1. Kasa Pawlu gaw hpa hpe yin la wa ai kun?

KASA Pawlu gaw, gawng kya ai aten ni nga ai lam tsun dan ai. Jaw ai hpe galaw na matu, shakut shaja tim, shi a hkum hkrang gaw gawng kya ai ngu shi yin la ai. Akyu hpyi ga ni hpe shi myit mada da ai hku Yehowa mahtai n jaw ai. (2 Ko 4:16; 12:7-9; Rom 7:21-23) Ninghkap ai ni gaw, shi hpe gawng kya ai wa hku nna mu mada ai lam hpe mung Pawlu chye ai. * Raitim, kaga ni hpe n kaja ai hku n mu mada ai. Shi a gawng kya ai lam ni a majaw, manu n dan ai ngu nna mung n hkamsha ai.​—2 Ko 10:10-12, 17, 18.

2. 2 Korinhtu 12:9, 10 hku nga yang Pawlu gaw gara lam hpe sharin la wa ai kun?

² Masha langai gaw, gawng kya ai ngu hkamsha ai shaloi hta pyi, n-gun ja lu ai lam Pawlu sharin la wa ai. (2 Korinhtu 12:9, 10 hpe hti u.) Yehowa gaw Pawlu hpe nang ‘gawng kya ai aten hta nye a n-gun atsam hkum tsup nga ai’ ngu tsun ai. Shi ra nga ai n-gun atsam hpe Yehowa jahpring shatsup ya lu ai hpe tsun mayu ai re. Ninghkap ai ni, anhte hpe jahpoi asawng ai shaloi, myit n daw ging ai lam hpe yu yu ga.

3. Jahpoi asawng hkrum yang hpa majaw kabu mai ai kun?

³ Kadai mung jahpoi asawng hkrum mayu na n re. Raitim, jahpoi asawng hkrum yang, yawn hkyen nna, myit daw myit  hten chye ai. (Gsh 24:10) Ninghkap ai ni a jahpoi asawng ai hpe gara hku mu mada ging ai kun? Pawlu zawn, anhte mung ‘hkala nba [jahpoi asawng, NW] ai . . . hta kabu ai.’ (2 Ko 12:10) Jahpoi asawng ai hte ninghkap hkrum ai lam gaw, Yesu a sape ajet re ai hpe madun dan ai. (1 Pe 4:14) Shi hpang hkan ai ni gaw, zingri hkrum na ngu Yesu tsun wa ai. (Yhn 15:18-20) Tsa ban 1 hta dai zawn byin wa ai. Dai aten hta, Grik htung hking shingkang ka-up hkrum ai ni gaw, Hkristan ni hpe hpaji n chye ai, gawng kya ai ni hku nna mu mada ma ai. Yuda ni a lapran hta, Hkristan ni hpe kasa Petru hte Yawhan zawn, laika n chye ai yu maya masha ni ngu sawn la ma ai. (Kas 4:13) Hkristan ni gaw, mung masa lam hta n shang lawm ai, asuya ni a makawp maga lam n lu ai, masha ni mung shanhte hpe n hkungga ai majaw, gawng kya ai zawn rai nga ai.

4. Tsa ban 1 na Hkristan ni gaw ninghkap ai ni hpe gara hku bai htang wa ai kun?

⁴ Tsa ban 1 na Hkristan ni gaw, ninghkap ai ni a majaw asum jaw wa ai kun? N jaw ai. Ga shadawn, kasa Petru hte Yawhan gaw, Yesu hpang hkan ai, shi a sharin achyin ai lam ni tsun dan ai majaw, zingri hkrum ai hpe arawng la hpa hku nna mu mada ai. (Kas 4:18-21; 5:27-29, 40-42) De a majaw, shanhte n kaya ai. Tsa ban 1 na Hkristan ni gaw, shanhte hpe masha ni n hkungga tim, ninghkap ai ni hta na pyi kaga ni hpe grau nna karum ya lu wa ai. Ga shadawn, dai Hkristan nkau ka wa ai Chyum Laika gaw, wan hku law ai masha ni hpe matut nna karum shingtau lam hte myit mada lam jaw nga ai. Shanhte hkaw tsun wa ai Mungdan gaw, ya aten hta sumsing lamu kaw uphkang nga nna, kade n na yang shinggyim masha ni hpe uphkang sana re. (Mat 24:14) Hkristan ni hpe zingri wa ai atsam kaba htum ai asuya gaw, hten run mat sai. Dai sadi dung ai sape ni gaw sumsing lamu kaw hkawhkam ni byin nga sai. Ninghkap ai ni gaw si mat sai. Bai hkrung rawt wa tim pyi, shanhte nju ndawng wa ai Hkristan ni a uphkang ai mungdan npu hta nga ra na re.​—Shr 5:10.

5. Yawhan 15:19 hku nga yang Yehowa a masha ni gaw hpa majaw yu kaji hkrum ai kun?

⁵ Dai ni aten hta mung Yehowa a masha ni gaw yu kaji hkrum ai. Hpaji n chye ai, gawng kya ai ni hku nna jahpoi asawng hkrum nga ai. Hpa majaw kun? Anhte makau grup-yin hta nga ai ni a myit jasat anhte hta n nga ai majaw re. Anhte gaw shagrit shanem ai myit, sumnung ai myit, madat mara ai myit nga na matu shakut ai. Mungkan myit jasat gaw shakawng ai, gumrawng ai, gumlau mayu ai. Anhte gaw mung masa lam ni hta n lawm ai. Gara mungdan hta nga ai raitim hpyen magam n gun ai. Mungkan masha ni hte n bung ai majaw, hpaji n rawng ai ni hku nna mu mada hkrum ai.​—Yawhan 15:19 hpe hti u; Rom 12:2.

6. Yehowa gaw gara bungli hpe ngut kre hkra shi a masha ni hpe karum ya nga ai kun?

⁶ Mungkan gaw anhte hpe dai hku sawn la tim, Yehowa gaw grau htum ai lam ni galaw na matu, akyu jashawn nga ai. Masha labau hta laklai dik ai hkaw tsun magam hpe ngut kre hkra karum ya nga ai. Yehowa a mayam ni gaw, dai ni aten hta magazin ni hpe amyu ga law law hte ga gale nna dip shapraw ya nga ai. Chyum Laika hpe akyu jashawn nna, wan hku law ai masha ni hpe karum ya nga ai. Mungkan hta gawngkya ai ngu shadu hkrum ai ni hpe Yehowa akyu jashawn nna, dai zawn mauhpa lam ni galaw nga ai. Anhte langai hpra hte gara hku seng ai kun? Anhte hpe n-gun atsam nga hkra Yehowa galaw ya  lu ai kun? Rai yang, shi a karum shingtau lam lu la hkra hpa galaw ra na kun? Kasa Pawlu kaw nna sharin la lu ai lam 3 hpe hkaja yu ga.

7. Pawlu a kasi ningli kaw nna sharin la lu ai lam langai gaw hpa rai kun?

⁷ Pawlu a kasi ningli kaw nna sharin la lu ai lam langai gaw, Yehowa a magam gun ai shaloi, tinang a n-gun atsam hpe n kamhpa na matu re. Masha ningmu hku yu yang, Pawlu hta gumrawng na lam, tinang hkum tinang kamhpa na lam ni nga ai. Shi gaw Roma ginwang, Tarshu mare hta nga kaba wa ai. Dai mare gaw sut su nga mai nna, mying gumhkawng ai dakkasu mung nga ai. Pawlu gaw dai aten hta mying kaba ai Yuda ningbaw Gamale kaw hpaji sharin la wa ai majaw grai ningtawn ai. (Kas 5:34; 22:3) Yuda masha ni a lapran hta mung ahkyak ai masha byin wa ai. Shi ndai hku tsun ai: “Nye a amyu na rau ram manang ni law law hte, Yuda htung hta e ngai grau nna kaba wa nngai.” (Gal 1:13, 14; Kas 26:4) Raitim, Pawlu gaw shi hkum shi n kamhpa ai.

8. Hpilipi 3:8 hku nga yang Pawlu gaw shi asum hkam wa ai lam ni hpe gara hku hkamsha ai kun? Hpa majaw gawng kya ai hta kabu ai kun?

⁸ Pawlu gaw masha ni a man hta yu kaba na zawn re ai lam ni hpe sharawng awng let kau da wa ai. Dai lam yawng hpe maza ni zawn shi mu mada ai. (Hpilipi 3:8 hpe hti u.) Hkristu hpang hkan ai majaw mayak mahkak law law hkrum wa ai. Shi a amyu masha ni nan shi hpe nju ndawng ai. (Kas 23:12-14) Mung masha shada da re ai Roma ni a kayat hkrum ai, htawng jahkrat hkrum ai. (Kas 16:19-24, 38) Shi gaw n hkum tsup ai majaw, tengman ai hpe galaw na matu grai yak ai hpe mung chye ai. (Rom 7:21-25) Shi hta manghkang nga ai, mara nga ai ngu hkamsha ai majaw, Hkristu hpang hkan ai kaw nna jahkring kau na malai, ‘gawng kya ai . . . hta kabu ai.’ Hpa majaw kun? Gawng kya ai aten hta Karai Kasang shi hpe karum ya ai ngu hkamsha ai majaw re.​—2 Ko 4:7; 12:10.

9. Tinang hpe gawng kya ai wa ngu mu shangun ai lam ni hpe gara hku sawn la ging ai kun?

⁹ Yehowa kaw nna atsam lu mayu yang, anhte a n-gun atsam, hpaji, shingdu labau  hte arung arai lusu ai lam ni hpe n mai myit ai. Dai lam ni gaw Yehowa a man hta akyu rawng ai ni byin hkra n lu galaw ya ai. Karai a masha ni gaw, “hpaji byeng-ya rawng ai law law wa, ahkang aya lu ai ni law law wa, du amyu hta na law law wa” n rai ma ai. Raitim, mungkan ga a angawk angak re ai ni hpe Yehowa akyu jashawn ai. (1 Ko 1:26, 27) Dai majaw, n-gun atsam, hpaji, shingdu labau hte arung arai ni n nga ai majaw, Yehowa a magam n lu gun ai ngu hkum myit la u. De a malai, Yehowa a hpung atsam hpe mu lu na ahkaw ahkang re ai ngu myit la u. Ga shadawn, ninghkap ai ni a majaw hkrit ai ngu hkamsha yang, na a makam masham hpe nden marai hte tsun dan lu na matu Yehowa kaw akyu hpyi u. (Ehp 6:19, 20) Machyi jung ai majaw yakhkak ai ngu hkamsha nga yang, dang lu ai daram shi a magam gun lu hkra atsam jaw na matu Yehowa kaw akyu hpyi u. Yehowa karum ya ai hpe mu shagu na a makam masham grau ngang kang wa na re.

10. Hebre 11:32-34 hta madun da ai sadi dung ai ni a kasi ningli hpe hpa majaw hkaja ging ai kun?

¹⁰ Pawlu gaw Chyum Laika hpe shakut shaja let hkaja ai. Chyum Laika hpe hkaja ai sha n-ga, dai hta lawm ai Yehowa a sadi dung ai mayam ni a kasi ningli kaw nna mung sharin la ai. Hebre Hkristan ni hpe laika ka ai shaloi, moi na Yehowa a sadi dung ai mayam ni a kasi ningli hpe myit yu na matu n-gun jaw wa ai. (Hebre 11:32-34 hpe hti u.) Dai mayam ni kaw nna Hkawhkam Dawi a lam hpe myit yu ga. Shi a hpyen ni hte manang nkau mi a ninghkap ai lam hkrum wa ai. Dawi a kasi ningli hpe Pawlu myit sawn sumru ai shaloi, shi gara hku n-gun lu wa ai, anhte mung Pawlu hpe gara hku kasi la mai ai lam chye lu na re.

11. Dawi gaw hpa majaw gawng kya ai zawn byin nga ai kun? (Makawp sumla hpe yu u.)

¹¹ Dawi gaw n-gun ja ai hpyen la Goliat a yu kaji hkrum wa ai. Goliat gaw shi hpe “n gawn n sawn” galaw wa ai. Goliat gaw hkum hkrang kaba nna, kaja ai hpyen hking dagraw da ai. Majan a matu mung atsawm shaman shakyang da ai. Dawi hta hpyen hking mung n nga ai. Mahkrum madup mung n nga ai. Shi gaw gawng kya ai zawn raitim, n-gun ja wa ai. N-gun atsam a matu Yehowa hpe kamhpa ai majaw hpyen wa hpe dang kau lu ai.​—1 Sa 17:41-45, 50.

12. Dawi gaw gara manghkang hpe mung hkrum wa ai kun?

¹² Dawi hpe gawng kya nna n-gun yawm shangun ai kaga chyam dinglik lam langai naw nga ai. Shi gaw Yehowa aya tang da ai Israela hkawhkam Shawlu hpe sadi dung let magam gun wa ai. Hkawhkam Shawlu gaw nnan hta Dawi hpe shagrau wa ai. Hpang hta gumrawng wa nna Dawi hpe manawn wa ai. Dawi hpe n kaja ai hku kanawn mazum nna, sat na matu pyi shakut wa ai.​—1 Sa 18:6-9, 29; 19:9-11.

13. Hkawhkam Shawlu a n tara ai hku kanawn mazum hkrum ai shaloi Dawi gara hku bai htang wa ai kun?

¹³ Dawi gaw Hkawhkam Shawlu a n tara ai hku kanawn mazum hkrum wa tim, Yehowa aya tang da ai hkawhkam hpe matut hkungga ai. (1 Sa 24:6) Shawlu galaw wa ai n kaja ai lam ni a matu Yehowa hpe mara n shagun ai. Ndai chyam dinglik ai lam hpe hkam jan lu na matu, Yehowa hpe kamhpa wa ai.​—Shk 18:1, ntsa na ga yan.

14. Kasa Pawlu gaw Dawi hte bung ai gara mayak mahkak ni hkrum wa ai kun?

¹⁴ Kasa Pawlu mung Dawi zawn hkrum wa ai. Hpyen ni gaw Pawlu hta grau atsam nga  ai. Shi a aten na ahkang aya kaba ai masha law law gaw shi hpe nju ai. Shanhte gaw shi hpe chyahkring hkring kayat ai, htawng jahkrat ai. Dawi zawn, Pawlu mung manang ni a n kaja ai hku kanawn mazum ai hpe hkrum wa ai. Hkristan nawku hpung kaw na nkau mi pyi shi hpe ninghkap ma ai. (2 Ko 12:11; Hpl 3:18) Raitim, Pawlu gaw ninghkap ai lam yawng hpe awng dang wa ai. Gara hku nna kun? Ninghkap ai lam ni nga tim matut hkaw tsun ai. Hpunau nauna ni gaw shi hpe myit daw hkra galaw tim, matut sadi dung ai. Grau nna gaw Karai Kasang hpe prat tup sadi dung wa ai. (2 Tm 4:8) Manghkang ni hpe tawt lai lu ai gaw shi a n-gun atsam a majaw n re ai sha, Yehowa hpe kamhpa ai majaw re.

15. Nang hpa galaw lu ai kun? Gara hku awng dang lu na kun?

¹⁵ Jawng manang, bungli manang, Sakse Hkam n re ai nta masha ni a zingri ai, jahpoi asawng ai hpe hkrum nga ai kun? Nawku hpung na marai langai gaw nang hpe n kaja ai hku kanawn mazum ga ai kun? Rai yang, Dawi hte Pawlu hpe myit dum u. Nang gaw “mai kaja ai hte n hkru n hkra ai hpe dang kau” lu na re. (Rom 12:21) Anhte ninghkap hkrum ai shaloi, Goliat hpe Dawi gasat wa ai zawn gasat na gaw n re. De a malai, Chyum Laika, Yehowa a lam tsun dan ai hku nna, n kaja ai hpe dang kau lu ai. Ga san ni hpe Chyum Laika hte mahtai jaw na, n kaja ai hku bai htang ai ni hpe tsawra myit hte hkungga ai lam madun na, hpyen ni hte hpawn masha yawng hpe kaja ai hku kanawn mazum na nga yang awng dang lu ai.​—Mat 5:44; 1 Pe 3:15-17.

16-17. Pawlu hpa hpe galoi n malap ai kun?

¹⁶ Kasa Pawlu gaw Hkristu a sape n byin shi yang, grai n hkru ai wa rai nna, Yesu hpang hkan ai ni hpe zingri wa ai. (Kas 7:58; 1 Tm 1:13) Hkristan nawku hpung hpe zingri wa ai Shawlu ngu ai Pawlu hpe Yesu nan hkum pat wa ai. Yesu gaw Pawlu hpe lamu kaw na ga shaga wa ai. Myi n mu mat hkra galaw dat ai. Myi bai mu na matu Pawlu gaw shi zingri wa ai masha ni kaw nna karum shingtau lam tam ra wa ai. Sape Anani a karum shingtau lam  hpe shagrit shanem let hkap la wa ai majaw myi bai mu wa ai.​—Kas 9:3-9, 17, 18.

¹⁷ Pawlu gaw Hkristan nawku hpung hta mying kaba ai wa byin wa ai. Raitim, Damasku de sa ai lam kaw Yesu sharin ya wa ai lam hpe galoi n malap ai. Matut shagrit shanem nna hpunau nauna ni a karum shingtau lam hpe sharawng awng let hkap la ai. Shanhte gaw shi hpe shangang shakang ya ai ngu shi yin la ai.​—Kol 4:10, 11.

18. Kaga ni a karum shingtau lam hpe kalang lang hpa majaw n hkap la mayu ai kun?

¹⁸ Pawlu kaw nna hpa sharin la lu ai kun? Yehowa a masha ni hte shawng nnan kanawn mazum ai shaloi, kaga ni a karum shingtau lam hpe hkap la mayu na re. Hpa majaw nga yang, wenyi lam hta ma chyangai ni naw rai nna, sharin la ra ai lam law law nga ai majaw re. (1 Ko 3:1, 2) Raitim, ya gaw gara hku kun? Shaning na na Yehowa hpe nawku wa nna mahkrum madup ni law wa ai shaloi, kaga ni karum ya ai hpe hkap la na matu yak chye ai. Laksan hku nna, tengman ai tara hta tinang daram aten n na shi ai ni karum ya ai shaloi re. Anhte hpe n-gun jaw na matu, hpunau nauna ni hpe Yehowa chyahkring hkring akyu jashawn nga ai. (Rom 1:11, 12) Yehowa jaw ai n-gun atsam hpe lu la mayu yang, dai lam hpe anhte hkap la ra ai.

19. Pawlu hpa majaw awng dang ai kun?

¹⁹ Pawlu gaw Hkristan byin wa ai hpang, laklai ai lam nkau hpe galaw lu wa ai. Hpa majaw kun? Shi a awng dang ai lam gaw, n-gun atsam, hpaji, shingdu labau hte arung arai lusu ai a majaw n re ai sha, shagrit shanem ai myit hte Yehowa hpe kamhpa ai majaw re. Anhte mung (1) Yehowa hpe kamhpa na (2) Chyum Laika kasi ningli kaw nna sharin la na (3) hpunau nauna ni a karum shingtau lam hpe hkap la na nga yang, Pawlu hpe kasi la lu na re. Gawng kya ai ngu hkamsha tim, Yehowa anhte hpe n-gun shaja ya na re.