Ngũsĩ sya Yeova Imanyĩawʼa Ata Nĩ Kana Ianĩsye Ũthũkũmi Woo?

THAŨKA

Ngũsĩ sya Yeova nimanyĩawʼa kĩla ĩvinda maũndũnĩ onthe makonetye mwĩkalĩle woo, na maũndũ asu nĩ vamwe na ũthũkũmi woo. Ũthũkũmi ũsu nĩ ũla Yesũ weeaĩe aatĩĩi make, nawʼo nĩ wĩa wa kũtavanyʼa na kũmanyĩsya ũvoo mũseo ĩũlũ wa Ũsumbĩ wa Ngai. (Mathayo 24:14; 28:19, 20) Tũkwataa momanyĩsyo asu maũmbanonĩ maitũ ma kĩla kyumwa, maũmbano ma mĩthenya ĩtatũ ala mekawa kĩla mwaka, na maũmbano ma mũthyũlũlũko. Ngũsĩ sya Yeova ila syĩthĩawa na ianda kĩkundinĩ kana ũseũvyonĩ nimanyĩawʼa mũnango kwĩsĩla sukulu sya Mbivilia sya mwanya.

Kĩlungunĩ kĩĩ

Nĩ maũndũ meva Ngũsĩ sya Yeova imanyĩawʼa?

Maũmbano ma kĩkundi. Kĩla kyumwa, nĩtwĩthĩawa na maũmbano elĩ vala tũthaithĩaa, navo vetawa Nyũmba ya Ũsumbĩ. Ũmbano ũmwe wĩkawa katĩkatĩ wa kyumwa, nawʼo ũla ũngĩ wikendi. Kĩla mũndũ ethĩawa e mũthokye na vai mbesa ikolanawʼa.

Ũmbano wa katĩkatĩ wa kyumwa. Nĩtũmanyĩawʼa ũndũ tũtonya kũsoma nesanga, kũea ngewa nesa na andũ, kũneena mbee wa andũ aingĩ, kũtavanyʼa, na kũmanyĩsya. Tũmanyĩawʼa maũndũ asu kwĩsĩla maũvoo, ũneenanyʼa, mawonanyʼo, na vitio. Maũndũ asu tũmanyĩawʼa nĩmatũtetheeasya tũkethĩwa na ũtũĩka yĩla tũũtavya angĩ ũvoo ũla wĩ Mbivilianĩ, na yĩla tũkwĩmanyĩsya Mbivilia na andũ ala mekwendeewʼa. Onthe ala mooka maũmbanonĩ nĩmatethekaa nĩ momanyĩsyo asu. Ũndũ ũla mũnene nĩ kana, maũmbano asu nĩmatũtetheeasya tũkalũlũmĩĩlya mũĩkĩĩo witũ kwa Ngai, tũkamwenda mũnango, na tũkenda athaithi ala angĩ.
Ũmbano wa wikendi. Ũmbano ũũ wĩthĩawa na ilungu ilĩ. Twambĩĩaa na ũvoo ũla wumawʼa kwondũ wa andũ onthe. Kĩlungu kya kelĩ kĩthĩawa ne ũneenanyʼa wa makũlyo na mosũngĩo kuma ĩkasetinĩ ya kwĩmanyĩsya ya Mũsyaĩĩsya. a Ilungu ila syĩthĩawa ĩkasetinĩ yiũ nineeneaa na kũelesya syongo sya Mbivilia, vamwe na myolooto ĩla ĩtũtetheeasya ũthũkũminĩ witũ na thayũnĩ witũ wa kĩla mũthenya.

Maũmbano ma mũthyũlũlũko na maũmbano ma mĩthenya ĩtatũ. Kĩla mwaka nĩtwĩthĩawa na maũmbano manene atatũ, na atavanyʼa kuma ikundinĩ mbingĩ nĩmaendaa maũmbanonĩ asu. Maũmbano asu ma kũtanĩthya nĩmaneeneaa kwa ũliku kyongo kĩna kuma Mbivilianĩ, o vamwe na maũvoo, mawonanyʼo, ũneenanyʼa, na vitio. O ta maũmbano ma kĩkundi, maũmbano ma mũthyũlũlũko na maũmbano ma mĩthenya ĩtatũ nĩmatũtetheeasya tũkongela ũmanyi witũ ĩũlũ wa Mbivilia, na nĩmatũtetheeasya tũkethĩwa atavanyʼa aseango ma ũvoo mũseo. O ta maũmbano ma kĩkundi, andũ onthe methĩawa me athokye, na vai mbesa ikolanawʼa.

Sukulu sya Mbivilia sya Ngũsĩ sya Yeova

Ngũsĩ imwe sya Yeova nithokawʼa sukulunĩ syĩ kĩvathũkanyʼo sya Mbivilia nĩ kana imanyĩwʼe mũnango. Sukulu isu nĩ syĩva? Kĩeleelo kyasyo nĩ kyaũ na ikuaa ĩvinda yĩana ata? Na naaũ matonya kũthi sukulu isu?

Sukulu ya Mavainia

Kĩeleelo: Kũmanyĩsya atavanyʼa ma ĩvinda yonthe, metawa mavainia, b kwaĩlangya ũtũĩka woo wĩanĩ wa kũtavanyʼa na kũmanyĩsya. Nĩmamanyĩawʼa kwĩsĩla ũneenanyʼa, mawonanyʼo, maũvoo, na ilungu sya masoesi.
Ĩvinda: Mĩthenya thanthatũ.
Ala mathokawʼa: Ala maminĩte mwaka ũmwe maitavanyʼa me mavainia nĩmathokawʼa. Angĩ ala mathokawʼa nĩ mavainia ala maminĩte myaka ĩtano kuma mathi sukulu ĩsu.

Sukulu ya Atavanyʼa ma Ũsumbĩ

Kĩeleelo: Kũmanyĩsya atavanyʼa ma ĩvinda yonthe me na ũtũĩka maũndũ makonetye ũthũkũmi woo. Amanyĩwʼa nĩmaĩlangasya ũtũĩka woo wa kũtavanyʼa na kũmanyĩsya, o vamwe na kũneenea kwa ũliku syongo sya Mbivilia. Mamina sukulu, aingĩ moo nĩmatũmawa makatetheesye isionĩ ila syĩthĩawa na vata mũnene wa atavanyʼa.
Ĩvinda: Myei ĩlĩ.
Ala mathokawʼa: Mavainia no mausũsye kũthi sukulu ĩsu ethĩwa nĩmeanĩĩtye maũndũ mana ala mendekaa, na ethĩwa maũndũ moo nĩmeũmetĩkĩlya kũthi vonthe vala ve na vata mũnene wa atavanyʼa.

Sukulu ya Atumĩa ma Kĩkundi

Kĩeleelo: Kũtetheesya atumĩa c meanĩsye ianda syoo kĩkundinĩ, ta kũmanyĩsya na kũsũvĩa ĩĩthya, na kũlũlũmĩĩlya wendo woo kwa Ngai na kwa athaithi ala angĩ.—1 Vetelo 5:2, 3.
Ĩvinda: Mĩthenya ĩtano.
Ala mathokawʼa: Atumĩa ma kĩkundi ala mananyuviwe o mĩtũkĩ, o vamwe na ala methĩĩtwe me atumĩa kwa myaka mingĩ na maminĩte myaka ĩtano kuma mathi sukulu ĩsu nĩmathokawʼa.

Sukulu ya Asyaĩĩsya ma Mũthyũlũlũko na Iveti Syoo

Kĩeleelo: Kũmanyĩsya atavanyʼa ala mathokeaa ikundi, metawa asyaĩĩsya ma mũthyũlũlũko, d kũthĩnĩkĩa ianda syoo nesa. (1 Timotheo 5:17) O na ĩngĩ, sukulu ĩsu nĩtetheeasya asyaĩĩsya asu ma mũthyũlũlũko vamwe na iveti syoo kũkwata ũmanyi mwingangĩ ĩũlũ wa Maandĩko.
Ĩvinda: Mwei ũmwe.
Ala mathokawʼa: Asyaĩĩsya ma mũthyũlũlũko ala mananyuviwe o mĩtũkĩ vamwe na iveti syoo nĩmathokawʼa mamina mwaka ũmwe wĩanĩ wa kũthokea ikundi. Mamina kũthi sukulu ĩsu, nĩmathokawʼa ĩngĩ ĩtina wa kĩla myaka ĩtano.

Sukulu ya Ũthũkũmi wa Ũsumbĩ

Kĩeleelo: Kũtetheesya atumĩa na atetheesya ma kĩkundi e kwĩanĩsya ianda syoo kwosana na maũndũ ala maendeee, na mavata ma kĩkundi. (2 Timotheo 3:1) Sukulu ĩsu yĩkawa ĩtina wa myaka mĩvũthũ.
Ĩvinda: No yĩkwe mĩthenya mingangĩ, ĩndĩ mavinda maingĩ yĩkawa mũthenya ũmwe.
Ala mathokawʼa: Asyaĩĩsya ma mũthyũlũlũko, atumĩa, na atetheesya ma kĩkundi.

Sukulu ya Ũthũkũmi wa Mbetheli

Kĩeleelo: Kũtetheesya athũkũmi ma Mbetheli f kwĩanĩsya wĩa woo nesa, kũmwenda Ngai mũnango na kũlũlũmĩĩlya wendo katĩ woo.
Ĩvinda: Mĩthenya ĩtano na nusu.
Ala mathokawʼa: Ala manookie o mĩtũkĩ Mbetheli nĩmathokawʼa. Athũkũmi ma Mbetheli ala maminĩte myaka ĩtano kuma mathi sukulu ĩsu no mathokwʼe ĩngĩ.

Sukulu ya Mbivilia ya Ngileati

Kĩeleelo: Kũtetheesya amanyĩwʼa maelewe na mayenda mũnango Ndeto ya Ngai, na kũmatetheesya meke kwosana na kĩla meemanyĩsya. (1 Athesalonika 2:13) Aklĩsto aĩkĩĩku ala maendaa sukulu ĩsu ya Ngileati nĩmatetheeasya mũno ũseũvyo wa Yeova na wĩa wa kũmanyĩsya andũ Mbivilia nthĩ yonthe. Ala mamina sukulu ĩsu no matũmwe kĩsionĩ kana ovisinĩ wa ũvonge, yĩthĩwe nĩ nthĩ yoo kana nĩ nthĩ ĩngĩ.
Ĩvinda: Myei ĩtano.
Ala mathokawʼa: Ovisi sya ũvonge nithokasya athũkũmi ma ĩvinda yonthe ala manyuvĩtwe mausũsye. Sukulu ĩsu yĩkĩawa Watchtower Educational Center ĩla yĩ Patterson New York, Amelika.

Sukulu ya Ala me Kamitiinĩ ya Ovisi wa Ũvonge na Iveti Syoo

Kĩeleelo: Kũmanyĩsya ala methĩawa nthĩnĩ wa Kamitii ya Ovisi wa Ũvonge g kũũngamĩa wĩa ũla wĩthĩawa ovisinĩ wa ũvonge, na wĩa ũla Ngũsĩ sya Yeova itwaĩĩasya nthĩnĩ wa nthĩ ila syĩ ungu wa ovisi woo wa ũvonge.
Ĩvinda: Myei ĩlĩ.
Ala mathokawʼa: Ovisi Ũla Mũnene wa Ngũsĩ sya Yeova nũthokasya amwe ala me nthĩnĩ wa Kamitii ya Ovisi wa Ũvonge na iveti syoo kũthi sukulu ĩsu, ĩla yĩkĩawa Watchtower Educational Center ĩla yĩ Patterson, New York.

Maũndũ ala Ngũsĩ imanyĩawʼa methĩawa maumĩte va?

Mavinda onthe, Mbivilia nĩyo yĩthĩawa ĩvuku yĩla yĩtũmĩawa mũno kũmanyĩsya Ngũsĩ sya Yeova. Tũĩkĩĩa kana Mbivilia ĩveveewe nĩ Ngai na yĩ na motao ala maseo vyũ matonya kũtethya Mũklĩsto thayũnĩ wake wʼonthe.—2 Timotheo 3:16, 17.

Ve kĩndũ Ngũsĩ sya Yeova iĩvaa nĩ kana imanyĩwʼe?

Aiee. Iiĩvaa kĩndũ nĩ kana imanyĩwʼe. Wĩa wa Ngũsĩ sya Yeova ũtetheeawʼa na mĩvothi ya ngoo ya kwenda.—2 Akolintho 9:7.

a Mbivilia na mavuku ala tũtũmĩaa kwĩmanyĩsya Mbivilia, o vamwe na vitio, ikwatĩkanaa kĩsesenĩ kitũ kya jw.org.

b Vainia nĩ mũtavanyʼa ũminĩte kũvatiswa akatwʼĩka Ngũsĩ na wĩthĩawa e ngelekanyʼo nzeo, ũla wĩthĩawa eyumĩtye kũtũmĩaa ũtalo mũna wa masaa kĩla mwei aitavanyʼa ũvoo mũseo.

c Atumĩa nĩ aũme aimu kĩ-veva ala mamanyĩasya kuma Maandĩkonĩ na maisũvĩa andũ ma Yeova kwa kũmatetheesya na kũmekĩa vinya. Mayĩĩvawa kwondũ wa wĩa ũla matethasya.

d Mũsyaĩĩsya wa mũthyũlũlũko nĩ mũtavanyʼa wa ĩvinda yonthe ũla ũthokeaa ikundi syĩ kĩvathũkanyʼo ila syĩ mũthyũlũlũkonĩ wake kĩla kyumwa. Ekĩaa vinya ana-a-asa na eĩtu-a-asa ala me kĩkundinĩ aitũmĩa maũvoo maumĩte Mbivilianĩ na kũendanyʼa namo ũtavanyʼanĩ.

e Atetheesya ma kĩkundi mekaa maũndũ maingĩ me kĩvathũkanyʼo matetheesye ana-a-asa na eĩtu-a-asa moo. Na nũndũ wa ũũ, nĩmanengae atumĩa ma kĩkundi mwanya mwingangĩ wa kũmanyĩsya, na kũsũvĩa ĩĩthya.

f Ovisi sya ũvonge sya Ngũsĩ sya Yeova syĩtawa Mbetheli. Atavanyʼa ma ĩvinda yonthe ala mathũkũmaa kũu nĩmakwataa mbau wĩa wa Ngũsĩ sya Yeova ũla wĩkawa kĩsionĩ kĩla kĩ ungu wa ovisi wa ũvonge.

g Kamitii ya Ovisi wa Ũvonge yĩthĩawa na aũme atatũ kana aingangĩ aimu kĩ-veva.

Syo Ngũsĩ sya Yeova itethekete ata nũndũ wa maũndũ ala imanyĩawʼa?

“Nũndũ nĩthĩawa na nthoni, neewʼaa ndiemwa nĩ kũneena na andũ ndesĩ ĩũlũ wa Mbivilia. Ĩndĩ maũndũ ala nĩmanyĩĩtye ũmbanonĩ wa katĩkatĩ wa kyumwa, nĩmandetheesye kwĩthĩwa na ũkũmbaũ na kwĩthĩwa mwalimũ mũseango. O na nĩnĩmanyĩĩtye kũneena nesa na ala angĩ kĩkũndinĩ na wĩanĩ.”—Natasha, Amelika.
“Kũthi Sukulu ya Atavanyʼa ma Ũsumbĩ nĩkwandetheeisye kwĩthĩwa na nguma sya Kĩklĩsto ta wendo, wũmĩĩsyo na kwĩka angĩ nesa. Nũndũ wa ũu nĩwʼaa natwʼĩkie Mũklĩsto mũseango, mũnyanya, na mũtũi mũseango. O na ĩngĩ, sukulu ĩsu nĩyamanyĩisye ũndũ ndonya kwĩka ũkunĩkĩli ĩũlũ wa maũndũ ala Mbivilia ĩneeneete na ũndũ ndonya kũelesya Ndeto ya Ngai kwa nzĩa ĩtonya kũkiita ngoo sya andũ.”—Stephen, Nigeria.
“Sukulu ya Atumĩa ma Kĩkundi nĩyandetheeisye kwĩthĩwa na wĩnyivyo ũla wendekaa nĩ kana nĩthĩwe nĩ mũtumĩa mũseango wa kĩkundi. Maũvoo ala maumiwe nĩmakindĩlĩĩile kana naĩ na vata wa kũatĩĩa ngelekanyʼo ya Yesũ.”—Luca, Italy.
“Sukulu ya Ũthũkũmi wa Ũsumbĩ nĩyamanyĩisye vata wa kwĩthĩwa nĩ mũnyanya, kwĩka angĩ nesa, na kwĩthĩwa nĩ mũtanu yĩla ngũea ngewa na angĩ. Nĩneemanyĩisye kana yĩla ngwĩka maũndũ kwondũ wa ala angĩ naĩlĩte kwĩka ũu nũndũ nĩnĩmendete, ĩndĩ ti atĩ nũndũ ũu nĩwʼo naĩlĩte kwĩka.”—Samuel, United Kingdom.
“Sukulu ya Ngileati nĩyatũtetheeisye tweethiana tũtũmĩĩte maũndũ ala tweemanyĩisye kuma Ndetonĩ ya Ngai. (Yakovo 1:22-25) Kwoou nĩtwoonie kũla ithyĩ ene twaaĩlĩte kwĩka moalyũku, na kũla twaaĩlĩte kwaĩlangya ũthũkũminĩ witũ kwa Yeova. O na ĩngĩ, nĩtweemanyĩisye kũsũanĩaa mũno ĩũlũ wa ala angĩ kwĩ ũndũ tũũsũanĩa ĩũlũ witũ, na kũeka wendo ũtũtongoesye maũndũnĩ ala tũũweta na ala tũkwĩka.”—Elnathan na Princess, Philippines.