Mbivilianĩ, ndeto ĩla ĩalyũlĩtwe “ũthayũũkyo” yumĩte ndetonĩ ya Kĩkiliki a·naʼsta·sis, ĩla yonanasya “kũkĩla” kana “kũũngama ĩngĩ.” Mũndũ athayũũkwʼa ethĩawa ookĩla kuma kĩkwʼũnĩ, na aisyoka thayũ ĩngĩ.—1 Akolintho 15:12, 13.

 O na kũtwʼĩka ndeto “ũthayũũkyo” ndĩ Maandĩkonĩ ma Kĩevelania, ala mavinda maingĩ metawa Ũtianĩo Mũkũũ, ũmanyĩsyo ũsu nũkwatĩkanaa maandĩkonĩ asu. Kwa ngelekanyʼo, kwĩsĩla mwathani Osea, Ngai athanie atĩĩ: “Ngamovosya kuma vinyanĩ wa Seoli; ngamatangĩĩa kuma kĩkwʼũnĩ.”—Osea 13:14; Yovu 14:13-15; Isaia 26:19; Ndanieli 12:2, 13.

 Andũ makathayũũkwʼa mekale va? Andũ amwe mathayũũkawʼa mathi ĩtunĩ makasumbĩke vamwe na Klĩsto. (2 Akolintho 5:1; Ũvuanyʼo 5:9, 10) Mbivilia yĩtĩte ũthayũũkyo ũsu ‘ũthayũũkyo wa mbee’ kana “ũthayũũkyo ũla wa mbee.” Ndeto isu syelĩ syonanasya kana ve ũthayũũkyo ũngĩ ũkaatĩĩa. (Ũvuanyʼo 20:6; Avilivi 3:11) Ũthayũũkyo ũsu ũkeethĩwa wa ala makekala vaa ĩũlũ wa nthĩ, na nĩwʼo wĩ na andũ ala aingĩ.—Savuli 37:29.

 Andũ mathayũũkawʼa ata? Ngai nũmũnengete Yesũ ũtonyi wa kũthayũũkya ala akwʼũ. (Yoana 11:25) Yesũ akathayũũkya “ala onthe me mbũanĩ” kĩla mũndũ ailye ũndũ wailye yĩla waĩ thayũ, na e na mosũanĩo ala waĩ namo. (Yoana 5:28, 29) Ala mathayũũkawʼa mathi ĩtunĩ manengawe mĩĩ ya veva. Namo ala makathayũũkwʼa mekale ĩũlũ wa nthĩ makanengwa mĩĩ mĩseo vyũ, ĩte na mathĩna.—Isaia 33:24; 35:5, 6; 1 Akolintho 15:42-44, 50.

 Naaũ makathayũũkwʼa? Mbivilia yaĩtye kana “kũkeethĩwa na ũthayũũkyo wa ala alũngalu na ala mate alũngalu.” (Meko ma Atũmwa 24:15) Ala alũngalu nĩ andũ aĩkĩĩku ta Noa, Sala, na Avalaamu. (Mwambĩlĩlyo 6:9; Aevelania 11:11; Yakovo 2:21) Namo andũ mate alũngalu nĩ ala mataatĩĩa myolooto ya Ngai nũndũ mayaakwata mwanya wa kwĩmanyĩsya.

 Ĩndĩ andũ ala meekaa maũndũ mathũku na ngũlũ na maleile vyũ maialyũla mwĩkalĩle woo, maikathayũũkwʼa. Yĩla andũ ta asu makwʼa, makwataa wanangĩko wa tene na tene mate na wĩkwatyo wa kwĩsa kũthayũũkwʼa.—Mathayo 23:33; Aevelania 10:26, 27.

 Ũthayũũkyo ũkeethĩwa ĩndĩĩ? Mbivilia yathanie kana ũthayũũkyo wa ĩtunĩ waĩ wĩkĩke ĩvindanĩ ya kwĩthĩwa vo kwa Klĩsto, yĩla yambĩĩie mwaka wa 1914. (1 Akolintho 15:21-23) Nawʼo ũthayũũkyo wa kũũ nthĩ ũkeekĩka ĩvindanĩ ya Ũsumbĩ wa Myaka Ngili wa Yesũ Klĩsto, yĩla nthĩ ĩkatwʼĩkĩthwʼa valatiso.—Luka 23:43; Ũvuanyʼo 20:6, 12, 13.

 Nĩkĩ tũtonya kũĩkĩĩa kana kũkeethĩwa ũthayũũkyo? Mbivilia nĩyĩeleetye kwa ũliku ĩũlũ wa andũ kenda mathayũũkiwʼe, na ve andũ meeyoneie kĩla ũmwe woo aithayũũkwʼa. (1 Asumbĩ 17:17-24; 2 Asumbĩ 4:32-37; 13:20, 21; Luka 7:11-17; 8:40-56; Yoana 11:38-44; Meko ma Atũmwa 9:36-42; 20:7-12; 1 Akolintho 15:3-6) Ũthayũũkyo wa Lasalo nĩ ũmwe wĩsĩkĩe mũno nũndũ aĩ mũkwʼũ mĩthenya ĩna, na Yesũ amũthayũũkya mbee wa ĩkomano ya andũ. (Yoana 11:39, 42) O na andũ ala mamũvĩngaa Yesũ mayaĩ mesa kũleana na ũndũ ũsu. Ĩndĩ vandũ va kũtanĩthwʼa nĩ kĩla weekie, mavangie ũndũ meũmũaa e na Lasalo.—Yoana 11:47, 53; 12:9-11.

 Mbivilia yonanĩtye kana Ngai e ũtonyi na wendi wa kũthayũũkya ala makwie. Nũiĩte kĩlilikanonĩ kyake kĩtausũaa kĩla kaũndũ kakonetye andũ onthe ala wĩthayũũkya aitũmĩa vinya wake ũte maela. (Yovu 37:23; Mathayo 10:30; Luka 20:37, 38) Ngai e na ũtonyi wa kũtũnga ala akwʼũ thayũ ĩngĩ, na nĩwendaa kwĩka ũu! Mbivilia ĩiweta ĩũlũ wa ũthayũũkyo, yaĩtye ũũ ĩũlũ wa Ngai: “Ũkeethĩwa na mea ma wĩa wa moko maku.”—Yovu 14:15.

Ũmanyĩsyo wa ũvũngũ ĩũlũ wa ũthayũũkyo

 Ũmanyĩsyo wa ũvũngũ: Ũthayũũkyo nĩ kũtũngĩanĩwa kwa thayũ na mwĩĩ.

 Kĩla Mbivilia ĩmanyĩasya: Mbivilia ĩmanyĩasya kana mũndũ mwene nĩwe thayũ, ĩndĩ thayũ ti kĩndũ kĩ nthĩnĩ wa mũndũ kyumaa yĩla wakwʼa. (Mwambĩlĩlyo 2:7; Esekieli 18:4) Yĩla mũndũ wathayũũkwʼa, ti mwĩĩ wĩthĩawa watũngĩanĩwa na thayũ, ĩndĩ ethĩawa atwʼĩkĩthwʼa kyũmbe kĩ thayũ ĩngĩ.

 Ũmanyĩsyo wa ũvũngũ: Andũ amwe mathayũũkawʼa na mayanangwa vau kwa vau.

 Kĩla Mbivilia ĩmanyĩasya: Mbivilia yaĩtye kana “ala meekie maũndũ mathũku” makakwata “ũthayũũkyo wa ũsilĩlo.” (Yoana 5:29) Ĩndĩ makasilĩlwa kwosana na maũndũ ala makeka mamina kũthayũũkwʼa, na ti maũndũ ala meekie matambĩte kũkwʼa. Yesũ aisye atĩĩ: “Ala akwʼũ makewʼa wasya wa Mwana wa Ngai, na ala mamwĩthukĩĩisye makeethĩwa thayũ.” (Yoana 5:25) Ala ‘makethukĩĩsya’ kana kũkwata maũndũ ala makamanyĩwʼa ĩtina wa kũthayũũkwʼa, masyĩtwa moo makaandĩkwa nthĩnĩ wa “ĩvuku ya thayũ.”—Ũvuanyʼo 20:12, 13.

 Ũmanyĩsyo wa ũvũngũ: Yĩla mũndũ wathayũũkwʼa, athayũũkawʼa na mwĩĩ o ũla waĩ nawʼo atambĩte kũkwʼa.

 Kĩla Mbivilia ĩmanyĩasya: Mũndũ amina kũkwʼa, mwĩĩ wake nĩwoaa na ũitwʼĩka mũthanga.—Mũtavanʼya 3:19, 20.