1-2. (a) Mahte 28:18-20 hku nga yang Hkristan nawku hpung hta hpa madung lit nga ai kun? (b) Ndai sumhpa hta hpa lam hkaja na kun?

YESU hkrung rawt ai hpang, shi gaw sape ni hte arau Galile na bum ntsa kaw hkrum na matu lajang wa ai. Dai shara kaw shanhte hkrum ai shaloi, kasa ni a myit hta myit mada ai lam ni hte hpring nga na re. (Mat 28:16) Dai gaw “lang lata sha hpunau manga tsa jan shi hpe mu dat” ai aten rai na re. (1 Ko 15:6) Yesu gaw dai shara kaw hkrum na matu sape ni hpe hpa majaw shaga ai kun? ‘Nanhte pru sa nna, masha amyu baw shagu hpe sape shatai mu’ ngu nna shanhte hpe lam matsun jaw mayu ai majaw re.​—⁠Mahte 28:18-20 hpe hti u.

² Yesu a lam matsun hpe na ai sape ni gaw, hpang e tsa ban langai na Hkristan nawku hpung shang masha ni byin wa ai. Dai nawku hpung a madung lit gaw Hkristu a sape ni * byin wa na matu re. Dai ni aten hta, mungkan ting kaw jet ai Hkristan nawku hpung law law nga wa tim, dai madung lit hpe naw gunhpai ra ai. Ndai sumhpa hta, ndai ga san mali hpe hkaja mat na re: Sape shatai ai magam gaw hpa majaw grai ahkyak ai kun? Dai hta hpa lam lawm ai kun? Sape shatai ai magam hta Hkristan yawng lawm ai kun? Dai magam gunhpai ai shaloi hpa majaw myit galu ra ai kun?

3. Yawhan 14:6 hte 17:3 hku nga yang sape shatai ai magam gaw hpa majaw grai ahkyak ai kun?

³ Sape shatai ai magam gaw hpa majaw grai ahkyak ai kun? Hkristu a sape byin wa yang she, Karai Kasang a jinghku mai byin ai majaw re. Dai sha n-ga, Hkristu hpang hkan ai masha ni gaw ya mung kaja ai prat lu la nna, htawm hpang hta mung htani htana asak lu na matu myit mada lam nga ai. (Yawhan 14:6; 17:3 hpe hti u.) Yesu gaw anhte hpe grai ahkyak ai lit jaw da ai. Raitim, dai lit hpe anhte hkrai sha galaw ra na n re. Kasa Pawlu gaw shi nan hte Hkristan ni hte seng nna ndai hku tsun da ai: “Anhte chyawm gaw Karai Kasang a shingdep shingtau ni rai nga ga ai.” (1 Ko 3:9) Yehowa hte Hkristu jaw ai laksan kumhpa gaw n hkum tsup ai masha ni a matu grai kaba ai ahkaw ahkang she rai nga a hka!

4. Eban yan Matide a mabyin kaw nna anhte hpa sharin la lu ai kun?

⁴ Sape shatai ai magam gaw anhte hpe grai ngwi pyaw shangun ai. Kolambia kaw nna Eban yan Matide a mabyin hpe myit yu ga. Shan la gaw Dabia ngu ai la langai hpe sakse hkam ai. Shan hpe shi ndai hku tsun ai: “Nye a prat hpe galai shai mayu ai. Raitim, n mai byin ai.” Dabia gaw gumhpraw lu na matu htwi shingjawng ya ai wa re. Nanghpam tsi lang ai, lu lai sha lai ai, shi a sumtsaw Erika hte arau nga sha ai. Eban ndai hku tsun ai: “An gaw shi hte arau Chyum Laika hkaja ai. Shi nga ai kahtawng gaw grai tsan nna, hkumpup ni grai law ai lam hku, aten na na lagaw leng jawn sa ra ai. Dabia a myit jasat hte akyang lailen ni galai shai wa ai hpe mu ai majaw, Erika mung Chyum Laika arau hkaja wa ai.” Dai hpang, Dabia gaw nanghpam tsi, tsa chyaru hte htwi shingjawng ai lam ni hpe jahkring kau ai. Erika hpe mung hkungran la ai. Matide ndai hku tsun ai: “Dabia yan Erika gaw 2016 hta hkalup hkam wa ai. Dabia galoi mung tsun nga ai ‘nye a prat hpe galai shai mayu ai. Raitim, n mai byin ai’ ngu ai ga hpe an bai dum ai. Grai kabu ai majaw, an myi pri si ni hkrat wa ai.” Masha ni hpe Hkristu a sape byin wa hkra karum ya ai lam gaw ngwi pyaw lam teng sha lu shangun ai.

5. Sape shatai ai magam galaw na matu shawng nnan hpa galaw ra ai kun?

⁵ Sape shatai ai magam hpe galaw na matu, shawng nnan myit dingman ai ni hpe “tam” ra ai. (Mat 10:11) Hkrum ai masha yawng hpe sakse hkam ai gaw anhte Yehowa Sakse re ai hpe madun nga ai re. Hkaw tsun na matu, Hkristu lam matsun da ai hpe hkan sa ai gaw jet ai Hkristan re ai hpe mung madun nga ai re.

6. Hkaw tsun magam hta awng dang na matu hpa gaw karum ya lu ai kun?

⁶ Masha nkau mi Chyum Laika tengman ai lam sharin la na matu grai ra sharawng ma ai. Raitim, masha law law gaw shawng nnan hta, myit n lawm ma ai. Shanhte myit lawm wa hkra anhte galaw ra ai. Hkaw tsun magam hta awng dang lu na matu anhte atsawm hkyen lajang ra ai. Anhte hkrum ai masha ni myit lawm na zawn re ai lam lama ma hpe lata ra ai. Dai hpang, gara hku tsun na hpe tau hkrau hkyen lajang da ra ai.

7. Marai langai hte gara hku ga shaga hpang na kun? Madat ya nna hkungga ai lam madun na matu hpa majaw ahkyak ai ngu shadu ai kun?

⁷ Ga shadawn, nta madu hpe ndai hku san mai ai: “Chyeju hte langai mi san mayu ai. Dai ni aten hta dinghku hka bra ai lam gaw grai law nga ai. Dinghku ngang kang hkra gara hku galaw mai na kun?” Dai hpang, Kolose 3:18, 19 hpe bawng ban mai ai. Shing nrai, ndai hku san mai ai: “Ma ni hpe kaja ai akyang lailen  nga hkra sharin ya na matu kaja htum lam gaw hpa rai na kun? Nang gara hku shadu ai kun?” Dai hpang, Tara Jahprang 6:6, 7 hpe hti nna bawngban u. Bawngban na matu gara lam hpe lata ai raitim, madat na ni a lam hpe nang myit ra ai. Chyum Laika hta lawm ai tengman lam hpe tsun dan yang, shanhte gara hku akyu lu la mai na lam shawng myit yu u. Ga shaga nga ai shaloi shanhte tsun ai hpe madat ya nna, shanhte a ningmu hpe hkungga na matu ahkyak ai. Rai yang, shanhte a lam grau chye wa nna, shanhte mung anhte tsun ai hpe grau madat mayu wa na re.

8. Bai kawan ai lam hpe hpa majaw shakut nna galaw ra ai kun?

⁸ Chyum Laika hkaja na matu marai langai garai n dawdan shi yang, anhte maga hku nna bai kawan na matu ahkying aten law law hpe jailang ra na re. Hpang kalang bai sa ai shaloi shanhte hte bai n hkrum lu ai baw byin chye ai. Nta madu gaw Chyum Laika hkaja ai hpe sharawng awng let hkap la mayu ai aten du hkra, chyahkring hkring bai kawan ra chye ai. Hpun langai galu kaba wa na matu ayan hka jaw ra ai. Dai zawn sha, myit lawm ai masha gaw Yehowa hte Hkristu hpe tsawra wa na matu, Karai Mungga a lam hpe ayan tsun dan ra ai.

9-10. Myit dingman ai masha hpe tam ai lam hta jet ai Hkristan yawng lawm ai ngu hpa majaw lu tsun ai kun?

⁹ Myit dingman ai ni hpe tam ai magam hta, jet ai Hkristan yawng shang lawm gunhpai nga ai. Dai magam gaw, mat nga ai ma langai hpe hkan tam ai bungli hte bung ai. Gara hku nna kun? Asak 3 ning re ai la kasha langai nta kaw nna mat mat ai mabyin hpe myit yu ga. Shi hpe masha marai 500 daram hkan tam ai. Mat mat nna hkying hkum 20 daram na ai hpang she, marai langai gaw ma hpe hkainu yi kaw tam mu wa ai. Ma hpe tam mu ai majaw,  shi hpe masha ni shakawn ai shaloi shi n hkap la ai. Shi ndai hku tsun ai: “Yawng jawm tam ai majaw shi hpe tam mu ai re.”

¹⁰ Masha law law gaw mat mat ai dai ma kasha hte bung ai. Shanhte hta myit mada lam n nga ai majaw, shanhte hpe anhte karum ya ra ai. (Ehp 2:12) Ging dan ai ni hpe hkan tam ai magam bungli hta anhte hte nawng wan 8 jan shang lawm nga ai. Nang hte arau Chyum Laika hkaja mayu ai masha hpe nang mu yang she mu na re. Raitim, Chyum Laika hkaja mayu ai masha hpe kaga hkaw tsun masha gaw, nang hkaw tsun ai lawk hta sha, tam mu yang mu na re. Hpunau (sh) nauna langai gaw, Hkristu a sape byin wa na masha hpe tam mu ai shaloi, kaga ni mung tam ai lam hta lawm ai majaw arau kabu na re.

11. Nang hta Chyum ga sharin n nga tim pyi sape shatai ai magam hpe gara lam hku nna karum ya lu ai kun?

¹¹ Nang hta Chyum ga sharin n nga tim, kaga lam hku nna sape shatai ai magam hpe karum ya mai ai. Ga shadawn, Nawku Hpung de shawng nnan sa lung ai ni hpe hkap tau la nna shanhte hpe hku hkau ai lam madun mai ai. Tsawra myit hpe dai lam hku nna madun yang, anhte gaw jet ai Hkristan ni re ai hpe sakse madun nga ai re. (Yhn 13:34, 35) Zuphpawng ni hta nang jaw ai mahtai gaw kadun tim, htap htuk nna hkungga ai hku rai yang, kaga ni a hkamsha lam hpe nang myit ya nga ai re. Masha nnan ni mung dai hku hkan galaw lu hkra nang sharin ya nga ai re. Hkaw tsun magam hta masha nnan hte arau ginrun nna, Chyum Laika hpe akyu jashawn nna masha ni hte gara hku bawngban mai ai lam shi hpe tsun dan mai ai. Dai hku galaw ai gaw, Hkristu hpe kasi la na matu shi hpe nang sharin ya nga ai re.​—⁠Luka 10:25-28.

12. Sape shatai ai magam gun na matu laklai ai atsam nga ra ai kun? Sanglang dan u.

¹² Yesu a sape byin wa hkra kaga ni hpe sharin ya na matu, anhte hta laklai ai atsam nga ra ai ngu kadai mung n myit la ging ai. Hpa majaw kun? Bolibia kaw na nauna Hpausatina a mabyin hpe myit yu ga. Yehowa Sakse ni hte nnan hkrum ai shaloi shi laika n chye hti ai. Ya gaw shi loi mi lu hti sai. Ya nga yang hkalup hkam ngut nna, kaga ni hpe sharin ya ai lam hpe shi grai ra sharawng ai. Bat mi hta Chyum ga sharin 5 hpe ayan sharin nga ai. Hpausatina gaw Chyum ga sharin ni daram laika n lu hti tim, marai 6 hpe hkalup hkam ai du hkra karum ya lu sai.​—⁠Luka 10:21.

13. Anhte amu law nga tim, sape shatai ai bungli galaw ai majaw lu la ai shaman chyeju nkau gaw hpa ni rai kun?

¹³ Hkristan law law gaw ahkyak ai lit ni a majaw amu law nga ai. Raitim, shanhte gaw Chyum ga sharin ya ai lam hta aten jaw nna, ngwi pyaw nga ma ai. Melani a mabyin hpe yu yu ga. Shi gaw Alaska kaw nga ai. Shi hkrai sha asak 8 ning rai sai kasha numsha hpe bau ra ai. Kanbau bungli hpe aten hpring galaw ra  nna, mawng ana byin nga ai kawa hpe mung yu lanu lahku ra ai. Sakse Hkam kadai mung n nga nna, mare hte tsan ai kahtawng hta shi nga ai. Grai kashung tim hkaw tsun magam lu sa hkra, n-gun lu la na matu ayan akyu hpyi ai. Chyum Laika sharin mayu ai masha hpe tam mayu ai majaw re. Hpang hta, Karai Kasang kaw amying nga ai hpe chye ai majaw grai kabu ai Sera hte hkrum wa ai. Aten loi mi na ai hpang, Chyum ga sharin na matu Sera hkap la wa ai. Melani ndai hku tsun ai: “Bat manga ya shani ni nga yang ngai grai myit pu ba nga ai. Raitim, Chyum ga sharin sa ai majaw an nu yan akyu lu la ai. Sera a ga san hpe mahtai jaw na matu tam sawk sagawn ai hpe an nu grai ra sharawng ai. Yehowa a jinghku byin wa ai hpe mu lu ai majaw grai kabu ai.” Sera gaw ninghkap ai lam hpe nden marai hte hkamjan lu wa ai. Shi a nawku jawng kaw nna pru ngut ai hpang hkalup hkam la ai.

14. (a) Sape shatai a magam gaw nga hkwi ai lam hte gara hku bung ai kun? (b) 2 Timohti 4:1, 2 hta Pawlu tsun da ai ga gaw nang hpe gara hku shadut ya ai kun?

¹⁴ Na a hkaw tsun magam gaw rawt jat lam n nga ai zawn raitim, sape byin wa na masa nga ai ni hpe asum n jaw ai sha matut tam ra ai. Yesu gaw sape shatai ai magam hpe nga hkwi ai hte shingdaw da ai. Nga hkwi ai ni gaw nga n lu shi ai laman, aten law law jaw yang jaw ra na re. Shanhte gaw shana hpang hkrat ai aten (sh) jahpawt jau jau aten hta dai bungli hpe galaw ma ai. Kalang lang grai tsan ai shara de sa ra ai. (Luk 5:5) Dai zawn sha, hkaw tsun masha nkau mi gaw, aten hte shara n bung ai sha “nga hkwi ai lam” hpe myit galu let aten law law jaw nna galaw nga ma ai. Hpa majaw kun? Masha law law hte grau nna hkrum lu ai majaw re. Dai hku atsam grau shaw nna galaw ai masha ni gaw, shiga hpe myit lawm ai ni hte  chyahkring hkring hkrum lu ai ahkyu lu la ma ai. Masha hpe grau hkrum lu na aten hta (sh) shanhte hpe grau tam mu na shara hta hkaw tsun na matu nang shakut lu na kun?​—⁠2 Timohti 4:1, 2 hpe hti u.

15. Chyum ga sharin ai shaloi hpa majaw myit galu ra ai kun?

¹⁵ Chyum ga sharin ai shaloi hpa majaw myit galu ra ai kun? Chyum Laika hta lawm ai lam ni hpe chye wa na matu hte tsawra wa na matu, Chyum ga sharin ni hpe karum ya ra ai hta n-ga galaw ra ai majaw re. Chyum Laika Madu Yehowa hpe chye wa nna tsawra wa na matu mung karum ya ra ai. Dai sha n-ga, Yesu gaw shi a sape ni hpe hpa lam hpyi shawn da ai, jet ai Hkristan hku nna gara hku asak hkrung ra ai lam hpe chye wa hkra mung karum ya ra ai. Chyum Laika npawt tara ni hpe shakut nna hkan sa nga ai hpe mung myit galu let karum ya ra ai. Masha nkau mi gaw shanhte a myit jasat hte akyang lailen ni hpe shata loi mi hte sha galai shai lu ma ai. Raitim, nkau mi chyawm gaw aten jaw ra ai.

16. Rauwu a mabyin kaw nna hpa sharin la lu ai kun?

¹⁶ Piru hta sasana magam gun ai hpunau gaw shi myit galu ya ai majaw kaja ai akyu lu wa ai. “Ngai hta Rauwu ngu ai Chyum ga sharin langai mi nga ai. Shi hte laika buk lahkawng hkaja ngut sai” nga nna hpunau tsun ai. “Raitim, shi a prat hta manghkang kaba ni naw nga nga ai. Shi a dinghku hta manghkang ni nga ai, matsa mawa ga ni hpe shi tsun ai. Dai majaw, shi a ma ni gaw shi hpe hkungga na matu yak nga ai. Shi gaw zuphpawng hpe ayan lung ai majaw, shi kaw sa nna shi hte shi a dinghku hpe matut karum ya ai. Shi hte hkrum ai 3 ning na ai hpang, shi gaw hkalup hkam na matu atsam hpring wa ai.”

17. Hpang na sumhpa hta hpa lam hkaja mat na kun?

¹⁷ Yesu gaw anhte hpe ndai hku tsun ai: ‘Pru sa nna, masha amyu baw shagu hpe sape shatai mu.’ Dai lit hpe atsawm gunhpai lu na matu, gara nawku htung kaw mung n lawm ai ni (sh) Karai Kasang nga ai hpe n kam ai ni hte hpawn, anhte a myit mang ai lam hte grai shai ai ni hte chyahkring hkring hkrum wa na re. Shingdu labau n bung ai ni hpe kabu gara shiga gara hku hkaw tsun lu na lam, hpang na sumhpa hta hkaja mat na re.