai Yaku kaw na manu dan ai lam ni sharin la lu ai. Daidaw buga hte 20 ning daram tsan mat ai hpang, bai wa na matu, lamu kasa kaw nna Yaku hpe Karai Kasang tsun ai. (Nin 31:11, 13, 38) Raitim, manghkang langai nga ai. Kahpu Esaw gaw Yaku hpe sat mayu ai. (Nin 27:41) Kahpu masin n si hkraw na hpe Yaku “ja ja hkrit ai hte myitru” myit tsang nga ai. (Nin 32:8) Kahpu hte simsa na matu hpa galaw ai kun? Shawng nnan, dai manghkang hpe Yehowa kaw akyu hpyi nna tsun dan ai. Dai hpang, Esaw hpe kumhpa grai law hkra shagun ya ai. (Nin 32:10-16) Hpang jahtum, kahpu hte myi man chyaw hkrum ai shaloi, tinang maga kaw na, hkungga ai lam madun ai. Esaw hpe, kalang, lahkawng lang sha n-ga, sanit lang du hkra gum dagup ai. Dai zawn, shagrit shanem ai, hkungga ai lam ni hku nna, kahpu hte simsa hkra shakut ai.​—Nin 33:3, 4.

12. Yaku a kasi ningli kaw na hpa sharin la lu ai kun?

¹² Kahpu Esaw hte hkrum na matu, Yaku lajang ai lam, hku hkau hkra shakut ai lam kaw na lam langai hpe sharin la lu ai. Yaku gaw Yehowa kaw shagrit shanem let karum hpyi ai. Dai hpang, kahpu hte simsa hkra danglu ai daram shakut ai hku nna, akyu hpyi ga hte maren galaw ai. Kahpu hte hkrum ai shaloi, kadai jaw ai, shut ai ngu tsun nna, byin wa ai lam ni hpe dang rang hkat ai baw n galaw ai. Bai simsa na matu sha bandung tawn ai. Yaku a kasi ningli hpe gara hku hkan sa mai ai kun?

13-14. Hpunau nauna langai hpe myit hkra machyi hkra galaw hkrup yang hpa galaw ging ai kun?

¹³ Asak lam ntsa hkawm nga ai anhte gaw, shada da simsa ra ai. (Rom 12:18) Hpunau nauna langai hpe, myit hkra machyi hkra galaw hkrup ai hpe sadi hkrup yang, hpa galaw ging ai kun? Yaku zawn sha, Yehowa kaw akroi anoi akyu hpyi u. Bai simsa hkra shakut ai hpe shaman chyeju jaw na matu akyu hpyi mai ai.

¹⁴ Aten la nna, tinang hkum tinang mung ndai hku bai san jep ra ai: ‘Gumrawng ai myit hpe kau da nna, shagrit shanem let hpyi nem na matu, simsa hkra galaw na matu ngai sharawng nga ai kun? Tinang maga kaw na simsa hkra shawng galaw na nga yang, Yehowa hte Yesu gara hku hkamsha na kun?’ Dai ga san ni gaw, Yesu a ga hpe madat na matu, hpunau nauna ni hte simsa hkra shagrit shanem let shakut na matu, shadut ya lu ai. Ndai lam hta, Yaku a kasi ningli hpe hkan sa mai ai.

15. Ehpesu 4:2, 3 hta lawm ai npawt tara hpe hkan sa ai gaw, hpunau hte simsa na matu gara hku karum ya lu ai kun?

¹⁵ Yaku gaw kahpu hte hkrum ai shaloi, gumrawng nna dang rang hkat yang hpa byin mat na hpe shingran yu u. Grai sawng mat na re. Anhte mung hpunau hte simsa sa na matu shakut ai shaloi, shagrit shanem ra ai. (Ehpesu 4:2, 3 hpe hti u.) Ga Shagawp 18:19 hta ndai hku tsun da ai: “Hpu nau hpe myit machyi ai gaw, ngang ai mare hta grau yak nga ai; Hpu nau shada jahte tam ai gaw, hpyen dap chyinghka htinggrang zawn rai nga ai.” Dai majaw, shagrit shanem let hpyi shawn na nga yang, “ngang ai mare” de shang lu na matu, lam mi hku tsun na nga yang, simsa lam lu na matu grau loi na re.

16. Hpa hpe tau hkrau myit da ra ai kun? Hpa majaw kun?

¹⁶ Hpunau hpe hpa tsun na, gara hku tsun na hpe tau hkrau myit da ra ai. Jin sai nga yang, shi myit machyi nga ai hpe, mat mat na matu yaw shada let ga shaga u. Shawng nnan hta, shi a maga hku nna myit hkra machyi hpa ga ni tsun wa chye ai. Dai majaw, masin pawt wa chye ai, lawt ga tsun wa chye ai. Raitim, dai hku galaw yang simsa lam lu na n re. Kadai shut ai, jaw ai ngu ai hta na, hpunau hte bai simsa na matu grau ahkyak ai hpe dum u.​—1 Ko 6:7.

17. Gibat a mabyin kaw na hpa chye lu ai kun?

¹⁷ Hpunau Gibat gaw, kaga ni hte simsa na matu, dang lu ai daram shakut wa ai. “Nta  masha langai hte grai nan n htuk ai. Bai htuk hkra atsawm bawngban lu na matu, 2 ning jan daram shakut ra ai” ngu tsun ai. Matut hpa naw galaw ai kun? “Shi hte ga n shaga shi yang, akyu hpyi ai. Jahte tam ai ga n tsun hkrup na matu, myit hpe shajin ai. Mara raw ya na matu shakut ai. Tinang jaw ai hpe tsun dan na hta, simsa hkra galaw na matu grau ahkyak ai hpe chye na da ai” ngu tsun ai. Akyu hku nna, “Ya, nta masha yawng hte hku hkau lam kaja nga sai majaw, myit simsa mat sai” ngu Gibat tsun ai.

18-19. Tinang a majaw, marai langai ngai myit hkra machyi nga yang hpa galaw na matu dawdan da ging ai kun? Hpa majaw kun?

¹⁸ Tinang a majaw, hpunau nauna langai myit hkra machyi nga ai hpe chye yang, hpa galaw na matu, dawdan da ging ai kun? Yesu htet da ai hte maren, simsa hkra galaw u. Yehowa kaw akyu hpyi tsun dan u. Simsa hkra galaw lu na matu, chyoi pra ai wenyi hpyi u. Rai yang, ngwi pyaw lam hkamsha lu na. Yesu a ga hpe madat ai lam mung madun lu na re.​—Mat 5:9.

¹⁹ “Hpung a baw” re ai Yesu kaw nna, tsawra myit lawm ai lam matsun ni Yehowa jaw da ai majaw, chyeju dum hpa re. (Ehp 5:23) Kasa Petru, Yaku, Yawhan ni zawn, “shi a ga madat mara” na matu myit dawdan da ga. (Mat 17:5) Tinang a majaw, myit hkra machyi mat ai hpunau nauna ni hte bai simsa hkra gara hku galaw mai ai hpe bawngban wa sai. Dai zawn simsa hkra shakut nna, asak lu shangun ai gyeng ai lam ntsa matut hkawm na nga yang, ya mung shaman chyeju law law lu na. Htawm hpang hta mung, htani htana ngwi pyaw lu na re.