O ũndũ myaka yaendeea na kũsonga, andũ amwe matwaanĩte nĩmaekaa kwonanyʼa wendo ũndũ meekaa mbeenĩ. We nĩwaĩle kũthĩnĩka ethĩwa thĩna ũsu wĩ mũtwaanonĩ waku?

•  Kĩla waĩle kũmanya

•  Kĩla waĩle kwĩka

 Kwonanyʼa wendo nĩkũtumaa mũtwaano wĩthĩwa mũlũmu. O tondũ mũndũ wĩthĩawa na vinya nũndũ wa kũya lĩu na kũnywʼa kĩwʼũ ateũtĩĩa, nowʼo mũtwaano ũendeeaa kwĩthĩwa wĩ mũlũmu ala matwaanĩte moonanyʼa wendo kĩla ĩvinda. O na ethĩwa andũ nĩmekalanĩtye myaka mingĩ matwaanĩte, kĩla ũmwe nĩwendaa kũmanya ethĩwa ũla ũngĩ nũmwendete na nũmũthĩnĩkĩaa.

 Mũndũ wĩ na wendo wa wʼo ndesũanĩaa o we mwene. Vandũ va kwĩka ũu, asũanĩaa ũndũ ũtonya kũtanĩthya ũla ũngĩ. Kwoou, vandũ wa kwonanyʼa wendo o ĩla ũkwĩwʼa ayenda kwĩka ũu, mũndũ ũkũsũanĩa ũla matwaanĩte nake akamanyaa ĩla ũla ũngĩ wĩ na vata wa kwonwʼa wendo na ayĩka ũu.

 Kaingĩ iveti nĩsyendaa kwonwʼa wendo kwĩ aũme. Mũndũũme no ethĩwe endete kĩveti kyake mũno vyũ. Ĩndĩ ethĩwa akakyonasya wendo kwakya na mawĩoo kana o yĩla ũkwenda kũkoma nakyo, kĩveti no kĩeme kũmanya nesa ethĩwa mũũme nũkyendete. Kwoou nũseo kũkyonyʼa wendo kĩla ĩvinda.

 Onyʼa ũla mũtwaanĩte nake kana nũmwendete kwĩsĩla ndeto syaku. Ndeto imwe ta kwasya “nĩngwendete” kana “Wĩ wa vata mũno kwakwa” no itume ũla mũtwaanĩte amanya nũmwendete.

 Mwolooto wĩ Mbivilianĩ: “Kĩla kyusũĩte ngoonĩ nĩkyo kanywʼa ũneenaa.”—Mathayo 12:34.

 Ũndũ wa kwĩka: Ti lasima kĩla ĩvinda ũkatavasya ũla mũtwaanĩte nake nũmwendete na kanywʼa. No ũmũandĩkĩe vandũ, ũkamũtũmĩa email, kana mesengyi.

 Onyʼa ũla mũtwaanĩte nũmwendete kwĩsĩla meko maku. Kũkũna kisi ũla mũtwaanĩte, kũmũkumbatĩa, kana o kũkwatana moko no kwonanyʼe kana yĩla ũũmwĩa, “nĩngwendete,” wĩthĩawa ũiweta ũu kuma ngoonĩ. O na kũkwata ũla mũtwaanĩte kwa nzĩa ya wendo, kũmũsisya kwa nzĩa ya wendo, kana kũmũthooea kamũthĩnzĩo syĩthĩawa syĩ nzĩa sya kũmwonyʼa nũmwendete. Nao nata kũtetheesya kĩveti kyaku maũndũnĩ amwe ta kũkĩkuĩa syĩndũ, kũkĩvingũĩa mũomo, kũthambya mĩio, kũvũa ngũa, kana o kũua? Yĩla iveti mbingĩ syoona iyĩkwa maũndũ ta asu, imanyaa nĩsyendetwe!

 Mwolooto wĩ Mbivilianĩ: “Twaĩle kwendana, na ti kwa ndeto kana ũĩmĩ, ĩndĩ kwa meko na wʼo.”—1 Yoana 3:18.

 Ũndũ wa kwĩka: Ĩka ũla ũtwaanĩte nake maũndũ maseo o ũndũ wamwĩkaa mũyĩĩvaanyʼa.

 Tũmĩa ĩvinda wĩ na ũla mũtwaanĩte. Kũtũmĩa ĩvinda mwĩ o elĩ nĩkũlũlũmĩĩlasya mũtwaano wenyu na kwĩka ũu kũĩkĩĩthasya ũla ũtwaanĩte nake kana nũtanĩaa kwĩthĩwa vamwe nake. Nĩwʼo kana no wĩthĩwe wĩ ũndũ wĩ vinya kwĩka ũu ethĩwa mwĩ na sya kana ethĩwa ve maũndũ maingĩ mwaĩle kwĩka kana kũneenea. Ethĩwa vailye ũu, no mũvange o kũtembeaa na maaũ mavinda kwa mavinda mwĩ o elĩ.

 Mwolooto wĩ Mbivilianĩ: “Mũĩkĩĩthye nesa maũndũ ala ma vata nĩ meva.”—Avilivi 1:10.

 Ũndũ wa kwĩka: Andũ amwe matwaanĩte na methĩawa makwatene mũno nĩmavangaa ĩvinda ya kumaala na kũthi vandũ mawĩoo kana wikendi me o elĩ.

 Manya ũla ũtwaanĩte nake. Kĩla mũndũ nĩwendaa kwonwʼa wendo kwa nzĩa syĩ kĩvathũkanyʼo. Neenai ĩũlũ wa ũndũ kĩla ũmwe wenyu ũnũkwenda kwonawʼa nĩwendete na ethĩwa nĩmwaĩle kwaĩlangya ũndũ ũsu. Na ĩndĩ ũyĩkĩa kĩthito wonyʼe ũla mũtwaanĩte kana nũmwendete. Lilikana kana kwonyʼa ũla ũtwaanĩte nake kana nũmwendete nĩ ũndũ wa vata nĩ kana mũtwaano wenyu wĩthĩwe wĩ mũlũmu.

 Mwolooto wĩ Mbivilianĩ: “Wendo . . . ndũmanthaa kwĩyĩuna.”—1 Akolintho 13:4, 5.

 Ũndũ wa kwĩka: Vandũ va kũlasimĩthya ũla ũngĩ akwende, ĩkũlye atĩĩ: ‘Nyie ndonya kwĩka ata nĩ kana ũla nĩtwaanĩte nake ambende?’