1. Sumsing sut gan a lam Yesu hpa tsun ai kun?

KUMHPA ni hta n mu lu ai kumhpa mung nga ai. Manu grai hpu ai kumhpa ni hpe n mu lu ai. Arung arai hta grau ai sumsing sut gan a lam, Bum Ntsa Na Mungga hta Yesu tsun wa ai. “Na a sut gan nga ai kaw, na a myit masin mung nga na lit dai” ngu shi tsun ai. (Mat 6:19-21) Masha ni gaw tinang manu shadan ai lam hpe lu na matu shakut ma ai. Anhte gaw sumsing sut gan re ai Karai a man hta amying kaja lu na matu shakut ai. Yesu sanglang dan wa ai hte maren, dai sut gan hpe jahten n mai ai zawn, lagu la mung n mai ai.

2. (a) 2 Korinhtu 4:17, 18 hta hpa hpe myit maju jung na matu Pawlu n-gun jaw ai kun? (b) Ndai sumhpa hta hpa lam hkaja na kun?

² “N dan ndawng ai arai ni hpe tau yu” na matu, kasa Pawlu n-gun jaw ai. (2 Korinhtu 4:17, 18 hpe hti u.) Dai hta, mungkan nnan shaman chyeju ni lawm ai. Anhte hpe akyu jaw ai n mu lu ai kumhpa 4 a lam hkaja yu ga. Dai ni gaw, Karai hte jinghku hku lu ai ahkang, akyu hpyi lu ai ahkang, chyoi pra ai wenyi a karum shingtau lam hte hkaw tsun bungli hta sumsing lamu kaw na madi shadaw ya ai lam ni re. Dai hpe gara hku chyeju dum mai ai lam hpe mung hkaja lu na re.

3. Manu dan dik ai n mu lu ai kumhpa gaw hpa rai kun? Gara hku lu la mai ai kun?

³ N mu lu ai kumhpa ni hta manu dan dik htum gaw, Yehowa hte jinghku hku lu ai ahkang re. (Gsh 3:32) Chyoi pra  ai Karai gaw yubak masha ni hte gara hku jinghku hku lu na kun? Yesu a gawng malai hkungga gaw “mungkan ga a yubak gun la kau” ya sai majaw re. (Yhn 1:29) Shinggyim masha ni hpe hkye la na matu, si ai du hkra Yesu sadi dung na hpe Yehowa chye ai. Dai majaw, Hkristu n du shi yang asak hkrung wa ai ni hte pyi, Karai jinghku hku wa ai.​—Rom 3:24, 25.

4. Hkristan prat garai n du shi ai aten na Karai a jinghku nkau hpe tsun dan u.

⁴ Hkristan n du shi ai aten na, Karai a jinghku nkau mi a lam hpe yu yu ga. Abraham gaw makam masham ngang kang ai. Shi si nna shaning 1,000 jan hta, “nye a jinghku” ngu Yehowa tsun wa ai. (Esa 41:8) Dai majaw, si hkrung si htan pyi Yehowa hte hku hkau lam hpe n jahten lu ai. Yehowa a matsing nyan hta, Abraham nga nga ai. (Luk 20:37, 38) Kaga langai gaw Yoba re. Lamu kasa zuphpawng hta, Yoba a lam Yehowa tsun wa ai. Yoba hpe “ding hpring ai hte kangka ai wa rai nga nna, Karai Kasang hpe hkrit kamyin let, yubak mara hpe koi kau ai wa rai nga ai” ngu tsun wa ai. (Yob 1:6-8) Shut shai ai nawku htung hte hpring nga ai mungdan hta, shaning 80 daram sadi dung let magam gun wa ai Daniela hte seng nna gaw Yehowa gara hku hkamsha ai kun? Asak kaba sai Daniela gaw Karai a matu “grai tsawra hkam ai wa” re ngu lamu kasa gaw 3 lang tsun wa ai. (Dan 9:23; 10:11, 19) Yehowa gaw si mat ai jinghku ni hpe bai jahkrung ya mayu ai.​—Yob 14:15.

5. Yehowa hte jinghku hku na matu gara lam ni ra ai kun?

⁵ Dai ni aten hta, Yehowa hte jinghku hku lu ai shinggyim masha kade daram nga ai kun? Wan hku law hkra nga ai. Mungkan ting hta, num, la hte ma ni gaw Karai a jinghku byin mayu ai lam tatut madun nga ma ai. “Teng man ai ni chyawm gaw shi [Yehowa] hte jinghku hku lu” ai. (Gsh 3:32) Yesu a gawng malai hkungga a majaw sha, Yehowa hte jinghku hku lu ai. Tinang hkum tinang Yehowa kaw apnawng nna hkalup hkam mai ai. Dai lam hku nna, ninggawn tawa hta grau htum ai wa hte “jinghku hku” nga ai wan hku law ai Hkristan ni hta anhte lawm lu ai.

6. Karai hte jinghku hku lu ai majaw chyeju dum ai lam gara hku madun mai ai kun?

⁶ Karai hte jinghku hku lu ai majaw, chyeju dum ai lam gara hku madun lu ai kun? Karai hpe shaning 100 jan sadi dung wa ai Abraham, Yoba ni zawn anhte mung, Yehowa a magam gun ai kade daram na sai raitim, matut sadi dung ra ai. Daniela zawn Karai hte hku hkau lam hpe asak hta grau nna manu shadan ra ai. (Dan 6:7, 10, 16, 22) Yehowa a karum shingtau lam hte mayak mahkak ni hpe hkam sharang lu nna, Karai hte matut hku hkau lu na re.​—Hpl 4:13.

7. (a) Ga Shagawp 15:8 hku nga yang anhte a akyu hpyi ga ni hpe Yehowa gara hku hkamsha ai kun? (b) Akyu hpyi ga ni hpe Yehowa gara hku mahtai jaw ai kun?

⁷ N mu lu ai kaga kumhpa gaw, akyu hpyi lu ai ahkang re. Grai hkau ai manang ni gaw, myit mang ai lam ni hte hkamsha lam ni hpe tsun dan hkat ma ai. Yehowa hte hku hkau lam mung dai zawn sha re. Yehowa gaw Chyum Laika hku nna ga shaga ai. Shi a myit mang ai lam ni, hkamsha lam ni hpe tsun dan ai. Anhte mung myit mang ai lam, hkamsha lam ni hpe akyu hpyi nna tsun dan ai. Akyu hpyi ga ni hpe Yehowa madat ya mayu ai. (Ga Shagawp 15:8 hpe hti u.) Manang ni zawn, Yehowa mung anhte a akyu hpyi ga  hpe madat ya ai. Kalang ta mahtai jaw ai aten mung nga ai. Kalang marang gaw, matut akyu hpyi ra ai. Gara hku mi raitim, htap htuk ai aten hta kaja htum mahtai jaw na hpe kam mai ai. Mahtai gaw myit mada da ai hku rai yang she rai na re. Ga shadawn, mayak mahkak ni hpe yeng seng kau ya na malai, nyan hpaji hte ‘hkam jan lu’ na matu n-gun atsam jaw ai.​—1 Ko 10:13.

8. Akyu hpyi lu ai ahkang hpe chyeju dum ai lam gara hku madun mai ai kun?

⁸ Akyu hpyi lu ai ahkang a matu chyeju dum ai lam gara hku madun mai ai kun? “Nsim n sa akyu hpyi nga mu” ngu ai Yehowa a lam matsun hpe madat mara ai hku nna re. (1 Ht 5:17) Akyu hpyi na matu Yehowa atik anang n shadut ai. Anhte a wanglu wanglang ahkang hpe hkungga nna, “akyu hpyi ai hta htep lahti” rai na matu n-gun jaw ai. (Rom 12:12) Chyahkring hkring akyu hpyi nna, chyeju dum ai lam madun mai ai. Akyu hpyi ai shaloi, Yehowa hpe shakawn shagrau ai lam ni lawm ging ai.​—Shk 145:2, 3.

9. Akyu hpyi ai hte seng nna hpunau langai gara hku hkamsha ai kun? Nang mung gara hku hkamsha ai kun?

⁹ Yehowa a magam gun ai aten na magang, akyu hpyi ga ni hpe shi mahtai jaw ai lam mu lu magang re. Akyu hpyi lu ai ahkang hpe chyeju dum myit mung law wa magang re. Ga shadawn, aten hpring magam hta 47 ning rai sai hpunau Hkris ndai hku tsun ai: “Jau jau rawt nna Yehowa hte ga shaga ai hpe grai ra ai. Jan pru nna yawng mayawng tsawm htap nga ai aten hta, akyu hpyi ai gaw grai myit simsa ai. Dai gaw akyu hpyi lu ai ahkang hte hpawn, Karai jaw ai kumhpa yawng hpe chyeju dum shangun ai. N yup shi yang akyu hpyi ai mung, angwi apyaw hte yup pyaw shangun ai.”

10. Karai a chyoi pra ai wenyi hpe hpa majaw manu shadan ging ai kun?

¹⁰ Manu shadan ging ai kumhpa ni hta, Karai a chyoi pra ai wenyi mung lawm ai. Dai hpe lu na matu, matut akyu hpyi ra ai lam Yesu tsun ai. (Luk 11:9, 13) Chyoi pra ai wenyi  hku nna, “chyahtum chyalai re ai n-gun atsam” Yehowa jaw ai. (2 Ko 4:7; Kas 1:8) Dai atsam a majaw, gara mayak mahkak hpe raitim hkamjan lu na re.

11. Chyoi pra ai wenyi gaw anhte hpe gara hku karum ya ai kun?

¹¹ Chyoi pra ai wenyi gaw Karai a magam hpe atsawm gun hpai lu hkra karum ya ai. Atsam ningja ni hpe rawt jat shangun ai. Karai a magam hta awng dang ai gaw, tinang atsam a majaw n re ai sha, Karai wenyi a majaw re ai hpe anhte chye na ai.

12. Shakawn 139:23, 24 hku nga yang hpa galaw na matu chyoi pra ai wenyi hpyi mai ai kun?

¹² Karai a chyoi pra ai wenyi a matu, chyeju dum mai ai kaga lam gaw, shut shai ai myit mang ai lam, ra marin ai lam ni hpe mu wa hkra akyu hpyi ai hku nna re. (Shakawn 139:23, 24 hpe hti u.) Yehowa gaw chyoi pra ai wenyi hku nna anhte a myit mang ai lam, ra marin ai lam ni hpe sadi hkrup hkra karum ya ai. Dai shaloi, dang manga kau lu na atsam hpe hpyi ging ai. Dai lam hku nna, chyoi pra ai wenyi n lu shangun ai lam ni hpe n galaw na matu myit dawdan da mai ai.​—Ehp 4:30.

13. Chyoi pra ai wenyi a matu grau chyeju dum chye hkra gara hku galaw mai ai kun?

¹³ Chyoi pra ai wenyi a majaw awng dang nga ai lam ni hpe, myit sawn sumru yang, chyeju dum ai myit law htam wa na re. “Chyoi pra ai Wenyi nanhte a ntsa e du jang, nanhte n-gun atsam lu la na ma rin dai rai nna, . . . lamu ga htum hkra, nye a sakse ni tai na ma rin dai” ngu sumsing lamu de n lung shi yang, sape ni hpe Yesu tsun ai. (Kas 1:8) Dai ga ni gaw dai ni aten hta hpring tsup nga ai. Chyoi pra ai wenyi a majaw, Yehowa a mayam wan 8 jan kahkyin la hkrum nga ai. Karai a chyoi pra ai wenyi gaw tsawra ai, kabu gara ai, ngwi pyaw ai, myit galu kaba ai, matsan dum ai, mai kaja ai, kangka ai, myit sumnung ai, tinang myit hpe hkang lu ai ngu ai “wenyi a asi” hpe shalat na matu karum ya ai majaw, Karai a masha ni gaw kahkyin gumdin nga ai. (Gal 5:22, 23) Chyoi pra ai wenyi gaw manu dan ai kumhpa re.

14. Hkaw tsun bungli hta n mu lu ai gara madi shadaw lam ni lu da ai kun?

¹⁴ Yehowa, shi a sumsing uhpung hte magam gun lu ai mung n mu lu ai kumhpa re. (2 Ko 6:1) Sape shatai ai bungli hta lawm ai gaw dai ahkang lu nga ai re. “Anhte chyawm gaw Karai Kasang a shingdep shingtau ni rai nga ga ai” ngu Pawlu tsun ai. (1 Ko 3:9) Hkaw tsun magam hta lawm ai mung Yesu a shingdep shingtau re. “Masha amyu baw shagu hpe sape shatai” na matu, shi hpang hkan ai ni hpe tsun ngut ai hpang, “ngai nanhte hte rau dinggrin a nga nga na” ngu Yesu tsun ai. (Mat 28:19, 20) Lamu kasa ni gaw gara hku kun? “Dinghta ga ntsa e nga ai ni . . . hpe, htani htana a kabu gara shi ga hkaw dan lu ai” bungli hta lamu kasa ni a lam matsun lu la ai gaw shaman chyeju re.​—Shr 14:6.

15. Hkaw tsun bungli hta Yehowa shang lawm nga ai lam Chyum Laika ga shadawn tsun dan u.

¹⁵ Sumsing lamu kaw na madi shadaw lam a majaw, hpa ni ngut kre nga ai kun? Mungdan shiga nli gat ai shaloi, nli nkau gaw ga kaja hta hkrat nna, kaba wa ai. (Mat 13:18, 23) Galu kaba shangun ai gaw kadai rai kun? “Nye Wa e lau la ai wa n rai yang gaw” shi a sape n mai byin ai ngu Yesu tsun ai. (Yhn 6:44) Chyum Laika ga shadawn langai hpe yu yu ga. Hpilipi mare shinggan hta hpawng nga ai anum ni hpe Pawlu sakse hkam ai. Ludi ngu ai num langai hte seng nna, ndai hku tsun ai: ‘Pawlu tsun dan ai lam hpe madat mara u ga nga, Madu [Yehowa] gaw shi a myit hpaw ya ai.’ (Kas 16:13-15) Ludi zawn sha, wan hku law ai kaga masha ni hpe mung Yehowa lau la ai.

16. Hkaw tsun bungli awng dang ai majaw kadai shagrau hkrum ging ai kun?

¹⁶ Hkaw tsun bungli awng dang ai majaw kadai shagrau hkrum ging ai kun? Korinhtu hpung de ka ai laika hta, Pawlu mahtai jaw da ai: “Ngai gaw hkai da nngai, Apolo gaw ntsin jaw wu ai: Karai Kasang e she tu shangun nga ai. Shing rai, hkai da ai wa gaw hpa n rai nga ai, ntsin jaw ai wa mung hpa n rai nga ai; tu shangun ai Karai Kasang chyu sha shabyin ya lu ai.” (1 Ko 3:6, 7) Hkaw tsun magam hta awng dang lam lu yang, Pawlu zawn Yehowa hpe shagrau ging ai.

17. Karai Kasang, Hkristu, lamu kasa ni hte “shingdep shingtau” byin lu ai majaw chyeju dum ai lam gara hku madun mai na kun?

¹⁷ Karai Kasang, Hkristu, lamu kasa ni hte “shingdep shingtau” byin lu ai ahkang a matu, gara hku chyeju dum mai na kun? Hkaw tsun na matu ahkaw ahkang tam ai hku nna re. ‘Shawa yawng a man e, nta shagu hkan e’ hkaw tsun mai ai. (Kas 20:20) Masat kaman sakse hkam mai ai. Marai langai hte hkrum ai shaloi, hku hkau ai hku tsun shaga hpang mai ai. Kaja ai hku bai htang ai ni hpe hpaji rawng let hkaw tsun mai ai.

18-19. (a) Tengman ai tara nli hpe anhte gara hku hka jaw ya ai kun? (b) Chyum ga sharin hpe Yehowa karum ya wa ai mahkrum madup hpe tsun dan u.

¹⁸ “Karai Kasang a shingdep shingtau” ni hku nna anhte gaw, tengman ai tara a nli hpe gat ai sha n-ga, hka mung jaw ai. Myit lawm ai lam madun ai ni hpang de bai sa na matu dang lu ai daram shakut ai. Shing nrai, Chyum ga sharin hpang lu na matu lajang ya ai. Chyum ga sharin a myit sumru ai lam galai shai wa hkra, Yehowa karum ya ai hpe mu lu ai shaloi, anhte grai kabu ai.

¹⁹ Dingda Ahprika kaw nga ai nat sara Rapalalani a lam hpe myit yu ga. Chyum Laika  hkaja nna chye wa ai lam ni hpe ra mat ai. Raitim, tsu ni hte ga shaga ai hte seng nna Chyum Laika ningmu hpe hkap la na matu yak ai. (Trj 18:10-12) Karai karum ya ai hpe hkap la ai majaw, myit sawn sumru ai lam galai shai wa nna, gumhpraw shang ai nat sara bungli hpe kau da ai. “Lam amyu myu hte karum ya ai Yehowa Sakse ni hpe grai chyeju dum ai. Nye a matu bungli tam ya ai. Yehowa hpe grau chyeju dum ai. Nye a prat hpe galai shai hkra karum ya ai majaw, hkalup hkam ngut sai sakse hkam langai hku nna, hkaw tsun bungli hta shang lawm nga sai” ngu asak 60 rai sai Rapalalani tsun ai.

20. Hpa galaw na matu nang dawdan da ai kun?

²⁰ N mu lu ai kumhpa 4 a lam bawngban wa sai. Grau htum ai kumhpa gaw, Yehowa hte hku hkau lu ai ahkang re. De a majaw, kaga kumhpa ni kaw nna akyu lu na matu lam hpaw mat ai. Dai lam ni gaw, akyu hpyi lu ai ahkang, chyoi pra ai wenyi a karum shingtau hte hkaw tsun bungli hta sumsing lamu kaw nna lu la ai madi shadaw ya ai lam ni re. Dai hpe chyeju dum na matu myit dawdan da ga. Kaja htum jinghku Yehowa hpe galoi mung chyeju dum nga ga.