Amerikan mung, Kelihpawniya ginwang, Lawtingjalit kaw na grai n hkru ai ni, kani nanghpam lusha ai ni nga ai mying kaba ai lawk hta ngai kaba wa ai. An nau ni marai 6 hta ngai gaw 2 ngu ai wa re.

Anu gaw iwanjalitke hpung masha re ai majaw, kashu kasha ni hpe mung dai hpung masha byin hkra sharin shaga ai. Raitim, ngai ramma aten hta prat lahkawng hte asak hkrung wa ai. Laban shani rai yang nawku jawng kaw mahkawn sa hkawn nna, ngam ai shani ni hta gaw parti poi ni lung, nanghpam tsi ni lang, pyaw hpa lam ni hpe sha hkan tam wa ai.

Ngai gaw kachyi mi sha raitim pawt loi ai majaw, mu ai hpe lang nna htim chye ai. Nawku jawng kaw na sharin ya ai lam ni gaw, nye a matu hpa akyu n rawng ai. “Matai htang ai gaw Madu a bungli, ngai gaw shi a laknak” ngu nna ngai galoi mung tsun tsun re ai. 1960 hpring shaning ni hta, ngai lahta tsang lung ai shaloi Sharaw Chyang Mung Masa (Black Panhters) hpung hpe ra sharawng wa ai. Dai hpung gaw mung masha ahkaw ahkang a matu rawt malan ai hta mying kaba ai. Ngai mung, mung masha ahkaw ahkang jawng ma uhpung hta shang dat ai. Anhte hpung n-gun madun shagu jawng jahkring pat mat ai.

Nye a htim chye ai myit jasat a majaw, n-gun madun ai daram hte myit n dik wa ai. Dai majaw, laja lana re ai zingri zingrat ai lam ni galaw wa ai. Ga shadawn, Amerikan hta Ahprika masha ni hpe laja lana zingri ai lam kayat da ai sumla hkrung hpe manang ni hte arau sa yu ai. Dai zawn zingri ai lam hpe ngai mu ai shaloi, grai masin pawt wa nna, sumla hkrung yu ai shara kaw sha shan hpraw ramma ni hte sa ga law nna kayat hkat ai. Bai nna, shan hpraw ni nga ai lawk ni de sa nna, mu ai shan hpraw masha shagu hpe jawm kayat ai.

Ngai asak 20 jan hta, an nau ni marai masum gaw nhkru ai lam law law tawt lai wa ai. Dai majaw, uphkang du ni hte manghkang byin ai. Nye kanau langai gaw mying kaba ai hpung hta shang da ai majaw, ngai mung dai hpung de shang mat ai. Dai hku nna, ngai gaw grai nhkru ai wa tai wa ai.

Nye manang langai a kanu yan kawa gaw Yehowa Sakse ni re. Shanhte gaw nawku zuphpawng ni sa lung na matu saw shaga ai majaw ngai hkan mat ai. Du ai hte kalang ta, Sakse Hkam ni gaw kaga ni hte n bung ai lam sadi hkrup ai. Nawku ku ai aten hta masha shagu gaw tinang na Chyum Laika hpe hpaw hti ma ai. Ramma ni pyi pinra ntsa kaw mungga htawn ai. Karai Kasang a mying gaw Yehowa re ai hpe chye lu dat nna, dai mying hpe shanhte akyu jashawn ai hpe mu ai shaloi ngai grai ra sharawng mat ai. (Shakawn 83:17) Dai hta masha amyu baw shagu nga tim, amyu ginhka ai lam n nga ai sha grai zing lum ai.

Nnan hta gaw Sakse Hkam ni hte Chyum Laika n kam sharin ai. Raitim, nawku zuphpawng ni sa lung ai hpe gaw ngai ra sharawng ai. Sakse Hkam ni a nawku zuphpawng sa ai lana mi hta, manang ni gaw ka poi sa ma ai. Dai hta shanhte gaw ramma lasha langai a shan hpyi palawng hpe hpyi ai. N lu hpyi ai majaw, shanhte jawm kayat nna si mat ai. Hpang shani hta shanhte masha sat ai lam hpe pyi naw shakawng dat ai. Tara rung hta san jep hkrum ai aten hta pyi, tara tawt lai ai ngu nna n shadu ma ai. Shanhte kaw na law malawng gaw htawng prat tup jahkrat hkrum ai. Dai shana hta ngai n hkan mat ai tsamai ai. Dai majaw, nye a prat hpe galai shai nna Chyum Laika hkaja na matu dawdan kau ai.

Masha amyu lata ai lam grai sawng ai aten hta, Yehowa Sakse ni chyawm gaw zing lum taw nga ma ai. Grai mauhpa re! Ga shadawn, shan hpraw Sakse Hkam langai gaw kaga mungdan de bu hkawm yang, shi a kasha ni hpe shan chyang dinghku gaw lanu lahku ya ai. Nga shara n nga ai shan chyang lasha langai hpe shan hpraw dinghku gaw nta shaga da ai. “Nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai” ngu ai Yesu a ga hte maren Yehowa Sakse ni asak hkrung nga ai hpe ngai kam mat sai. (Yawhan 13:35) Jet ai mungkan grup hpunau nauna ni hpe ngai mu sai.

Nye a sawn sumru ai lam ni hpe galai shai ra ai lam, Chyum Laika hkaja let chye na wa ai. Nye a myit jasat hpe galai shai yang she, masin pawt ai hpe hkang lu ai sha n-ga, kaja htum asak hkrung sa lam re ai hpe chye wa ai. (Roma 12:2) Dai hku nna, nye a prat gaw galai shai wa nna, 1974, January shata hta Yehowa Sakse hku nna hkalup hkam la ai.

Hkalup hkam ngut ai hpang pyi, masin pawt ai lam hpe n lu hkang shi ai. Ga shadawn, nta langai hpang langai hkaw tsun sa ai shaloi, nye madaw ntsa kaw na rediyu hpe lagut lagu mat ai. Lagut hpang hkan let dep hkyen ai shaloi, rediyu hpe kabai jahkrat nna shi hprawng mat ai. Kaga ni hpe dai lam tsun dan ai shaloi, myitsu salang langai gaw “Stibin, lagut hpe rim lu nna nang hpa galaw na?” ngu nna san ai. Dai ga san a majaw myit hpa lam ni nga wa nna, masha ni hte simsa hkra nga na matu shakut wa ai.

1974, October shata kaw nna, hkying hkum 200 shang lawm ra ai Chyum hpaji jaw bungli hta aten hpring magam gun wa ai. Hpang hta Amerikan mung, Nyu Yawk mare, Brukalin kaw na Yehowa Sakse ni a ginjaw rung hta shawang lit gun langai hku na magam gun na ahkang lu wa ai. Hkamja lam n kaja ai anu hpe lanu lahku na matu 1978 hta Lawtingjalit de bai wa ai. Lahkawng ni na ai hpang, Eranda ngu ai Hkristan nauna langai hte hkungran la ai. Anu n nga mat ai du hkra an arau lanu lahku wa ai. Hpang hta, an gaw Gilead Chyum jawng lung nna, sasana ni hku nna Panama hta lit ang wa ai.

Hkalup hkam ngut tim pyi, masin pawt nna grai mazut ai hku htang mayu ai myit ni byin wa chye ai. Ngai hpe masin pawt shangun ai ni hte san san nga na matu, myit hpe simsa hkra shakut ra ai hpe chye na wa ai. Nye madu jan hte hpawn masha law law gaw ngai dai hku shakut ai hpe n kam na daram mau ma ai. Shanhte hkum tsun, ngai pyi nye hkum ngai n kam ai. Dai zawn galai shai lu ai gaw, nye a n-gun atsam a majaw n re ai sha, Chyum Laika a galai shai ya lu ai atsam a majaw re.​—Hebre 4:​12.

Chyum Laika a majaw nye a prat gaw, asak hkrung ai lachyum nga wa nna myit mung simsa wa ai. Ya nga yang, masha ni hpe kayat ai baw n galaw ai sha, Karai a lam chye wa hkra karum ya nga sai. Lahta tsang jawng ma prat hta ga law hkat ai manang langai hpe pyi Chyum Laika sharin ya wa ai. Shi hkalup hkam ngut ai hpang, gawk shap nna arau jawm nga ai. Dai ni aten du hkra shi hte ngai gaw, jinghku majing zawn naw re. Ya du hkra nga yang, an la gaw masha marai 80 jan hpe Chyum Laika sharin ya wa nna, Yehowa Sakse byin wa hkra karum ya wa ai.

Lachyum nga ai prat hte asak hkrung lu ai sha n-ga, jet ai mungkan grup hpunau nauna ni a lapran hta ngwi pyaw simsa lam hkamsha lu ai majaw, Yehowa hpe grai chyeju dum ai.