MAKAWP SUMHPA | CHYUM LAIKA GAW PRAT HPE RAWT JAT SHANGUN LU
Chyum Laika Hpe Hpa Majaw Hti Ging Ai Kun?
“Chyum Laika gaw chye na na matu grai yak ai ngu ngai shadu ai.”—Jobi
“Chyum Laika hti ai hpe ngai grai lagawn ai.”—Kwini
“Grai htat ai Chyum Laika hpe yu dat ai hte, hti mayu ai myit mat mat ai.”—Ezike
Chyum Laika hti na ngu myit dat ai shaloi, ntsa hta madun da ai lam ni a majaw, hti na matu hting nut ga ai kun? Masha law law gaw Chyum Laika hti na matu myit grai li ma ai. Raitim, Chyum Laika gaw na a prat hkrun lam hpe grau myit dik nna ngwi pyaw lu hkra karum ya lu ai nga yang gaw taw? Chyum Laika hpe myit lawm let hti lu ai ladat ni nga ai nga yang gaw taw? Chyum Laika kaw nna gara hku akyu lu mai ai ngu ai hpe kalang mi daram san jep yu yang kaja na kun?
Chyum Laika hpe hti ngut ai hpang, akyu lu la wa ai ni tsun ai lam nkau hpe dinglik yu ga.
Asak 20 daram nga ai Ezike ndai hku tsun ai: “Lai wa sai aten ni hta, ngai gaw yaw shada lam n nga ai sha, mawdaw gawt nga ai wa hte bung ai. Raitim, Chyum Laika hti ai shaloi, nye a prat gaw lachyum nga wa ai. Chyum Laika hta shani shagu na hkawm sa lam a matu tatut re ai hpaji jaw ga ni lawm ai.”
Asat 20 daram nga ai Hprida mung ndai hku tsun ai: “Ngai gaw myit grai lawan nna galaw chye ai wa re. Raitim, Chyum Laika hti ai shaloi, tinang hkum tinang hkang chye wa ai. Dai majaw, kanawn mazum ai lam hta rawt jat wa nna, ya nga yang manang law law lu wa sai.”
Asak 50 jan re ai Yunik mung ndai hku tsun ai: “Chyum Laika hti ai gaw nye a n kaja ai akyang ni hpe galai shai kau lu nna, grau kaja ai masha langai byin wa hkra karum ya ai.”
Ndai hta madun da ai ni hte wan hku law ai masha ni chye wa ai zawn, Chyum Laika hti ai gaw nang hpe myit dik lu shangun nna, ngwi pyaw ai asak aprat lu la hkra karum ya lu ai. (Esaia 48:17, 18) Dai sha n-ga (1) kaja ai daw dan lam ni jahkrat lu hkra, (2) jet ai jinghku lu la hkra, (3) myit tsang ai lam ni hpe hparan lu hkra, (4) kaja htum gaw Karai Kasang a lam hpe grau chye hkra karum ya lu ai. Chyum Laika hta lawm ai hpaji jaw ga ni gaw, Karai Kasang kaw na sa ai re majaw, hkan sa na nga yang, galoi mung shut na n re. Karai Kasang gaw n kaja ai hpaji jaw ga hpe galoi mung n jaw ai.
Ahkyak ai gaw Chyum Laika hpe hti hpang na matu sha re. Dai hku hpang dat ai shaloi, grau loi nna hti mayu ai myit nga hkra, gara tatut re ai hpaji jaw ga ni gaw karum ya lu na kun?
