1. Yehowa a nta masha ni kahkyin gumdin nga ai lam langai gaw hpa rai kun?

YEHOWA a nta masha byin lu ai hpe anhte manu shadan ai. Anhte hpa majaw ndai daram kahkyin gumdin let simsa nga ai kun? Lam langai gaw, Yehowa jahkrat da ai baw ngu ai lamang hpe hkungga na matu, marai shagu dang lu ai daram shakut nga ai majaw re. Dai lamang a lam grau chye na yang, grau kahkyin gumdin wa na re.

2. Ndai sumhpa hta gara ga san ni bawngban na kun?

² Nawku hpung kata na baw ngu ai lamang a lam hpe, ndai sumhpa hta bawngban na re. Ndai ga san ni hpe mung bawngban na re: Nauna ni a daw gaw hpa rai kun? Hpunau shagu gaw, nauna shagu a baw re ai kun? Hpunau nauna ni a ntsa nga ai myitsu salang ni a ahkang aya hte madu jan, kasha ni a ntsa nga ai dinghku baw a ahkang aya gaw bung ai kun? Shawng nnan, nauna ni hpe gara hku mu mada ging ai lam bawngban mat wa ga.

3. Nauna ni hpe manu shadan ai myit gara hku rawt jat lu wa na kun?

³ Dinghku hpe lanu lahku na matu, kabu gara shiga hkaw tsun na matu, nawku hpung hpe madi shadaw na matu, shakut nga ai nauna ni hpe anhte manu shadan ai. Shanhte hpe Yehowa hte Yesu gara hku mu mada ai lam dinglik yu ai hku nna, manu shadan ai myit grau rawt jat wa na re. Num ni hpe  kasa Pawlu gara hku kanawn mazum ai lam dinglik yu ai hku nna mung akyu lu la na re.

4. La ni hpe mung, num ni hpe mung, Yehowa manu shadan ai lam Chyum Laika hta gara hku tsun da ai kun?

⁴ La ni hpe mung, num ni hpe mung, Yehowa manu shadan ai ngu Chyum Laika hta tsun da ai. Ga shadawn, tsa ban langai hta amyu ga amyu myu tsun shaga lu ai atsam lu na matu, la ni hpe mung, num ni hpe mung Yehowa chyoi pra ai wenyi jaw ai. (Kas 2:1-4, 15-18) Chyoi pra ai wenyi hte namman jaw hkrum nna, Hkristu hte rau uphkang na ahkang lu ai ni hta, la ni mung, num ni mung lawm ai. (Gal 3:26-29) Ginding aga hta, htani htana asak hkrung lu ai shaman chyeju lu la ai ni hta, la ni mung, num ni mung lawm ai. (Shr 7:9, 10, 13-15) Hkaw tsun ai hte sharin achyin ai lit hpe mung la ni mung, num ni mung lu da ai. (Mat 28:19, 20) Nauna Priskila a shakut ai lam hpe Kasa Laika hta ka da ai. Hpaji chye ai Apolo tengman ai lam hpe tup hkrak chye na wa hkra, madu wa Akula hte rau karum ya wa ai.​—Kas 18:24-26.

5. Yesu gaw num ni hpe hkungga ai lam Luka 10:38, 39, 42 gaw gara hku madun dan ai kun?

⁵ Yesu gaw num ni hpe shagrau nna hkungga ai. Hparishe ni gaw num ni hpe yu kaji ai. Shanhte hte Chyum Laika lam bawngban na gaw hkum tsun, masha man hta ga pyi n shaga ai. Yesu gaw dai hku n re. Sape ni hte Chyum Laika tengman ai lam bawngban ai aten hta, num ni hpe mung shang lawm shangun ai. * (Luka 10:38, 39, 42 hpe hti u.) Hkaw tsun sa ai hkrun lam ni hta, num ni hpe mung hkan nang shangun ai. (Luk 8:1-3) Si ai kaw nna bai hkrung rawt sai ngu ai hpe kasa ni hpe tsun na matu, num ni hpe ahkaw ahkang jaw wa ai.​—Yhn 20:16-18.

6. Num ni hpe hkungga ai lam kasa Pawlu gara hku madun ai kun?

⁶ Num ni hpe shagrau na matu, Timohti hpe kasa Pawlu laksan matsun da ai. “Hpaw mi ni hpe kanu zawn” kanawn mazum na matu, “mahkawn ni hpe kajan zawn” mu mada na matu Pawlu tsun ai. (1 Tm 5:1, 2) Kung hpan ai Hkristan byin wa na matu, Timohti hpe Pawlu law law karum ya wa tim, “chyoi pra ai Chyum Laika” hpe shawng nnan sharin ya ai ni gaw, kanu hte kawoi dwi re ai hpe yin la ai. (2 Tm 1:5; 3:14, 15) Roma nawku hpung de ka ai laika hta, nauna ni hpe mying hte hpawn shakram dat ai. Nauna ni a galaw ai lam hpe sadi hkrup ai sha n-ga, manu shadan ai lam tsun shapraw da ai.​—Rom 16:1-4, 6, 12; Hpl 4:3.

7. Gara ga san ni hpe bawngban na kun?

⁷ Shawng na laika pang ni hta tsun da ai hte maren, nauna ni gaw hpunau ni hta grau grit nem ai ngu Chyum Laika hta n tsun da ai. Tsawra myit nga nna gam jaw gam ya kam ai nauna ni gaw, nawku hpung hpe akyu law law jaw ai. Nawku hpung hta simsa let kahkyin gumdin wa hkra shanhte karum ya ai hpe myitsu salang ni manu shadan ai. Raitim, ga san nkau mung nga wa ai. Ga shadawn, masa lam nkau hta, baw magap na matu, nauna ni hpe Yehowa hpa majaw hpyi shawn ai kun? Myitsu salang hte magam tau hku nna hpunau ni hpe sha lit ap da ai majaw, hpunau shagu gaw nauna shagu a baw re ai kun?

8. Ehpesu 5:23 hku nga yang, hpunau shagu gaw nauna shagu a baw re ai kun? Sanglang dan u.

⁸ Asan sha htai na nga yang, n re! Nawku hpung hta nga ai nauna yawng a baw gaw, hpunau n re. Hkristu re. (Ehpesu 5:23 hpe hti u.) Dinghku hta, madu jan hpe woi awn  na matu, madu wa hta ahkang aya nga ai. Hkalup hkam ngut sai kasha lasha gaw, kanu a baw n re. (Ehp 6:1, 2) Nawku hpung hta myitsu salang ni gaw, hpunau nauna ni a ntsa ahkang aya ram daw sha nga ai. (1 Ht 5:12; Heb 13:17) Kanu kawa hte n nga sai, ding hku n nga ai num ni gaw, kanu kawa hte myitsu salang ni hpe matut hkungga na raitim, nawku hpung hta nga ai la ni zawn sha shanhte a baw mung Yesu re.

9. Nauna ni gaw kalang lang hpa majaw baw magap ra ai kun?

⁹ Nawku hpung hta, hkaw tsun ai hte nawku daw jau ai lam hpe woi awn na matu, la ni hpe Yehowa lit ap da ai. Num ni hpe gaw, dai zawn ahkang aya n jaw da ai. (1 Tm 2:12) Hpa majaw kun? La ni a baw hku nna Yesu hpe lit ap da ai lam hte maren sha re. Shi lam yan hte shi atsawm hkrak rai nga na matu re. Hpunau langai ayan galaw nga ai lit hpe nauna langai galaw ra na masa nga ai shaloi, baw magap * na matu, Yehowa hpyi shawn da ai. (1 Ko 11:4-7) Nauna ni grau grit nem ai majaw, dai zawn hpyi shawn da ai n re. Karai Kasang lajang da ai baw ngu ai lamang hpe hkungga ai lam madun lu ai ahkaw ahkang jaw da ai re. Dai lam hpe matsing da nna, dinghku a baw ni hte myitsu salang ni hta ahkang aya kade daram nga ai kun? ngu ai ga san hpe bawngban mat wa ga.

10. Myitsu salang langai gaw nawku hpung a matu tara ni hpa majaw jahkrat hkrup chye ai kun?

¹⁰ Myitsu salang ni gaw Hkristu hpe tsawra ai. Yehowa hte Yesu ap da ai sagu ni hpe mung tsawra ai. (Yhn 21:15-17) Myitsu salang  langai gaw, nawku hpung hpe grai tsawra ai majaw, tinang hkum tinang kawa langai zawn hkamsha mat chye ai. Dinghku hpe makawp maga na matu, dinghku a baw ni hta tara jahkrat na ahkang nga ai zawn, myitsu salang ni hta mung Karai a sagu hpung hpe makawp maga na matu, tara jahkrat na ahkang nga ai ngu sawn la hkrup chye ai. Hpunau nauna nkau mung shanhte a malai dawdan ya na matu, hpyi shawn wa chye ai. Raitim, nawku hpung a myitsu salang hte dinghku baw a ahkang aya bung ai kun?

11. Dinghku a baw hte myitsu salang ni hta bung ai gara lam ni nga ai kun?

¹¹ Dinghku a baw hte myitsu salang langai a bung ai lam nkau hpe kasa Pawlu tsun da ai. (1 Tm 3:4, 5) Ga shadawn, Yehowa gaw nta masha ni hpe dinghku baw a ga hpe madat mara shangun mayu ai. (Kol 3:20) Nawku hpung hpe mung myitsu salang ni a ga madat mara shangun mayu ai. Tinang uphkang ai npu hta nga ai ni hpe wenyi lam kaja hkra karum ya na matu, hkamsha lam hpe lanu lahku ya na matu, Karai a tara ni hpe hkan sa lu hkra karum ya na matu, ‘ka da nga ai hte maren n lai’ na matu, myitsu salang ni hte dinghku a baw ni kaw nna Yehowa myit mada ai. (1 Ko 4:6) Kaja ai dinghku baw zawn, myitsu salang ni gaw, nawku hpung hta nga ai ni yakhkak hkrum ai aten ni hta, karum ya ma ai.​—Yak 2:15-17.

12-13. Roma 7:2 hku nga yang, dinghku a baw hte myitsu salang hta n bung ai gara lam ni nga ai kun?

 ¹² Raitim, myitsu salang hte dinghku a baw hta n bung ai lam ni mung nga ai. Ga shadawn, Yehowa gaw myitsu salang ni hpe tara agyi ni hku nna lit jaw da ai. Myit malai n lu ai, mara galaw ai ni hpe nawku hpung kaw nna shapraw kau na matu, lit jaw da ai.​—1 Ko 5:11-13.

¹³ Dinghku a baw ni hpe gaw, myitsu salang ni hpe n jaw da ai ahkang aya nkau Yehowa jaw da ai. Ga shadawn, dinghku a baw gaw, dinghku a matu tara jahkrat na ahkang, tara hte maren hkan sa hkra galaw na ahkang nga ai. (Roma 7:2 hpe hti u.) Kasha ni hpe gara aten hta nta wa ra na ngu ai tara hpe masat da na ahkang, dai tara hpe n hkan sa yang dam jaw na ahkang nga ai. (Ehp 6:1) Tsawra myit nga ai dinghku a baw gaw, dinghku a matu tara ni garai n jahkrat shi yang, madu jan hte shawng bawngban ai. Gaja nga yang, shan lahkawng gaw “hkum shan langai sha” re. *​—Mat 19:6.

14. (a) Marku 10:45 hku nga yang, Yesu hpe nawku hpung a baw hku nna, Yehowa lit ap da ai gaw hpa majaw htap htuk ai kun? (b) Uphkang Hpung a lit ngu ai gaw hpa rai kun? (“ Uphkang Hpung A Lit” ngu ai lawk hpe yu u.)

¹⁴ Yehowa gaw nawku hpung hta nga ai marai shagu hte, shinggyim masha yawng a asak hpe gawng malai hkungga jaw nna, mari da ai. (Marku 10:45 hpe hti u; Kas 20:28; 1 Ko 15:21, 22) Dai majaw, gawng malai hkungga hku nna asak jaw wa ai Yesu hpe nawku hpung a baw hku nna lit ap da ai gaw  htap htuk ai. Yesu gaw anhte a baw hku nna, langai hpra a matu, dinghku a matu, nawku hpung ting a matu, tara jahkart na ahkang, dai tara hte maren hkan sa hkra galaw na ahkang nga ai. (Gal 6:2) Tara jahkrat na matu sha myit nga ai n re. Anhte langai hpra hpe lanu lahku nna tsawra ai.​—Ehp 5:29.

15-16. Nauna Ma Li hte hpunau Binjamin a ga ni kaw nna hpa sharin la lu ai kun?

¹⁵ Nauna ni gaw Hkristu lit ap da ai madu wa ni a lam matsun hpe hkan sa ai hku nna, Hkristu hpe hkungga ai lam madun ai. Amerikan hta nga ai nauna Ma Li tsun ai hpe nauna ni myit hkrum na re. Shi ndai hku tsun ai: “Madu jan langai hku nna, nawku hpung hta nauna langai hku nna, ngai lu da ai shara hpe manu shadan ai. Yehowa a baw lamang hpe, jaw ai ningmu nga hkra galoi mung ngai shakut ai. Nye madu wa hte nawku hpung hta nga ai hpunau ni mung ngai hpe hkungga nna manu shadan ai lam tsun ai majaw, nye a lit hpe kang ka hkra galaw na matu grau loi ai.”

¹⁶ Nauna ni hpe hkungga ai, shagrau ai hku nna baw lamang hpe chye na ai lam hpunau ni madun ai. Ingalan hta nga ai hpunau Binjamin ndai hku tsun ai: “Zuphpawng ni hta nauna ni a mahtai ni, tinang hkrai hkaja ai lam hte hkaw tsun bungli hta grau tang du hkra galaw lu na hpaji jaw ga ni kaw nna ngai law law sharin la lu ai. Shanhte a shakut ai lam ni gaw grai manu dan ai.”

17. Baw ngu ai lamang hpe hpa majaw hkungga ging ai kun?

¹⁷ Num, la, dinghku a baw, myitsu salang ngu ai nawku hpung hta nga ai yawng gaw, baw ngu ai lamang hpe chye na na, hkungga na nga yang nawku hpung ting simsa lam hkamsha lu na re. Ahkyak htum gaw sumsing Kawa Yehowa hpe shakawn shagrau ai lam byin shangun ai.​—Shk 150:6.