Yesu gaw Yerusalem hta nga nga ai aten hta, Wa Yehowa a lam tsun dan let dai aten na nawku htung ningbaw ni a shut shai ai lam ni hpe tsun dan wa ai. (Yawhan 8:12-30) Karai Kasang hte seng ai dai ni aten na sharin achyin ai lam ni gaw, jaw, n jaw hpe dai aten na Yesu tsun wa ai ga ni hte san jep mai ai. Yesu ndai hku tsun wa ai: “Nanhte nye a ga hta agrin nga myit yang gaw, nye a sape teng teng nanhte rai nga myit dai: teng man ai lam mung nanhte chye lu na ma rin dai rai nna, dai teng man ai gaw, nanhte hpe shalawt dat na ra ai.”—Yawhan 8:31, 32.

‘Nye a ga hta agrin nga u’ ngu ai Yesu a ga gaw, nawku htung sharin achyin ya ai lam ni gaw “teng man ai lam” re ai, n re ai hpe ginhka chye lu hkra karum ya lu na re. Dai majaw, Karai Kasang a lam hte seng nna langai ngai chye wa yang, ‘dai gaw Yesu tsun ai ga ni, chyum daw ni hte rap ra ai lam nga ai kun?’ ngu nna tinang hkum san yu u. Beria mare masha ni gaw Kasa Pawlu a sharin achyin ai lam ni hpe na ai shaloi, “dai mungga hta myit shawn loi ai hte, dai lam ni teng ai n teng ai chye lu hkra, Chyum laika hpe shani shagu a yu nga ma ai.” Shanhte hpe kasi la mai ai.—Kasa 17:11.

Shawng na sumhpa ni hta lawm ai Marko, Rosa, Remawdi ni gaw Yehowa Sakse Ni hte arau Chyum Laika hkaja nna, tinang a makam masham hpe atsawm san jep wa ma ai. Shanhte hpa akyu ni lu la wa ai kun?

Marko: “Chyum Laika sharin ya ai wa gaw, an la san ai ga san ni yawng hpe, Chyum Laika hte mahtai jaw ai. Chye wa ai lam ni a majaw, Yehowa hpe grau grau tsawra wa ai sha n-ga, an a makyit sumri mung grau nna ngang kang wa ai.”

Rawsa: “Chyum Laika ngu ai gaw Karai Kasang a lam hpe masha a myit mang lam hte ka da ai laika buk re ngu nna ngai shadu wa ai. raitim, ngai chye mayu ai ga san ni hpe Chyum Laika gaw mahtai jaw ya lu ai hpe gau ngwi ngwi chye wa ai. Ya chyawm gaw, Yehowa gaw nye a matu kaja wa nga nna kamhpa mai ai Marai Hkum Langai rai nga sai.”

Remawdi: “Karai a lam chye wa hkra karum ya rit ngu nna ngai akyu hpyi wa ai. Kade n na yang, an la gaw Chyum Laika hkaja wa ai. Ya gaw, Yehowa Karai Kasang hte seng ai teng man lam hte Karai Kasang gaw kaning re ai wa re ngu ai hpe chye lu ai majaw, ngai grai kabu ai.”

Chyum Laika gaw Karai Kasang hpe chye na shut shangun ai masu magaw lam ni hpe, hpaw shaleng dan lu ai sha n-ga, shi a ra sharawng hpa atsam ningja ni a lam hpe mung tsun dan da ai. Chyum Laika gaw Karai a atsam hte lam matsun nna ka da ai re. Chyum Laika hti ai shaloi, “Karai Kasang e anhte hpe jaw da ai chyeju” re ai teng man ai tara ni hpe chye wa ai. (1 Korinhtu 2:12) Dai majaw, ahkyak ai lam ni re ai Karai Kasang a lam, prat a yaw shada lam, htawm hpang hte seng nna teng man ai lam ni hpe, Chyum Laika hta gara hku tsun da ai hpe nang nan hkaja yu u. Dai ga san nkau a mahtai hpe www.dan124.com/kac hta “Chyum Laika Sharin Ya Ai Lam Ni > Chyum Laika Ga San Ni A Mahtai” ngu ai ga baw npu hta hti yu mai ai. Chyum Laika hkaja mayu ai nga yang, internet kaw nna hpyi shawn mai ai zawn, Yehowa Sakse langai hpe mung hpyi shawn mai ai. Dai hku Chyum Laika hkaja na nga yang, Karai Kasang hpe nang shadu da ai hta grau nna tsawra wa na re ai hpe anhte kam ga ai.