Kwambĩĩa mwaka ũũ, tũkeethĩawa na ĩvinda yingangĩ ya kwĩyũmbanĩsya ũmbano wa kũlilikana kĩkw’ũ kya Klĩsto. Yĩla ũmbano ũsu weethĩwa katĩ katĩ wa kyumwa, kũikethĩawa na Ũmbano wa Mwĩkalĩle wa Aklĩsto kyumwanĩ kĩu. O na ĩngĩ, ũmbano ũsu weethĩwa wikendi, kũikethĩawa na ũvoo wa andũ onthe na Ĩsomo ya Mũsyaĩĩsya. We no ũvange kũtũmĩaa nesa ĩvinda yĩu yongeleka? O tondũ kwailye ĩvindanĩ ya atũmwa, nĩtwaĩlĩte kwĩkaa mĩvango mĩseo ĩvindanĩ yĩĩ ya mwanya. (Luk 22:7-13; km 3/15 1) Ithyonthe nĩtwaĩle kũmbany’a ngoo sitũ. Ĩndĩ tũtonya kwĩka ũu ata?

• Sũanĩa vata wa kũthi ũmbanonĩ ũsu.—1Ko 11:23-26

• Voya na ũisũanĩa ũndũ ngwatanĩo yaku na Yeova ĩilye.—1Ko 11:27-29; 2Ko 13:5

• Soma na ũivindĩĩsya ũvoo umĩte Mbivilianĩ ũla wĩthĩawa ũeleetye nĩkĩ kĩkw’ũ kya Yesũ nĩ kya vata.—Yoa 3:16; 15:13

Atavany’a amwe nĩmasomaa na makavindĩĩsya ilungu sya kũsoma Mbivilia sya ĩvinda ya kũlilikana kĩkw’ũ kya Yesũ, ila syĩthĩawa nthĩnĩ wa kavuku Kũneenea Maandĩko Kĩla Mũthenya. Angĩ namo nĩmasomaa maandĩko ala monanĩtw’e kyatinĩ kĩĩ kĩ vaa ĩtheo. Na ve o angĩ masomaa ilungu ila syĩthĩawa nthĩnĩ wa ĩkaseti ya Mũsyaĩĩsya ineenee ĩũlũ wa kũlilikana kĩkw’ũ kya Yesũ, na wendo ũla Yeova na Yesũ matwonisye. Nĩtwĩsĩ kana maũndũ ala ũũnyuva kũvindĩĩsya ĩvindanĩ yĩĩ, nĩmeũkũtetheesya ũmũthengeee Yeova na Mwana wake mũnango.