1. Mahte 24:9 hku nga yang, mungkan gaw anhte hpe nju ndawng ai shaloi hpa majaw n mau ging ai kun?

YEHOWA gaw anhte hpe tsawra chye hkra, kaga ni a tsawra myit hpe hkam la mayu hkra hpan da ai. Dai majaw, marai langai ngai gaw tinang hpe nju ai nga yang myit n pyaw ai, hkrit tsang myit ni pyi nga chye ai. Ga shadawn, Uyawpa hta nga ai nauna Jawjina ndai hku tsun ai: “Ngai asak 14 ning hta, Yehowa hpe nawku ai majaw anu gaw grai nju wa ai. Ngai grai myit n pyaw ai. Kaja ai masha gaw re kun? ngu myit wa ai.” * Hpunau Danilo mung ndai hku ka wa ai: “Ngai Yehowa Sakse langai re ai majaw, hpyen la ni gaw ngai hpe kayat ai, jahpoi ai, jahkrit shama ai shaloi ngai grai hkrit ai. Kaya mung kaya ai.” Dai zawn nju ndawng hkrum ai shaloi grai myit n pyaw ai. Raitim, dai gaw mauhpa n re. Anhte nju ndawng hkrum na ngu Yesu tau hkrau tsun tawn da ai.​—Mahte 24:9 hpe hti u.

2-3. Yesu a hpang hkan ai ni gaw hpa majaw nju ndawng hkrum ai kun?

² Yesu a hpang hkan ai ni hpe mungkan gaw nju ndawng ai. Hpa majaw kun? Yesu zawn sha mungkan ga hte n seng ai majaw re. (Yhn 15:17-19) Masha asuya hpe hkungga ai raitim, shanhte hpe nawku ai, shanhte a masat dazik hpe hkungga jaw ai baw gaw n galaw ga ai. Anhte gaw Yehowa kaw sha tsep kawp apnawng da ai. Satan hte shi a amyu matu ni n hkap la ai Karai a uphkang lam hpe sha anhte madi shadaw ai. (Nin 3:1-5, 15) Shinggyim masha a matu myit mada lam gaw Karai a Mungdan sha rai nna, dai Mungdan gaw kade n na yang ninghkap ai ni yawng hpe jahten shaza kau na lam anhte hkaw tsun ga ai. (Dan 2:44; Shr 19:19-21)  Nhkru ai ni a matu gaw n kaja ai shiga rai nna, myit sumnung ai ni a matu gaw kabu gara shiga re.​—Shk 37:10, 11.

³ Karai a tsang madang hte maren asak hkrung ai majaw mung, anhte nju ndawng hkrum ai. Dai tsang madang ni gaw, mungkan a tsang madang ni hte tsep kawp n bung ai. Ga shadawn, Karai Kasang jahten kau ai Sodom hte Gomora kaw na masha ni galaw wa ai akyang lailen ni hpe, ya na masha law law gaw hkap la nna hkan galaw nga ai. (Yud 7) Dai zawn akyang lailen hte seng nna, anhte gaw Chyum Laika tsang madang hpe hkan sa ai majaw, masha law law gaw anhte hpe jahpoi asawng nna, ningmu gyip ai ni ngu tsun ma ai.​—1 Pe 4:3, 4.

4. Nju ndawng hkrum ai shaloi gara atsam ningja gaw anhte hpe shangang shakang ya lu ai kun?

⁴ Masha ni anhte hpe nju ndawng nna jahpoi asawng ai shaloi, hkam jan lu hkra hpa gaw karum ya na kun? Yehowa anhte hpe karum ya na ngu ai makam masham anhte hta nga ra ai. N-gang zawn sha anhte a makam masham gaw, “n hkru n hkra ai wa a wan pala nlang hte hpe sat dang kau lu” ai. (Ehp 6:16) Raitim, makam masham hta n-ga naw ra ai. Tsawra myit mung ra ai. Hpa majaw kun? Tsawra myit gaw “sin pawt la htet n nga ai.” Hkra machyi ai lam yawng mayawng hpe hkam sharang lu shangun ai. (1 Ko 13:4-7, 13) Yehowa hpe tsawra ai myit, hpunau nauna ni hpe tsawra ai myit, hpyen ni hpe pyi tsawra ai myit gaw, nju ndawng ai lam hpe hkam jan lu hkra gara hku karum ya na lam hkaja yu ga.

5. Kawa hpe tsawra ai myit gaw Yesu hpe gara hku shangang shakang ya wa ai kun?

⁵ Yesu gaw hpyen ni shi hpe sat na shana hta, shi hpang hkan ai ni hpe ndai hku tsun wa ai: “Ngai nye a Wa hpe tsaw ra nga nngai . . . [dai majaw] nye Wa e ngai hpe matsun jaw dat ai hte maren she, ngai galaw nga nngai.” (Yhn 14:31) Yehowa hpe tsawra ai myit a majaw, grai sawng ai chyam dinglik lam hpe pyi Yesu hkam jan lu wa ai. Yehowa hpe tsawra ai myit gaw anhte hpe mung, dai zawn hkam jan lu hkra karum ya ai.

6. Roma 5:3-5 hku nga yang, mungkan a nju ndawng hkrum ai hpe hkam jan ai hte seng nna Yehowa a mayam ni gara hku hkamsha ai kun?

⁶ Karai hpe tsawra ai myit gaw zingri zingrat lam ni hpe hkam jan lu hkra, Yehowa a mayam ni hpe ayan na karum ya ai. Ga shadawn, n hkaw tsun na matu Yuda tara rap daw kaw na kasa ni hpe matsun jaw ai shaloi, Karai hpe tsawra ai myit gaw “masha ga madat na hta, Karai Kasang a ga mahtang grau madat na” matu shanhte hpe shadut ya wa ai. (Kas 5:29; 1 Yh 5:3) Dai zawn agrin nga ai tsawra myit gaw, mazut nna atsam kaba ai asuya ni a man hta matut sadi dung lu hkra, dai ni aten na anhte a hpunau nauna ni hpe karum ya nga ai. Myit daw mat na malai, mungkan a nju ndawng hkrum ai hpe hkam jan lu ai gaw ahkaw ahkang langai re ngu sawn la lu shangun ai.​—Kas 5:41; Roma 5:3-5 hpe hti u.

7. Nta masha ni anhte hpe ninghkap wa ai shaloi, gara hku bai htang ging ai kun?

⁷ Yak dik htum chyam dinglik lam gaw, nta masha ni kaw na rai chye ai. Teng man lam hpe anhte myit lawm hpang wa ai shaloi, nta masha nkau gaw anhte hkalem hkrum sai ngu shadu ma ai. Nkau gaw, anhte mana mat sai ngu na pyi shadu ai. (Marku 3:21 hte shingdaw yu u.) Anhte hpe hkra machyi hkra galaw nna pyi, ninghkap wa chye ai. Dai zawn lam ni hpe anhte n mau ging ai. Yesu ndai hku tsun ai: “Tinang hpe ndawng n yawt na ni gaw, tinang a nta na ni tai wa na ma ra ai.” (Mat 10:36) Jinghku ni anhte hpe gara hku mi mu mada ai raitim, shanhte hpe hpyen ni hku nna bai htang na n re. Yehowa hpe tsawra ai myit law htam wa magang, masha ni hpe tsawra ai myit grau nga wa na re. (Mat 22:37-39) Raitim, kaga ni a myit shapyaw ya na matu Chyum Laika tara ni, tsang madang ni hpe n hkan sa mat ai baw galoi mung galaw na n re.

8-9. Laja lana re ai ninghkap lam hpe hkam jan lu hkra nauna langai hpe hpa gaw karum ya wa ai kun?

 ⁸ Nauna Jawjina gaw kanu a laja lana ninghkap ai hpe hkrum tim, hkam jan lu wa ai. Shi ndai hku sang lang dan ai. “Yehowa Sakse ni hte arau anu hte ngai Chyum Laika hkaja hpang ai. Shata kru na mat nna ngai zuphpawng ni lung mayu hpang wa ai aten, anu gaw ngai hpe hkum pat wa ai. Anu gaw hpung htak mat ai ni hte matut mahkai ai hpe ngai chye mat ai. Ngai hpe ga shaga ai shaloi, shanhte mara shagun ai lam ni hpe bai tsun dan ai. Shi nye ntsa grai mazut wa ai. Kara gang ai, du manat da ya ai, laili laika ni hpe mung kabai kau ya ai. Ngai asak 15 ning hta hkalup hkam la ai. Yehowa hpe n nawku lu mat hkra, anu gaw ngai hpe gumlau ai ramma ni hpe tawn ai shara hta sa bang kau ai. Dai shara hta nkau gaw nanghpam tsi lang ai, tara tawt lai ma ai. Laksan hku nna ninghkap ai lam hpe tinang hpe tsawra ai ni kaw na hkrum yang, hkam jan na matu yak ai.”

⁹ Dai lam hpe nauna gara hku hparan wa ai kun? Shi ndai hku tsun ai: “Anu ngai hpe ninghkap hpang ai shani hta, Chyum Laika buk ting hpe ngai hti ngut mat sai. Teng man lam hpe ngai mu tam sai ngu kam ai. Yehowa hte grai hku hkau ai ngu hkamsha ai. Ngai shi kaw chyahkring hkring akyu hpyi ai. Shi mung madat ya ai. Gumlau ai ramma ni hpe tawn ai shara hta nga taw ai laman, nauna langai gaw shi nta de sa chyai na matu saw shaga ai. An lahkawng arau Chyum Laika hpe hkaja ai. Dai sha n-ga hpunau nauna ni a majaw mung ngai n-gun lu wa ai. Shanhte a nta masha langai zawn ngai hpe hkamsha shangun ai. Ninghkap ai ni gaw kadai wa mi raitim, Yehowa gaw shanhte hta grau ai hpe ngai atsawm sha chye wa ai.”

10. Anhte a Karai Yehowa hte seng nna hpa hpe kam mai ai kun?

¹⁰ Gara lam mung “Hkristu Yesu hta e Karai Kasang a tsaw ra ai hta na, anhte hpe n jahka kau lu” ai lam kasa Pawlu ka wa ai. (Rom 8:38, 39) Jamjau hkrum nga ai aten ni nga tim, anhte hpe shalan shabran ya na matu, n-gun jaw na matu Yehowa gaw anhte maga galoi mung nga na re. Jawjina a mahkrum madup zawn sha, Yehowa gaw wenyi hpunau nauna ni hku nna anhte hpe karum ya ai.

11. Yawhan 15:12, 13 hta Yesu tsun da ai tsawra myit gaw sape ni hpe gara hku karum ya wa ai kun? Ga shadawn tsun dan u.

¹¹ Yesu gaw shi si na shana hta, shada da tsawra na matu sape ni hpe bai shadum wa ai. (Yawhan 15:12, 13 hpe hti u.) Sak jaw ai tsawra myit gaw matut kahkyin gumdin na matu, mungkan a nju ndawng ai hpe hkam jan lu na matu karum ya na hpe Yesu chye ai. Htesaloni hta nga  ai nawku hpung a kasi ningli hpe myit yu ga. Nawku hpung hpawng de ai aten kaw nna hpung masha ni zingri hkrum wa ai. Hpunau ni gaw sadi dung ai hte tsawra myit madun ai hta kasi kaja ma ai. (1 Ht 1:3, 6, 7) Raitim, grau nna tsawra myit madun na matu, shanhte hpe Pawlu n-gun jaw wa ai. (1 Ht 4:9, 10) Tsawra myit gaw, myit daw ai ni hpe shalan shabran ya nna, gawng kya ai ni hpe madi shadaw ya na matu shadut ya lu ai. (1 Ht 5:14) Shanhte gaw Pawlu a lam matsun hpe hkan sa wa ai. Dai majaw, laning mi na ai hpang shanhte hpang de bai ka ai lahkawng ngu na laika hta Pawlu ndai hku tsun wa ai: “Nanhte langai hte langai a tsaw ra ai myit gaw shada da e law htam jat wa ai.” (2 Ht 1:3-5) Shanhte hta nga ai tsawra myit gaw, yakhkak ai lam ni hte zingri zingrat lam hpe hkam jan lu hkra karum ya wa ai.

12. Majan byin nga ai laman mungdan langai hta nga ai hpunau nauna ni gaw shada da tsawra myit hpe gara hku madun wa ai kun?

¹² Hpunau Danilo hte shi madu jan a mahkrum madup hpe myit yu ga. Shanhte a mare hta majan byin hpang wa tim, matut nna zuphpawng ni lung ai, dang lu ai made hkaw tsun ai. Nga ai malu masha ni hpe hpunau nauna ni hte arau garan sha ai. Dai hpang lani mi hta, hpyen la ni gaw hpunau a nta de sa wa ai. “Makam masham hpe nyet kau na matu ngai hpe tsun ai. Ngai n hkap la ai majaw ngai hpe kayat ai. Sanat gap nna jahkrit wa ai. Shanhte n pru mat shi yang, nye madu jan hpe roi rip na matu bai sa wa na ngu na mung jahkrit ai. Raitim, hpunau ni gaw kaga mare de du ai wanleng daru de alawan sa dat ya ai. Dai hpunau ni a tsawra myit hpe ngai galoi n malap ai. Mare nnan de du ai shaloi, dai kaw na hpunau ni gaw an hpe lusha jaw ai, bungli hte nta tam na matu mung karum ya ai. De a majaw, majan byin ai shara kaw na hprawng wa ai Sakse Hkam ni hpe anhte a nta hta shingbyi shangun lu wa ai” ngu Danilo tsun ai. Dai lam gaw, hkristan tsawra myit gaw nju ndawng ai lam hpe hkam jan lu hkra karum ya ai hpe madun nga ai.

13. Masha ni anhte hpe nju ndawng yang pyi Yehowa hpe matut nawku lu hkra chyoi pra ai wenyi gaw gara hku karum ya ai kun?

¹³ Hpyen ni hpe tsawra na matu sape ni hpe Yesu tsun wa ai. (Mat 5:44, 45) Dai hku galaw na matu loi ai kun? N loi ai. Raitim, Karai a chyoi pra ai wenyi karum ya ai lam hte galaw lu ai. Karai a chyoi pra ai wenyi a majaw byin wa ai asi hta tsawra ai, myit galu ai, matsan dum ai, mai kaja ai hte tinang myit hpe hkang lu ai lam ni lawm ai. (Gal 5:22, 23) Dai atsam ningja ni gaw nju ndawng ai lam hpe hkam jan lu shangun ai. Ninghkap ai ni law law a madu jan, madu wa, ma, htingbu ni gaw dai atsam ningja ni hpe madun  ai majaw, shanhte a myit galai shai wa ma ai. Shanhte kaw na law law gaw hpunau nauna ni pyi byin wa ai. Yehowa hpe nawku ai majaw nang hpe nju ndawng nga ai ni hpe, tsawra na matu yak nga ai nga yang, chyoi pra ai wenyi a matu akyu hpyi u. (Luk 11:13) Karai a lam matsun ni hte maren hkan sa ai gaw, galoi mung kaja htum re ai hpe kam u.​—Gsh 3:5-7.

14-15. Roma 12:17-21 gaw laja lana ninghkap ai madu wa hpe tsawra myit madun na matu Yasamin hpe gara hku karum ya wa ai kun?

¹⁴ Sin praw ka-ang hta nga ai nauna Yasamin a kasi ningli hpe yu yu ga. Shi Yehowa Sakse langai byin wa ai shaloi, madu wa gaw masu hkrum sai ngu shadu wa ai. Dai majaw Yehowa hpe n nawku lu hkra shi madu wa galaw wa ai. Madu jan hpe n-gawn n sawn galaw wa ai. Jinghku ni, hpung sara, nat sara ni hpe karum hpyi nna jahkrit shama shangun ai. Nta masha ni hpe hka bra hkra galaw ai wa ngu na mung mara shagun ai. Nawku zuphpawng galaw nga ai aten hta pyi, hpunau ni hpe sa matsa ai. Nhkru ai hku kanawn mazum hkrum ai majaw, nauna gaw chyahkring hkring hkrap ai.

¹⁵ Nawku htingnu hta, Yasamin a wenyi dinghku gaw shi hpe shalan shabran ya nna n-gun jaw ai. Roma 12:17-21 (Hti u.) hta lawm ai ga ni hpe hkan sa na matu myitsu salang ni n-gun jaw ai. “Dai gaw grai yak ai. Raitim, Yehowa kaw ngai karum hpyi ai. Chyum Laika tsun ai hte maren dang lu ai daram ngai hkan sa ai. Nye madu wa gaw shat gawk kata hta ga nhpu ni hpe dingsang jahkrat bang da ai raitim, ngai jasan jaseng galaw kau ai. Shi ngai hpe matsa ai raitim, sumnung ai hku ngai bai htang ai. Shi machyi ai aten, ngai lanu lahku ya ai” ngu Yasamin tsun ai.

16-17. Yasamin a kasi kaw na hpa sharin la lu ai kun?

¹⁶ Madu wa hpe tsawra myit madun ai majaw Yasamin gaw shaman chyeju lu wa ai. Shi ndai hku tsun ai: “Ngai ayan na teng ai hku tsun ai hpe nye madu wa chye ai majaw, ngai hpe grau kam wa ai. Makam masham lam tsun jahta ai shaloi, shi hkungga let madat ya wa ai. Nta hta simsa lam nga hkra galaw na hpe shi myit hkrum wa ai. Ya nga yang, nawku zuphpawng ni lung na matu pyi shi n-gun jaw ai. Anhte a dinghku prat gaw grai rawt jat wa ai. Nta hta mung simsa lam nga wa ai. Nye madu wa teng man lam hpe hkap la nna, Yehowa hpe nawku wa na matu ngai myit mada nga ai.”

¹⁷ Tsawra ai myit gaw, “yawng mayawng hpe hkam mana nga ai, . . . yawng mayawng hpe myit mada nga ai hte yawng mayawng hpe shakut sharang nga ai” lam Yasamin a kasi gaw madun nga ai. (1 Ko 13:4, 7) Nju ndawng ai lam gaw atsam kaba nna hkra machyi shangun lu ai. Raitim, tsawra myit gaw grau atsam kaba ai. Masin salum hpe dang kau lu ai. Yehowa a myit hpe shapyaw ya lu ai. Ninghkap ai ni anhte hpe matut  nna nju ndawng nga ai raitim pyi, anhte kabu gara lu ai. Gara hku nna kun?

18. Nju ndawng hkrum ai shaloi anhte hpa majaw kabu gara lu ai kun?

¹⁸ Yesu ndai hku tsun ai: “Masha ni gaw nanhte hpe ndawng n yawt . . . yang, nanhte a lu myit dai.” (Luk 6:22) Ndawng n yawt ai hpe gaw anhte n hkrum mayu ai. Makam masham a majaw zingri zingrat hkrum ai shaloi mung anhte n pyaw ai. Rai yang, nju ndawng hkrum ai shaloi hpa majaw kabu gara lu ai kun? Ndai lam masum a majaw re. Langai, anhte hkam jan ai nga yang Karai a myiman lu la ai. (1 Pe 4:13, 14) Lahkawng, anhte a makam masham gaw grau ngang kang wa nna n-gun ja wa ai. (1 Pe 1:7) Masum, manu daw dan n lu ai htani htana asak shaman chyeju hpe lu la na re.​—Rom 2:6, 7.

19. Kayat hkrum ngut ai hpang kasa ni gaw hpa majaw kabu gara ai kun?

¹⁹ Yesu hkrung rawt nna kade n na yang, kasa ni gaw Yesu tsun wa ai kabu gara lam hpe lu la wa ai. Shanhte kayat hkrum nna, n hkaw tsun na matu hkang da hkrum ai. Raitim, shanhte kabu ai. Hpa majaw kun? ‘[Yesu a] amying ningsang a majaw she, kaya hkrum na gaw, ging nga ga ai’ nga nna shanhte myit la ai. (Kas 5:40-42) Hpyen ni a nju ndawng hkrum na hpe hkrit ai hta grau nna shanhte a Madu hpe tsawra ma ai. Kabu gara shiga matut hkaw tsun ai hku na tsawra myit hpe shanhte madun wa ai. Dai ni aten hta hpunau nauna law law mung mayak mahkak amyu myu nga ai raitim, sadi dung let Yehowa a magam gun nga ai. Shanhte galaw nga ai bungli, Yehowa a amying a matu madun ai tsawra myit hpe Yehowa n malap ai lam shanhte chye ai.​—Heb 6:10.

20. Hpang na sumhpa hta hpa lam hpe hkaja na kun?

²⁰ Ndai mungkan dingsa nga ding yang gaw, anhte nju ndawng hkrum nga na re. (Yhn 15:19) Raitim anhte n hkrit ra ai. Hpang na sumhpa hta, sadi dung ai ni hpe Yehowa gaw shangang shakang ya nna, makawp maga ya na hpe anhte hkaja lu na re. (2 Ht 3:3) Dai majaw Yehowa, hpunau nauna ni hte hpyen ni hpe pyi matut tsawra mat ga. Ndai hpaji jaw ga hpe hkan sa na nga yang, anhte ni gaw kahkyin gumdin nga na, wenyi lam hta n-gun ja nga na re. Yehowa hpe shagrau lu nna, tsawra myit gaw nju ndawng ai hpe dang kau lu ai lam sakse madun lu na re.