AHKYING kade rai sai hpe chye mayu yang, nang hpa galaw ai kun? Nayi hpe nang yu na re. Shani 1:30 rai sai hpe nang mu ai. Manang langai gaw, “ahkying kade rai sai kun?” ngu nna san yang, nang gara hku htai na?

Buga ginra hku hkan nna aten hpe tsun ai lam n bung na re. Ga shadawn, nang ndai hku tsun na re. “1:30 rai sai.” (sh) “13:30 rai sai.” Shara nkau hta nga yang, “hkying lahkawng a chyen mi” ngu tsun na re. Tsun mayu ai gaw, hkying lahkawng htu na matu, manit 30 ra ai hpe tsun ai re.

Chyum Laika prat hta, ahkying hte seng nna masha ni gara hku lang ai kun? Shanhte hta mung ahkying ladaw hpe garan ginhka lu ai lam ni nga ai. Ga Shaka Dingsa hta, “manap jau jau,” “shani,” “shani chyingtung,” hte “shana” ngu nna lang da ai. (Ningpawt 8:11; 19:27; 43:16; Tara Jahprang 28:29; 1 Hkawhkam 18:26) Raitim, kalang lang rai yang, Chyum Laika hta ahkying ladaw hte seng nna tup hkrak lang da ai.

Moi Israela prat hta, shana na ahkying ladaw hta, sin langa ni nga ai. Israela ni gaw, shana aten hpe ladaw masum garan da nna, “shana na ladaw” ngu shaga ai. (Shakawn 63:5) Tara Agyi 7:19 hta, “yup dung hpawa” ngu nna hti lu ai. Yesu a aten hta, Yuda masha ni gaw, Greek hte Roma ni zawn, shana aten hpe ladaw mali garan da ai.

Kabu Gara Shiga Chyum Laika mali hta, shana na ladaw hte seng nna law law lang tsun da ai. Ga shadawn, “shana na ahkying ladaw mali” hta, Yesu gaw sape ni nga ai hkali de hka ntsa hku nna lam hkawm sa wa ai. (Mahte 14:25) Yesu tsun ai ga shadawn hta: “Nta madu gaw, lagut sa na ahkying ladaw hpe chye lu taw gaw, shi a nta hpe n tawk waw u ga, shi a maja nga na ra ai nanhte dum mu” ngu nna tsun da ai.​—⁠Mahte 24:43.

Maja nga na matu, sape ni hpe Yesu tsun ai shaloi, ahkying ladaw mali hpe tsun wa ai. Yesu ndai hku tsun ai: “Dai nta madu gaw, nrim e, yup tung e, u-goi hpawa e, jahpawt manap e, bai du wa na ra ai hpe nanhte n chye da mu ai majaw, a maja nga mu.” (Marku 13:35) “Nrim” ngu ai ahkying ladaw gaw, jan shang ai aten kaw nna hkying 9 daram du hkra re. “Yup tung” ngu ai ahkying ladaw gaw, hkying 9 daram kaw nna, yup tung du hkra re. “U-goi hpawa” ngu ai ahkying ladaw gaw, yup tung kaw nna jahpawt hkying 3 daram du hkra re. U-goi hpawa aten hta Yesu rim hkrum ai rai na re. (Marku 14:72) “Jahpawt manap” ngu ai ahkying ladaw gaw, jahpawt hkying 3 daram kaw nna jan pru wa ai aten du hkra re.

Chyum Laika prat na masha ni hta, dai ni aten na masha ni zawn nayi n nga tim, ahkying ladaw hpe ginhka lu ma ai.