1, 2. Dai ni aten na Karai a mayam ni a aprat gaw hpa majaw yak nga ai kun? (Ndai sumhpa shawng na sumla hpe yu u.)

SARAWUN ni hte tsi sara ni gaw, kap chye ai ana zinli nga ai masha ni a lapran hta amu galaw nga ai. Shanhte gaw, machyi ai masha ni hpe karum ya mayu ai majaw, tsi tsi ya ma ai. Raitim, dai machyi ai masha ni kaw nna, ana zinli ni n kap wa na matu, shanhte hkum shanhte mung makawp maga ra ai. Yehowa a mayam ni re ai anhte ni mung, dai zawn masa hte bung nga ai. Anhte kaw nna law malawng gaw, Karai Kasang ra sharawng ai akyang lailen hte n htan shai ai myit jasat ni nga ai masha ni hte rau nga, rau bungli galaw ra nga ai. Dai gaw anhte hpe grai yak shangun chye ai.

² Ndai hpang jahtum nhtoi ni hta, Karai Kasang hpe n tsawra ai masha ni gaw, jaw ai shut ai hte seng ai Karai a tsang madang ni hpe mung nyet kau ma ai. Kasa Pawlu gaw Timohti hpe ka ai laika hta shanhte a n kaja ai akyang lailen ni hte seng nna madun da ai. Ndai prat a jahtum ni wa ai hte maren, dai n kaja ai akyang lailen ni hpe, masha ni grau grau nna hkap la wa na ngu Pawlu tsun wa ai. (2 Timohti 3:1-5, 13 hpe hti u.) Dai n kaja ai akyang lailen ni hpe, anhte mu ai shaloi grai hkrit tsang mat chye ai. Raitim, dai zawn akyang lailen ni hpe madun nga ai masha ni a myit jasat ni hte galaw ai lam ni gaw, anhte hpe shingkang ka-up wa chye ai. (Ga Shagawp 13:20) Ndai sumhpa hta,  dai akyang lailen ni hte Karai Kasang a masha ni hta nga ai akyang lailen ni gaw, kade daram shai nga ai hpe chye lu na re. Yehowa hpe masha ni chye chyang wa hkra karum ya ai shaloi, dai n kaja ai akyang lailen ni anhte hta n kap wa hkra, tinang hkum tinang makawp maga lu ai lam hpe mung chye lu na re.

3. 2 Timohti 3:2-5 hta kaning re ai masha ni hpe madun da ai kun?

³ Hpang jahtum na nhtoi ni gaw, “yak la ai aten” rai na ngu Pawlu tsun wa ai. Anhte a aten hta, masha ni a lapran byin wa na, n kaja ai akyang lailen 19 hpe shi ka wa ai. Dai ni gaw, Roma 1: 29-31 hta shi ka wa ai akyang lailen ni hte bung ai. Raitim, Timohti hpang de ka ai laika hta lang da ai ga si ni hpe Ga Shaka Ningnan a kaga shara ni hta n mu lu ai. Pawlu gaw “masha ni” ngu ai ga si hte hpang da ai. Masha yawng hta Pawlu tsun da ai n kaja ai akyang lailen ni nga na gaw n re. Hkristan ni hta grai shai ai akyang lailen ni nga ai.—Malahki 3:18 hpe hti u.

4. Myit tsaw myit dap ai ni ngu ai lachyum gaw hpa hpe tsun mayu ai kun?

⁴ Tinang hkum tinang tsawra ai ni, gumhpraw marin ai ni law wa na ngu Pawlu ka ngut ai hpang, masha ni gaw grang dakat ai ni, gumrawng gumtawng re ai ni hte myit tsaw myit dap ai ni byin wa na ngu bai tsun ai. Dai zawn akyang lailen ni hpe madun ai ni gaw, shanhte a mu mada ai lam, galaw ai lam, lusu ai lam hte tsang madang ni gaw masha ni hta grau ai ngu sawn la ai majaw re. Dai zawn masha ni gaw, shagrau hkrum ai hpe grai ra sharawng ma ai. Dai zawn masha ni a lam hte seng nna hpaji du langai ndai hku tsun ai: “Shi a salum hta shi hkum shi sha nawku ai tawn hkungri langai nga ai.” Gumrawng ai gaw grai n kaja ai majaw, gumrawng ai masha ni pyi kaga masha ni gumrawng nga ai hpe mu yang n ra ma ai.

5. Yehowa a sadi dung ai mayam ni pyi gara hku nna gumrawng wa ai kun?

⁵ Yehowa gaw gumrawng gumtawng ai hpe n ju n dawng ai. “Gumrawng gumtawng re ai myi man” hpe shi n ra ai. (Ga Shagawp 6:16, 17) Gumrawng ai myit gaw, Karai Kasang hte tsan gang shangun ai. (Shakawn 10:4) Gumrawng ai gaw Satan a akyang lailen re. (1 Timohti 3:6) Yehowa a sadi dung ai mayam nkau mi pyi, gumrawng ai myit jasat kap wa ai gaw yawn hpa re. Ga shadawn, Yuda Hkawhkam Uzia gaw shaning law law sadi dung wa ai. Raitim, Chyum Laika hta ndai hku tsun da ai: “Ya shi gaw hpung dagu lu la jang, shi a akyu hten hkra myit kaba wa nna shi a Karai Kasang Yehowa hpe shut kau wu ai.” Uzia gaw nawku htingnu de sa nna, shi galaw na ahkang n lu ai manam pyaw ai baw hpe sa nat nawng ai. Sadi dung ai Hkawhkam Hezekia mung chyahkring mi gumrawng wa ai.—2 Hkawhkam Labau 26:16; 32:25, 26.

6. Hpa lam ni a majaw Dawi gumrawng wa mai ai kun? Raitim, hpa majaw shi shagrit shanem ai myit nga ai kun?

⁶ Masha nkau mi gaw, tsawm ai, amying kaba ai, madum sumpyi hte seng ai hta ningtawn ai, n-gun atsam kaba ai hte shagrau hkrum ai majaw gumrawng wa ma ai. Dawi gaw dai zawn atsam ni yawng nga wa tim, shi a aprat ting shagrit shanem ai myit madun wa ai. Ga shadawn, Dawi gaw Goliat hpe sat ngut ai hpang, Hkawhkam Shawlu gaw shi a kasha hte hkungran la mai sai lam tsun ai. Raitim, Dawi ndai hku tsun ai: “Ngai wa, hkawhkam wa a kahkri tai na gaw, ngai hkum hte nye a marai, nye a amyu dap ni wa mi, Israela mungdan hta, hpa grau ga ta?” (1 Samuela 18:18) Dawi shagrit shanem ai myit nga na matu hpa gaw karum ya ai kun? Karai Kasang gaw shagrit shanem nna shi hpe lanu lahku ya ai majaw, shi hta atsam ningja ni hte ahkaw ahkang ni lu wa ai hpe shi chye ai. (Shakawn 113:5-8) Dawi gaw shi hta nga ai kaja ai hpa rai timung, Yehowa kaw nna sa ai  hpe shi chye ai.—1 Korinhtu 4:7 hte shingdaw yu u.

7. Anhte shagrit shanem na matu hpa gaw karum ya ai kun?

⁷ Dawi zawn, dai ni aten na Yehowa a masha ni mung, shagrit shanem ai myit nga na matu shakut ra ai. Tsaw Htum ai Yehowa shagrit shanem ai hpe anhte chye ai gaw, anhte hpe mung hkan galaw na matu shadut ya ai. (Shakawn 18:35) ‘Matsan dum ai, sumnung ai, mai kaja ai, myit nem ai, myit gyip ai hte myit galu kaba ai dagraw nga mu’ ngu ai ga hpe anhte hkan sa mayu ai. (Kolose 3:12) Tsawra myit hta “grang ai ga n tsun ai, gumrawng gumtawng n rawng ai” hpe mung anhte chye ai. (1 Korinhtu 13:4) Anhte shagrit shanem ai hpe masha ni mu yang, shanhte mung Yehowa hpe chye mayu wa na re. Makam masham n bung ai madu wa pyi, Hkristan madu jan a kaja ai lai nsam hpe yu nna Yehowa hpang sit sa mayu wa na re. Karai Kasang a mayam ni shagrit shanem ai majaw, kaga masha ni mung shi hpang sit sa wa chye ai.—1 Petru 3:1.

8. (a) Dai ni na masha nkau gaw kanu kawa ni a ga madat ai hte seng nna gara hku mu mada ai kun? (b) Chyum Laika gaw ma ni hpa galaw ra ai ngu tsun da ai kun?

⁸ Jahtum nhtoi na masha ni gaw, kaga masha hpe gara hku kanawn mazum na lam hte seng nna, Pawlu ka wa ai. Ma ni gaw kanu kawa ga n madat ai ni byin wa na ngu ka da ai. Dai ni na aten hta, laika buk ni, sumla hkrung ni hte TV lamang ni gaw, ma ni kanu kawa a ga n madat tim, hpa n ra ai ngu mu mada wa hkra, galaw ya nga ai. Dai zawn madat mara lam n nga ai gaw, kun dinghku a zinlum lam hpe teng sha gawng kya shangun ai. Dai lam teng sha byin nga ai hpe masha ni chye ai mung grai na sai. Ga shadawn, moi Greek masha ni hta, marai langai gaw shi kanu kawa hpe kayat yang, shi a shinggyim ahkaw ahkang sum mat na re. Roma tara npu hta mung, marai langai ngai gaw shi kawa hpe kayat ai nga yang, masha sat ai wa hpe jaw ai dam zawn jaw hkrum na re. Ga Shaka Dingsa hte Ga Shaka Ningnan lahkawng yan hta, kasha ni gaw shanhte a kanu kawa ni hpe hkungga lara na matu hkang da ai.—Pru Mat 20:12; Ehpesu 6:1-3.

9. Ma ni shanhte a kanu kawa hpe madat mara na matu hpa gaw karum ya ai kun?

⁹ Makau grup yin na ma ni madat mara lam n nga timung, ma ni hpe kanu kawa ga madat na matu hpa gaw karum ya na kun? Ma ni gaw, kanu kawa ni shanhte a matu galaw ya ai kaja ai lam ni hpe myit ai nga yang, kanu kawa hpe chyeju dum nna, shanhte a ga hpe mung madat mayu wa na re. Anhte yawng a Kawa re ai Karai Kasang gaw, ramma ni hpe mung kanu kawa a ga madat shangun mayu ai hpe ramma ni chye da ra ai. Ramma ni gaw, shanhte a kanu kawa hte seng nna kaja ai hku tsun dan ai nga yang, manang ni mung shanhte a kanu kawa hpe grau hkungga wa na re. Lama na, kanu kawa ni gaw shanhte a kasha ni a ntsa, nja nhpra myit n rawng ai ni rai yang, ma ni gaw shanhte a ga hpe madat na matu grau nna yak chye ai. Ramma langai gaw, shi a kanu yan kawa shi hpe teng sha tsawra ai ngu hkamsha yang, ga madat na matu yak ai shaloi hta pyi, madat mara na re. Ramma hpunau Austin gaw ndai hku tsun  ai: “Kalang lang nu yan wa a ga hpe n kam madat ai. Raitim, kanu kawa ni gaw rap ra ai tara ni jahkrat ya nna, hpa majaw jahkrat ai hpe atsawm tsun dan ya ai. Shanhte hte ga shaga loi na matu mung lam hpaw da ya ai. Dai hku galaw da ya ai majaw, shanhte a ga madat na matu loi wa ai. Shanhte ngai hpe yu lanu lahku ai hpe ngai mu nna shanhte hpe mung myit pyaw shangun mayu ai.”

10, 11. (a) Kaga ni hpe n tsawra ai masha ni gaw gara akyang lailen ni hpe madun ai kun? (b) Jet ai Hkristan ni gaw kaga ni hpe gara hku tsawra ai kun?

¹⁰ Masha shada da tsawra myit n madun ai hte seng ai kaga akyang lailen ni hpe mung Pawlu tsun wa ai. “Kanu kawa ga n madat ai ni” ngu ai ga si hpe tsun ngut ai hpang chyeju n chye dum ai ni ngu ai ga si hpe ka da ai. Chyeju n chye dum ai masha gaw, kaga masha ni shanhte hpe galaw ya ai kaja ai lam ni hpe manu n shadan ai. Masha ni gaw, sadi n dung ai ni byin wa na ngu nna mung Pawlu tsun wa ai. Shanhte gaw, bawng jahkrup n mai ai ni re ai majaw, kaga masha ni hte mung simsa hkra n kam galaw mayu ai. Shanhte gaw, shatan nhkan chye ai ni, mayun gumlau ai ni rai nna n hkru n kaja ai ga sha tsun ai. Masha a lam hte Karai Kasang a lam hpe pyi n kaja ai hku tsun ai. Shanhte gaw sari jahpoi ai ni rai nna kaga ni a amying jahten na matu masu nna tsun ai. *

¹¹ Yehowa a mayam ni gaw, jet ai tsawra myit madun nga ai majaw, mungkan kaw nna masha law law hte grai shai nga ai. Dai gaw galoi mung teng nga ai. Mawshe a tara hta nambat lahkawng ahkyak htum ai tara gaw, masha shada da hpe tsawra u ngu ai tara re nga nna Yesu tsun wa ai. Dai gaw, Karai Kasang hpe tsawra u ngu ai tara ngut yang ahkyak htum re. (Mahte 22:38, 39) Shada da tsawra ai myit gaw, jet ai Hkristan re ai hpe chye shangun na nga nna Yesu tsun da ai. (Yawhan 13:34, 35 hpe hti u.) Jet ai Hkristan ni gaw shanhte a hpyen ni hpe pyi tsawra ma ai.—Mahte 5:43, 44.

12. Yesu gaw kaga ni hpe tsawra ai lam gara hku madun wa ai kun?

¹² Yesu gaw masha hpe teng sha tsawra ai lam madun wa ai. Karai Mungdan a kabu gara shiga hpe, mare langai hpang langai sa nna, masha ni hpe hkaw tsun ai hku nna madun wa ai. Myi n mu ai ni, lagaw hten ai ni, manggang kap ai ni hte na n na ai ni hpe shamai ya ai. Si mat ai ni hpe pyi asak bai jahkrung ya ai. (Luka 7:22) Yesu gaw masha ni shi hpe n ju tim, masha hpe hkye la na matu shi a asak hpe jaw wa ai. Yesu gaw shi Kawa a tsawra myit hpe kasi la nna htep lahti hkan sa ai. Mungkan ting na Yehowa Sakse ni gaw, Yesu hpe kasi la nna masha ni hpe tsawra ai lam madun ai.

13. Anhte kaga ni hpe madun ai tsawra myit gaw Yehowa hpe masha ni chye wa hkra gara hku karum ya lu ai kun?

¹³ Masha ni hpe tsawra ai lam madun yang, dai gaw Karai Kasang hpe masha ni chye wa hkra karum ya lu ai. Ga shadawn, Htai mungdan hta nga ai la langai gaw ginwang zuphpawng hpe sa lung ai shaloi, hpunau nauna ni langai hte langai madun ai tsawra myit hpe mu nna myit hta grai hkamsha mat ai. Nta bai wa ai hpang, shi gaw Yehowa Sakse ni hte bat mi hta lahkawng lang Chyum Laika hkaja na matu hpyi shawn wa ai. Bai nna, shi a makyin jinghku ni yawng hpe hkaw tsun wa ai. Shata kru na ai hpang, shi gaw Nawku Htingnu hta shawng nnan lang hku nna Chyum Laika hti nga sai. Kaga ni hpe tsawra ai lam anhte madun nga ai kun? Tinang hkum tinang ndai hku san yu u: ‘Ngai na dinghku, nawku hpung hte hkaw tsun magam hta nga ai masha ni hpe ngai dang lu ai daram karum ya nga ai kun? Yehowa mu mada ai zawn kaga ni hpe mu mada ai kun?’

14, 15. N kaja ai gara akyang lailen ni hpe masha law law madun nga ai kun? Masha nkau mi shanhte a akyang hpe gara hku galai shai kau ai kun?

¹⁴ Jahtum nhtoi ni hta, anhte koi ging ai kaga akyang lailen ni hpe masha ni madun nga ai. Ga shadawn, masha law law gaw kaja ai hpe n dawng ai ni re. Shanhte gaw kaja ai hpe n dawng nna ning hkap ai baw pyi galaw ma ai. Dai zawn masha ni gaw tinang myit hpe n lu hkang ai ni, myit matse ai ni re. Masha nkau nga yang baw ja ai ni re. Shanhte gaw n myit yu ai sha galaw nna, shanhte galaw ai majaw kaga ni hkra machyi na hpe mung hpa zawn n nawn ai.

¹⁵ Matse ai dusat du myeng ni zawn akyang nga ai masha law law gaw, shanhte a lai nsam ni hpe galai shai wa ma ai. Dai zawn galai shai na hpe Chyum Laika hta tau hkrau myihtoi htoi da ai. (Esaia 11:6, 7 hpe hti u.) Grai zai ai dusat du myeng ni re ai chyahkyawn hte hkanghkyi ni gaw, sagu ni hte dumsu ni zawn re ai nta hta rem da ai dusat ni hte simsa let rau nga na lam anhte lu hti ai. Shanhte hpa majaw simsa ai kun? Myihtoi ga hta ndai hku matut tsun da ai: “Yehowa hpe chye chyang ai lam, mungkan ting pri rai na ra ai.” (Esaia 11:9) Dusat du myeng ni gaw, Yehowa a lam n sharin la lu ai majaw, dai gaw ga shadawn hku nna tsun nga ai re. Ndai myihtoi ga gaw, dusat zawn akyang nga ai masha ni galai shai wa na hpe tsun mayu ai re.

16. Tinang a akyang lailen ni hpe galai shai na matu Chyum Laika gaw gara hku karum ya ai kun?

¹⁶ Hpunau nauna law law gaw, moi aten hta chyahkyawn zawn myit matse ai ni raitim, ya gaw simsa ai masha ni byin wa sai. Shanhte kaw nna nkau mi a mahkrum madup hpe, jw.org a “Chyum Laika Gaw Prat Hpe Galai Shai Ya” ngu ai sumhpa ni hta nang hti mai  ai. Shanhte gaw Yehowa hpe chye chyang wa nna nawku wa ma ai. Shanhte gaw, tara hkungga ai htung hkan ma timung, dai hte seng ai hpung dagu hpe nyet kau ai ni hte n bung ai. Dai zawn nyet kau ai ni gaw, Karai Kasang hpe nawku masu nna, shanhte a akyang lailen gaw teng sha n nawku ai hpe madun dan nga ai. Raitim, Yehowa a masha ni lapran kaw na masha law law gaw, moi grai matse wa tim, ya gaw “teng man ai hte seng ai ding hpring ai hte chyoi pra re ai Karai Kasang hpan tawn da ai gawng shing-yan ningnan hpe dagraw lu” nga sai. (Ehpesu 4:23, 24) Karai Kasang hte seng ai lam hpe masha ni sharin la ai shaloi, shanhte gaw Karai a tsang madang hku hkan sa ra ai hpe chye wa ma ai. Dai gaw shanhte a kamsham lam, myit mang ai lam hte galaw hkawm sa ai lam ni hpe galai shai na matu karum ya ai. Dai zawn galai shai na matu n loi tim, Karai Kasang hpe myit pyaw shangun mayu ai ni hpe Karai a wenyi gaw karum ya na re.

17. Masha ni hta nga ai n kaja ai akyang lailen ni n kap wa hkra anhte gara hku koi lu na kun?

¹⁷ Karai Kasang hpe nawku ai ni hte, n nawku ai ni a lapran na shai ai hpe, mu na matu loi wa sai. Karai Kasang hpe n nawku ai masha ni hta nga ai n kaja ai akyang lailen ni n kap wa na matu, anhte grai sadi ra ai. Anhte gaw, Yehowa lam matsun ai hku sha hkan sa mayu ai majaw, 2 Timohti 3:2-5 hta madun da ai masha zawn re ai ni hpe koi mayu ga ai. Dai zawn n kaja ai akyang lailen nga ai ni hpe, anhte tsep kawp koi lu na gaw n re. Shanhte hte arau bungli galaw ai, arau jawng sa ai, arau nga ai pyi rai na re. Raitim, shanhte myit ai zawn n myit hkra, shanhte galaw ai zawn n galaw hkra anhte koi lu ai. Gara hku nna kun? Wenyi lam ngang kang hkra, Chyum Laika hkaja nna, Yehowa hpe nawku ai ni hte sha kanawn ai hku nna re.

18. Anhte tsun shaga ai, galaw ai lam ni gaw masha ni Yehowa hpe chye chyang wa na matu gara hku nna karum ya lu ai kun?

¹⁸ Yehowa hpe masha ni chye chyang wa hkra mung, anhte karum ya mayu ga ai. Dai majaw, sakse hkam na matu ahkaw ahkang tam u. Htap htuk ai aten hta kaja ai hku hkaw tsun lu na matu, Yehowa hpang akyu hpyi u. Anhte gaw Yehowa Sakse ni re ai hpe masha ni chye hkra galaw ra ai. Rai yang, anhte a kaja ai arawn alai gaw, anhte hpe shagrau na matu n re ai sha, Karai Kasang hpe shagrau na matu byin wa na re. Yehowa anhte hpe ndai hku sharin ya ai: ‘Tara n hkungga ai myit hte mungkan ga hpe marin marit ai lam koi kau nhtawm, ndai prat e si si re ai hte dinghpring nna tara hkungga ai lam hkan nang u.’ (Titu 2:11-14) Yehowa hpe kasi la nna, shi anhte hpe galaw shangun ai hpe anhte hkan galaw yang, dai hpe masha ni mu wa na re. Masha nkau mi ndai hku pyi tsun wa chye ai: “Karai Kasang nanhte hte rau rai nga ai, anhte na yu sa ga ai majaw, anhte nanhte hte rau sa na ga ai.”—Zehkaria 8:23.