ĨKĨA KĨTHITO WĨTHĨWE MŨTAVANY’A MŨSEO | ŨNDŨ ŨTONYA KŨTANĨA MŨNANGO WĨA WA KŨTAVANY’A

Tetheesya Amanyĩw’a ma Mbivilia Mevathane na Itindo Nthũku

THAŨKA

Nĩ kana amanyĩw’a ma Mbivilia methĩwe anyanya ma Yeova, no nginya manyuve atindany’a moo nesa. (Sav 15:1, 4) Atindany’a aseo makamatetheesya mekae maũndũ ala maĩlĩte.—Nth 13:20; lff ĩsomo ya 48.

Yĩla ũendeee kũtetheesya amanyĩw’a maku maekane na itindo nthũku, ĩthĩwa na tei. No wĩthĩe ti laisi kwoo kũeka kũtindany’a na anyanyae moo ma tene. Kwoou, onany’a kana nũkwendeew’a nĩ amanyĩw’a maku ma Mbivilia o na mĩthenya ĩla mũte kwĩmanyĩsya. No wĩke ũu kwa kũmaandĩkĩa mesengyi, kũmakũnĩa simũ, kana o kũmathokea. O ũndũ maendeee kwĩka maendeeo, no ũmathokye makatũmĩa ĩvinda vamwe na andũ ma Ngai. Weeka ũu, vandũ va kwĩw’a ta mekwasya anyanya, makaendeeaa kũkwata angĩ aingĩ. (Mko 10:29, 30) O naku ũkeethĩawa na ũtanu woona ũndũ athaithi ma Yeova maendeee kwongeleka.

ĨLOELEI VITIO TETHEESYA AMANYĨW’A MAKU MA MBIVILIA MEVATHANE NA ITINDO NTHŨKU, NA MŨISŨNGĨA MAKŨLYO AA MAATĨĨE:

Itindo nthũku nĩ kyaũ?—1Ko 15:33
Rose esũanĩaa yĩla ana-a-asa mekwĩtanĩthya maũndũ methĩawa mailyĩ ata?
Neeta amũtetheesya ata Rose atie kĩtindo kĩthũku na aikwata anyanya aseo?

KAVUKU KA KWĨMANYĨSYA KA ŨMBANO