1. Karai mungga a atsam hpe nang gara hku kam ai kun? (Ndai sumhpa shawng na sumla hpe yu u.)

SHINGGYIM masha ni hpe jaw ai Yehowa a mungga hte shiga gaw, “a hkrung nga ai hte atsam nga” ai hpe shi a amyu masha ni kam ai. (Hebre 4:12, NW) Tinang a prat hte kaga ni a prat hta Chyum Laika a atsam hpe anhte mu lu ai. Sakse Hkam garai nbyin shi ai aten hta, masha nkau mi gaw lagut ni, kani ya ni, hpye ai amu galaw ai ni byin ga ai. Kaga ni gaw amying gumhkawng ai ni, lu su ai ni raitim, shanhte a prat hta lama ma ra nga ai ngu hkam sha nga dingyang re. (Hpaji 2:3-11) Myit mada lam mat taw nga ai ni gaw, Chyum Laika hku nna myit mada lam bai lu wa ai gaw, kabu hpa re. Sin Langchyi hta, “Chyum Laika Gaw Prat Hpe Galai Shai Ya” ngu ai sumhpa ni kaw nna mahkrum madup ni hpe anhte lu hti nna, n-gun lu wa ai. Hkristan byin ngut ai hpang pyi, Yehowa hte hku hkau lam matut ngang kang na matu Chyum Laika gaw karum ya ai.

2. Karai Mungga a atsam gaw tsa ban langai na masha ni a ntsa gara hku akyu byin wa ai kun?

² Masha law law gaw teng man ai tara hpe chye wa ai majaw,  grai galai shai wa ai hpe n mau ra ai. Tsa ban langai na sumsing lamu myit mada lam nga ai hpunau nauna ni mung, dai zawn galai shai ai lam ni galaw wa ai. (1 Korinhtu 6:9-11 hpe hti u.) Karai a Mungdan hpe sali wunli n lu ai ni a lam Pawlu tsun ngut ai hpang, ndai hku bai tsun ai: “Nanhte nkau mi gaw shingrai chyalu ni rai nga myit dai.” Karai a Mungga hte chyoi pra ai wenyi gaw galai shai na matu dai zawn masha ni hpe karum ya ai. Hkristan byin ngut ai hpang pyi, dai hku galaw wa ai ni kaw nna nkau mi gaw Karai Kasang hte hku hkau lam hten za shangun ai mara kaba ni bai galaw ma ai. Ga shadawn, namman chya hkrum ai hpunau langai mung hpung kaw nna shapraw hkrum ai lam Chyum Laika hta tsun da ai. Hpang e shi gaw galai shai wa ai majaw, Hkristan hpung masha bai byin wa ai. (1 Korinhtu 5:1-5; 2 Korinhtu 2:5-8) Anhte a hpunau nauna ni gaw Karai Mungga atsam a majaw, galai shai ai lam law law hpe lu galaw ai gaw shakawn hpa re.

3. Ndai sumhpa hta gara lam ni hpe hkaja lu na kun?

³ Karai a Mungga gaw grai atsam kaba ai. Yehowa anhte hpe jaw ai aten kaw nna anhte dai hpe atsawm akyu jashawn mayu ai. (2 Timohti 2: 15) Ndai sumhpa hta Chyum Laika a atsam hpe (1) anhte aprat hta, (2) anhte a hkaw tsun magam hta, (3) pinra kaw nna sharin achyin ya ai hta gara hku akyu jashawn mai na lam hpe bawng ban mat na re. Anhte akyu lu na matu sharin ya ai sumsing Kawa hpe anhte chyeju dum na matu hte tsawra myit madun na matu, ya hkaja ai lam ni gaw karum ya na re.​—⁠Esaia 48:17.

4. (a) Karai a Mungga kaw nna akyu lu la na matu anhte hpa galaw ra ai kun? (b) Chyum Laika hti na aten hpe gara hku lata na kun?

⁴ Karai a Mungga kaw nna anhte akyu lu na matu, Chyum Laika hpe ayan hti ra ai. Anhte dai hpe shani shagu shakut nna hti ging ai. (Yawshu 1:8) Anhte law malawng gaw grai amu kyin ma ai. Galaw ra ai lit ni grai law ai majaw, Chyum Laika n hti ai baw n mai byin ai. (Ehpesu 5:15, 16 hpe hti u.) Jahpawt jau jau hti mai ai. Kalang lang gaw shani kaang (sh) shana maga hti mai ai. “Na a tara hpe ngai gade wa tsaw nga n hka! Ngai shani tup dai hpe myit aru nga nngai” nga nna tsun ai shakawn kungdawn sara zawn anhte mung hkam sha ga ai.​—⁠Shakawn 119:97.

5, 6. (a) Anhte hpa majaw sawn sumru ra ai kun? (b) Sawn sumru ai lam hta akyu nga na matu gara hku galaw lu ai kun? (c) Chyum Laika hti ai hte sawn sumru ai lam gaw nang hpe gara hku karum ya wa sai kun?

⁵ Raitim, Chyum Laika hpe hti ai hte sha gaw n mai ai. Hti ai lam hpe atsawm myit sawn sumru nna dinglik ra ai. (Shakawn 1:1-3) Anhte a prat hta dai hku galaw yang, Chyum Laika lam matsun hte maren hkan sa lu na. Chyum Laika hpe laika buk kaw nna hti ai raitim, electronic hku hti ai raitim anhte a bandung gaw hti ai lam ni hpe salum de du na matu re.

⁶ Sawn sumru ai lam hta akyu nga na matu gara hku galaw lu ai kun? Anhte Chyum Laika hti ai shaloi, chyahkring hkring nna, tinang hkum tinang ndai hku san ra ai: ‘Ndai  gaw Yehowa a lam ngai hpe hpa tsun dan ai kun? Ngai hti ai lam hpe nye a prat hta gara hku hkan sa nga ai kun? Galai shai na matu hpa naw ra nga ai kun?’ Karai a Mungga hpe myit sawn sumru nna, anhte hti ai lam ni a matu akyu hpyi na nga yang, dai hpe tatut hkan sa mayu wa na re. Dai hku galaw yang, Chyum Laika a atsam hpe anhte a prat hta tatut hkam la lu na re.​—⁠2 Korinhtu 10:4, 5.

7. Karai a Mungga hpe hkaw tsun magam hta atsawm gara hku akyu jashawn na kun?

⁷ Hkaw tsun magam hte sharin achyin ya ai hta Karai a Mungga hpe chyahkring hkring lang na matu ahkyak ai. Hpunau langai ndai hku tsun ai: “Yehowa hte hkaw tsun bungli rau sa yang nang hkrai hkaw tsun na kun? (sh) Shi hpe mung ahkang jaw na kun?” Marai langai hpe nang Chyum Laika hti dan yang, Yehowa hpe ga shaga na matu ahkang jaw ai re. Atsawm lata da ai Chyum daw gaw anhte tsun shaga ai ga yawng hta grau nna atsam kaba ai. (1 Htesaloni 2:13) Hkaw tsun magam hta Chyum Laika hpe dang lu ai daram shakut nna hti nga ai kun?

8. Hkaw tsun ai aten hta Chyum daw hpe hti dan ai sha n-ga hpa naw galaw ra ai kun?

⁸ Raitim, hkaw tsun magam hta masha ni hpe Chyum daw hti dan ai hte sha n ngut ai. Masha law malawng gaw Chyum Laika a lachyum hpe n chye na ma ai. Tsa ban langai hta mung, ya aten hta mung maren sha re. (Roma 10:2) Anhte hti dan ai hpe nta madu ni chye na na ngu n mai sawn la ai. Dai majaw, madung ga si hpe kahtap hti dan nna, hpa hpe tsun mayu ai lam, atsawm tsun dan ai hku nna shanhte hpe karum ya mai ai. Dai gaw, masha ni a myit masin de Karai a Mungga du lu ai ladat re.​—⁠Luke 24:32 hpe hti u.

9. Chyum daw hpe n hti dan shi yang, Chyum Laika hpe hkungga wa hkra anhte gara hku galaw lu na kun? Ga shadawn jaw u.

⁹ Anhte Chyum Laika hpe n hti dan shi yang, nta madu ni Chyum Laika hpe hkungga wa hkra anhte a tsun shaga ai lam mung karum ya lu ai. Ga shadawn, anhte ndai hku mai tsun ai, “Ndai hte seng nna Hpan Madu gara hku tsun ai hpe yu yu ga.” (Sh) Hkristan n rai yang gaw, “Chyoi Pra ai Laika hta gara hku tsun da ai hpe yu yu ga.” Nawku htung hpe n ra ai masha rai yang, ndai hku san mai ai, “Moi na ga ni hpe na yu ga ai i?” Masha shagu hta tinang a shingdu labau hte makam masham nga ai hpe anhte dum yang, shanhte hte atsawm shachyen shaga lu na re.​—⁠1 Korinhtu 9:22, 23.

10. (a) Hpunau langai hpa byin wa ai kun? (b) Karai Mungga a atsam hpe na a hkaw tsun magam hta gara hku mu lu ai kun?

¹⁰ Hkaw tsun magam hta Karai a Mungga hpe jailang yang, akyu nga ai hpe masha law law mu wa ai. Ga shadawn, hpunau langai gaw anhte a magazine hti ai shaning hku na sai, Wa la langai hpang sa chyai ai. Lani mi hta, hpang jahtum pru ai Sin Langchyi hpe dai hku sha jaw dat na malai, hpunau gaw Chyum daw langai hti dan na ngu dawdan ai. Shi gaw, 2 Korinhtu 1: 3, 4 hpe hti dan ai: “Matsan dum chye ai Kawa hte, shangwi shapyaw na lam amyu myu a Karai Kasang,  . . . anhte a tsin-yam tsindam amyu myu hta shi anhte hpe shangwi shapyaw mi ai.” Dai ga gaw, shi a myit hpe hkra ai majaw, hpunau wa hpe bai kahtap hti ya na matu tsun ai. Shi hte shi madu jan gaw, teng sha shalan shabran ai lam ra nga ai ngu tsun ai. Dai Chyum daw a majaw, Chyum Laika a lam grau chye mayu wa ai. Karai a Mungga hpe anhte a hkaw tsun magam hta akyu jashawn ai gaw grai akyu nga ai.​—⁠Kasa 19:20.

11. Pinra kaw nna sharin achyin ya ai hpunau ni hta hpa lit ni nga ai kun?

¹¹ Zuphpawng ni, ninghtawn zuphpawng ni hte ginwang zuphpawng ni lung ai hpe anhte ra sharawng ga ai. Yehowa hpe nawku daw jau mayu ai majaw re. Anhte sharin la ai lam kaw nna mung akyu lu ga ai. Dai majaw, pinra kaw nna sharin achyin ya ai hpunau ni gaw, laksan ahkaw ahkang hte grai ahkyak ai lit lu da ai. (Yaku 3:1) Shanhte sharin achyin ya ai lam ni gaw, Karai a Mungga kaw sha madung da ging ai. Dai ahkaw ahkang hpe nang lu yang, shawa masha ni Chyum Laika a atsam lu la hkra nang gara hku akyu jashawn na kun?

12. Mungga htawn ai wa gaw Chyum daw ni hpe madung tawn nna gara hku htawn mai ai kun?

¹² Mungga htawn ai shaloi, Chyum daw ni gaw ahkyak ai daw re. (Yawhan 7:16) Dai majaw, nang mungga htawn ai aten hta, mahkrum madup ni, ga shadawn ni hpe Chyum Laika hta grau nna n dan dawng mat  hkra sadi ra ai. Chyum Laika kaw na hti dan ai hte Chyum Laika kaw na sharin ya ai gaw n bung ai lam hpe mung dum ra ai. Chyum daw law law hpe hti dan yang mung, masha law malawng gaw n lu matsing ai. Dai majaw, Chyum daw ni hpe atsawm lata ra ai. Bai nna, shanhte atsawm hkan sa lu na matu aten la nna hti na, tsun shaleng dan na, ga shadawn ni hte tsun dan ra na re. (Nehemia 8:8) Outline hpe madung tawn nna mungga htawn yang, outline hta lawm ai Chyum daw ni hte outline hpe atsawm hkaja da ra ai. Outline hte Chyum daw ni gara hku matut mahkai ai hpe chye na hkra hkaja da ra ai. Outline hta lawm ai madung lam ni hpe sharin ya na matu, dai Chyum daw ni kaw nna nkau mi hpe akyu jashawn ra ai. (De a matu kaja ai lam matsun ni hpe Theocratic Jawng Hpaji Kaw Nna Akyu Lu La U-BU laika buk a daw 21 kaw nna 23 hta mu lu ai.) Chyum Laika kaw nna manu dan ai lam ni hpe atsawm tsun dan lu hkra Yehowa hpang akyu hpyi na matu ahkyak ai.​—⁠Ezra 7:10 hte Ga Shagawp 3:13, 14 hpe hti u.

13. (a) Zuphpawng hta na dat ai Chyum daw a majaw nauna langai gara hku akyu lu wa ai kun? (b) Zuphpawng hta Chyum Laika sharin ya ai lam gaw nang hpe gara hku akyu jaw wa sai kun?

¹³ Australia mungdan kaw nna nauna langai gaw, kaji ai aten hta yawn hkyen ai lam law law hkrum wa ai. Dai majaw, Yehowa hpe chye wa ai hpang pyi, shi hpe Yehowa tsawra ai ngu tsep kawp n lu kam ai. Zuphpawng hta na dat ai Chyum daw langai gaw nauna a myit masin hpe hkra ya ai. Shi dai  Chyum daw hpe atsawm sumru nna, sawk sagawn ai lam ni galaw wa ai. Dai hku galaw ai majaw, kaga Chyum daw ni hpe mung hti mayu wa ai. Shi hpe Yehowa tsawra ai ngu kamsham wa ai. * Zuphpawng ni, ninghtawn zuphpawng ni hte ginwang zuphpawng ni hta dai nauna zawn nang hkrum ga ai kun?​—⁠Nehemia 8:12.

14. Yehowa a Mungga hpe tsawra nna manu shadan ai lam gara hku madun mai na kun?

¹⁴ Yehowa ka da ya ai Chyum Laika hpe lu da ai majaw, anhte chyeju dum ga ai. Shi a Mungga gaw agrin nga na ngu shi ga sadi jaw wa ai hte maren grin hkra galaw wa ai. (1 Petru 1:24, 25) Dai majaw, anhte gaw Chyum Laika ayan hti nna tinang a prat hta hkan sa na hte kaga ni hpe karum ya na matu, Chyum Laika hpe akyu jashawn mayu ga ai. Anhte dai hku galaw yang, Chyum Laika a Madu Yehowa Karai Kasang gaw ahkyak htum re ai lam, Chyum Laika hpe manu shadan ai lam hte teng sha tsawra ai lam anhte madun ai re.