1. Nyan hpaji gara hku lu mai na kun? Dai gaw anhte hpe gara hku karum ya na kun?

NYAN hpaji gaw Yehowa kaw nna re. Kaga ni yawng hpe shi n daw n hta jaw ai. Yaku 1:5 hta ndai hku hti lu ai: “Nanhte hta na marai langai ngai hpaji byeng-ya kadawn nga yang gaw, n jet kau ai sha, nlang hte hpe n daw n hta a jaw nga ai Karai Kasang kaw, hpyi nga u ga.” Karai Kasang a sharin shaga ai lam hpe hkap la ai hku nna, nyan hpaji lu la mai ai. Dai hku galaw na nga yang, shut ai lam hpe koi lu nna, Yehowa hte matut hku hkau lu na re. (Ga Shagawp 2:10-12) Htani htana asak myit mada lam mung nga wa na re.​—⁠Yuda 21.

2. Karai Kasang a sharin shaga ai lam hpe tsawra na matu gara hku sharin la mai na kun?

² Anhte n hkum tsup ai majaw, nga kaba wa ai masa a majaw, sharin shaga ai lam hpe hkap la na matu hte kaja ai lam hku mu na matu kalang lang yak chye ai. Raitim, anhte a prat hta Karai Kasang a sharin shaga ai lam kaw nna akyu lu la ai shaloi, shi anhte hpe kade daram tsawra ai hpe anhte chye na lu na re. Ga Shagawp 3:11, 12 hta anhte hpe ndai hku tsun da ai: ‘Ngai sha e, Yehowa a sharin ai hpe n gawn n sawn hkum rai et; Yehowa gaw tsaw ra ai wa hpe sharin ya ai.’ Anhte hpe Yehowa gaw kaja htum  prat lu shangun mayu ai hpe kam mai ai. (Hebre 12:5-11 hpe hti u.) Karai Kasang gaw anhte hpe atsawm chye ai majaw, shi a sharin shaga ai lam gaw htap htuk nna, anhte ra nga ai lam hte tup hkrak re. Ndai sumhpa hta, sharin shaga ai hte seng ai lam mali hpe hkaja lu na re: (1) Tinang hkum tinang sharin shaga ai lam, (2) ma ni hpe kanu kawa ni jaw ging ai sharin shaga ai lam, (3) nawku hpung kaw nna lu la ai sharin shaga ai lam hte (4) sharin shaga ai kaw nna lu la ai hkra machyi ai lam hta na grau sawng ai lam.

3. Ma langai tinang hkum tinang sharin shaga ai lam hta gara hku rawt jat lu na kun? Ga shadawn tsun dan rit.

³ Anhte hta tinang hkum tinang sharin shaga ai lam nga yang, anhte a arawn alai hte myit mang ai lam hpe hkang lu na re. Anhte gaw tinang hkum tinang sharin shaga lu ai atsam hte n shangai wa tim, anhte dai hpe shalat la mai ai. Ga shadawn, ma langai gaw lagaw leng jawn sharin la ai shaloi, kanu kawa ni gaw lagaw leng hpe jum ya na re. Raitim, aten loi na wa yang, ma gaw lagaw leng gara hku jawn na hpe loi li chye wa ai shaloi, kanu kawa ni gaw lagaw leng hpe jum ya dat, tat ya dat galaw nna jawn shangun na re. Ma gaw lagaw leng atsawm chye jawn wa sai hpe kanu kawa ni chye ai shaloi, shi hkrai jawn na matu ahkang jaw na re. Dai hte maren, kanu kawa ni gaw, shanhte a ma ni hpe “Madu a sharin achyin ai hte daru shadum ai lam” hku nna, myit galu let shaman ya yang, ma ni hpe tinang hkum tinang sharin shaga ai lam hte nyan hpaji jat wa hkra karum ya nga ai re.​—⁠Ehpesu 6:4.

4, 5. (a) Tinang hkum tinang sharin shaga ai lam gaw hpa majaw “gawng shing-yan ningnan” a ahkyak ai lam re ai kun? (b) Anhte mara galaw hkrup yang pyi, hpa majaw myit n daw ging ai kun?

⁴ Asak kaba ai shaloi she, Yehowa a lam chye wa ai ni mung dai hte maren sha re. Shanhte hta tinang hkum tinang sharin shaga ai lam nga ai raitim, kung hpan ai Hkristan n byin shi ai. Raitim, shanhte gaw “gawng shing-yan ningnan” hpe hpun nna, Hkristu hte bung hkra shakut yang, grau nna kung hpan wa na re. (Ehpesu 4:23, 24) Tinang hkum tinang sharin shaga ai lam gaw, “tara n hkungga ai myit hte mungkan ga hpe marin marit ai lam koi kau nhtawm, ndai prat e si si re ai hte dinghpring nna tara hkungga ai lam hkan nang lu hkra” anhte hpe karum ya lu ai.​—⁠Titu 2:12.

⁵ Raitim, anhte yawng gaw yubak masha ni re. (Hpaji 7:20) Rai yang, anhte mara galaw hkrup ai shaloi, tinang hkum tinang sharin shaga ai lam n nga mat sai lachyum kun? Dai hku n re. Ga Shagawp 24:16 hta ndai hku tsun da ai: “Ding hpring ai wa gaw sanit lang kataw ti mung, bai rawt lu na ra ai.” “Bai rawt lu na” matu anhte hpe hpa gaw karum ya na kun? Anhte a n-gun atsam hte n re ai sha, Karai Kasang a chyoi pra ai wenyi hte mai byin ai. (Hpilipi 4:13 hpe hti u.) Tinang hkum tinang sharin shaga ai lam gaw, wenyi asi langai re ai tinang myit hpe hkang lu ai atsam ningja hte bung ai.

6. Karai a Mungga hpe gara hku grau kaja hkra hkaja lu na kun? (Ndai sumhpa shawng na sumla hpe yu u.)

⁶ Akyu hpyi ai, Chyum Laika hkaja ai, myit sawn sumru ai lam gaw, tinang hkum tinang sharin shaga ai lam rawt jat wa hkra karum ya lu ai. Raitim, Chyum Laika hkaja na matu yak ai (sh) n kam hkaja ai nga yang gaw gara hku kun? Myit hkum daw u. Nang ahkang jaw na nga yang, Yehowa gaw shi a Mungga hpe “myit marin” wa hkra, nang hpe karum ya na re. (1 Petru 2:2, 3) Tinang hkum tinang sharin shaga na matu, Yehowa hpe hpyi shawn yang, Chyum Laika hkaja na aten san san nga wa na re. Minit loi mi daram hte nnan hpang hkaja mai ai. Angwi ngwi hte, hkaja ai lam grau loi wa nna, grau pyaw wa na re. Yehowa a myit mang ai lam ni hpe sumru na matu aten jaw ai hpe nang ra sharawng wa na re.​—⁠1 Timohti 4:15.

7. Yehowa a magam hta anhte yaw shada da ai bandung du na matu tinang hkum tinang sharin shaga ai gaw gara hku karum ya ai kun?

 ⁷ Tinang hkum tinang sharin shaga ai lam gaw, Yehowa a magam hta anhte a bandung du na matu karum ya ai. Ga shadawn, myit rawt ai lam yawm mat wa ai ngu hkamsha ai kawa langai gaw, aten galu ningshawng byin na matu bandung jahkrat wa ai. Tinang hkum tinang sharin shaga ai lam gaw, shi hpe gara hku karum ya wa ai kun? Anhte a magazine ni hta lawm ai ningshawng ni a lam hti nna, akyu hpyi wa ai. Dai hku galaw ai gaw, shi hte Yehowa a lapran hku hkau lam ngang kang shangun ai. Galaw lu ai aten ni hta, aten kadun ningshawng galaw hpang ai. Gara lam a majaw mung, shi n jahkring kau ai. Shi a bandung hpe matut nna myit maju jung wa ai. Dai majaw, hpang jahtum hta, aten galu ningshawng byin wa ai.

8-10. Yehowa hpe ma ni nawku na matu bau maka ya ai lam hta, kanu kawa ni hpe hpa gaw karum ya na kun? Ga shadawn jaw u. 

⁸ Yehowa gaw shi a “sharin achyin ai hte daru shadum ai lam hta” ma ni hpe bau maka na matu kanu kawa ni hpe lit jaw da ai. (Ehpesu 6:4) Dai ni na aten hta, dai hku galaw na matu n loi ai. (2 Timohti 3:1-5) Ma ni gaw jaw ai shut ai hpe chye nna n shangai wa ai. Shanhte a myit nsam mung shaman shakyang n hkrum shi ai. Dai majaw, shanhte hpe  sharin shaga ra ai. (Roma 2:14, 15) “Sharin shaga” ngu ai a madung Greek ga si gaw, “ma ni rawt jat ai lam” (sh) lit la chye ai masha kaba byin na matu, ma hpe bau maka ai lachyum re nga nna Chyum Hpaji du langai sang lang da ai.

⁹ Kanu kawa ni gaw ma ni hpe tsawra myit hte sharin shaga yang, ma ni mung shim lum ai ngu hkamsha lu na re. Wanglu wanglang galaw lu ai ahkang gaw shadawn sharam sha nga nna, galaw ai lam shagu gaw shi akyu hte shi nga ai hpe sharin la ra na re. Dai majaw, Hkristan kanu kawa ni gaw, ma ni hpe bau maka ai shaloi, Yehowa a nyan hpaji hpe shamyet shanat na matu grai ahkyak ai. Tinang a htung hking, asak hkrung nga ai ban prat hku hkan nna, ma ni hpe sharin shaga ai ladat mung n bung chye ai hpe myit dum ra ai. Raitim, Karai Kasang a ga madat ai kanu kawa ni gaw, shanhte a mahkrum madup ni (sh) masha a ningmu hku galaw ai lam n nga ai.

¹⁰ Noa a kasi ningli kaw nna anhte sharin la mai ai. Sanghpaw li shachyaw na matu Yehowa tsun ai shaloi, dai hpe gara hku galaw na matu Noa n chye wa ai. Yehowa a ntsa shamyet shanat nna, Yehowa tsun ai hte maren, “lam shagu shi galaw” wa ai. (Ningpawt 6:22) Akyu gaw hpa rai na kun? Sanghpaw li gaw, Noa hte shi dinghku a asak hpe hkye la lu wa ai. Noa gaw awng dang ai kanu kawa mung re. Hpa majaw kun? Karai Kasang a nyan hpaji hta shamyet shanat ai majaw re. Noa gaw shi a ma ni hpe atsawm sharin ya wa nna, shanhte a matu kasi kaja madun wa ai. Hka sha-u garai n ing shi ai dai n hkru ai aten hta, dai hku galaw na matu gaw n loi ai.​—⁠Ningpawt 6:5.

11. Ma ni hpe shaman shakyang na matu kanu kawa ni hpa majaw grai shakut ra ai kun?

¹¹ Nang gaw kanu kawa rai yang, Yehowa galaw shangun ai “lam shagu” hpe gara hku galaw lu na kun? Yehowa a ga madat u. Na a ma ni hpe bau maka ai hta shi a karum shingtau lam hpe hkap la u. Shi a Mungga hte uhpung a hpaji jaw ga ni hpe akyu jashawn u. Nang dai hku galaw wa ai majaw, ma ni gaw nang hpe chyeju dum nga na re. Hpunau langai ndai hku tsun ai: “Nye kanu kawa ni ngai hpe bau maka wa ai lam a majaw, shanhte hpe ngai grai chyeju dum ai. Nye salum de du hkra kaja htum sharin ya ai.” Yehowa hte ni htep hkra karum ya wa ai gaw, shi a kanu kawa ni re ngu shi tsun ai. Kanu kawa ni gaw ma ni hpe dang lu ai daram kaja htum sharin shaga tim pyi, ma ni gaw Yehowa hpe kau da hkrup chye ai. Raitim, kaja htum shakut ai kanu kawa ni gaw, kaja ai myit nsam lu la nna, lani mi hta shanhte a kasha ni Yehowa hpang bai kayin wa na hpe myit mada mai ai.

12, 13. (a) Shapraw da hkrum ai kasha ni nga yang, Karai Kasang hpe madat mara ai lam kanu kawa ni gara hku madun na kun? (b) Yehowa hpe kanu kawa ni madat mara ai majaw, dinghku langai gara hku akyu lu wa ai kun?

¹² Madat mara lam madun ai hta, kanu kawa nkau mi a matu yak chye ai lam langai gaw, shanhte a ma ni shapraw kau hkrum ai aten hta re. Shapraw kau hkrum ai majaw, nta kaw nna pru mat ai kasha nga ai nauna langai ndai hku yin la ai: “Gara hku galaw yang nye kasha hte kanawn mazum mai ai ahkang lu na lam, uhpung shapraw ai laili laika ni hta ngai hkan tam ai.” Raitim, shi a madu wa gaw, kasha hte seng nna shanhte hta lit n nga sai lam hte Yehowa hpe sadi dung ra ai lam shi hpe tsawra myit hte karum ya wa ai.

¹³ Aten loi na ai hpang, kasha gaw nawku hpung de bai shang lu wa ai. Kanu ndai hku tsun ai: “Ya gaw, shi ngai hpe shani shagu ngu na daram phone shaga ai, laika sa ai. An gaw, Karai Kasang hpe madat mara ai lam shi chye ai majaw, an hpe shi grai hkungga ai. Anhte hta grai kaja ai hku hkau lam nga sai.” Nang hta shapraw da hkrum ai kasha ni nga yang, “na a myit masin mahkra hte Yehowa hpe kam hpa” lu na kun? “Na a chye chyang ai nyan hta” n shamyet ai lam Yehowa hpe madun na kun? (Ga Shagawp 3:5, 6) Yehowa a tara gaw, shi kade daram hpaji rawng ai lam hte anhte hpe kade daram tsawra ai lam madun ai hpe  myit dum u. Na a ma ni hte hpawn, shinggyim masha yawng a matu Yesu hpe jaw wa ai lam galoi mung hkum malap. Karai Kasang gaw, yawng mayawng hpe htani htana asak lu shangun mayu ai. (2 Petru 3:9 hpe hti u.) Dai majaw, kanu kawa ni e, Yehowa a tara hte lam matsun gaw teng man nna, dai hpe madat mara ai majaw hkra machyi tim pyi, matut nna dai hpe kamhpa nga u. Karai Kasang a tara hpe madat mara nna, dai hpe hkan sa u. 

14. “Myit su ai kunhting wa” hku nna jaw ai Yehowa a lam matsun kaw nna anhte gara hku akyu lu mai na kun?

¹⁴ Hkristan nawku hpung hpe lanu lahku na, makawp maga na, sharin achyin ya na nga nna Yehowa ga sadi jaw da ai. Lam amyu myu hku nna shi galaw nga ai. Ga shadawn, nawku hpung hpe lanu lahku na matu Yesu hpe san tawn da nna, anhte matut nna sadi dung lu hkra, wenyi nshat madi shadaw ya na matu, Yesu gaw “myit su ai kunhting wa” hpe lit ap da ai. (Luka 12:42) Dai “kunhting wa” gaw, manu dan ai lam matsun hte sharin shaga ai lam anhte hpe jaw ai. Anhte na la ai mungga langai (sh) anhte a magazine na sumhpa langai gaw, anhte a myit mang ai lam hte galaw ai lam hpe galai shai na matu karum ya wa ai aten hpe nang myit dum na re. Dai zawn galai shai ai lam ni galaw ai majaw, nang ngwi pyaw lu wa ai. Hpa majaw nga yang, nang hpe sharin shaga na matu, Yehowa hpe ahkang jaw ai majaw re.​—⁠Ga Shagawp 2:1-5.

15, 16. (a) Myitsu salang ni kaw nna anhte gara hku akyu lu mai na kun? (b) Myitsu salang ni gaw shanhte a magam hpe angwi apyaw hte gun hpai lu hkra anhte gara hku karum lu ai kun?

¹⁵ Hkristan nawku hpung a matu Yesu Hkristu gaw, myitsu salang ni hpe jaw da ai. Dai myitsu salang ni hpe Chyum Laika hta “kumhpa hku nna jaw da ai masha ni” ngu tsun da ai. (Ehpesu 4:8, 11-13, NW) Myitsu salang ni kaw nna anhte hpa akyu lu mai na kun? Shanhte a makam masham hte kaja ai kasi ningli hpe anhte kasi la mai ai, Chyum Laika hku nna shanhte sharin shaga ai hpe anhte hkan sa mai ai. (Hebre 13:7, 17 hpe hti u.) Myitsu salang ni gaw, anhte hpe tsawra nna, Karai Kasang hte ni htep shangun mayu ai. Anhte zuphpawng n sa ai (sh) myit rawt ai lam yawm nga ai hpe shanhte sadi hkrup yang, anhte hpe alawan karum ya na matu shakut ai. Anhte tsun ai hpe madat ya nna, Chyum Laika hpe lakap nna nyan hpaji hte tsawra myit lawm ai n-gun jaw ga ni tsun ai. Shanhte karum shingtau ya ai lam hpe, Yehowa madun ai tsawra myit hku nna nang mu ai kun?

¹⁶ Anhte hpe sharin shaga ra ai shaloi, myitsu salang ni a matu n loi ai hpe myit dum u. Hkawhkam Dawi mara kaba galaw nna ip da ai majaw, dai hpe sharin shaga ra ai shaloi, myihtoi Nahtan gara hku hkamsha wa na hpe nang chye ai kun? (2 Samuela 12:1-14) Kasa 12 kaw nna Petru gaw, Yuda Hkristan ni hte Yuda masha n re ai ni hpe myi man lata nna kanawn mazum wa ai majaw, sharin shaga ra ai shaloi, Pawlu gara hku hkamsha wa na kun? Dai hku galaw na matu, Pawlu hta nden marai nga ra ai. (Galati 2:11-14) Dai majaw, myitsu salang ni nang hpe sharin shaga ai shaloi, shanhte a matu grau loi hkra nang gara hku galaw mai ai kun? Shagrit shanem nna chyeju dum u. Ga shaga loi ai wa byin na matu shakut u. Shanhte karum ya ai hpe Karai Kasang a tsawra myit madun ai lam hku nna mu mada u. Nang akyu lu la nna, myitsu salang ni mung, shanhte a magam hpe angwi apyaw hte gun hpai lu na re.

17. Nauna langai hpe myitsu salang ni gara hku karum ya wa ai kun?

¹⁷ Nauna langai gaw, lai wa sai aten hta byin wa ai lam a majaw, Yehowa hpe tsawra na matu yak wa nna, shi grai myitru wa ai. Shi ndai hku tsun ai: “Myitsu salang ni hte ga shaga ra na hpe ngai chye wa ai. Shanhte gaw, ngai hpe mara n tam ai, laja lana sharin shaga ai baw n galaw ai sha, n-gun jaw ai. Makam masham ngang kang hkra karum ya ai.  Shanhte kade daram amu kyin tim, zuphpawng ngut shagu, myitsu salang langai ngai gaw ngai hte shaga na matu shakut ai. Ngai galaw wa ai lam a majaw, Karai Kasang a tsawra myit hte n ging dan ai ngu hkamsha wa ai. Raitim, aten ni na wa ai hte maren, Yehowa gaw, shi ngai hpe tsawra ai lam ngai chye na wa hkra, nawku hpung hte myitsu salang ni hpe akyu jashawn wa ai. Yehowa hpe galoi mung n kau da sana lam ngai akyu hpyi ai.”

18, 19. Sharin shaga ai lam kaw nna lu la ai hkra machyi lam hta grau sawng ai lam gaw hpa rai kun? Ga shadawn jaw u. 

¹⁸ Sharin shaga ai lam a majaw, hkra machyi ai ngu hkamsha chye ai. Raitim, Karai Kasang a sharin shaga ai lam hpe ninghkap yang, lu la na lam gaw grau hkra machyi shangun ai. (Hebre 12:11) Ka-in hte Hkawhkam Zedekia a n kaja ai kasi ningli kaw nna, anhte sharin la mai ai. Ka-in gaw shi a kanau hpe n ju n dawng nna sat mayu ai hpe, Karai Kasang mu ai shaloi, Ka-in hpe shi ndai hku sadi jaw wa ai: “Nang hpa rai pawt nga n ta? Hpa rai myi man sum nga lit ta? Nang kaja ai galaw yang gaw, myi man hpaw lu na n rai ni? N kaja ai nang galaw yang chyawm gaw, yubak gaw chyinghka makau e makun hpum nga ai: dai gaw nang kaw kanan mayu nga ai; rai ti mung, dai hpe nang up lu na rai ndai.” (Ningpawt 4:6, 7) Ka-in gaw, Yehowa a sharin shaga ai lam hpe nyet kau nna, shi a kanau hpe sat kau ai. Dai majaw, shi a prat ting hta hkrit tsang hpa akyu ni lu wa ai. (Ningpawt 4:11, 12) Ka-in gaw, Karai Kasang hpe madat mara yang, dai daram sawng ai lam ni hkrum na n re.

¹⁹ Zedekia gaw gawng kya nna nhkru ai hkawhkam re. Shi uphkang ai shaloi, Yerusalem na masha ni gaw n kaja ai masa hte hkrum nga ai. Myihtoi Yeremia gaw, galai shai na matu Zedekia hpe chyahkring hkring sadi jaw wa ai. Raitim, hkawhkam wa gaw Yehowa a sharin shaga ai lam hpe nyet kau wa ai majaw, n kaja ai akyu ni lu wa ai. (Yeremia 52:8-11) Yehowa gaw anhte hpe dai zawn hkra machyi ai lam n byin shangun mayu ai.​—⁠Esaia 48:17, 18 hpe hti u. 

20. Karai Kasang a sharin shaga ai lam hpe hkap la ai ni hte n hkap la ai ni gaw hpa akyu lu na kun?

²⁰ Dai ni na aten hta, masha law law gaw Karai Kasang a sharin shaga ai lam hpe, jahpoi asawng nna nyet kau ma ai. Raitim, kade n na yang, Karai Kasang a sharin shaga ai lam hpe nyet kau ai ni gaw, hkra machyi na re. (Ga Shagawp 1:24-31) Dai majaw, “sharin shaga ai ga madat u, hpaji rawng u” ngu nna tsun ai ga hpe hkan sa ga. Ga Shagawp 4:13 hta ndai hku tsun da ai: “Sharin achyin ai lam hpe manat nga u; dai hpe hkum dat dat u; Dai gaw na a asak rai nga ai majaw, sin da u.”