Ngai gaw Guatimala mungdan a sinna maga de na grai tsan ai bum ga ginra, Ah-hku mare hta shangai ai re. Anhte a dinghku gaw, Maya amyu kaw na yu hkrat wa ai Aisi amyu lakung re. Anhte a amyu ga hte Saping amyu ga hpe mung lu shaga ai. Guatimala mungdan hta 36 ning daram na hkra byin wa ai, mung grai shuk ai masa hpe ma prat hta hkrum wa ai. Dai aten hta, Aisi masha ni law law si mat wa ai.

Ngai asak 4 ning daram hta, 7 ning rai sai nye kahpu gaw bawm langai hpe lang ginsup nga ai shaloi, ndum shami kapaw mat ai. Dai majaw, ngai myi n mu mat ai. Nye kahpu gaw, si mat ai. Dai hpang, Guatimala mare na myi n mu jawng hta nga nna myi n mu laika hpe sharin la ai. Sara, saranum ni gaw ngai hpe kaga ni hte ga n shaga shangun ai. Shanhte mung ngai hpe koi yen ma ai. Hpa majaw re ai hpe ngai n chye na wa ai. Dai majaw, grai garen wa nna jawng pat ai shata 2 hpe sha myit mada wa ai. Rai jang she, ngai hpe tsawra ai anu kaw wa lu na re. Raitim, ngai asak 10 ning hta anu si mat ai. Mungkan ntsa ngai hpe tsawra ai gaw nye nu langai sha nga ai majaw, nu si mat nna grai yawn hkyen wa ai.

Asak 11 ning hta, dai daw buga de wa nna, kawa bung na kanu n bung ai nye kahpu a dinghku hte rau nga wa ai. Ngai ra mara yawng, malu masha, bu hpun ai lam ni yawng hpe madi shadaw ya wa ai. Raitim, myit hkamsha lam hpe chyawm n lu madi shadaw ya ai. Kalang lang marawn hkrap nna Karai Kasang hpe ndai hku akyu hpyi wa ai: “Nu hpa majaw si mat ai rai? Ngai hpa majaw myi n mu ai prat du ra ai rai?” Ndai zawn sawng dik ai mabyin hkrum ai gaw, Karai Kasang a myit ra ai lam re ngu, masha ni tsun ma ai. Dai rai yang, Karai Kasang gaw matsan dum myit n nga ai, n tara ai ngu hkamsha wa ai. Myi n mu ai majaw she tinang hkrai n lu sat si wa ai re.

Myi n mu mat ai hpang kaw na myit hte hkum hkrang n-gun yawm wa ai. Ma prat hta chyahkring hkring hkumshan roi rip hkrum wa ai. Dai zawn hkrum ai aten ni hta, kaga masha ni hpe n tsun dan wa ai. Tsun dan jang mung, kadai ahkyak shatai ya na n re. Masha ni gaw ngai hpe ga atsawm n shaga ai majaw, tinang hkrai sha nga wa ai. Dai hku nna yawn hkyen nga let, myit daw ana hkamsha wa ai. Ngai kadai hpe mung n kam mat sai.

Ngai asak 13 hta Yehowa Sakse yanla langai gaw, muk sha jawng yu ai aten hta ngai kaw du wa ai. Ngai hpe yu matsan dum ai saranum langai gaw, ngai hte ga shaga yu na matu shanhte hpe tsun ai. Shanhte gaw si mat ai ni bai hkrung rawt wa na, myi n mu ai ni bai mu wa na ngu ai Karai a ga sadi a lam tsun dan ai. (Esaia 35:5; Yawhan 5:28, 29) Shanhte tsun ai ni hpe ngai ra ai. Raitim, ngai gaw kaga masha ni hte ga nau n shaga ai majaw, shanhte hpe gara hku tsun ra na hpe n chye ai. Dai pyi naw, shanhte asum n jaw ai sha bai du wa nna, Chyum Laika lam ni tsun dan ai. Ngai kaw du na matu bum ni lai nna deng 6 daram lam hkawm wa ai.

Shanhte atsawm bu hpun da tim, lu su ai ni chyawm n re ai, ngu nna kawa bung na kanu n bung ai kahpu gaw tsun dan ai. Dai pyi, kumhpa kaji ni la sa nna ngai hpe lanu lahku ya wa ai. Jet ai Hkristan ni sha tinang akyu n tam ai myit madun na re.

Myi n mu laika hte Chyum Laika hkaja wa ai. Chye wa ai lam ni hpe chye na ai raitim, nkau hpe hkap la yak nga ai. Ga shadawn, Karai Kasang gaw ngai hpe tsawra ai, lanu lahku ai. Karai Kasang nye ntsa tawn ai hkamsha lam hpe, kaga masha ni tsun dan lu ai ngu ai hpe mung hkap la n mai ai. Yehowa Karai Kasang gaw nhkru n kaja ai lam hpe chyahkring mi ahkang jaw da ai lam hpe chyawm chye na ai. Raitim, dai aten hta Karai Kasang hpe tsawra myit rawng ai kawa langai hku nna mu na matu yak wa ai. *

Chyum Laika kaw na sharin ya ai lam ni a majaw, nye a ningmu angwi ngwi galai shai wa ai. Ga shadawn, yakhkak jamjau hkrum nga ai ni hpe Karai Kasang matsan dum ai lam hpe ngai sharin la ai. N tara ai hku kanawn mazum hkrum ai hte seng nna Karai Kasang gaw: “Nye a amyu hkrum ai ru tsang lam hpe ngai azin ayang mu se ai rai nna,. . . shanhte hkrum ai nni nkri hpe ngai chye nga nngai” ngu tsun ai. (Pru Mat 3:7) Karai Kasang a tsawra matsan dum chye ai atsam ningja ni hpe grai manu shadan chye wa ai majaw, shi hpang apnawng mayu wa ai. 1998 hta Yehowa Sakse hku nna hkalup hkam la ai.

Hkalup hkam nna laning mi daram hta Ekwitla Mare makau kaw na myi n mu ai ni a matu sharin jawng hpe sa lung ai. Nta kaw na nawku zuphpawng sa ai mayak mahkak hpe, myitsu salang langai chye mat ai. Ngai hpe Chyum Laika sa sharin ya ai sakse hkam yanla hkawm lai wa ai bum a maga mi hta she, ni htum nawku hpung nga ai majaw, ngai zuphpawng lung na matu n loi ai. Ngai hpe karum ya na matu Ekwitla kaw nga ai sakse hkam dinghku langai hpe hpyi shawn wa ai. Dai majaw, ngai hpe shanhte a nta de shaga mat nna, nawku zuphpawng lung lu hkra karum ya ai. Dai ni aten du hkra, nta masha langai zawn makawp maga ya nga ai.

Ngai hpe tsawra myit madun ai hpunau nauna ni a lam tsun yang, htum na n re. Kadun dawk tsun yang, shanhte a majaw Yehowa Sakse hku nna jet ai Hkristan ni a ka-ang kaw nga lu nna myit dik sai.​—Yawhan 13:34, 35.

Ya nga jang, ngai gaw manu dan wa ai hta n-ga, myit mada lam mung nga nna, asak hkrung lu ai hpe mung pyaw wa sai. Yehowa Sakse ni a hpaji jaw bungli hta aten hpring magam gun nga sai. Dai majaw, tinang a myi n mu ai prat hpe malap mat nna, kaga masha ni hpe manu dan ai Chyum Laika teng man lam sharin ya na matu, ahkaw ahkang lu da ai. Hkying hku law ai masha ni lung nga ai ginwang zuphpawng hta pyi, Chyum mungga ni htawn tsun na ahkang lu wa ai.

2010 ning, E Sabedaw mungdan hta hpaw da ai magam jawng (ya aten Kabu Gara Shiga Hkaw Tsun Ai Ni A Matu Jawng) hpe lu lung wa ai. Dai jawng kaw na shaman shakyang ya ai lam a majaw, nawku hpung lit ni hpe ngut kre awng dang lu wa ai. Dai hta n-ga, magam gun lu hkra karum ya ai Karai Kasang Yehowa gaw, ngai hpe grai manu shadan nna tsawra ai lam hkamsha lu nga sai.

“Hkam sha ai hta jaw ya ai mahtang grau a nga ai” ngu Yesu tsun wa ai. (Kasa 20:35) Ngai myit pyaw nga sai ngu, ya lu tsun sai. Kaga masha ni hpe karum ya lu na ngu, shawng hta kalang mung n myit yu ga wa tim, ya karum ya lu sai.