Mbivilia ndĩvatĩte andũ maitanĩa kũmanyana kĩ-mwĩĩ, ĩndĩ yonanĩtye kana ũsu nĩ mũthĩnzĩo kuma kwa Ngai kwa andũ ala matwaanĩte. Oombie ‘mũndũũme na mũndũ mũka’ na oona kĩla kĩndũ woombĩte ‘kyamwendeesya mũno.’ (Mwambĩlĩlyo 1:​27, 31 The Holy Bible in Current Kikamba Language) Ĩla wakwatanisye mũndũũme na mũndũ mũka ma mbee mũtwaanonĩ, aisye kana “makeethĩwa mwĩĩ ũmwe.” (Mwambĩlĩlyo 2:​24) Ũu nĩ vamwe na kũtanĩa kũmanyana kĩ-mwĩĩ na kwĩthĩwa na ũnyanya wa vakuvĩ.

 Mbivilia ĩiweta ũtanu ũla mũndũũme ũkwataa mũtwaanonĩ yaĩtye atĩĩ: ‘Tanĩa kĩveti kyaku kya ũthoo. Nondo syakyo nikwĩanĩae mavinda onthe; Naku ũtanĩthawʼe mavinda onthe nĩ wendo wakyo.’ (Nthimo 5:​18, 19) Ngai endaa o nasyo iveti itanĩe kũmanyana kĩ-mwĩĩ. Mbivilia yaasya: “Aũme na iveti maĩlĩte kwĩanĩsya vata wa ũla ũngĩ wa kũmanyana kĩ-mwĩĩ.”​—1 Akolintho 7:3, God’s Word Bible.

Ala maĩle kũmanyana kĩ-mwĩĩ

 Mũvango wa Ngai nĩ kana andũ ala matwaanĩte nomo maĩlĩte kũmanyana kĩ-mwĩĩ me oka, o tondũ ĩandĩko ya Aevelania 13:4 yonanĩtye: “Mũtwaano nũtaĩwe nĩ andũ onthe, na ũkomo wĩthĩwe ũte mũvukye, nũndũ mathaaa na ilaalai Ngai akamasilĩla.” Andũ ala matwaanĩte maĩlĩte kwĩthĩwa me aĩkĩĩku kwa ala matwaanĩte namo, na mayĩthĩawa meyumĩtye vyũ kwĩanĩasya wĩvĩto woo. Kwĩanĩsya wendi wa mũndũ mwene tikwʼo kũtumaa ethĩwa na ũtanu, ĩndĩ ala matwaanĩte makwataa ũtanu mwingĩ ĩla maatĩĩa mwolooto ũũ wa Mbivilia: “Kwĩ mũyo kũnengane kwĩ kwosa.”​—Meko ma Atũmwa 20:35.