Ong-Li nĩ ũmwe wa Ngũsĩ sya Yeova kuma nthĩ ya Bulgaria. Ve ĩvinda weemanyĩasya Mbivilia na mũndũ mũka ũmwe mũtwae wĩtawa Zlatka, ĩndĩ mũũme ndeemanyĩasya. Mwĩĩtu-a-asa Ong-Li aĩtye: “Ĩvinda yĩmwe tũyĩmanyĩsya ĩũlũ wa mĩsyĩ, nĩnaeleisye Zlatka kana nĩ ũndũ wa vata mũno kũtavya mũndũ ũla tũtwaanĩte nake na syana sitũ kana nĩtũmendete. Zlatka anzyaisye emakĩe mũno na andavya kana we vaiĩ ĩvinda o na yĩmwe waatavya mũũme kana kelĩtu kake kala ke na myaka kenda kana nũmendete!”

 Nĩvo Zlatka waisye, “Nĩthĩawa nĩyumĩtye vyũ kwĩka kyonthe kĩla ndonya kwondũ woo, ĩndĩ mwa ndyĩsa kũmatavya kana nĩnĩmendete.” Aendeee kwasya atĩĩ, “Nyinyia wakwa ndaandavya kana nũmbendete syũa o na ũmwe, o na ũsũa ndaatavya nyinyia wakwa kana nũmwendete.” Nũndũ wa ũu, Ong-Li nĩwamwonisye Mbivilianĩ ĩvinda Yeova wawetie na wasya mũnene kana nũmwendete Yesũ. (Mathayo 3:17) Kwoou nĩweekĩie Zlatka vinya amũvoye Yeova amũtetheesye ũndũnĩ ũsu, na ayĩyĩkĩĩa mũvango wa kũtata ũndũ ũtonya atavye mũũme na kelĩtu koo kana nũmendete.

 Ong-Li aĩtye: “Ĩtina wa mĩthenya ĩlĩ nĩnakomanie na Zlatka e mũtanu mũno, na ambĩa kĩtumi nũndũ aĩ anamũvoyie Yeova amũtetheesye o ũndũ twawetete. Na ĩndĩ mũũme enũka amũtavya kana nũneemanyĩisye Mbivilianĩ kana nĩ ũndũ wa vata mũno kĩveti kũnenga mũũme wakyo ndaĩa na kũmwenda. Amina kũmũelesya, avindisye vanini na ĩndĩ amũtavya kana nũmwendete mũno! O na kelĩtu kake kenũka, akakumbatĩie na akatavya kana nũkendete. Zlatka ambĩie atĩĩ: ‘Mwa nĩĩwʼa ta naaũwa mũio mũito. Myaka ĩsu yonthe vaiĩ ĩvinda naatavya mũndũ ũndũ ngwĩwʼa, ĩndĩ yu Yeova nũndetheesye kũelesya andũ makwa ũndũ nĩmendete.’

 Ong-Li aendeee kwasya atĩĩ: “Ĩtina wa kyumwa kĩmwe nĩnakomanie na mũũme wa Zlatka na andavya ũũ: ‘Andũ aingĩ measya kana Zlatka ndaĩle kũendeea kwĩmanyĩsya Mbivilia vamwe naku, ĩndĩ ũwʼo nĩ kana maũndũ ala wĩmanyĩĩtye Mbivilianĩ kũvika vau nĩmatethetye mũsyĩ witũ mũno. Matukũ asu mwa twĩthĩĩtwe twĩ atanu mũno na twendanĩte; mũtwaano witũ yu nĩ mũseango.’”